ཤིན་ཧྭ་གསར་འགྱུར་ཁང་དུ་སིང་ཀ་ཕོར་ནས་ཟླ་5ཚེས་1ཉིན་གློག་འཕྲིན་འབྱོར་གསལ། སིང་ཀ་ཕོར་གྱི་གྲུ་གཟིངས་ལས་དོན་དོ་དམ་ཀུང་སི་ཞིག་གིས་ཟླ་5ཚེས་1ཉིན་གསལ་བསྒྲགས་སྤེལ་ནས་ཀུང་སི་དེའི་མིང་འོག་གི་སྣུམ་སྐྱེལ་གྲུ་གཟིངས་གཅིག་ཁེན་ནི་ཡའི་ཉེ་འགྲམ་གྱི་མཚོ་ཁོངས་སུ་མཚོ་ཇག་གིས་བཙན་ཁྲིད་བྱས་པ་དང་གྲུ་གཟིངས་ཐོག་གི་གྲུ་པ་25ནང་ཀྲུང་གོ་བ་5ཡོད་ཅེས་བཤད་པ་རེད།

    སིང་ཀ་ཕོར་བཅའ་སྡོད་ཀྲུང་གོའི་གཞུང་ཚབ་ཆེ་མོ་ཁང་གིས་བཙན་ཁྲིད་བྱས་པའི་གྲུ་གཟིངས་ཐོག་ཀྲུང་གོ་བ་ཁ་ཤས་ཡོད་པའི་སྐོར་གྱི་སྙན་ཞུ་འབྱོར་རྗེས་མིག་སྔར་འབྲེལ་ཡོད་ཀྱི་གནས་ཚུལ་ལ་སྔར་བས་ཞིབ་བསྡུར་བྱེད་བཞིན་ཡོད་པ་དང་འབྲེལ་རྗེས་སྙེགས་ཀྱི་བྱ་ཐབས་ཀྱང་སྤྱོད་ཀྱི་ཡོད་ཅེས་གསུངས་པ་རེད།

    སིང་ཀ་ཕོར་ཀོང་རུང་གྲུ་གཟེངས་ལས་དོན་ཀུང་སིས་ཚེས་1ཉིན་སྤེལ་བའི་གསལ་བསྒྲགས་ནང་ཀུང་སི་དེ་གའི་མིང་འོག་གི “GTGemini”རྟགས་ཅན་གྱི་སྣུམ་སྐྱེལ་གྲུ་གཟིངས་དེ “ཁེན་ནི་ཡའི་ཉེ་འགྲམ་གྱི་མཚོ་ཁོངས་ནས་བཙན་ཁྲིད་བྱས་ཏེ་མིག་སྔར་སོ་མ་ལིའི་ཕྱོགས་སུ་སྐྱོད་བཞིན་ཡོད ”གྲུ་གཟིངས་དེ་སིང་ཀ་ཕོར་གྱི་དུས་ཚོད་ཟླ་4ཚེས་30ཉིན་གྱི་ཆུ་ཚོད་12དང་སྐར་མ་33ལ་བཙན་ཁྲིད་བྱས་པ་དང་སིང་ཀ་ཕོར་དུ་ཡོད་པའི་ཀུང་སི་དེའི་གཞུང་ལས་ཁང་གིས་སྐབས་དེར་མཚོ་དོན་སྲུང་སྐར་ཁ་པར་བརྒྱུད་ནས་གྲུ་དཔོན་དང་འབྲེལ་གཏུག་བྱས་ཡོད་ཀྱང་རྗེས་སུ་འབྲེལ་བ་ཆད་འདུག་ཅེས་བཤད་པ་རེད། གསལ་བསྒྲགས་ནང་གནས་ཚུལ་ཐོན་སྐབས་ཏ་སྣུམ་ཏུན་ཁྲི་2.8བླུགས་ཡོད་པའི་གྲུ་གཟིངས་དེ་ཧིན་རྡུ་ཉི་ཞི་ཡ་ནས་ཁེན་ནི་ཡའི་མོང་པ་ས་གྲུ་ཁར་སྐྱོད་ཀྱི་ཡོད་ཅེས་བཤད་ཡོད་པ་རེད།

    གྲུ་གཟིངས་ལས་དོན་ཀུང་སིས་འབྲེལ་ཡོད་ཀྱི་འགན་འཁུར་བས་ནུས་ཤུགས་ཡོད་རྒུས་འབྲེལ་ཡོད་རྒྱལ་ཁབ་ཁག་གི་གྲུ་པའི་ནང་མི་དང་འབྲེལ་གཏུག་བྱེད་བཞིན་ཡོད། ཀུང་སིས་ཐབས་ཤེས་གང་ཡོད་བཏོན་ནས་ཁོང་ཚོ་གློད་འགྲོལ་གཏོང་ཐུབ་པའི་བརྩོན་ལེན་ཧུར་ཐག་བྱ་རྒྱུ་ཡིན། ཀུང་སིས་སིང་ཀ་ཕོར་དང་རྒྱལ་སྤྱིའི་འབྲེལ་ཡོད་སྒྲིག་གཞིར་གནས་ཚུལ་གྱི་འཕེལ་རིམ་གསར་ཤོས་སྙན་སེང་ཞུས་ཡོད་ཅེས་བཤད་པ་རེད།