མི་དམངས་ཉིན་རེའི་ཚགས་པར་ཁང་དུ་ཁེ་རོ་ནས་ཟླ་5ཚེས་5ཉིན་གློག་འཕྲིན་འབྱོར་གསལ། གོང་ཚེས་ཉིན་ཡེ་མེན་རྒྱལ་སྲུང་པུས་གནས་ཚུལ་ཡོངས་བསྒྲགས་བྱས་པའི་ནང “རྟེན་གཞི ”རྩ་འཛུགས་ཨ་རབ་ཕྱེད་གླིང་གི་ཡན་ལག་འགོ་པ་གཉིས་ཏེ་མུའུ་ས་དབྱི་ཏེ ·མུའུ་པ་ལ་ཁེ་དང་དེའི་གཅུང་པོ་ཨ་པུའུ་ཏུའུ་ལ ·མུའུ་པ་ལ་ཁེ་གཉིས་པོ་ཉིན་དེའི་ཞོགས་པ་ཡེ་མེན་ལྷོ་རྒྱུད་ཀྱི་ཧྲེ་པུའུ་ཨོ་ཞིང་ཆེན་དུ་བསད་པ་རེད། ཁོ་པ་གཉིས་ཀྱིས་དེ་སྔོན་ཡེ་མེན་སྲིད་གཞུང་ལ་དམིགས་ཏེ་གཏུམ་སྤྱོད་ཀྱི་འཇབ་རྒོལ་ཐེངས་མང་བྱས་པའི་དབང་གིས་ཡེ་མེན་བདེ་འཇགས་སྡེ་ཚན་གྱི་འགུགས་བཟུང་ཉེས་ཅན་གྱི་གཏེ་པོར་གྱུར་པ་རེད་ཅེས་བརྗོད་ཡོད།

    མཐོང་མཁན་ཚོས་བརྗོད་པར་གཞིགས་ན། མི་དེ་གཉིས་སྡོད་སའི་རླངས་འཁོར་ལ་མི་མེད་གནམ་གྲུས་འཕེན་པའི་འཕུར་མདེལ་ཕོག་སོང་ཞེས་དང་ཧྥ་རན་སེ་གསར་འགྱུར་ཁང་ནས་གནས་ཚུལ་སྤེལ་བའི་ནང་ཨ་དམག་གི་མི་མེད་གནམ་གྲུས་ཉིན་དེར་སྐྱེས་ཁོངས་སོ་ཏི་ནས་ཡིན་པའི “རྟེན་གཞིའི ”རྩ་འཛུགས་ཀྱི་འགོ་ཁྲིད་པ་གཅིག་ལ་མཁའ་རྒོལ་བྱེད་སྐབས་རྒྱག་ནོར་ཤོར་ནས “རྟེན་གཞིའི ”རྩ་འཛུགས་ཀྱི་ཁོངས་མི་དེ་གཉིས་ལ་ཕོག་པ་རེད་ཅེས་བཤད་མོད། འོན་ཀྱང་གནས་ཚུལ་དེ་ཡེ་མེན་དང་ཨ་རིའི་གཞུང་ཕྱོགས་ཀྱི་བདེན་དཔང་ཐོབ་མེད་པ་རེད།

    ཡེ་མེན་ཨ་པི་ཡང་ཞིང་ཆེན་གྱི་གྲོང་ཁྱེར་གཙོ་བོ་ཅིན་ཅི་པའར་གྲོང་ཁྱེར་དུ་ཚེས་4ཉིན “རྟེན་གཞིའི ”རྩ་འཛུགས་ཀྱི་དྲག་ཆས་པ་འདྲ་བ་ཁག་གཅིག་གིས་བདེ་འཇགས་སྐོར་སྐྱོད་རླངས་འཁོར་ལ་འཇབ་རྒོལ་བྱས་པས་ཉེན་རྟོག་པ་9ཤི་བ་དང་ཉེན་རྟོག་པ་2རྨས་པ་རེད།