ཀྲུང་གོ་དང་ཨ་རིའི་དབར་གྱི་འཐབ་ཇུས་དང་དཔལ་འབྱོར་ཐད་ཀྱི་སྐད་ཆ་ཤོད་རེས་ཐེངས་གསུམ་པ་དེ་ཟླ་5ཚེས་9ཉིན་དང་ཚེས་10ཉིན་ཨ་རིའི་རྒྱལ་ས་ཝ་ཧྲིང་ཐོན་དུ་བྱ་རྒྱུ་ཡིན་ཞིང་། དེང་གི་འཛམ་གླིང་ཐོག་གི་དར་རྒྱས་ཆེ་བའི་རྒྱལ་ཁབ་ཆེ་ཤོས་དང་འཕེལ་རྒྱས་འགྲོ་བཞིན་པའི་རྒྱལ་ཁབ་ཆེ་ཤོས་ཀྲུང་གོའི་དབར་རིམ་པ་མཐོ་བའི་ལོ་འཁོར་གྱི་སྐད་ཆ་ཤོད་རེས་བྱེད་པ་དེར་འཛམ་གླིང་སྐྱེ་བོ་ཀུན་གྱིས་དོ་སྣང་ཆེན་པོ་བྱེད་ཀྱི་ཡོད།

    ཀྲུང་གོ་དང་ཨ་རིའི་དབར་གྱི་འཐབ་ཇུས་དང་དཔལ་འབྱོར་ཐད་ཀྱི་སྐད་ཆ་ཤོད་རེས་དེ་2009ལོར་ཀྲུང་གོ་དང་ཨ་རི་རྒྱལ་ཁབ་གཉིས་པོའི་དབུ་འཛིན་གྱིས་ཐུན་མོང་ཐོག་བཟོས་གནང་བ་ཞིག་ཡིན་པ་དང་། ལམ་སྲོལ་དེ་ཀྲུང་གོ་དང་ཨ་རིའི་དབར་གྱི་འབྲེལ་བ་གོང་འཕེལ་འགྲོ་རྒྱུར་སྐུལ་འདེད་གཏོང་བའི་གལ་ཆེའི་ལས་སྟེགས་ཤིག་ཏུ་རིམ་བཞིན་འཕེལ་རྒྱས་ཕྱིན་ཡོད། ད་ཐེངས་ཀྱི་ཀྲུང་ཨ་ཕྱོགས་གཉིས་པོའི་ཚོགས་པ་དེ་སྲིད་གཞུང་གི་སྡེ་ཚན་16དང་སྡེ་ཚན་20སོ་སོ་ནས་ཕེབས་པ་ཞིག་ཡིན་པ་དང་ཀྲུང་གོའི་རྒྱལ་སྲིད་སྤྱི་ཁྱབ་ཁང་གི་ཙུང་ལི་གཞོན་པ་ཝང་ཆི་ཧྲན་དང་རྒྱལ་དོན་ཨུ་ཡོན་ཏའེ་པིང་གོ་དང་ཨ་རིའི་རྒྱལ་དོན་བློན་ཆེན་ཁེ་ལིན་ཏུན་དང་ནོར་སྲིད་པུའུ་ཀྲང་ཀའེ་ཐེ་ན་སོ་སོ་རྒྱལ་ཁབ་གཉིས་པོའི་དབུ་འཛིན་གྱི་སྐུ་ཚབ་ཀྱི་མིང་ཐོག་ནས་ཞུགས་རྒྱུ་རེད།

    དེ་གོང་གི་འཐབ་ཇུས་དང་དཔལ་འབྱོར་ཐད་ཀྱི་སྐད་ཆ་ཤོད་རེས་ཐེངས་གཉིས་པ་དང་བསྡུར་ན་སྐད་ཆ་ཤོད་རེས་ཐེངས་གསུམ་པ་འདིར་མི་དེ་བས་མང་བས་དོ་སྣང་བྱེད་ཀྱི་ཡོད། ད་རེས་ཀྱི་སྐད་ཆ་ཤོད་རེས་ཐེངས་གསུམ་པ་དེ་ཀྲུང་གོ་དང་ཨ་རིའི་དབར་གྱི་འབྲེལ་བར་འཕེལ་རྒྱས་ཀྱི་གོ་སྐབས་དང་ལོ་རྒྱུས་ཀྱི་རྒྱབ་ལྗོངས་གསར་པ་འཕྲད་པའི་སྐབས་དང་ཏག་ཏག་འཁེལ་ཡོད། འདི་ལོའི་ཟླ་བ་དང་པོར་ཀྲུའུ་ཞི་ཧུའུ་ཅིན་ཐའོ་ཨ་རིར་འཚམས་འདྲིར་ཕེབས་རིང་ཀྲུང་ཨ་རྒྱལ་ཁབ་གཉིས་པོའི་དབུ་འཛིན་ལ་ཕན་ཚུན་བརྩི་བཀུར་དང་ཕན་ཚུན་གཉིས་ཕན་གྱི་ཀྲུང་གོ་དང་ཨ་རིའི་དབར་གྱི་མཉམ་ལས་རོགས་ཟླའི་འབྲེལ་བ་འཛུགས་སྐྱོང་བྱ་རྒྱུའི་ཐད་ཐུན་མོང་གི་ངོས་འཛིན་བྱུང་བ་དེ་ནི་དུས་སྐབས་གསར་པའི་རྒྱལ་ཁབ་གཉིས་ཀྱི་འབྲེལ་བའི “གནས་ཚད་གསར་པ ”ཞིག་རེད། སྐད་ཆ་ཤོད་རེས་ཐེངས་གསུམ་པས་རྒྱལ་ཁབ་གཉིས་པོའི་དབུ་འཛིན་གྱི་ཐུན་མོང་གི་ངོས་འཛིན་དོན་འཁྱོལ་བྱ་རྒྱུར་ནན་ཏན་དམིགས་ནས་ཕྱོགས་གཉིས་པོའི་འབྲེལ་བ་གོང་འཕེལ་གཏོང་རྒྱུ་དང་འབྲེལ་བའི་ཁྱོན་ཡོངས་ཀྱི་རང་བཞིན་དང་། འཐབ་ཇུས་ཀྱི་རང་བཞིན། ཡུན་རིང་རང་བཞིན་བཅས་ཀྱི་གནད་དོན་ཐད་བསམ་འཆར་ཤོད་རེས་གཏིང་ཟབ་བྱ་རྒྱུ་དང་ཤེས་རྟོགས་བྱ་ཤུགས་ཆེ་རུ་གཏོང་བ་དང་། ཕན་ཚུན་ཡིད་ཆེས་བྱ་ཤུགས་ཆེ་རུ་གཏོང་བ། མཉམ་ལས་ལ་སྐུལ་འདེད་གཏོང་བ་བཅས་ཀྱི་ཐོག་ནས་ཀྲུང་གོ་དང་ཨ་རིའི་དབར་གྱི་མཉམ་ལས་རོགས་ཟླའི་འབྲེལ་བ་བརྟན་པོའི་ངང་གོང་དུ་འཕེལ་རྒྱུར་སྐུལ་འདེད་གཏོང་རྒྱུ་ཡིན་པ་རེད།

    ཀྲུང་གོ་དང་ཨ་རིའི་དབར་གྱི་འཐབ་ཇུས་དང་དཔལ་འབྱོར་ཐད་ཀྱི་སྐད་ཆ་ཤོད་རེས་དེར་འཛམ་གླིང་དང་འབྲེལ་བའི་དོན་སྙིང་ལྡན་ཞིང་། ཨ་རི་དང་ཀྲུང་གོ་ཕྱོགས་གཉིས་པོས་ཐུན་མོང་ཐོག་དོ་ཁུར་བྱེད་པའི་རྒྱལ་སྤྱིའི་གནད་དོན་ཐད་ལྷག་བསམ་ཟོལ་མེད་ཀྱིས་གྲོས་བསྡུར་བྱ་རྒྱུ་ཡིན་པ་མ་ཟད། ཨ་རི་དང་ཀྲུང་གོ་ཕྱོགས་གཉིས་པོས་ནུས་རྒྱུའི་བདེ་འཇགས་དང་། འཕེལ་རྒྱས། འབྲུ་རིགས་རོགས་སྐྱོར་སོགས་ཀྱི་གནད་དོན་ལ་སྔར་ལས་ལྷག་པའི་ཁ་གཏད་ནུས་ལྡན་གཅོག་རྒྱུའི་ཐད་སྐད་ཆ་ཤོད་རེས་བྱ་རྒྱུ་ཡིན་པ་རེད།

    ད་རེས་འཐབ་ཇུས་དང་དཔལ་འབྱོར་ཐད་ཀྱི་སྐད་ཆ་ཤོད་རེས་ནང་གསར་གཏོད་ཆེ་ཤོས་ནི་ཀྲུང་གོ་དང་ཨ་རི་ཕྱོགས་གཉིས་པོའི་མཐོ་རིམ་དམག་དོན་འཐུས་མི་ཞུགས་རྒྱུ་དེ་ཡིན་ཞིང་། ཕན་ཚུན་དབར་སྔར་ལས་རྒྱུས་མངའ་དང་ཡིད་ཆེས་ཆེ་རུ་གཏོང་རྒྱུ་དང་འཐབ་ཇུས་ཀྱི་ནོར་འཛོལ་མི་ཡོང་བ་བྱེད་པའི་བྱ་ཐབས་གསར་པ་དེ་ནི་ཀྲུའུ་ཞི་ཧུའུ་ཅིན་ཐའོ་ཨ་རིར་འཚམས་འདྲི་གནང་རིང་རྒྱལ་ཁབ་གཉིས་པོའི་དབུ་འཛིན་གྱིས་ཕྱོགས་གཉིས་པོའི་དམག་དོན་འབྲེལ་བ་སྐྱོན་བྲལ་དང་། བརྟན་པོ། བློས་འགེལ་བཅས་ཀྱི་ཕྱོགས་སུ་འཕེལ་རྒྱས་གཏོང་རྒྱུའི་ཐད་ངོས་འཛིན་གཅིག་མཐུན་བྱུང་བའི་མཚོན་ཚུལ་ཞིབ་ཕྲ་ཞིག་རེད།

    ཀྲུང་གོ་དང་ཨ་རིའི་དབར་གྱི་མཉམ་ལས་རོགས་ཟླའི་འབྲེལ་བའི་ནང་དོན་གལ་ཆེན་ཞིག་ནི་ཁྱོན་ཡོངས་ནས་གཉིས་ཕན་ཡོང་བ་བྱེད་པའི་དཔལ་འབྱོར་རོགས་ཟླའི་འབྲེལ་བ་ཡིན་ཞིང་། ཀྲུང་གོ་དང་ཨ་རིའི་དབར་གྱི་འཐབ་ཇུས་དང་དཔལ་འབྱོར་ཐད་ཀྱི་སྐད་ཆ་ཤོད་རེས་བྱེད་པ་ནི་ཀྲུང་གོ་དང་ཨ་རིའི་དབར་གྱི་དཔལ་འབྱོར་རོགས་ཟླའི་མི་མངོན་པའི་ནུས་ཤུགས་སྔར་ལས་འདོན་སྤེལ་བྱ་རྒྱུ་དེ་རེད། ཀྲུང་གོ་དང་ཨ་རིའི་དབར་གྱི་དཔལ་འབྱོར་འབྲེལ་བ་དེ་ཁ་ཕྱོགས་སྒྱུར་མཚམས་གསར་པའི་ཐོག་གནས་ཡོད་པས་རྒྱལ་ཁབ་ཕན་ཚུན་གཉིས་པོ་ཚོང་དོན་རོགས་ཟླ་ཆེ་ཤོས་གཉིས་པར་གྱུར་ཁར་ཀྲུང་གོ་ནི་ལོ་10བསྟུད་མར་ཨ་རིའི་དཔལ་འབྱོར་འཕར་མགྱོགས་སུ་གཏོང་མཁན་ཕྱིར་གཏོང་ཁྲོམ་ར་གཙོ་བོར་ཆགས་པ་དང་། ཨ་རི་ནི་ཀྲུང་གོར་མ་དངུལ་འཇོག་མཁན་ཕྱི་རྒྱལ་གྱི་རྒྱལ་ཁབ་ཆེ་ཤོས་ཡིན། ཀྲུང་གོས་འདས་ཟིན་པའི་ལོ་གཉིས་ནང་ཨ་རིར་ཐད་ཀར་མ་རྩ་འཇོག་ཚད་མང་དུ་བཏང་ཡོད།

    དཔལ་འབྱོར་འཕེལ་རྒྱས་ཀྱི་དུས་རིམ་དང་དེ་བཞིན་ཕྱོགས་གཉིས་ཀར་བྱུང་བའི་རྒྱལ་སྤྱིའི་དངུལ་རྩའི་ཉམས་ཉེན་ཁྲོད་བསྐྱར་གསོ་ཡོང་ཚད་མི་འདྲ་བའི་དབང་གིས་དཔལ་འབྱོར་ཁྱབ་ཁོངས་ཐད་ཀྲུང་ཨ་སོ་སོར་དོ་ཁུར་བྱ་གནད་རེ་ཡོད། ཨ་རིའི་དཔལ་འབྱོར་བསྐྱར་གསོ་བྱེད་སྒང་དུ་གནས་ཀྱང་ལས་ཀ་ཤོར་ཚད་སྔར་བཞིན་མང་སྟབས་འཛད་སྤྱོད་ལ་བརྟེན་ནས་དཔལ་འབྱོར་འཕར་མགྱོགས་སུ་གཏོང་ཐབས་དེས་ཨ་རིའི་ཁེ་ལས་ལ་ཀྲུང་གོའི་ཁྲོམ་རའི་ནང་ནས་ཚོང་གི་གོ་སྐབས་སྔར་ལས་ལྷག་པ་བཙལ་ཏེ་ལས་ཞུགས་སྔར་ལས་མང་བ་ཞིག་ཐོབ་རྒྱུའི་འདུན་པ་ཆེན་པོ་བཅང་གི་ཡོད། ཀྲུང་གོར་ལོ་30ལྷག་ཙམ་རིང་འཕེལ་རྒྱས་མྱུར་པོ་བྱུང་རྗེས་དཔལ་འབྱོར་འཕར་ཚད་སྒྱུར་མགྱོགས་སུ་གཏོང་རྒྱུའི་ཐད་འབད་བརྩོན་གྱིས་ཨ་རིར་ཁྲོམ་ར་མུ་མཐུད་རྒྱ་བསྐྱེད་གཏོང་རྒྱུ་དང་འབྲེལ་ཨ་རིས་ཀྲུང་གོར་མཐོ་གསར་ལག་རྩལ་ཕྱིར་གཏོང་གི་ཚད་གཞི་མེད་པ་བཟོ་རྒྱུ་དང་ཀྲུང་གོའི་ཁྲོམ་རའི་དཔལ་འབྱོར་གྱི་གནས་བབ་ཁས་ལེན་ཁར་ཀྲུང་གོའི་ཁེ་ལས་ལ་ཨ་རིར་མ་རྩ་འཇོག་པའི་གོ་སྐབས་མང་དུ་གཏོང་རྒྱུ་སོགས་ཀྱི་རེ་བ་བྱེད་ཀྱི་ཡོད།

    ཀྲུང་གོ་དང་ཨ་རིའི་འབྲེལ་བ་བཟང་པོ་ཡོང་བ་བྱ་རྒྱུ་ནི་ཀྲུང་ཨ་རྒྱལ་ཁབ་གཉིས་ཀྱི་ཐུན་མོང་ཁེ་ཕན་དང་འཚམས་ལ་རྒྱལ་སྤྱིའི་སྤྱི་ཚོགས་ཀྱི་ཐུན་མོང་རེ་བའང་ཡིན། འདི་ག་ཚགས་པར་གྱི་གསར་འགོད་པས་གླེང་བརྗོད་བྱ་གཞི་འདིར་དམིགས་ནས་འབྲེལ་ཡོད་མི་སྣར་བཅར་འདྲི་བྱེད་རིང་ཀྲུངགོ་དང་ཨ་རིའི་འཐབ་ཇུས་དང་དཔལ་འབྱོར་ཐད་ཀྱི་སྐད་ཆ་ཤོད་རེས་ཐེངས་གསུམ་པ་དེས་ཀྲུང་གོ་དང་ཨ་རིའི་དབར་གྱི་མཉམ་ལས་རོགས་ཟླའི་འབྲེལ་བ་བརྟན་པོའི་ངང་གོང་དུ་འཕེལ་རྒྱུར་སྐུལ་འདེད་གཏོང་ཐུབ་པའི་རེ་བ་བྱེད་པ་དེ་ནི་ཕྱོགས་གཉིས་ཀའི་ཐུན་མོང་གི་འདུན་པ་ཡིན་པའི་མྱོང་ཚོར་ཟབ་མོ་བྱུང་།