ལི་པི་ཡའི་དམག་འཁྲུག་དེ་ཕན་ཚུན་སྲ་འཛིན་གྱི་གནས་སུ་གྱར་བ་དང་ཆབས་ཅིག་འཛམ་གླིང་གི་མིག་རྒྱང་དེ་གཟའ་འཁོར་དེར་ཨེ་ཤེ་ཡར་དེ་བས་མང་བ་ཕྱོགས་ཡོད། ཨེ་ཤེ་ཡ་ནུབ་མའི་ཕ་ལེ་སི་ཐན་དང་ཡང་ན་ཨེ་ཤེ་ཡ་བྱང་ཤར་གྱི་ཁྲའོ་ཞན་ཕྱེད་གླིང་གང་ཞིག་ཡིན་རུང་འབྲེལ་ཡོད་ཕྱོགས་ཀྱིས་སྔ་རྗེས་སུ་མཐུན་འགྲིག་གི་ཆ་འཕྲིན་བརྒྱུད་གཏོང་བྱས་པ་དང་ཆབས་ཅིག་ས་ཁུལ་དུ་ཞི་བདེའི་རེ་བ་སླར་ཡང་ཐོན་བཞིན་ཡོད་མོད། འོན་ཀྱང་མཐུན་འགྲིག་བྱེད་པའི་བསམ་འདུན་འཆང་རུང་ཞི་བདེ་བྱུང་མེད་པར་བརྟེན་མི་ཚོར་དགའ་སྤྲོའི་ཁྲོད་སྔར་བཞིན་སེམས་ཁྲལ་ཡོད་པ་རེད།

    གསང་བའི་གྲོས་མོལ་བྱས་པ་བརྒྱུད་ཕ་ལེ་སི་ཐན་མི་རིགས་བཅིངས་འགྲོལ་ལས་འགུལ (ཕ་ཐེ་ཧོ )དང་དབྱི་སི་ལམ་གྱི་འགོག་རྒོལ་ལས་འགུལ (ཧ་མ་སི )དབར་ཟླ་4ཚེས་27ཉིན་གྲོས་མཐུན་བཞག་ནས་རིང་མིན་དུ་བར་བརྒལ་སྲིད་གཞུང་མཉམ་དུ་འཛུགས་རྒྱུ་དང་འབྲེལ་ཕ་ལེ་སི་ཐན་གྱི་ཙུང་ཐུང་དང་ཁྲིམས་འཛུགས་ཨུ་ལྷན་གྱི་འདེམས་བསྐོ་བྱ་ལུགས་ཁྱབ་བསྒྲགས་བྱས་པ་རེད། ཕ་ལེ་སི་ཐན་གྱི་ཆབ་སྲིད་སྟོབས་ཤུགས་ཆེ་གྲས་གཉིས་ཡིན་པའི་ཕ་ཐེ་ཧོ་དང་ཧ་མ་སི་དབར་ཐུན་མོང་གི་ངོས་འཛིན་བྱུང་ནས་ཕ་ལེ་སི་ཐན་མི་རིགས་ལ་མཐུན་འགྲིག་བྱ་རྒྱུར་རེ་བ་སྦྱིན་ཡོད། ཕྱོགས་གཉིས་པོས་ད་རེས་གློ་བུར་དུ་མཐུན་འགྲིག་བྱ་ལུགས་ཁྱབ་བསྒྲགས་བྱས་པ་དེ་དབུས་ཤར་ས་རྒྱུད་ཀྱི་དུས་བབ་ལ་གློ་བུར་དུ་འགྱུར་ལྡོག་བྱུང་བ་དང་འབྲེལ་བ་མེད་པ་མ་རེད། ལི་པི་ཡ་དང་། ཡེ་མེན། སི་རི་ཡ་སོགས་རྒྱལ་ཁབ་ཟང་ཟིང་གི་གནས་སུ་གྱར་བའི་སྐབས་དེར་ཕ་ལེ་སི་ཐན་གྱི་ཕྱོགས་ཁག་ལའང་ཉེན་ཁ་ཚོར་སེམས་ཆེན་པོ་ཡོད་པ་རེད། ཨ་རབ་འཛམ་གླིང་སྲོལ་རྒྱུན་ལས་བྱུང་བའི་རྒྱབ་སྐྱོར་སྟོབས་ཤུགས་ལ་འགྱུར་ལྡོག་བྱུང་བའི་གནས་ཚུལ་འོག་གལ་ཏེ་སྤུན་ཟླའི་དབར་འཛིང་རེས་བྱེད་པའི་དཀའ་གནད་ལས་སྒྲོལ་གང་ཐུབ་མ་བྱས་ཚེ་ཕན་པ་ཐོབ་མཁན་དེ་ཁ་གཏད་རྒྱལ་ཁབ་དབྱི་སི་རལ་ཁོ་ན་ཡིན་པ་རེད། འོན་ཀྱང་ཕ་ཐེ་ཧོ་དང་ཧ་མ་སིར 2007ལོར་འགལ་བ་ཚབས་ཆེན་ཐོན་རྗེས་ཅོར་ཏན་གཙང་ཆུའི་ནུབ་འགྲམ་དང་ཅ་ཧྲ་ས་རྒྱུད་ཁ་ཕྲལ་དབང་སྒྱུར་བྱེད་པའི་གནས་སུ་ཐོག་མཐའ་བར་གསུམ་དུ་གྱར་ནས་ཕྱོགས་གཉིས་པོའི་དབར་འཁོན་མེད་ཉི་མ་སྤྲིན་བྲལ་ལྟར་ཐུབ་མིན་དང “འཐབ་ཕྱོགས་གཅིག་གྱུར ”དངོས་འབྲེལ་ཡོང་ཐུབ་མིན་ཐད་ད་དུང་དུས་ཚོད་ཀྱིས་ཞིབ་བཤེར་བྱེད་དགོས་པ་ཞིག་ཡོད་པ་རེད།

    མིག་རྒྱང་དེ་ཨེ་ཤེ་ཡ་བྱང་ཤར་ལ་ལྟ་སྐབས་ཕ་ལེ་སི་ཐན་གྱི་ཕྱོགས་ཆེ་གྲས་གཉིས་པོའི་དབར་གྲོས་མཐུན་བྱུང་བའི་ཉིན་གཉིས་པར་ཁྲའོ་ཞན་ཕྱེད་གླིང་ནས་ཀྱང་མཐུན་འགྲིག་གི་ཆ་འཕྲིན་འབྱོར་ཡོང་བ་རེད། ཨ་རིའི་ཙུང་ཐུང་ཟུར་པ་ཁ་ཐེས་སྣེ་ཁྲིད་གནང་བའི “རྒྱལ་སྤྱིའི་བསླབ་པ་རྒན་གྲས་ཚོགས་པས ”ཚེས་28ཉིན་ཁྲའོ་ཞན་ལ་འཚམས་འདྲི་གནང་མཇུག་འགྲིལ་བ་དང་སྦྲགས་ཧན་གོའི་ཧྲོའར་རུ་འབྱོར་རྗེས་འཚོགས་པའི་གསར་འགོད་པའི་ཚོགས་འདུའི་ཐོག་ཁྲའོ་ཞན་ཆེས་མཐོའི་འགོ་ཁྲིད་པ་ཅིན་ཀྲེང་རིས་གསུངས་པའི་ངག་འཕྲིན་ཏེ་ཁྲའོ་ཞན་གྱིས་ཕྱོགས་དྲུག་གི་གྲོས་མོལ་གྱི་དོ་བདག་རྒྱལ་ཁབ་ཚང་མ་དང་ཆ་རྐྱེན་མེད་པར་གནད་དོན་ཚང་མའི་ཐད་གྲོས་མོལ་བྱེད་འདོད་ཡོད་པ་དང་འབྲེལ་དུས་དང་རྣམ་པ་ཀུན་ཏུ་ཧན་གོའི་ཙུང་ལི་ལི་མིང་པོ་དང་ངོ་འཕྲད་བྱ་རྩིས་ཡོད་ལུགས་བསྟན་པ་དེ་རེད།

    ཁྲའོ་ཞན་ཕྱོགས་ཀྱིས་རྣམ་འགྱུར་དེ་བསྟན་པ་ལས་ཁྲའོ་ཞན་གྱི་ཉིང་རྡུལ་གནད་དོན་ལ་འགྱུར་ལྡོག་བྱུང་ཡོད་མོད། འོན་ཀྱང་ན་ནིང “ཐེན་ཨན ”རྟགས་ཅན་གྱི་དོན་རྐྱེན་དང་ཡན་ཕིང་གླིང་ཕྲན་དུ་མེ་སྒྱོགས་འཕེན་པའི་དོན་རྐྱེན་འཕྲད་པའི་ཁྲའོ་ཧན་ཕྱོགས་གཉིས་པོའི་ངོས་ནས་བརྗོད་ན་2000ལོར་ཅིན་ཀྲེང་རི་དང་འགན་བཞེས་བཞིན་པའི་ཧན་གོའི་ཙུང་ཐུང་ཅིན་ཏ་ཀྲུང་དབར་ལོ་རྒྱུས་རང་བཞིན་གྱི་ཕྱག་གཏོང་རེས་གནང་བའི་གནས་ཚུལ་སླར་ཡང་ཐོན་མིན་དང་སྐབས་ཤིག་རིང་ཟིང་ཆ་ལངས་ཉེན་ཆེ་བའི་ཁྲའོ་ཧན་གྱི་འབྲེལ་བ་མཐུན་འགྲིག་བྱེད་པའི་ངག་འཕྲིན་དེ་ནས་བཟུང་རིམ་བཞིན་ལེགས་སུ་གཏོང་ཐུབ་མིན་ཐད་ཕྱི་ཕྱོགས་ཀྱིས་དགའ་སྣང་བྱེད་མི་ཕོད་པ་ཞིག་ཡོད། ཁྲའོ་ཞན་ཕྱེད་གླིང་དུ་རྒྱུན་བསྲིང་ཞི་བདེ་ཡོང་བ་བྱེད་པར་ད་དུང་རྒྱལ་ཁབ་གཉིས་པོ་དང་འབྲེལ་ཡོད་ཕྱོགས་ཁག་དབར་འབད་བརྩོན་ལྷོད་མེད་བྱེད་དགོས་པ་ཞིག་ཡོད།

    ཨེ་ཤེ་ཡ་ལྷོ་མར་མཐའ་མཚམས་ས་ཁུལ་གྱི་བདག་དབང་གིས་རྐྱེན་པས་རྩོད་གཞི་ཐོན་པ་དང་ཐེ་ལན་དང་ཁམ་ཕུ་ཁྲེ་རྒྱལ་ཁབ་གཉིས་ཀྱི་དམག་དཔུང་དབར་ཉེ་བའི་གཟའ་འཁོར་གཅིག་རིང་མེ་མདའ་རྒྱག་རེས་ཐེངས་མང་བྱས་ནས་མི་གྲངས་བཅུ་ལྷག་ཙམ་ཤི་རྨས་བྱུང་བས་གནོད་འཚེ་ཐོན་པ་དེར་མི་རྣམས་སེམས་ཁྲལ་བྱེད་དགོས་པ་ཞིག་ཡོད། ཚེས་28ཉིན་ཕྱོགས་གཉིས་པོའི་དབར་དམག་རྒྱག་མཚམས་འཇོག་པའི་གྲོས་མཐུན་བཞག་མ་ཐག་སླར་ཡང་གོ་མཚོན་མཉམ་འཕྱར་བྱས་པ་དེས་ཞི་བདེ་ནི་དཀའ་ཚེགས་ཆེན་པོ་ཞིག་ཡིན་པས་མི་རྣམས་སེམས་ཁྲལ་སྐྱེ་འོས་པ་ཞིག་ཡོད།