ཟླ་5ཚེས་3ཉིན་ཝེ་ཐེ་ནམ་གྱི་རྒྱལ་ས་ཧ་ནོ་དབྱིར་འཚོགས་པའི་དབུས་ཤར་མནའ་འབྲེལ་དང་ཀྲུང་རི་ཧན་གསུམ (10+3)གྱི་ནོར་སྲིད་དབུ་འཛིན་གཞོན་པའི་ཚོགས་འདུའི་ཐོག་10+3གྱི་སྤྱི་ཁོག་དཔལ་འབྱོར་ཞིབ་འཇུག་གཞུང་དོན་ཁང་(བསྡུས་མིང་ལ་AMROབརྗོད )གི་ཀྲུའུ་རེན་གྱི་འོས་མི་དངོས་སུ་ཁྱབ་བསྒྲགས་བྱས་ཤིང་། ཐོག་མའི་ལོ་གསུམ་གྱི་ལས་འགན་འཁུར་ཡུན་ནང་ཀྲུང་གོས་འོས་སྦྱོར་བྱས་པའི་འོས་མི་ཝུའེ་པེན་ཧྭ་ཡིས་ལས་འགན་ལོ་གཅིག་འཁུར་རྒྱུ་དང་རི་པིན་གྱིས་འོས་སྦྱོར་བྱས་པའི་འོས་མི་ཀེང་པེན་ཡང་གིས་ལོ་གཉིས་པ་དང་གསུམ་པའི་འགན་འཁུར་རྒྱུ་ཡིན་པ་རེད། མི་དོན་བསྐོ་གཞག་ཁྱབ་བསྒྲགས་བྱས་རྗེས་ཝུའེ་པེན་ཧྭ་ཡིས་འདི་ག་ཚགས་པར་གྱི་གསར་འགོད་པའི་བཅར་འདྲི་དང་ལེན་བྱས་ཤིང་། ཁོང་གིས་AMROབཙུགས་པ་དེ་ཐོག་ནས་10+3གྱིས་ས་ཁོངས་ཀྱི་ནོར་སྲིད་མཉམ་ལས་གཏིང་ཟབ་ཏུ་བཏང་བར་གལ་ཆེའི་འཕེལ་རྒྱས་གསར་པ་བྱུང་བ་མཚོན་ཡོད་ཅེས་བཤད།

    ཝུའེ་པེན་ཧྭ་ཡིས་1997ལོ་ནས་1998ལོ་བར་གྱི་ཨེ་ཤེ་ཡའི་དངུལ་རྩའི་ཉམས་ཉེན་ལས་ཨེ་ཤེ་ཡའི་རྒྱལ་ཁབ་ལ་ས་ཁོངས་ཀྱི་ཉམས་ཉེན་སེལ་རོགས་བྱེད་པའི་ལམ་སྲོལ་འཛུགས་རྒྱུའི་དགོས་ངེས་ཀྱི་རང་བཞིན་ལ་ངོས་འཛིན་གཏིང་ཟབ་བྱུང་ཡོད། དམིགས་ཚད་དེའི་ཕྱོགས་སུ་བསྐྱོད་རྒྱུའི་གོམ་པ་དང་པོ་ཡིན་པའི་ཆ་ནས་དབུས་ཤར་དང་ཀྲུང་རི་ཧན་གསུམ་གྱིས་ཕྱོགས་གཉིས་པོའི་དངུལ་ལོར་བརྗེ་རེས་ཀྱི་ལམ་སྲོལ་བཙུགས་པ་དེ་ནི་ཆིང་མན་གྲོས་འགོ་ཡིན་མོད། འོན་ཀྱང་གྲོས་འགོ་དེར་ཕྱོགས་གཉིས་པོས་གྲོས་མཐུན་འཇོག་དགོས་པ་དང་ལག་བསྟར་གྱི་གོ་རིམ་ཡང་ཪྙོག་དྲ་ཆེ་བ་དང་ཕན་འབྲས་ཐོན་ཚད་དམའ་པོ་ཡིན་པར་བརྟེན་ཀྲུང་གོ་སྲིད་གཞུང་གིས་2003ལོར་ཆིང་མའེ་ཡི་གྲོས་འགོ་སྣ་མང་ཅན་དུ་འགྱུར་རྒྱུར་སྐུལ་འདེད་གཏོང་བ་དང་10+3གྱི་ཁོངས་མིས་མཉམ་དུ་ཞུགས་པའི་ཕྱོགས་མང་པོའི་དངུལ་ལོར་བརྗེ་རེས་ཀྱི་ལམ་སྲོལ་འཛུགས་དགོས་པའི་གྲོས་འགོ་བཏོན་ཡོད། གྲོས་འགོ་དེར་ཕྱོགས་ཁག་གི་རྒྱབ་སྐྱོར་ཆེན་པོ་ཐོབ་ནས་2009ལོར་10+3ཕྱོགས་ཁག་གིས་ཆིང་མའེ་ཡི་གྲོས་འགོ་སྣ་མང་ཅན་དུ་འགྱུར་རྒྱུའི་གྲོས་མཐུན་ལ་གྲོས་འཆམ་བྱུང་ནས་རང་གིས་རང་བདག་གཉེར་བྱེད་པའི་གསོག་མཛོད་ལམ་སྲོལ་བཙུགས་ཤིང་། དེའང་ཨེ་ཤེ་ཡ་ཤར་མའི་ས་ཁོངས་ཀྱི་ཕྱི་དངུལ་གསོག་འཇོག་ཐེབས་རྩ་ཡིན་པ་དང་དེའི་དམིགས་ཡུལ་ནི་དངུལ་རྩའི་ཉམས་ཉེན་གྱི་རྡབ་རྡེག་བྱུང་བའི་ཁོངས་མིའི་རྒྱལ་ཁབ་ལ་དུས་ཐུང་གི་མ་དངུལ་རྒྱབ་སྐྱོར་བྱས་ནས་དཀའ་ངལ་ལས་སྒྲོལ་རོགས་བྱ་རྒྱུ་དེ་རེད། ཁོངས་མིའི་རྒྱལ་ཁབ་བཅུ་གསུམ་གྱིས་ཨ་སྒོར་དུང་ཕྱུར་1200འདོན་རྒྱུའི་ཁས་ལེན་བྱས་པ་དེའི་ནང་ཀྲུང་གོ་དང་རི་པིན་སོ་སོས་ཨ་སྒོར་དུང་ཕྱུར་384(ཀྲུང་གོའི་མ་དངུལ་ནང་ཤང་ཀང་དམིགས་བསལ་སྲིད་འཛིན་ཁུལ་གྱིས་བཏོན་པའི་ཨ་སྒོར་དུང་ཕྱུར་42ཚུད་ཡོད )དང་ཧན་གོས་ཨ་སྒོར་དུང་ཕྱུར་192བཏོན་པ་རྣམས་ཀྱིས་གསོག་མཛོད་སྤྱི་དངུལ་གྱི་32%དང་། 32% 16%བཅས་སོ་སོར་བཟུང་བར་ཁྱོན་80%ཟིན་ཡོད། དབུས་ཤར་མནའ་འབྲེལ་རྒྱལ་ཁབ་བཅུས་ཨ་སྒོར་དུང་ཕྱུར་240བཏོན་པ་དེས་20%བཟུང་ཡོད། གསོག་མཛོད་ནང་ཀྲུང་གོ་དང་རི་པིན་གྱིས་མ་དངུལ་གཅིག་མཚུངས་བཞག་པ་དེས་ཕྱོགས་གཉིས་པོར་ལམ་སྲོལ་དེའི་ནང་མཉམ་དུ་འགག་རྩའི་ནུས་པ་འདོན་རྒྱུའི་རྨང་གཞི་བཏིང་ཡོད་ཅེས་བཤད།

    AMROགཞུང་དོན་ཁང་དེ་སིང་ཀ་ཕོར་བཙུགས་ཡོད་ཅིང་། དེའི་དམིགས་ཡུལ་ནི “རང་ཚུགས་དང་ཨེ་ཤེ་ཡའི་ཁྱད་ཆོས་ལྡན་པའི་སྤྱི་ཁོག་དཔལ་འབྱོར་ལ་ལྟ་ཞིབ་དང་ཉམས་ཉེན་སེལ་རོགས་ཀྱི་ལམ་སྲོལ་བཙུགས ”ནས་ས་ཁོངས་དཔལ་འབྱོར་ལ་ལྟ་ཞིབ་དང་དབྱེ་ཞིབ་བྱ་རྒྱུར་སྐུལ་འདེད་ཀྱིས་ཆིང་མའེ་ཡི་གྲོས་འགོ་སྣ་མང་ཅན་དུ་འགྱུར་རྒྱུའི་གྲོས་མཐུན་ལག་ལེན་བསྟར་རྒྱུར་རྒྱབ་སྐྱོར་བྱ་རྒྱུ་དེ་རེད།

    ཝུའེ་པེན་ཧྭ་ཡིས་ད་རེས་ཨ་རི་ནས་བྱུང་བའི་རྒྱལ་སྤྱིའི་དངུལ་རྩའི་ཉམས་ཉེན་ཁྲོད་འབྲེལ་ཡོད་རྒྱལ་སྤྱིའི་སྒྲིག་གཞིས་འདོན་དགོས་པའི་སྔོན་ཚུད་ཀྱི་ཉེན་བརྡ་གཏོང་བའི་ནུས་པ་འདོན་ཐུབ་མེད་པ་དེས་10+3ལ་ས་ཁོངས་ཀྱི་སྤྱི་ཁོག་དཔལ་འབྱོར་ལ་ལྟ་ཞིབ་བྱ་རྒྱུར་ཤུགས་སྣོན་རྒྱག་རྒྱུའི་དགོས་ངེས་རང་བཞིན་ལ་ངོས་འཛིན་སྔར་བས་ཟབ་ཏུ་ཕྱིན་ཡོད་ཅེས་བཤད། ངོ་སྤྲོད་བྱས་པར་གཞིགས་ན། AMROལ་གཙོ་བོ་ཕྱོགས་གཉིས་ཐད་ཀྱི་ལས་འགན་ཡོད་པ་སྟེ། གཅིག་ནི་ཉམས་ཉེན་མ་ཐོན་པའི་རྒྱུན་གཏན་གྱི་སྐབས་སུ་ཁོངས་མིའི་རྒྱལ་ཁབ་13གྱི་སྤྱི་ཁོག་དཔལ་འབྱོར་ལ་ལྟ་ཞིབ་བྱེད་སྐབས་གལ་ཏེ་གནད་དོན་ཡོད་པ་ཤེས་འཕྲལ་སྲིད་ཇུས་ཀྱི་གྲོས་འགོ་གང་སྔ་སྔ་བཏོན་ནས་འབྲེལ་ཡོད་སྲིད་གཞུང་ལ་དཔྱད་གཞི་བྱ་རྒྱུར་སྤྲོད་དགོས་པ་དང་། གཉིས་ནི་ཆིང་མའེ་ཡི་གྲོས་འགོ་སྣ་མང་ཅན་དུ་འགྱུར་རྒྱུའི་གྲོས་མཐུན་ལག་ལེན་བསྟར་མཁན་སྒྲིག་གཞི་ཡིན་པའི་ཆ་ནས་AMROཡིས་གནས་ཚུལ་གང་འདྲ་ཞིག་གི་འོག་ཏུ་ཁོངས་མིའི་རྒྱལ་ཁབ་ཅིག་གིས་གསོག་དངུལ་སྤྱོད་ཆོག་པར་ཞིབ་འཇུག་བྱ་རྒྱུ་མ་ཟད། མ་དངུལ་ཇི་ལྟར་སྤྱོད་རྒྱུར་གྲོས་འགོ་འདོན་རྒྱུ་དང་འབྲེལ་མ་དངུལ་སྤྱད་པའི་ཕན་འབྲས་ལ་དཔྱད་དཔོག་བྱ་རྒྱུའི་འགན་འཁུར་དགོས་པ་དེ་རེད། AMROཡིས་མ་དངུལ་སྤྱོད་མཁན་རྒྱལ་ཁབ་ཀྱི་འདོད་འདུན་ལ་བརྩི་བཀུར་གང་ལེགས་བྱ་རྒྱུ་དང་མ་དངུལ་གྱི་བདེ་འཇགས་ཐད་འཛིན་པའི་མ་རྩ་འདོན་མཁན་རྒྱལ་ཁབ་ཀྱི་སེམས་ཁུར་ལ་སྤྱི་ཡོངས་ནས་བསམ་གཞིགས་བྱ་རྒྱུ་ཡིན་པ་རེད། ཆིང་མའེ་ཡི་གྲོས་འགོ་སྣ་མང་ཅན་དུ་འགྱུར་རྒྱུའི་གྲོས་འགོ་གཞིར་བཟུང་AMROཡིས་ཁོངས་མིའི་རྒྱལ་ཁབ་ལ་སྤྱིའི་དངུལ་བུན་གཡར་ཚད་ཀྱི་20%ནང་ཚུན་གྱི་མ་དངུལ་རྒྱབ་སྐྱོར་བྱེད་སྐབས་ཆ་རྐྱེན་གང་ཡང་མི་བརྗོད་པ་དང་སྤྱིའི་དངུལ་བུན་གཡར་ཚད་20%ཡན་གྱི་གྲས་དེ་རྒྱལ་སྤྱིའི་དངུལ་ལོར་ཐེབས་རྩ་རྩ་འཛུགས་ཀྱི་དངུལ་གཡར་ལམ་སྲོལ་དང་འབྲེལ་མཐུད་བྱེད་དགོས་ཀྱི་ཡོད་པ་རེད།