ཙུང་ལི་དབུན་ཅ་པའོ་ཡིས་ཧིན་རྡུ་ཉི་ཞི་ཡར་དངོས་གཞིའི་འཚམས་འདྲི་མ་གནང་གོང་ཧིན་རྡུ་ཉི་ཞི་ཡར་བཅའ་སྡོད་ཀྲུང་གོའི་གཞུང་ཚབ་ཆེ་མོ་བ་ཀྲང་ཆི་གཡོད་ཀྱིས་ཅ་ཁར་ཐར་ཀྲུང་གོའི་སྨྱན་སྦྱོར་གྱི་མཉམ་འབྲེལ་བཅར་འདྲི་དང་ལེན་གནང་སྐབས་མིག་སྔའི་ཀྲུང་གོ་དང་ཧིན་རྡུ་ཉི་ཞི་ཡའི་འབྲེལ་བ་དང་ཀྲུང་གོ་དང་ཨེ་ཤེ་ཡ་ཤར་ལྷོའི་མནའ་འབྲེལ་འབྲེལ་བ་དེ་སྔ་འཛིན་ཕྱི་གཏོད་ཀྱི་འགག་རྩའི་དུས་སྐབས་སུ་སླེབས་ཡོད་པས་ཙུང་ལི་དབུན་ཅ་པའོ་ཡིས་ཧིན་རྡུ་ཉི་ཞི་ཡར་དངོས་གཞིའི་འཚམས་འདྲི་ཐེངས་དང་པོ་གནང་བའི་དུས་སྐབས་གལ་ཆེ་ལ་དོན་སྙིང་གལ་ཆེན་ལྡན་ཡོད་པས་ཕྱོགས་གཉིས་ཀྱི་འཐབ་ཇུས་རོགས་ཟླའི་འབྲེལ་བ་འཕེལ་རྒྱས་འགྲོ་རྒྱུར་སྐུལ་མ་ནུས་ལྡན་ཐེབས་པ་དང་གཉིས་ཁེ་གཉིས་ཕན་གྱི་རྣམ་པ་གསར་པ་གཏོད་ཐུབ་ངེས་རེད་ཅེས་གསུངས་པ་རེད།
ཀྲང་ཆི་གཡོད་ཀྱིས་དུས་རབས་འདིའི་ལོ་བཅུ་ཚན་དང་པོར་རྒྱལ་སྤྱི་དང་ས་ཁུལ་གྱི་དུས་བབ་ཪྙོག་འཛིང་ཆེ་ལ་གཏིང་ཟབ་པའི་འགྱུར་ལྡོག་བྱུང་ཞིང་། ཨེ་ཤེ་ཡའི་འཕེལ་རྒྱས་ལ་མི་རྣམས་ཀྱིས་དེ་བས་དོ་ཁུར་ཆེན་པོ་བྱེད་ཀྱི་ཡོད་པ་དང་འཛམ་གླིང་ཐོག་གི་འཕེལ་རྒྱས་ཀྱི་གསོན་ཤུགས་ཆེ་ཤོས་ལྡན་པའི་ས་ཁུལ་ཞིག་ལ་གྱུར་ཡོད། ཀྲུང་གོ་དང་། ཧིན་རྡུ་ཉི་ཞི་ཡ། ཨེ་ཤེ་ཡ་ཤར་ལྷོའི་མནའ་འབྲེལ་བཅས་ཀྱི་རང་ངོས་ཀྱི་དཔལ་འབྱོར་དང་སྤྱི་ཚོགས་འཕེལ་རྒྱས་ལ་གྲུབ་འབྲས་མངོན་གསལ་དོད་པོ་ཐོབ་ཡོད་པ་དང་ཨེ་ཤེ་ཡ་ཤར་ལྷོའི་མནའ་འབྲེལ་གྱི་གཞི་གཅིག་ཅན་གྱི་འཕེལ་རིམ་མགྱོགས་སུ་ཕྱིན་ཁར་ས་ཁུལ་དབར་གྱི་མཉམ་ལས་རྒྱུན་ཆད་མེད་པར་གཏིང་ཟབ་ཏུ་ཕྱིན་ནས་ཀྲུང་གོ་དང་ཧིན་རྡུ་ཉི་ཞི་ཡ་དང་དེ་བཞིན་ཨེ་ཤེ་ཡ་ཤར་ལྷོའི་འབྲེལ་བ་དེ་འཕེལ་རྒྱས་ཀྱི་དུས་སྐབས་གསར་པར་སླེབས་པའི་ངོས་འཛིན་གནང་བ་རེད།
ཁོང་གིས་ད་ཕན་ལོ་ཤས་རིང་ཧིན་རྡུ་ཉི་ཞི་ཡས་དཔལ་འབྱོར་དང་སྤྱི་ཚོགས་ཀྱི་འཕོ་འགྱུར་སྣ་ཚོགས་བརྒྱུད་ནས་འཕེལ་རྒྱས་ཀྱི་ལམ་བུ་བརྟན་པོ་ཞིག་གི་ཐོག་སྐྱོད་དེ་ས་ཁུལ་དང་འཛམ་གླིང་གི་གར་སྟེགས་ཐོག་དགེ་མཚན་ལྡན་པའི་ནུས་པ་འདོན་བཞིན་ཡོད་ཅིང་། འདི་ལོ་ནི་ཀྲུང་གོ་དང་ཨེ་ཤེ་ཡ་ཤར་ལྷོའི་མནའ་འབྲེལ་དབར་གླེང་མོལ་བྱེད་རེས་ཀྱི་འབྲེལ་བ་བཙུགས་ནས་ལོ་20འཁོར་བ་དང་ཧིན་རྡུ་ཉི་ཞི་ཡས་ཨེ་ཤེ་ཡ་ཤར་ལྷོའི་རེས་འཁོར་ཀྲུའུ་ཞིའི་རྒྱལ་ཁབ་ཀྱི་འགན་འཁུར་ཡོད་ཅིང་། ཨེ་ཤེ་ཡ་ཤར་ལྷོའི་མནའ་འབྲེལ་གྱི་དཔལ་འབྱོར་དངོས་ཚན་དང་རེས་འཁོར་ཀྲུའུ་ཞིའི་རྒྱལ་ཁབ་ཆེ་ཤོས་ཡིན་པའི་ཧིན་རྡུ་ཉི་ཞི་ཡས་ཀྲུང་གོ་དང་ཨེ་ཤེ་ཡ་ཤར་ལྷོའི་མནའ་འབྲེལ་གྱི་འབྲེལ་བ་དང་ཨེ་ཤེ་ཡ་ཤར་ལྷོའི་གཞི་གཅིག་ཅན་གྱི་འཛུགས་སྐྲུན་དང་ས་ཁུལ་དབར་གྱི་མཉམ་ལས་ཁྲོད་ནུས་པ་གལ་ཆེན་བཏོན་ཡོད། ཀྲུང་གོ་དང་ཧིན་རྡུ་ཉི་ཞི་ཡ་གཉིས་ཀ་ཨེ་ཤེ་ཡའི་འཕེལ་རྒྱས་འགྲོ་བཞིན་པའི་རྒྱལ་ཁབ་ཆེན་པོའི་ཁོངས་སུ་གཏོགས་ཡོད་པས་དཔལ་འབྱོར་སྔར་བས་འཕེལ་རྒྱས་གཏོང་བ་དང་དམངས་འཚོ་ལེགས་སུ་གཏོང་རྒྱུ་དེ་ནི་རྒྱལ་ཁབ་གཉིས་ཀྱི་ཐུན་མོང་གི་ལས་འགན་ཡིན། དཔལ་འབྱོར་འཕེལ་རྒྱས་གཏོང་བ་དང་། དབུལ་པོ་མེད་པ་བཟོ་བ། འབྲུ་རིགས་དང་ནུས་རྒྱུའི་བདེ་འཇགས། གནམ་གཤིས་ཀྱི་འགྱུར་ལྡོག སྲོལ་རྒྱུན་མིན་པའི་བདེ་འཇགས་ཐད་ཀྱི་འགྲན་སློང་ལ་ཁ་གཏད་གཅོག་པ་སོགས་གནད་དོན་གལ་ཆེན་རབ་དང་རིམ་པའི་ཐད་ཕྱོགས་གཉིས་ཀར་རྒྱ་ཁྱབ་དང་ཐུན་མོང་གི་ཁེ་ཕན་ལྡན་ཡོད། ཕྱོགས་གཉིས་ཀས་ས་ཁུལ་དབར་གྱི་མཉམ་ལས་གཏིང་ཟབ་ཏུ་གཏོང་རྒྱུར་གཞོལ་བ་དང་གླེང་མོལ་དང་གྲོས་མོལ་བྱས་པ་བརྒྱུད་མི་མཐུན་ས་མེད་པ་བཟོས་ཏེ་ས་ཁུལ་གྱི་ཞི་བདེ་དང་བརྟན་ལྷིང་སྲུང་སྐྱོང་དང་ཐུན་མོང་ཐོག་ཡར་རྒྱས་འགྲོ་འགྱུར་སྐུལ་འདེད་གཏོང་དགོས་ཞེས་གསུངས་པ་རེད།