མི་དམངས་ཉིན་རེའི་ཚགས་པར་ཁང་དུ་པེ་ཅིང་ནས་ཟླ་4ཚེས་26ཉིན་གློག་འཕྲིན་འབྱོར་གསལ། འདི་ག་ཚགས་པར་ཁང་གི་ཕྱི་རྒྱལ་དུ་བཅའ་སྡོད་གསར་འགོད་པས་གནས་ཚུལ་སྤེལ་བ་གཞིར་བཟུང་། ལུའུ་ཐའོ་གསར་འགྱུར་ཁང་གིས་ཨ་ཧྥེ་རི་ཁ་མནའ་འབྲེལ་ཕྱོགས་ཀྱི་ཆ་འཕྲིན་དྲངས་པར་གཞིགས་ན། ཚེས་25ཉིན་ལི་པི་ཡ་སྲིད་གཞུང་གིས་ངོ་རྒོལ་ཤོག་ཁག་གི་འཐུས་མི་དང་དེ་བཞིན་ཨ་ཧྥེ་རི་ཁ་མནའ་འབྲེལ་གྱི་འགོ་ཁྲིད་པ་དང་ལི་པི་ཡའི་རྒྱལ་ནང་གི་ཉམས་ཉེན་སེལ་རྒྱུའི་སྐོར་གྲོས་མོལ་བྱས་ཤིང་། ཨ་ཧྥེ་རི་ཁ་མནའ་འབྲེལ་གྱི་ཞི་བདེ་དང་བདེ་འཇགས་ཀྲོན་ཡོན་ལ་མུའུ་ཅ་ཉི་ཡིས་དེ་ནི་ངོ་རྒོལ་ཤོག་ཁག་ཞུགས་རྒྱུར་ཕན་པའི་གྲོས་མོལ་ཐེངས་དང་པོ་དེ་ཡིན་པ་དང་དེའི་རིང་ཨ་ཧྥེ་རི་ཁ་མནའ་འབྲེལ་དང་། མཉམ་འབྲེལ་རྒྱལ་ཚོགས། ཡོ་རོབ་མནའ་འབྲེལ་བཅས་ཀྱི་འཐུས་མིས་ཀྱང་དེའི་རྗེས་སུ་ཕྱོགས་གཉིས་པོའི་འཐུས་མི་སོ་སོ་དང་གྲོས་མོལ་བྱ་རྒྱུ་ཡིན་པ་རེད།

    ཨ་རབ་གསར་འགྱུར་དྲ་བའི་ཐོག་ཚེས་26ཉིན་གནས་ཚུལ་སྤེལ་བར་གཞིགས་ན། ཚེས་25ཉིན་གྱི་དགོང་མོ་ལི་པི་ཡའི་རྒྱལ་ས་ཐི་རི་ཕོ་ལིར་བྱང་ཆིངས་ཀྱིས་མཁའ་རྒོལ་བྱས་རྗེས་འབར་གས་ཧ་ཅང་ཆེན་པོ་ཐེངས་ལྔ་བྱུང་བ་དང་བྱང་ཆིངས་ཕྱོགས་ཀྱིས་ད་རེས་ཀྱི་རྒོལ་རྡུང་དམིགས་ཡུལ་ནི་ལི་པི་ཡའི་འཕྲིན་གཏོང་ལྟེ་གནས་གཏོར་རྒྱུ་དེ་ཡིན་ཞེས་བཤད་པ་རེད། ལི་པི་ཡ་སྲིད་གཞུང་གི་མགྲིན་ཚབ་པ་དབྱི་ཕུའུ་ལ་ཤིན་གྱིས་བྱང་ཆིངས་ཀྱིས་མཁའ་རྒོལ་བྱས་པ་དེ་ནི་གཏི་ཐུག་གི་འཇིགས་སྐུལ་རིང་ལུགས་པའི་བྱེད་སྟངས་ཤིག་རེད་ཅེས་སྐྱོན་འཛུགས་གནང་བ་མ་ཟད་ཁོང་གིས་ད་དུང་མིག་སྔར་ཁ་ཀྲ་ཕེ་བདེ་འཇགས་ཀྱི་གནས་སུ་ཡོད། ཡིན་ནའང་དེ་ནི་ཁོང་གིས་ཡིབ་ནས་བཞུགས་པ་ཞིག་མིན་ཞེས་གསུངས་པ་རེད།