ཕྱི་རྒྱལ་དུ་སློབ་སྦྱོང་བྱེད་མཁན་ཀྲུང་གོའི་སློབ་མའི་སྤེལ་རེས་དང་རོགས་སྐྱོར་གྱི་སེམས་ཤུགས་འཕེལ་བའི་མཐུན་ཚོགས་ཀྱི་ལས་འཛིན་དཔོན་ཝུའུ་ཧྲི་ལན་ཀྲེན་དབྱི་ནི་འདི་ལོ་ལོ་ 69 ལ་སླེབས་ཡོད་པ་དང་ཀྲུང་གོའི་གྲོགས་པོ་དང་སྤེལ་རེས་གཏིང་ཟབ་བྱ་ཆེད་ད་ལྟའང་རྒྱ་ཡིག་སློབ་སྦྱོང་བྱེད་ཀྱི་ཡོད།

    ཝུའུ་ཧྲི་ལན་དེ་སྔོན་རི་པིན་ཏ་ཙང་པུའུ (ད་ཆའི་ནོར་དོན་པུའུ་ཡིན་པ )དུ་ལས་ཀ་བྱེད་མྱོང་ཡོད་པ་དང་རྗེས་སུ་འགོག་སྲུང་ཐིང (ད་ཆའི་འགོག་སྲུང་པུའུ་ཡིན་པ )དུ་ལས་ཀའི་འགན་འཁུར་མྱོང་ཡོད། དུས་རབས་གོང་མའི་ལོ་རབས་བརྒྱད་ཅུ་པར་ཀྲུང་གོར་རྒྱུན་སྡོད་བྱེད་མྱོང་ཡོད་ཅིང་། ཁོང་གིས་སྟོབས་འབྱོར་ལྡན་པའི་རྒྱལ་ཁབ་ཅིག་ལ་དགྲར་འཛིན་པའི་བསམ་པ་རྩ་བ་ནས་མེད་ཚེ་དེ་འཇིགས་སྐུལ་དུ་འགྱུར་མི་སྲིད་པའི་ངོས་འཛིན་བྱེད་ཀྱི་ཡོད། ཀྲུང་གོའི་གོང་འཕེལ་སྐོར་གླེང་སྐབས་ཁོང་གིས་ལོ་རྒྱུས་ཀྱི་ཉམས་མྱོང་ཡིན་ནའང་འདྲ་ཡང་ན་ལོ་མང་རིང་གི་མཐོང་ཕྱོགས་མི་འདྲ་བར་གཞིགས་ནའང་འདྲ་རི་པིན་བ་མི་ཉུང་བ་ཞིག་གིས་འབྱུང་འགྱུར་གྱི་ཀྲུང་གོའི་གོང་འཕེལ་ལམ་བུ་དང་ཁ་ཕྱོགས་ལ་སེམས་ཁྲལ་སྣ་ཚོགས་བྱེད་ཀྱི་ཡོད་པ་དང་ལྷག་དོན་དུ་ཀྲུང་གོའི་དམག་གྲབས་སྟོབས་ཤུགས་ཆེ་རུ་སོང་བ་མཐོང་སྐབས་ཀྲུང་གོར་དོགས་ཟོན་བྱེད་བསམ་ཆེ་རུ་སོང་ཡོད་ཅེས་བཤད་ཅིང་། ཁོང་གིས་དེ་ནི་རི་པིན་བ་ཁག་གཅིག་གིས་ཀྲུང་གོར་ངོས་འཛིན་དང་ཤེས་རྟོགས་བྱ་རྒྱུ་མི་འདང་བ་ལས་ཐོན་པ་ཞིག་ཡིན་པའི་ངོས་འཛིན་བྱེད་ཀྱི་ཡོད་པ་རེད། ཝུའུ་ཧྲི་ལན་གྱིས་རྒྱལ་ཁབ་དང་རྒྱལ་ཁབ་དབར་དང་ལྷག་དོན་དུ་རྒྱལ་དམངས་དབར་ཕན་ཚུན་བསམ་ཤེས་ཟབ་ཏུ་གཏོང་རྒྱུ་ནི་གལ་འགངས་ཤིན་ཏུ་ཆེན་པོ་ཞིག་ཡིན་ཞིང་། སྐད་ཆ་ཤོད་རེས་དང་། འབྲེལ་གཏུག སྤེལ་རེས་བཅས་བྱེད་པ་དང་ཆབས་ཅིག་གནད་དོན་མང་པོ་ཞིག་རང་བཞིན་དུ་ཐག་ཆོད་ཐུབ་ཀྱི་ཡོད་ཅེས་བཤད་ཅིང་། ཁོང་གིས་2004 ལོའི་ཟླ་12 པར་ཕྱི་རྒྱལ་དུ་སློབ་སྦྱོང་བྱེད་མཁན་ཀྲུང་གོའི་སློབ་མའི་སྤེལ་རེས་དང་རོགས་སྐྱོར་གྱི་སེམས་ཤུགས་འཕེལ་བའི་མཐུན་ཚོགས་འཛུགས་རྒྱུའི་བསམ་ཚུལ་སྐོར་གླེང་སྐབས་སྐབས་དེ་དུས་རི་པིན་གྱི་དབུ་བཞུགས་བློན་ཆེན་གྱི་འགན་འཁུར་བའི་ཞའོ་ཆོན་གྱིས་གཡུལ་སར་སྲོག་ཤོར་བའི་དཔོན་དམག་ལ་ཕྱག་མཆོད་བྱ་ཡུལ་དུ་ཕྱག་མཆོད་བྱེད་པ་སོགས་གནད་དོན་ཐོན་ནས་ཀྲུང་གོ་དང་རི་པིན་གྱི་འབྲེལ་བ་དེ་སྡུག་ཤོས་སུ་སླེབས་ཡོད། ཕྱི་རྒྱལ་དུ་སློབ་སྦྱོང་བྱེད་མཁན་ཀྲུང་གོའི་སློབ་མས་རི་པིན་དུ་འབད་འབུངས་ལོ་མང་བྱས་རྗེས་རི་པིན་གྱི་གྲོགས་པོ་དང་སྤེལ་རེས་དང་བསམ་ཤེས་བྱ་རྒྱུ་མི་འདང་བའི་དབང་གིས་རི་པིན་ལ་བག་ཆགས་ངན་པ་བྱུང་ནས་ཕྱིར་ལོག་བྱེད་ཀྱི་ཡོད། རི་པིན་དུ་སློབ་སྦྱོང་བྱེད་མཁན་ཀྲུང་གོའི་སློབ་མས་མཛའ་གྲོགས་ཀྱི་ཟམ་པའི་ནུས་པ་བཏོན་ནས་རི་པིན་གྱི་གྲོགས་པོ་དེ་བས་མང་བ་སྒྲིག་ཏེ་ཕན་ཚུན་བསམ་ཤེས་བྱ་ཤུགས་ཆེ་རུ་གཏོང་རོགས་བྱ་རྒྱུའི་རེ་བ་བྱེད་ཀྱི་ཡོད་ཅེས་བཤད་པ་དང་སྦྲགས་ཀྲུང་གོའི་སྤྱི་ཚོགས་དང་། དཔལ་འབྱོར། རིག་གནས་བཅས་ཀྱི་སྣ་མང་རང་བཞིན་ལ་འཛིན་པའི་རི་པིན་བ་དེ་བས་མང་བའི་ངོས་འཛིན་བྱ་ཤུགས་ཆེ་རུ་གཏོང་དགོས་པ་དང་ཀྲུང་གོ་གོང་འཕེལ་འགྲོ་བར་ལྟ་སྟངས་ཡང་དག་འཛིན་པ་ལས་ཀྲུང་གོར་རང་ཤེད་ཀྱིས་འོལ་ཚོད་ཀྱི་མཇུག་བསྡོམས་བྱ་རྒྱུ་མེད་པ་སེམས་ཀྱི་གཏིང་ནས་ཚོར་གྱི་འདུག་ཅེས་བཤད་པ་རེད།

    བཅར་འདྲི་བྱེད་རིང་ད་དུང་ཝུའུ་ཧྲི་ལན་གྱིས་འདི་ག་ཚགས་པར་གྱི་གསར་འགོད་པར་2007 ལོར་ཙུང་ལི་དབུན་ཅ་པའོ་ཡིས་ཀྲུང་གོ་དང་རི་པིན་གྱི་ཕྱི་འབྲེལ་འབྲེལ་བ་ལེགས་སུ་གཏོང་རིང་རྒྱལ་དོན་འཚམས་འདྲི་གནང་སྐབས་རི་པིན་གྱི་རྒྱལ་ཚོགས་སུ་གསུངས་བའི་གཏམ་བཤད་ཡིག་ཆ་དང་སྒྲ་འཇུག་བསྟན་བྱུང་། ཁོང་གིས་ཙུང་ལི་དབུན་ཅ་པའོ་ཡི་གཏམ་བཤད་དེ་ངས་ག་ཚོད་བལྟས་མེད་དང་ག་ཚོད་ཉན་མེད་ཤོད་རྒྱུ་མི་འདུག ཙུང་ལི་དབུན་ཅ་པའོ་ཡི་གཏམ་བཤད་དེ་ཧ་ཅང་ཡག་པོ་ཡོད་པས་ངས་ཤིན་ཏུ་དགའ་པོ་བྱེད་ཀྱི་ཡོད་པ་དང་དེའི་ནང་གི་ཀྲུང་གོ་ཞི་བདེའི་ངང་གོང་འཕེལ་འགྲོ་བ་དང་མཐུན་སྦྱོར་ལྡན་པའི་འཛམ་གླིང་དབར་གྱི་ནང་དོན་དེས་ང་ལ་བག་ཆགས་ཟབ་མོ་བྱུང་ཞེས་བཤད་པ་རེད།

    ཝུའུ་ཧྲི་ལན་གྱིས་ཀྲུང་གོར་ཞི་བདེའི་གོང་འཕེལ་གྱི་ཁོར་ཡུག་ཅིག་ཡོད་དགོས། འཛམ་གླིང་ཐོག་ཞི་བདེར་མི་དགའ་བའི་མི་མེད་ཅིང་། ཀྲུང་གོས་ཞི་བའི་གོང་འཕེལ་གྱི་ལམ་བུའི་ཐོག་བསྐྱོད་ཡོད་པ་དང་ཀྲུང་གོ་འདི་ཉིད་ཞི་བདེའི་ངང་གོང་འཕེལ་གཏོང་བ་དེ་ཨེ་ཤེ་ཡ་དང་འཛམ་གླིང་གི་ཞི་བདེ་དང་འབྲེལ་བ་ཟབ་མོ་ཡོད་། ནུས་ཁུངས་དང་གནམ་གཤིས་སོགས་འབྱུང་འགྱུར་མིའི་རིགས་ཀྱི་གོང་འཕེལ་དང་འབྲེལ་བ་ཡོད་པའི་གནད་དོན་མང་དག་ཅིག་ལ་འཛམ་གླིང་ཡོངས་ཀྱི་ཁྱབ་ཁོངས་ནང་ཐུན་མོང་ཐོག་འབད་བརྩོན་བྱས་ནས་ཐག་གཅོད་བྱེད་དགོས་ཀྱི་ཡོད་པར་བརྟེན་རྒྱལ་ཁབ་ཁག་གིས་ལག་གདང་སྦྲེལ་ནས་མཉམ་ལས་བྱེད་པ་དང་ཞི་བདེའི་ངང་གོང་འཕེལ་བཏང་ཚེ་འཛམ་གླིང་འདི་ཉིད་ལ་མཛེས་སྡུག་ལྡན་པའི་འབྱུང་འགྱུར་ཞིག་ཡོང་ངེས་ཡིན་ཞེས་བཤད་པ་རེད།