ཤིན་ཧྭ་གསར་འགྱུར་ཁང་ཨབ་ཀྲ་པེ་ནས་ཟླ་5ཚེས་2ཉིན་གློག་འཕྲིན་འབྱོར་པ་གཞིར་བཟུང་། ཀྲུང་ཧྭ་མི་དམངས་སྤྱི་མཐུན་རྒྱལ་ཁབ་དང་མཚོ་ཁུག་ཨ་རབ་རྒྱལ་ཁབ་མཉམ་ལས་ཨུ་ཡོན་ལྷན་ཁང་དབར་གྱི་རེས་སྐོར་གཉིས་པའི་འཐབ་ཇུས་གླེང་མོལ་དེ་ཚེས་2ཉིན་ཨ་རབ་མཉམ་འབྲེལ་ཚོ་དཔོན་རྒྱལ་ཁབ་ཀྱི་རྒྱལ་ས་ཨབ་ཀྲ་པེར་འཚོགས་པ་རེད།

    ཚོགས་འདུ་དེ་ཀྲུང་གོའི་ཕྱི་འབྲེལ་དཔོན་དབྱང་ཅེ་ཁྲེ་དང་མཚོ་ཁུག་མཉམ་ལས་ཨུ་ཡོན་ལྷན་ཁང་གི་པུའུ་ཀྲང་ལས་འཛིན་ལྷན་ཚོགས་ཀྱི་རེས་སྐོར་སྡོད་བྱའི་ཀྲུའུ་ཞིའི་རྒྱལ་ཁབ་ཨ་རབ་མཉམ་འབྲེལ་ཚོ་དཔོན་གྱི་ཕྱི་འབྲེལ་དཔོན་ཨ་པུ་ཏུ་ལ ·པེན ·ཀྲ་ཡེ་ཏེ ·ཨ་ལེ་ན་ཧ་ཡང་གཉིས་ཀྱིས་གཙོ་སྐྱོང་གནང་བ་དང་ཁུ་ཝེ་ཐེའི་དབུ་བཞུགས་བློན་ཆེན་གཞོན་པ་དང་ཕྱི་འབྲེལ་བློན་ཆེན་གཅིག་ལྕོགས་ཡིན་པའི་མུའུ་ཧན་མུའུ་ཏེ ·ས་པ་ཧེ་དང་། པ་རེན་གྱི་ཕྱི་འབྲེལ་གྱི་བློན་ཆེན་ཧ་ལི་ཏེ། མཚོ་ཁུག་མཉམ་ལས་ཨུ་ལྷན་གྱི་རེས་སྐོར་རྗེས་མའི་ཀྲུའུ་ཞིའི་རྒྱལ་ཁབ་སོ་ཏི་ཨ་རབ་ཀྱི་ཕྱི་འབྲེལ་རྒྱལ་དོན་བློན་ཆེན་མའེ་ཨ་ཉི། མཚོ་ཁུག་མཉམ་འབྲེལ་ཨུ་ལྷན་གྱི་དྲུང་ཆེ་ཀྲ་ཡེ་ཉི་བཅས་ཚོགས་འདུར་ཞུགས་པ་རེད།

    ཕྱོགས་གཉིས་པོས་2010ལོའི་ཟླ་6པར་པེ་ཅིང་དུ་མིང་རྟགས་བཀོད་པའི 《ཀྲུང་ཧྭ་མི་དམངས་སྤྱི་མཐུན་རྒྱལ་ཁབ་དང་མཚོ་ཁུག་ཨ་རབ་རྒྱལ་ཁབ་མཉམ་ལས་ཨུ་ཡོན་ལྷན་ཁང་དབར་གྱི་འཐབ་ཇུས་གླེང་མོལ་གྱི་བསམ་ཤེས་དྲན་ཐོ 》དང་དེ་བཞིན་2004ལོའི་ཟླ་6པར་པེ་ཅིང་དུ་མིང་རྟགས་བཀོད་པའི་དཔལ་འབྱོར་དང་། མ་འཇོག ལག་རྩལ་བཅས་མཉམ་ལས་ཀྱི་སྒྲོམ་གཞིའི་གྲོས་དོན་གཞིར་བཟུང་ཕྱོགས་གཉིས་པོས་ཁྱབ་ཁོངས་ཁག་གི་ཞིབ་གྲོས་དང་། མཐུན་སྦྱོར། མཉམ་ལས་བཅས་ཀྱི་ལམ་སྲོལ་སྔར་བས་འཐུས་ཚང་དུ་གཏོང་རྒྱུའི་ནན་བཤད་བྱས་པ་རེད།

    ཕྱོགས་གཉིས་པོས་རིགས་གཅིག་མཁས་ཅན་གྱི་ཚོགས་འདུ་གང་མགྱོགས་འཚོགས་ཏེ་གོང་དུ་བཤད་པའི་སྒྲོམ་གཞིའི་གྲོས་དོན་དང་བསམ་ཤེས་དྲན་ཐོས་ཉོ་ཚོང་དང་། མ་འཇོག ནུས་རྒྱུ། རིག་གནས། སློབ་གསོ། ཚན་ཞིབ། ཁོར་ཡུག འཕྲོད་བསྟེན་སོགས་ཁྱབ་ཁོངས་ཀྱི་འབྲེལ་ཡོད་ནང་དོན་བཟོ་རྒྱུའི་བྱ་སྤྱོད་འཆར་གཞི་དོན་འཁྱོལ་བྱ་ཆེད་ཞིབ་ཕྲའི་དུས་ཚོད་གཏན་འཁེལ་བྱེད་དགོས་པའི་ངོས་འཛིན་བྱས་ཤིང་། ཕྱོགས་གཉིས་པོས་མུ་མཐུད་ཞིབ་གྲོས་བྱ་རྒྱུར་ཤུགས་སྣོན་བརྒྱབ་སྟེ་རང་མོས་ཚོང་དོན་ཁུལ་གྱི་གྲོས་མོལ་གང་མགྱོགས་ལེགས་འགྲུབ་ཡོང་རྒྱུའི་མོས་མཐུན་བྱས་པ་རེད།

    ཕྱོགས་གཉིས་པོས་དབུས་ཤར་མཚོ་ཁུག་ས་ཁུལ་གྱི་འཐབ་ཇུས་གནས་བབ་གལ་ཆེ་བས་འཛམ་གླིང་ཞི་བདེ་དང་འཕེལ་རྒྱས་འགྲོ་རྒྱུར་ཤུགས་རྐྱེན་གལ་ཆེན་ལྡན་པ་དང་ས་ཁུལ་དེའི་ཞི་བདེ་དང་བརྟན་ལྷིང་ལ་སྲུང་སྐྱོང་བྱ་རྒྱུ་དེ་ས་ཁུལ་གྱི་རྒྱལ་ཁབ་དང་རྒྱལ་སྤྱིའི་སྤྱི་ཚོགས་ཀྱི་ཐུན་མོང་གི་ཁེ་ཕན་དང་མཐུན་ཡོད་པའི་ངོས་འཛིན་བྱས་ཡོད། ཀྲུང་གོ་ཕྱོགས་ཀྱིས་མཚོ་ཁུག་མཉམ་ལས་ཨུ་ཡོན་ལྷན་ཁང་གིས་ཡེ་མེན་གྱི་མིག་སྔའི་ཉེན་ཁ་ཐག་གཅོད་བྱ་ཆེད་འབད་འཐབ་བྱས་པར་དགའ་བསུ་ཞུས་པ་དང་འབྲེལ་རྒྱབ་སྐྱོར་ཡང་བྱས་པ་རེད།

    ཕྱོགས་གཉིས་པོས་2012ལོར་ཀྲུང་གོར་ཀྲུང་གོ་དང་མཚོ་ཁུག་མཉམ་ལས་ཨུ་ཡོན་ལྷན་ཁང་དབར་གྱི་རེས་སྐོར་གསུམ་པའི་འཐབ་ཇུས་གླེང་མོལ་བྱ་རྒྱུའི་ཐད་གྲོས་ཐག་བཅད་པ་རེད།