མི་དམངས་ཉིན་རེའི་ཚགས་པར་ཁང་དུ་པང་ཁོག་ནས་ཟླ་4ཚེས་19ཉིན་གློག་འཕྲིན་འབྱོར་གསལ། ཏུང་ཅིང་ནས་གནས་ཚུལ་འབྱོར་གསལ། རི་པིན་ཏུང་ཅིང་གློག་ཤུགས་ཀུང་སིས་ཚེས་19ཉིན་ནས་བཟུང་འཕྲུལ་ཙུའུ་ཁང་གཉིས་པའི་ནང་གི་འགྱེད་འཕྲོའི་རང་བཞིན་ཆེ་བའི་བཙོག་ཆུ་འབོར་ཆེན་དེ་དག་འགྱེད་འཕྲོའི་རང་བཞིན་གྱི་ཕན་མེད་དངོས་རིགས་ཐག་གཅོད་སྒྲིག་ཆས་ནང་ཐག་གཅོད་བྱ་རྒྱུ་རེད། བཙོག་ཆུ་ཐག་གཅོད་བྱ་རྒྱུ་དེས་ཉིང་རྡུལ་གློག་ཁང་གྲང་བཟོའི་ནུས་པ་སླར་གསོ་བྱེད་བཞིན་པའི་ལས་ཀར་ཕན་ཐོགས་ཡོད་པ་མ་ཟད། བྱེད་ཐབས་དེས་བཙོག་ཆུ་བཟོ་ཁང་དེ་དང་འབྲེལ་བའི་ཐད་ཁྲོན་བརྒྱུད་དེ་རྒྱ་མཚོའི་ནང་རྒྱུག་རྒྱུ་སྔོན་འགོག་བྱ་ཆེད་རེད།

    ཏུང་ཅིང་གློག་ཤུགས་ཀུང་སིས་ཕུའུ་ཏའོ་ཉིང་རྡུལ་གློག་ཁང་དང་པོའི་འཕྲུལ་ཙུའུ་གཉིས་པའི་ནང་སྒྲོ་གཤོག་སྒུལ་བྱེད་འཕྲུལ་འཁོར་ཁང་གི་ས་འོག་ཁང་དང་སྒྲོ་གཤོག་སྒུལ་བྱེད་འཕྲུལ་འཁོར་ཁང་ཕྱིའི་ཐད་ཁྲོན་ནང་འགྱེད་འཕྲོའི་རང་བཞིན་ཆེ་བའི་བཙོག་ཆུ་ཏུན་ཁྲི་2.5ཙམ་ཡོད་པ་དང་ལས་དོན་མི་སྣས་གཟའ་འཁོར་བཞི་ཡི་དུས་ཚོད་སྤྱད་དེ་དེའི་ནང་གི་བཙོག་ཆུ་ཏུན་ཁྲི་1ཙམ་ཕན་མེད་དངོས་རིགས་ཐག་གཅོད་སྒྲིག་ཆས་ནང་གཅིག་སྡུད་ཐོག་ཐག་གཅོད་བྱ་རྒྱུ་རེད། དེ་བྱིངས་ཀྱི་ལྷག་མ་ཏུན་ཁྲི་1.5ཙམ་དེ་འགྱེད་འཕྲོའི་རང་བཞིན་ཆེ་བའི་བཙོག་ཆུ་ཐག་གཅོད་བྱེད་ཐབས་ཀྱི་ཐོག་ནས་གཙང་བཟོའི་མ་ལག་ལ་གཞིགས་ཏེ་ཞིབ་འཇུག་བྱ་རྒྱུ་ཡིན་ལུགས་བསྟན་པ་རེད།

    ཨུ་རུ་སུའི་ཕྱི་འབྲེལ་པུའུ་ཡིས་ཚེས་18ཉིན་གྱི་དགོང་མོ་རི་པིན་དུ་ཡུལ་སྐོར་དུ་མི་བསྐྱོད་རྒྱུའི་ཐ་ཚིག་དེ་མེད་པ་བཟོས་ཀྱང་སྔར་བཞིན་ཨུ་རུ་སུའི་སྤྱི་དམངས་ལ་མིག་སྔར་གེགས་བར་བྱུང་ཁུལ་དུ་གང་ཉུང་ཉུང་བསྐྱོད་རྒྱུའི་གྲོས་འགོ་བཏོན་པ་རེད། རི་པིན་སྨྱན་སྦྱོར་གྱིས་ཐག་གཅོད་དེ་ཨུ་རུ་སུའི་རིགས་གཅིག་མཁས་ཅན་རི་པིན་དུ་བསྐྱོད་ནས་ས་གནས་ས་ཐོག་ཏུ་རྟོག་ཞིབ་བྱས་རྗེས་བཏོན་པའི་གྲོས་འགོ་གཞིར་བཟུང་བཏོན་པ་ཞིག་རེད་ཅེས་བཤད་པ་རེད།

    རི་པིན་ཉེན་རྟོག་ཐིང་གིས་ས་གནས་དེ་གའི་དུས་ཚོད་ཚེས་19ཉིན་གྱི་ཆུ་ཚོད་18ཐོག་ཡོངས་བསྒྲགས་བྱས་པའི་སྙན་ཞུ་ཞིག་གི་ཐོག་ནས་རི་པིན་དུ་ས་ཡོམ་དྲག་པོ་བརྒྱབ་པ་དང་དེ་བཞིན་དེ་ལས་བྱུང་བའི་མཚོ་ཡོམ་ནང་མི་གྲངས་14001རྐྱེན་ལམ་དུ་ཤོར་བ་དང་མི་གྲངས་13660གར་སོང་ཆ་མེད་དུ་སོང་བའི་གཏན་འཁེལ་བྱས་པ་མཚོན་ཡོད། ཉེན་རྟོག་ཐིང་གིས་ཆུ་སུབ་ཐེབས་ནས་ཤི་བ་ཕུད་མནན་ནས་ཤི་བ་དང་རྨས་སྐྱོན་ཚབས་ཆེན་ཕོག་ནས་ཤི་བ་དེ་མཚོ་ཡོམ་ལས་བྱུང་བ་ཞིག་ཡིན་པ་དང་དེ་ནི་ཁང་པ་ལོག་ནས་ཡུལ་མི་འབོར་ཆེན་རྐྱེན་ལམ་དུ་ཤོར་བའི་པན་ཧྲེན་ས་ཡོམ་དྲག་པོ་དང་ཁྱད་པར་ཆེན་པོ་ཡོད་པའི་ངོས་འཛིན་བྱས་པ་རེད།

    ཤིན་ཧྭ་གསར་འགྱུར་ཁང་པེ་ཅིང་ནས་ཟླ་4ཚེས་19ཉིན་གློག་འཕྲིན་འབྱོར་གསལ། རི་པིན་ཕུའུ་ཏའོ་ཉིང་རྡུལ་ལས་འཛོལ་གྱིས་རང་རྒྱལ་ལ་ཤུགས་རྐྱེན་ཐེབས་སྲིད་པར་དམིགས་ནས་རྒྱལ་ཁབ་ཉིང་རྡུལ་ལས་འཛོལ་འཕྲལ་སྡོམ་མཐུན་སྦྱོར་ཨུ་ལྷན་གྱིས་ཟླ་4ཚེས་19ཉིན་སྒམ་བཙན་ཁྱབ་བསྒྲགས་བྱས་པ་སྟེ།

    པེ་ཅིང་གི་དུས་ཚོད་ཚེས་18ཉིན་གྱི་ཆུ་ཚོད་19དང་སྐར་མ་20ཐོག་རྒྱལ་སྤྱིའི་རྡུལ་ཕྲན་ནུས་པའི་སྒྲིག་གཞིས་རི་པིན་གྱི་ཏུང་ཅིང་གློག་ཤུགས་ཀུང་སིས་ཕུའུ་ཏའོ་ཉིང་རྡུལ་ལས་འཛོལ་རྗེས་ཀྱི་སླར་གསོའི་སྐུད་ལམ་ས་བཀྲ་ཡོངས་བསྒྲགས་བྱས་པ་དང་ཟླ་བ་དྲུག་ནས་དགུ་བར་གྱི་དུས་ཚོད་ནང་ཕྱིར་འཐེན་བྱས་པའི་ཡུལ་མི་རྣམས་ཕ་ཡུལ་དུ་བསྐྱར་ལོག་བྱས་ནས་སྤྱི་དམངས་ཀྱི་རྒྱུན་གཏན་འཚོ་བའི་སྒྲིག་ལམ་སླར་གསོ་ཡོང་བ་བྱ་རྩིས་ཡོད་པའི་བརྡ་ཁྱབ་བཏང་བ་རེད།

    རང་རྒྱལ་གྱི་ནང་སའི་ཁོར་ཡུག་གི་འགྱེད་འཕྲོའི་ཚད་གཞི་དང་བཟའ་བཅར་ཟུར་འཐེན་ཞིབ་དཔྱད་ཚད་ལེན་བྱས་འབྲས་དེ་ཚེས་18ཉིན་དང་བསྡུར་ན་འགྱུར་ལྡོག་མངོན་གསལ་དོད་པོ་བྱུང་མེད། འཐུང་ཆུར་ཟུར་འཐེན་ཞིབ་དཔྱད་ཚད་ལེན་བྱས་པ་བརྒྱུད་རྒྱུན་གཏན་མིན་པའི་གནས་ཚུལ་ཐོན་མེད་པ་རེད།