མི་དམངས་ཉིན་རེའི་ཚགས་པར་ཁང་དུ་ཁྭ་ལ་ལུམ་ཕུར་ནས་ཟླ་4ཚེས་28ཉིན་གློག་འཕྲིན་འབྱོར་གསལ། ཚེས་28ཉིན་རྒྱལ་སྲིད་སྤྱི་ཁྱབ་ཁང་གི་ཙུང་ལི་དབུན་ཅ་པའོ་ཡིས་ཁྭ་ལ་ལུམ་ཕུར་མ་ལེ་ཞི་ཡའི་ཙུང་ལི་ན་ཅེ་ཕུའུ་དང་གྲོས་མོལ་གནང་ཞིང་། ཕྱོགས་གཉིས་པོས་ཀྲུང་གོ་དང་མ་ལེ་ཞི་ཡ་རྒྱལ་ཁབ་གཉིས་པོའི་འཐབ་ཇུས་རང་བཞིན་གྱི་མཉམ་ལས་དང་དེ་བཞིན་ཐུན་མོང་ཐོག་དོ་ཁུར་བྱེད་པའི་རྒྱལ་སྤྱི་དང་ས་ཁུལ་གྱི་གནད་དོན་སྐོར་ལ་དགོངས་འཆར་བརྗེ་རེས་གཏིང་ཟབ་གནང་ནས་ངོས་འཛིན་གཅིག་མཐུན་ཡོང་ཐབས་གནང་བ་རེད།
དབུན་ཅ་པའོ་ཡིས་ཀྲུང་གོ་དང་མ་ལེ་ཞི་ཡ་རྒྱལ་ཁབ་གཉིས་པོའི་དབར་སྲོལ་རྒྱུན་གྱི་མཛའ་གྲོགས་ཟབ་མོ་ལྡན་ལ་ཕན་ཚུན་མཛའ་གྲོགས་ཀྱི་འགྲོ་འོང་དམ་ཟབ་ཀྱང་ཡོད། ཕྱོགས་གཉིས་པོས་རང་རང་སོ་སོའི་སྲོག་ཤིང་དུ་གྱུར་པའི་ཁེ་ཕན་གྱི་གནད་དོན་ལ་ཕན་ཚུན་རྒྱབ་སྐྱོར་བྱེད་པ་དང་། དོ་ཁུར་བྱེད་པའི་གནད་དོན་གལ་ཆེན་ལ་ཕན་ཚུན་ལྟ་རྟོག་བྱེད་པ། རྒྱལ་སྤྱིའི་དངུལ་རྩའི་ཉམས་ཉེན་ལ་ལག་གདང་སྦྲེལ་ནས་ཁ་གཏད་གཅོག་པ་བཅས་བྱས་པས་ཁྱབ་ཁོངས་ཁག་ནང་སྤེལ་རེས་དང་མཉམ་ལས་གཏིང་ཟབ་ཏུ་ཕྱིན་ནས་རྒྱལ་ཁབ་གཉིས་པོའི་དབར་གྱི་འབྲེལ་བའི་ཐད་འཕེལ་ཕྱོགས་བཟང་པོ་ཞིག་ཐོན་ཡོད། ཀྲུང་གོ་དང་མ་ལེ་ཞི་ཡ་རྒྱལ་ཁབ་གཉིས་པོ་ད་ལྟ་འཕེལ་རྒྱས་འགྲོ་བཞིན་པའི་འགག་རྩའི་དུས་མཚམས་སུ་སླེབས་ཡོད་པས་དེང་སྐབས་ཀྱི་ཪྙོག་འཛིང་ཆེ་བའི་རྒྱལ་སྤྱི་དང་ས་ཁུལ་གྱི་ཁོར་ཡུག་དེའི་མདུན་དུ་མཉམ་ལས་བྱེད་རྒྱ་སྔར་བས་ཆེ་རུ་བཏང་སྟེ་འགྲན་སློང་ལ་དེ་བས་ལེགས་པའི་ངང་ཁ་གཏད་བཅག་ནས་ཐུན་མོང་གི་ཁེ་ཕན་སྲུང་སྐྱོང་ཡག་པོ་བྱེད་དགོས་ཞེས་གསུངས་པ་རེད།
ན་ཅེ་ཕུའུ་ཡིས་མ་ལེ་ཞི་ཡ་ཡིས་ཀྲུང་གོའི་དབར་གྱི་འབྲེལ་བར་ཚད་མཐོའི་མཐོང་ཆེན་དང་ཀྲུང་གོ་འདི་ཉིད་མཛའ་མཐུན་གྱི་གྲོགས་པོ་དང་བློས་འགེལ་ཆོག་སའི་རོགས་ཟླ་ཞིག་ཏུ་བརྩི་གི་ཡོད། ཉེ་བའི་ལོ་ཤས་རིང་ཕྱོགས་གཉིས་པོའི་ཐུན་མོང་གི་འབད་བརྩོན་འོག་རྒྱལ་ཁབ་གཉིས་པོའི་ཁྱབ་ཁོངས་ཁག་གི་མཉམ་ལས་ལ་དགེ་མཚན་ལྡན་པའི་གྲུབ་འབྲས་ཐོབ་ཡོད། ཐེངས་འདིར་ཙུང་ལི་དབུན་ཅ་པའོ་འཚམས་འདྲིར་ཕེབས་པ་དེས་ཀྲུང་གོ་དང་མ་ལེ་ཞི་ཡ་རྒྱལ་ཁབ་གཉིས་པོའི་འབྲེལ་བ་འཕེལ་རྒྱས་འགྲོ་རྒྱུར་གསོན་ཤུགས་གསར་པ་ཞིག་སྦྱིན་རྒྱུ་རེད། མ་ལེ་ཞི་ཡ་ཕྱོགས་ཀྱིས་མ་ལེ་ཞི་ཡ་དང་ཀྲུང་གོ་རྒྱལ་ཁབ་གཉིས་པོའི་དབར་གྱི་འབྲེལ་བ་འབྱུང་འགྱུར་ཡག་པོ་ཞིག་ཡོང་རྒྱུར་ཡིད་ཆེས་ཆེན་པོ་ཡོད། ཀྲུང་གོ་ཕྱོགས་དང་མཉམ་ལས་དམ་ཟབ་བྱས་ནས་རྒྱལ་ཁབ་གཉིས་པོའི་འབྲེལ་བ་འཕེལ་རྒྱས་དེ་བས་ཆེན་པོ་ཡོང་རྒྱུར་སྐུལ་འདེད་གཏོང་འདོད་ཡོད་ཅེས་གསུངས་པ་རེད།
དབུན་ཅ་པའོ་ཡིས་ད་དུང་ཀྲུང་གོ་དང་མ་ལེ་ཞི་ཡ་རྒྱལ་ཁབ་གཉིས་པོའི་འཐབ་ཇུས་རང་བཞིན་གྱི་མཉམ་ལས་འབྲེལ་བ་འཕེལ་རྒྱས་འགྲོ་རྒྱུར་སྔར་བས་སྐུལ་འདེད་གཏོང་རྒྱུའི་གྲོས་འགོ་བཏོན་གནང་བ་རེད།