དྲོད་ཚད་འཕེལ་བའི་རྡི་ལི་གསར་པའི་ཟླ་བ་བཞི་པར “ཀྲུང་གོ་དང་རྒྱ་གར་གྱི་སྤེལ་རེས་ལོའི ”རྣམ་གྲངས་གལ་ཆེན་ཡིན་པ་དང་ཀྲུང་གོའི་རྒྱལ་སྲིད་སྤྱི་ཁྱབ་ཁང་གསར་འགྱུར་གཞུང་དོན་ཁང་དང་། སི་ཁྲོན་ཞིང་ཆེན་མི་དམངས་སྲིད་གཞུང་། རྒྱ་གར་དུ་བཅའ་སྡོད་ཀྲུང་གོའི་གཞུང་ཚབ་ཆེ་མོ་ཁང་བཅས་ཀྱིས་ཐུན་མོང་ཐོག་གཙོ་གཉེར་བྱས་པའི “ཀྲུང་གོ་ཤེས་ཚོར། རྒྱ་གར་དུ་སྐྱོད་ཅེས་པའི་སི་ཁྲོན་གཟའ་འཁོར ”གྱི་བྱེད་སྒོ་ཟླ་4ཚེས་25ནས་ཚེས་30ཉིན་བར་དེ་གར་འཚོགས་པ་རེད།
སི་ཁྲོན་ནི་རྒྱ་གར་དང་ཐག་ཉེ་ཤོས་དང་ཞིང་ཆེན་རིམ་པའི་ཀྲུང་གོའི་དཔལ་འབྱོར་དངོས་ཚན་ཆེ་ཤོས་དེ་ཡིན་ལ་སི་ཁྲོན་གྱིས་ལོ་ངོ་སྟོང་ཙམ་རྒྱུན་སྲིང་པའི་ཀྲུང་གོ་དང་རྒྱ་གར་དབར་གྱི་མཛའ་གྲོགས་འགྲོ་འོང་དཔང་རྟགས་བྱས་ཡོད།
ལོ་2000ལྷག་ཙམ་གྱི་གོང་དུ “ལྷོ་ཕྱོགས་ཀྱི་དར་གོས་འགྲུལ་ལམ ”མམ་ཡང་ན “ཇ་རྟ་ཚོང་ལམ ”དུ་བརྗོད་པ་དེ་ཡུན་ནན་ནས་འབར་མ་བརྒྱུད་རྒྱ་གར་དང་ཕ་ཁི་སི་ཐན་སོགས་སུ་འབྱོར་བས་ཀྲུང་གོའི་གནའ་རབས་ཀྱི་ལྷོ་ནུབ་ས་ཁུལ་དེ་ཨེ་ཤེ་ཡ་ཤར་ལྷོ་དང་། ལྷོ་ཨེ་ཤེ་ཡ། ནུབ་ཨེ་ཤེ་ཡ། ཡོ་རོབ་བཅས་དང་སྦྲེལ་བའི་རྒྱལ་སྤྱིའི་བགྲོད་ལམ་ཞིག་ཏུ་གྱུར་ཡོད།
ཚེས་25ཉིན་འགོ་ཚུགས་པའི་སི་ཁྲོན་རིག་གནས་ཀྱི་པར་རིས་འགྲེམས་སྟོན་ཐོག་པར་རིས་དགུ་བཅུ་ལྷག་ཙམ་གྱི་ཐོག་ནས་ལྷོ་ཕྱོགས་ཀྱི་དར་གོས་འགྲུལ་ལམ་གྱི་གནས་གལ་ཆེན་སི་ཁྲོན་དང་རྒྱ་གར་དབར་གྱི་ལོ་རྒྱུས་ཡུན་རིང་གི་འགྲོ་འོང་མཚོན་ཞིང་། པར་རིས་འགྲེམས་སྟོན་ཐོག་ད་དུང་2008ལོའི་དབུན་ཁྲོན་ས་ཡོམ་དྲག་པོའི་གེགས་ཁུལ་བསྐྱར་སྐྲུན་གྱི་འགྲེམས་ཁུལ་བཙུགས་ཡོད་པས་རྒྱ་གར་བའི་ཡིད་དབང་བཀུག་ཡོད། རྡི་ལི་གསར་པའི་ཧྲེ་ཀྲང་མཁྱེན་ལྡན་མ་ཨ་པིས་སི་ཁྲོན་གྱི་ས་ཡོམ་གེགས་ཁུལ་དུ་བྱུང་བའི་འགྱུར་ལྡོག་དེ་མི་རྣམས་ཧང་སངས་དགོས་པ་ཞིག་འདུག་ལ་ཀྲུང་གོའི་མི་དམངས་ཀྱི་མགྱོགས་ལ་ནུས་ལྡན་གྱི་བསྐྱར་སྐྲུན་ལས་དོན་ལ་ཡིད་སྨོན་བྱེད་དགོས་པ་ཞིག་འདུག་ཅེས་གསུངས་པ་རེད། སི་ཁྲོན་ཞིང་ཆེན་གྱི་ཧྲེང་ཀྲང་ཅང་ཅུས་ཧྥང་གིས་མཁྱེན་ལྡན་མ་ཨ་པིར་གོད་ཆག་བྱུང་ནས་ཡུན་རིང་མ་སོང་གོང་རྒྱ་གར་གྱིས་སི་ཁྲོན་གེགས་ཁུལ་ལ་རོགས་སྐྱོར་གནང་བས་ཀྲུང་གོའི་མི་དམངས་ལ་སེམས་འགུལ་ཚད་མེད་ཐེབས་ཡོད་ཅེས་གསུངས་པ་རེད།
ད་ཕན་ལོ་ཤས་རིང་ཀྲུང་གོ་དང་རྒྱ་གར་དབར་གྱི་དངོས་དོན་མཉམ་ལས་དང་། སྤེལ་རེས་རྒྱ་ཆེ། ཞི་བདེ་དང་གྲ་རྒྱས་ལ་ཕྱོགས་པ་བཅས་ཀྱི་འཐབ་ཇུས་མཉམ་ལས་ཀྱི་རོགས་ཟླའི་འབྲེལ་བ་སྔར་བས་ཟབ་ཏུ་ཕྱིན་ཡོད།
རྒྱ་གར་དུ་བཅའ་སྡོད་ཀྲུང་གོའི་གཞུང་ཚབ་ཆེ་མོ་བ་ཀྲང་ཡན་གྱིས་ཟླ་4ཚེས་26ཉིན་སྤེལ་བའི་སི་ཁྲོན (རྒྱ་གར )དཔལ་འབྱོར་ཚོང་དོན་མཉམ་ལས་འོས་སྦྱོར་ངོ་སྤྲོད་ཚོགས་འདུའི་ཐོག་འདས་ཟིན་པའི་ལོ་བཅུའི་ནང་ཀྲུང་གོ་དང་རྒྱ་གར་ཕྱོགས་གཉིས་པོའི་ཚོང་དོན་བསྡོམས་འབོར་ལྡབ་20ཙམ་འཕར་ཞིང་། ན་ནིང་རྒྱལ་ཁབ་གཉིས་ཀྱི་ཚོང་དོན་བསྡོམས་འབོར་ཨ་སྒོར་དུང་ཕྱུར་600ལས་བརྒལ་ཁར་ཨ་སྒོར་དུང་ཕྱུར་1000ཟིན་རྒྱུའི་2015ལོའི་ཕྱོགས་གཉིས་ཀྱི་དམིགས་ཚད་མངོན་འགྱུར་ཐུབ་རེ་ཡོད་ཅེས་གསུངས་པ་རེད།