མི་དམངས་ཉིན་རེའི་ཚགས་པར་ཁང་དུ་པེ་ཅིང་ནས་ཟླ་4ཚེས་28ཉིན་གློག་འཕྲིན་འབྱོར་གསལ། ཕྱི་རྒྱལ་དུ་བཅའ་སྡོད་འདི་ག་ཚགས་པར་གྱི་གསར་འགོད་པ་ལི་ཤའོ་དང་། ཤིས་ལའེ་དབང་། ཝུའུ་ཡུན་བཅས་ཀྱིས་སྤེལ་བའི་གནས་ཚུལ་ཕྱོགས་བསྡུས། བྱང་ཆིངས་མཉམ་འབྲེལ་དམག་གི་དམག་འཐབ་གནམ་གྲུས་ས་གནས་དེ་གའི་དུས་ཚོད་ཚེས་28ཉིན་གྱི་ཐོ་རེངས་སུ་སླར་ཡང་ལི་པི་ཡའི་རྒྱལ་ས་ཐི་རི་ཕོ་ལིར་མཁའ་ཐོག་ནས་འཇབ་རྒོལ་བྱས་ཤིང་། མཁའ་ཐོག་འཇབ་རྒོལ་གྱི་དམིགས་ས་ནི་གྲོང་ཁྱེར་དེའི་ཤར་རྒྱུད་ཀྱི་དམག་དོན་སློབ་གླིང་ཞིག་ཡིན་པ་དང་མཁའ་ཐོག་འཇབ་རྒོལ་ཁྲོད་ཉུང་མཐར་ཡང་མི་བཞི་ལ་རྨས་སྐྱོན་ཕོག་ཡོད་པ་རེད། ལི་པི་ཡའི་མངའ་ཁོངས་ནང་གི་ཚོ་པ་མང་པོ་ཞིག་གི་འཐུས་མིས་ཚེས་27ཉིན་མཉམ་འབྲེལ་གསལ་བསྒྲགས་སྤེལ་ནས་དམག་འཁྲུག་མགྱོགས་མྱུར་མཇུག་བསྒྲིལ་ནས་རྒྱལ་ཁབ་ཁ་བྲལ་གྱི་གནས་སུ་མི་གྱར་རྒྱུའི་རེ་འབོད་བྱས་པ་རེད།

    ཚེས་28ཉིན་མཉམ་འབྲེལ་རྒྱལ་ཚོགས་འགྲོ་བ་མིའི་ཐོབ་ཐང་ལས་འཛིན་ལྷན་ཚོགས་ཀྱི་མི་གསུམ་ལས་གྲུབ་པའི་རང་ཚུགས་བརྟག་དཔྱད་ཚོགས་ཆུང་གིས་ཐི་རི་ཕོ་ལིར་ལས་དོན་སྤེལ་འགོ་བཙུགས་ནས་ས་གནས་དེ་གའི་དུས་བབ་ཟང་ཟིང་བྱུང་རིང་གི་འགྲོ་བ་མིའི་ཐོབ་ཐང་གི་གནས་ཚུལ་ལ་བཅར་འདྲི་དང་བརྟག་དཔྱད་བྱས་ཡོད། བརྟག་དཔྱད་ཚོགས་ཆུང་གིས་དེ་ཉིན་སྨན་ཁང་དང་། སློབ་གྲྭ བཙོན་ཁང་སོགས་སུ་བཅར་འདྲི་བྱེད་པར་བསྐྱོད་ནས་ས་གནས་དེ་གའི་མང་ཚོགས་དང་ངོ་ཐུག་གདོང་འཕྲད་ངང་སྤེལ་རེས་དང་འབྲེལ་བ་བྱས་པ་རེད། ཤེ་ལི་ཕུའུ་ཡིས་བརྟག་དཔྱད་ཚོགས་པས་གྲོང་ཁྱེར་དང་ས་ཁུལ་མང་པོ་ཞིག་ཏུ་བཅར་འདྲི་བྱེད་པར་བསྐྱོད་དེ་དམག་འཁྲུག་གི་ཟིང་ཆའི་རིང་མི་སེར་ཤི་རྨས་དང་། གླས་དམག་གི་བྱེད་སྒོ འདྲི་གཅོད་དང་ཁྲིམས་ཆད་སོགས་འགྲོ་བ་མིའི་ཐོབ་ཐང་ལ་བཙན་གནོད་བྱས་པ་དང་འབྲེལ་བ་ཡོད་སྲིད་པའི་དོན་རྐྱེན་མཐའ་དག་ལ་བརྟག་དཔྱད་བྱ་རྒྱུ་རེད་ཅེས་གསུངས་ཤིང་། ཤེས་རྟོགས་བྱུང་བར་གཞིགས་ན། བརྟག་དཔྱད་ཚོགས་པ་དེས་ཟླ་བ་དྲུག་པའི་གོང་དུ་མཉམ་འབྲེལ་རྒྱལ་ཚོགས་ལ་ལི་པི་ཡའི་འགྲོ་བ་མིའི་ཐོབ་ཐང་དང་འབྲེལ་བ་ཡོད་པའི་གནས་ཚུལ་སྐོར་གྱི་སྙན་ཞུ་འབུལ་རྒྱུ་ཡིན་པ་རེད། ཚེས་27ཉིན་ལི་པི་ཡའི་ཕྱི་འབྲེལ་དཔོན་ཨའོ་པེ་ཏིས་ཐུ་ནི་སིར་འཚམས་འདྲི་གནང་བ་དང་ཐུ་ནི་སིའི་ཕྱི་འབྲེལ་དཔོན་ཁེ་ཕེ་དང་གྲོས་མོལ་གནང་ནས་ཐུ་ནི་སི་ཕྱོགས་ནས་ཕྱི་འབྲེལ་དང་ཉམ་ཐག་མི་སེར་བཀོད་སྒྲིག་སོགས་ཀྱི་གནད་དོན་ཐད་རྒྱབ་སྐྱོར་ཐོབ་རྒྱུའི་བརྩོན་ལེན་བྱས་པ་རེད།