ཟླ་5ཚེས་4ཉིན་ཕ་ལེ་སི་ཐན་མི་རིགས་བཅིངས་འགྲོལ་ལས་འགུལ (ཕ་ཐ་ཧོ )དང་ཕ་ལེ་སི་ཐན་གྱི་དབྱི་སེ་ལམ་འགོག་རྒོལ་ལས་འགུལ (ཧ་མ་སི )ཚུད་པའི་ཕ་ལེ་སི་ཐན་གྱི་ཆབ་སྲིད་ཤོག་ཁག་མང་པོའི་འཐུས་མིས་ཁེ་རོར་ཚོགས་འདུ་འཚོགས་ཏེ་ཕ་ལེ་སི་ཐན་གྱི་མཐུན་འགྲིག་གྲོས་མཐུན་ལ་དངོས་སུ་མིང་རྟགས་བཀོད་པར་རྟེན་འབྲེལ་ཞུས་པ་རེད། ཕ་ལེ་སི་ཐན་མི་རིགས་དབང་ཆའི་ལས་ཁུངས་ཀྱི་ཀྲུའུ་ཞི་ཨ་པ་སི་དང་ཧ་མ་སི་ཆབ་སྲིད་ཅུས་ཀྱི་འགོ་ཁྲིད་པ་མའེ་ཧྲ་ཨ་ལ་རྟེན་འབྲེལ་མཛད་སྒོར་ཞུགས་པ་དང་ཨ་པ་སིས་ཚོགས་འདུའི་ཐོག་གསུང་བཤད་གནང་ནས་ང་ཚོའི་ནང་ཁུལ་གྱི་ཁ་ཕྲལ་གྱི་མུན་ནག་ཆ་དེ་ནམ་ཡང་མེད་པར་གྱུར་ཡོད་ཅེས་གསུངས་པ་རེད།
དེ་གོང་གི་ཉིན་ཞིག་ཕ་ཐ་ཧོ་དང་ཧ་མ་སི་ཚུད་པའི་ཕ་ལེ་སི་ཐན་གྱི་ཆབ་སྲིད་ཤོག་ཁག་གི་འཐུས་མི་བཅུ་གྲངས་ཁ་ཤས་ཀྱིས་ཁེ་རོར་ནང་ཁུལ་མཐུན་འགྲིག་གི་གྲོས་མཐུན་ལ་དངོས་སུ་མིང་རྟགས་བཀོད་པ་རེད། ཨ་རབ་མནའ་འབྲེལ་གྱི་དྲུང་ཆེ་མོ་ཧྲ་དང་། ཨེ་ཅིབ་ཀྱི་ཕྱི་འབྲེལ་དཔོན་ཨ་ལ་པི། མཉམ་འབྲེལ་རྒྱལ་ཚོགས་ཀྱི་དྲུང་ཆེའི་དམིགས་བསལ་ཕོ་ཉ་བཅས་དང་དེ་བཞིན་ཨ་རབ་རྒྱལ་ཁབ་མང་པོའི་འཐུས་མི་ད་རེས་ཀྱི་ཚོགས་འདུར་ཞུགས་ཡོད། གྲོས་མཐུན་གྱི་ནང་དོན་གྲས་སུ་ཕ་ལེ་སི་ཐན་གྱིས་རང་བཙན་མི་སྣ་ལས་གྲུབ་པའི་བར་བརྒལ་སྲིད་གཞུང་བཙུགས་ཏེ་འདེམས་བསྐོ་ཆེན་པོའི་གྲ་སྒྲིག་དང་ཅ་ཧྲ་བསྐྱར་སྐྲུན་བྱ་རྒྱུའི་འགན་འཁུར་རྒྱུ་དང་། གྲོས་མཐུན་ལ་མིང་རྟགས་བཀོད་ནས་ལོ་གཅིག་སོང་རྗེས་ཕ་ལེ་སི་ཐན་མི་རིགས་དབང་ཆའི་ལས་ཁུངས་ཀྱི་ཀྲུའུ་ཞི་དང་དབྱི་ཧུའེ་གྲོས་ཚོགས་འདེམས་བསྐོ་བྱ་རྒྱུ་དང་ཆེས་མཐོའི་བདེ་འཇགས་ཨུ་ཡོན་ལྷན་ཁང་ཞིག་བཙུགས་ཏེ་བདེ་འཇགས་ལས་དོན་མཐུན་སྦྱོར་བྱ་རྒྱུར་མོས་མཐུན་བྱས་པ་བཅས་ཚུད་ཡོད།
དེའི་རིང་གླེང་ཕྱོགས་དང་སྨྱན་སྦྱོར་ཚན་པས་ཕ་ལེ་སི་ཐན་ནང་ཁུལ་དུ་གྲོས་མཐུན་ལ་མིང་རྟགས་བཀོད་པ་དེ་ཕ་ལེ་སི་ཐན་རྒྱལ་ཁབ་འཛུགས་རྒྱུའི་བྱ་གཞག་ཆེན་པོར་ཕན་པ་ཡོད་པ་རྒྱ་ཁྱབ་ཏུ་ངོས་འཛིན་བྱས་ཡོད་ལ་གྲོས་མཐུན་དེའང་རྒྱལ་ཁབ་འཛུགས་རྒྱུའི་བྱ་གཞག་ཆེན་པོའི་གལ་ཆེའི་བྱ་ཐབས་ཤིག་ཡིན་ཞེས་ཤོད་ཆོག ཕ་ལེ་སི་ཐན་ནང་ཁུལ་དུ་ཞི་བའི་མཐུན་འགྲིག་གྲོས་དོན་ལ་མིང་རྟགས་བཀོད་པ་དང་ཆབས་ཅིག་སྔོན་རྩིས་བསྡོམས་འབོར་ཨ་སྒོར་དུང་ཕྱུར་50ཟིན་པའི་རྨང་གཞིའི་འཛུགས་སྐྲུན་འཆར་གཞི་ཞིག་ཉེ་དུས་ལག་ལེན་བསྟར་འགོ་ཚུགས་རྒྱུ་རེད། མིག་སྔར་འགྲིམ་འགྲུལ་དང་། བཟོ་སྐྲུན། འཕྲིན་གཏོང་། གློག་རྡུལ་སོགས་ཁྱབ་ཁོངས་ནས་ཡོང་བའི་རྒྱལ་ཁབ་ལས་བརྒལ་བའི་ཀུང་སི་བཅུ་གྲངས་ཁ་ཤས་ཀྱིས་ཕ་ལེ་སི་ཐན་ཕྱོགས་དང་འབྲེལ་བ་བྱེད་འགོ་བཙུགས་ཏེ་ཅོ་ཏན་གཙང་པོའི་ནུབ་འགྲམ་དང་ཅ་ཧྲ་ས་རྒྱུད་ཀྱི་རྨང་གཞིའི་འཛུགས་སྐྲུན་རྣམ་གྲངས་འགན་གཙང་ལེན་རྒྱུའི་རེ་བ་བྱེད་ཀྱི་ཡོད་པ་རེད།
ཚེས་3ཉིན་ཕ་རན་སེའི་ཙུང་ཐུང་ཧྲ་ཁེ་ཆིས་ཕ་རན་སེས་ཕ་ལེ་སི་ཐན་དང་དབྱི་སི་རལ་གཉིས་ཀྱིས་ཟླ་9པར་མཉམ་འབྲེལ་རྒྱལ་ཚོགས་ཀྱི་ཚོགས་ཆེན་མ་འཚོག་གོང་ཞི་བའི་གྲོས་མོལ་བསྐྱར་གསོ་བྱ་རྒྱུའི་རེ་བ་ཡོད། དེ་ལྟར་མ་བྱས་ཚེ་ཕ་རན་སེས་ཕ་ལེ་སི་ཐན་རྒྱལ་ཁབ་ཁས་ལེན་རྒྱུའི་འགན་འཁུར་རྒྱུ་ཡིན་ཞེས་དང་ད་དུང་ཁོང་གིས་ཕྱི་འབྲེལ་གྱི་ཐབས་ལམ་བརྒྱུད་འཛམ་གླིང་དབུས་ཤར་གྱི་ཞི་བདེའི་འཕེལ་རིམ་ལ་སྐུལ་འདེད་གཏོང་བར་ཨ་རི་ཕུད་པའི་སྟོབས་ཤུགས་གཞན་དག་ཡོད་དགོས་པར་བརྟེན་གླིང་ཆེན་ཡོ་རོབ་ཆབ་སྲིད་ཐད་ནས་དེའི་ནང་དེ་བས་མང་བ་ཞུགས་དགོས་ཞེས་གསུངས་པ་དང་ཕ་རན་སེའི་སྨྱན་སྦྱོར་ཚན་པས་ཧྲ་ཁེ་་ཆིའི་རྣམ་འགྱུར་ནི་ཨ་རིའི་ཙུང་ཐུང་ཨའོ་པ་མས་ན་ནིང་ཟླ་9པར་མཉམ་འབྲེལ་རྒྱལ་ཚོགས་ཀྱི་ཚོགས་ཆེན་ཐོག་བྱས་པའི་གཏམ་བཤད་ལ་གཞོགས་འདེགས་བྱས་པ་ཞིག་ཡིན་པའི་ངོས་འཛིན་བྱེད་ཀྱི་ཡོད། སྐབས་དེར་ཨའོ་པ་མས་གསུང་བཤད་གནང་རིང་ང་ཚོས་ཕྱི་ལོ (2011ལོ )མིང་རྟགས་འགོད་རྒྱུ་ཡིན་པའི་གྲོས་ཆོད་དེ་ལས་ཁོངས་མིའི་རྒྱལ་ཁབ་གསར་པ་ཞིག་མཉམ་འབྲེལ་རྒྱལ་ཚོགས་ནང་ཞུགས་ཐུབ་རྒྱུ་ཡིན་པ་སྟེ་བདག་དབང་དང་རང་བཙན་གྱི་ཕ་ལེ་སི་ཐན་རྒྱལ་ཁབ་དེ་དབྱི་སི་རལ་དང་ཞི་བའི་ཐོག་མཉམ་གནས་ཡོང་རྒྱུ་དེ་ཡིན་ཞེས་གསུངས་པ་རེད།
ཨ་རིའི་རྒྱལ་སྲིད་སྤྱི་ཁྱབ་ཁང་གི་མགྲིན་ཚབ་པ་མ་ཁེ ·ཐུའོ་ན་ཡིས་གལ་སྲིད་ཕ་ལེ་སི་ཐན་དུ་སྲིད་གཞུང་གསར་པ་བཙུགས་ན་ཨ་རིས་སྲིད་གཞུང་གི་གྲུབ་ཆར་གཞིགས་ཏེ་ཚོད་སྐོར་བྱ་རྒྱུ་ཡིན་ཞེས་གསུངས་པ་དང་ཁོང་གིས་གལ་སྲིད་ཆབ་སྲིད་ཀྱི་འཕེལ་རིམ་ནང་ཧ་མ་སིས་ནུས་པ་འདོན་དགོས་ན་ངེས་པར་དུ་ཕྱོགས་བཞིའི་གྲོས་མོལ་གྱི་རྩ་དོན་དང་ལེན་བྱས་ཏེ་གཏུམ་སྤྱོད་བྱེད་སྒོ་དང་འཇིགས་སྐུལ་རིང་ལུགས་དོར་ནས་དབྱི་སི་རལ་གྱི་འཚོ་གནས་དབང་ཆ་ཁས་ལེན་བྱེད་དགོས་པ་མ་ཟད་དེ་སྔོན་བཞག་པའི་ཕྱི་འབྲེལ་གྱི་གྲོས་མཐུན་ལའང་སྲུང་བརྩི་ཞུ་དགོས་ཞེས་བསྐྱར་བཤད་གནང་ཡོད།
དབྱི་སི་རལ་གྱི 《ཅེ་རུས་ས་ལེམ་གྱི་སྦྲག་སྲིད་ཚགས་པར 》ཐོག་ཚེས་4ཉིན་ཆེད་བརྗོད་སྤེལ་ཏེ་རྒྱལ་སྤྱིའི་སྤྱི་ཚོགས་ཀྱིས་ཕྱོགས་གཅིག་ནས་པིན ·ལ་ཏེང་མེ་མདའ་བརྒྱབ་ནས་བསད་པར་བསྔགས་བརྗོད་ཆེན་པོ་བྱེད་པ་དང་ཕྱོགས་གཞན་ཞིག་ནས་ཕ་ཐ་ཧོ་དང་ཧ་མ་སི་གཉིས་མཐུན་འགྲིག་བྱུང་བར་དགའ་སྤྲོ་དཔག་མེད་བྱེད་ཀྱི་ཡོད། འཛམ་གླིང་དབུས་ཤར་གནད་དོན་གྱི་ཕྱོགས་བཞི་པོ་སྟེ་ཨ་རི་དང་། ཨུ་རུ་སུ། ཡོ་རོབ་མནའ་འབྲེལ། མཉམ་འབྲེལ་རྒྱལ་ཚོགས་བཅས་ཚང་མས་མཐུན་འགྲིག་བྱུང་བ་དེ་འཛམ་གླིང་དབུས་ཤར་གྱི་ཞི་བའི་བྱ་གཞག་ལ་ཕན་པ་ཡོད་ཀྱང་གལ་སྲིད་ཧ་མ་སིའི་ལོ་རྒྱུས་ལ་ཞིབ་པར་བལྟས་ན་ཧ་མ་སི་ནི “རྟེན་གཞིའི ”རྩ་འཛུགས་དང་འདྲ་བར་འཇིགས་སྐུལ་རྩ་འཛུགས་ཤིག་ཡིན་པ་ཤེས་སྲིད་ཅེས་བཀོད་ཡོད་པ་རེད།
ཚེས་3ཉིན་ནེ་ཐ་ཉི་ཡ་ཧུའུ་ཡིས་ཕ་ཐ་ཧོ་དང་ཧ་མ་སིའི་དབར་མཐུན་འགྲིག་བྱུང་བ་དེ་འཛམ་གླིང་དབུས་ཤར་གྱི་ཞི་བའི་འཕེལ་རིམ་ལ་རྡུང་རྡེག་ཚ་ནན་བཏང་བ་ཞིག་རེད་ཅེས་གསུངས་ཡོད། 《རྒྱལ་ཁབ་ས་ཆའི་ཚགས་པར 》ཞེས་པའི་ཐོག་དབྱི་སི་རལ་གྱི་ཕྱི་འབྲེལ་པུའི་སྲིད་ཇུས་འཆར་འགོད་སྡེ་ཚན་གྱིས་ཉེ་ཆར་བཏོན་པའི་ནང་ཁུལ་གྱི་སྙན་སྒྲོན་སྐོར་གནས་ཚུལ་སྤེལ་ཡོད་པ་དང་སྙན་སྒྲོན་དེའི་ནང་འཛིན་པའི་ཕ་ལེ་སི་ཐན་ནང་ཁུལ་མཐུན་འགྲིག་བྱུང་བར་ལྟ་སྟངས་ཐད་ནེ་ཐ་ཉི་ཡ་ཧུའུ་དང་འདྲ་གི་མེད་པ་རེད། སྙན་སྒྲོན་ནང་ཕ་ལེ་སི་ཐན་ནང་ཁུལ་དུ་མཐུན་འགྲིག་བྱུང་བ་ནི་བདེ་འཇགས་ལ་འཇིགས་སྐུལ་ཕོག་པ་ཞིག་མིན་པར་འཐབ་ཇུས་ཀྱི་གོ་སྐབས་ངོ་མ་འཕྲད་པ་ཞིག་ཡིན་པ་དང་ཕུགས་ནས་བལྟས་ན་དབྱི་སི་རལ་རྒྱལ་ཁབ་ཀྱི་ཁེ་ཕན་དང་འཚམས་ཡོད་པའི་ངོས་འཛིན་བྱས་ཡོད། ད་དུང་སྙན་སྒྲོན་ནང་ཕ་ལེ་སི་ཐན་ནང་ཁུལ་མཐུན་འགྲིག་བྱུང་བ་དེར་ཧུར་བརྩོན་ཆེ་ལ་དགེ་མཚན་ལྡན་པའི་རྣམ་འགྱུར་འཛིན་དགོས་པ་དང་། གང་འདྲ་བྱས་ཏེ་ཕ་ལེ་སི་ཐན་ཕྱོགས་ཀྱིས་ད་ལོའི་ཟླ་9པར་མཉམ་འབྲེལ་རྒྱལ་ཚོགས་ཀྱི་ཚོགས་ཆེན་འཚོགས་རིང་རྒྱལ་སྤྱིའི་ཁས་ལེན་བྱ་རྒྱུའི་བརྩོན་ལེན་བྱ་རྒྱུར་ཁ་གཏད་གཅོག་རྒྱུར་བསམ་བློ་ཞིབ་པར་གཏོང་དགོས། ཕ་ལེ་སི་ཐན་ཕྱོགས་དང་མུ་མཐུད་དེ་བདེ་འཇགས་ཐད་མཐུན་སྦྱོར་བྱེད་དགོས་པ་བཅས་ཀྱི་གྲོས་འགོ་ཁག་གསུམ་བཏོན་ཡོད་ཀྱང་ལྟ་བ་དེ་དབྱི་སི་རལ་སྲིད་གཞུང་གིས་ད་ལྟ་ཁས་བླངས་མེད། ཨེ་ཅིབ་འབྱུང་འགྱུར་ཞིབ་འཇུག་ལྟེ་གནས་ཀྱི་ཀྲུའུ་རེན་ན་པེ་ལེས་ཕ་ལེ་སི་ཐན་ནང་ཁུལ་མཐུན་འགྲིག་བྱུང་བའི་གྲོས་མཐུན་ལ་མིང་རྟགས་བཀོད་པ་དེ་ཕ་ལེ་སི་ཐན་གྱི་ངོས་ནས་བཤད་ན་དོན་ཆེན་ཞིག་ཡིན་པ་དང་ཁ་ཕྲལ་གྱི་གནས་སུ་གྱར་བའི་ཕ་ལེ་སི་ཐན་རང་བཙན་ཡོང་ཐུབ་པ་ནི་བསམ་ཡུལ་ལས་འདས་པ་ཞིག་རེད། ཕ་ལེ་སི་ཐན་ནང་ཁུལ་མཐུན་འགྲིག་བྱུང་བ་དེ་ཐོག་ནས་དབྱི་སི་རལ་གྱིས་ཕ་ལེ་སི་ཐན་ནང་ཁུལ་གྱི་འགལ་བ་སྤྱད་དེ་ཕ་ལེ་སི་ཐན་རྒྱལ་ཁབ་འཛུགས་རྒྱུ་ནར་འགྱངས་བཟོ་བའི་དུས་རབས་འདས་་ཟིན་པས་ད་ནས་བཟུང་དབྱི་སི་རལ་གྱིས་གྲོས་མོལ་སྒྲོག་ཙེའི་ཐོག་དངོས་ཤུགས་ཆེ་རུ་འགྲོ་བ་དང་སྟོབས་ཤུགས་གཅིག་ཏུ་སྒྲིལ་བའི་ཕ་ལེ་སི་ཐན་ལ་ཁ་གཏད་གཅོག་དགོས་ལུགས་མཚོན་ཡོད།