མི་དམངས་ཉིན་རེའི་ཚགས་པར་ཁང་དུ་ཁེ་རོ་ནས་ཟླ་5ཚེས་3ཉིན་གློག་འཕྲིན་འབྱོར་གསལ། ཁ་ཐར་ཕྱེད་གླིང་བཪྙན་འཕྲིན་ལས་ཁུངས་ཀྱིས་ཚེས་2ཉིན་སྤེལ་བའི་གསར་འགྱུར་ནང་ལས་ཁུངས་དེ་གའི་དབྱིན་སྐད་ལེ་ཚན་གྱི་བུད་མེད་གསར་འགོད་པ་གཅིག་ཟླ་4ཚེས་29ཉིན་སི་རི་ཡ་རུ་གར་སོང་ཆ་མེད་དུ་གྱུར་འདུག་པས་ཕྱེད་གླིང་བཪྙན་འཕྲིན་ལས་ཁུངས་ཀྱིས་སི་རི་ཡའི་སྲིད་གཞུང་ལ་གསར་འགོད་པ་དེ་གང་དུ་ཡོད་མེད་ཀྱི་འབྲེལ་ཡོད་གནས་ཚུལ་མཁོ་འདོན་བྱ་རྒྱུའི་རེ་བ་བཏོན་ཡོད་ཅེས་བཤད་པ་རེད།

    ཤེས་རྟོགས་བྱུང་བར་གཞིགས་ན། བུད་མེད་གསར་འགོད་པ་དེ་ཨ་རི་དང་། ཁ་ན་ཏ། དབྱི་རན་བཅས་རྒྱལ་ཁབ་གསུམ་གྱི་རྒྱལ་ཁོངས་སུ་གཏོགས་པ་དང་2010ལོའི་ཟླ་8པ་ནས་བཟུང་ཁ་ཐར་ཕྱེད་གླིང་བཪྙན་འཕྲིན་ལས་ཁུངས་སུ་ལས་ཀ་བྱས་པ་རེད། ཁོང་ད་ཐེངས་སི་རི་ཡ་རུ་ས་གནས་དེ་གའི་གནས་ཚུལ་སྤེལ་བར་བཏང་བས་རྒྱལ་གྲོལ་མཆན་འགོད་ལག་ཁྱེར་ལེན་ལོང་མ་བྱུང་བའི་རྐྱེན་གྱིས་དབྱི་རན་རྒྱལ་ཁོངས་ཀྱི་ཐོབ་ཐང་སྤྱད་དེ་རྒྱལ་གྲོལ་མཆན་འགོད་ལག་ཁྱེར་ལེན་མི་དགོས་པར་སི་རི་ཡའི་ས་ཁོངས་སུ་འཛུལ་བ་རེད། འོན་ཀྱང་སི་རི་ཡ་རུ་འབྱོར་རྗེས་ནང་མི་དང་ཕྱེད་གླིང་བཪྙན་འཕྲིན་ལས་ཁུངས་དང་འབྲེལ་བ་ཆད་པ་རེད།

    སྤྱི་ཁྱབ་ཁང་ཨ་རིའི་ཉིའུ་གཡོད་དུ་བཙུགས་ཡོད་པའི་གསར་འགོད་པ་སྲུང་སྐྱོང་ཨུ་ཡོན་ལྷན་ཁང་གིས་ཁོ་ཚོར་བུད་མེད་གསར་འགོད་པ་དེ་སི་རི་ཡའི་སྲིད་གཞུང་གིས་བཀག་ཉར་བྱས་པའི་དཔང་རྟགས་ཡོད་ཅེས་བཤད་པ་རེད། གསར་འགོད་པ་སྲུང་སྐྱོང་ཨུ་ཡོན་ལྷན་ཁང་གིས་བསྡོམས་རྩིས་བྱས་པར་གཞིགས་ན། ཟླ་3པའི་ཟླ་དཀྱིལ་དུ་སི་རི་ཡར་ཟིང་ཆ་ལངས་པ་ནས་བཟུང་ཕྱི་རྒྱལ་གྱི་གསར་འགོད་པ་བཅུ་ཕྲག་ཁ་ཤས་བཀག་ཉར་བྱས་ཡོད་པ་རེད།