ཐའེ་ཚང་ནི་ཀྲུང་གོའི་ཅང་སུའུ་ཞིང་ཆེན་སུའུ་ཀྲོའུ་གྲོང་ཁྱེར་གྱི་རྫོང་རིམ་པའི་གྲོང་ཁྱེར་ཞིག་ཡིན་ཡང་འཇར་མན་གྱི་བཟོ་ཚོང་དང་དཔལ་འབྱོར་ལས་རིགས་ནང་སྙན་གྲགས་ཧ་ཅང་ཆེན་པོ་ཡོད་པས “འཇར་མན་གྱི་ཁེ་ལས་མང་པོ་འཛུགས་ས ”ཞེས་བརྗོད་ཀྱི་ཡོད། ཉིན་ཤས་གོང་འཇར་མན་ས་གནས་ཁག་ནས་ཡོང་བའི་ཁེ་ལས་མཁས་ཅན་200ལྷག་ཙམ་འཇར་མན་གྱི་པ་ཕུའུ་ཀྲོའུ་ཡི་ལྟེ་བའི་གྲོང་ཁྱེར་སི་ཐུ་ཅ་ཐེ་རུ་བསྐྱོད་དེ་ཐའེ་ཚང་གྲོང་ཁྱེར་སྲིད་གཞུང་གིས་གཉེར་བའི “ཐའེ་ཚང་དུ་བཙུགས་པའི་འཇར་མན་ཁེ་ལས་ཀྱི་ལོ་18རིང་གི་གནས་ཚུལ་དྲན་གསོ ”ཞེས་པའི་རྟེན་འབྲེལ་བྱེད་སྒོ་ཆེ་གྲས་ལ་ཞུགས་པ་རེད།

    ཅང་སུའུ་ཞིང་ཆེན་དང་པ་ཕུའུ་ཀྲོའུ་ནི་མཛའ་མཐུན་གྱི་ཞིང་ཆེན་དང་ཀྲོའུ་ཡིན་ཞིང་། 1993ལོར་འཇར་མན་གྱིས་མ་དངུལ་བཏང་པའི་ཁེ་ལས་དང་པོ་སྟེ་ལྡེམ་རྩིབ་བཟོ་མཁན་ཁོ་ཨེན ——ལི་པོ་སི་ཀུང་སི་དེ་ཐའེ་ཚང་དུ་བཙུགས་རྗེས་འཇར་མན་གྱི་ཁེ་ལས་150ལྷག་ཙམ་གཅིག་རྗེས་གཉིས་མཐུད་ངང་ཐའེ་ཚང་དུ་ཡོང་ནས་མ་དངུལ་བཏང་སྟེ་བྱ་གཞག་གཏོད་རྒྱུའི་ཡིད་དབང་འཕྲོག་པའི་ནང་ཤི་མན་ཙི་དང་། པའེ་ཨེར། ཧྲི་ཕུའུ་ལེ་སོགས་གྲགས་ཅན་ཁེ་ལས་ཚུད་ཡོད། 2008ལོའི་ཟླ་11པར་ཀྲུང་གོའི་ཚོང་དོན་པུའུ་དང་འཇར་མན་གྱི་དཔལ་འབྱོར་དང་ལག་རྩལ་པུའུ་གཉིས་ཀྱིས་ཐའེ་ཚང་དུ་ཀྲུང་གོའི “ཀྲུང་གོ་དང་འཇར་མན་གྱི་ཁེ་ལས་མཉམ་ལས་རྟེན་གཞི ”དང་པོ་དེ་བཙུགས་པ་རེད། ཀྲུང་གུང་ཐའེ་ཚང་གྲོང་ཨུད་ཀྱི་ཧྲུའུ་ཅི་ལུའུ་ལེའུ་ཧྲེང་གིས་ལོ་18ཀྱི་རིང་འཇར་མན་གྱི་ཁེ་ལས་ཀྱིས་ཐའེ་ཚང་དུ་མ་དངུལ་གཏོང་འབོར་ཨ་སྒོར་དུང་ཕྱུར་10ལས་བརྒལ་བ་དང་པ་ཕུའུ་ཀྲོའུ་ཁོ་ན་ནས་ཁེ་ལས་41ཐའེ་ཚང་དུ་བཙུགས་པ་དེ་ཐོག་ནས་འཇར་མན་དང་པ་ཕུའུ་ཀྲོའུ་ཡི་ཁེ་ལས་ཀྱིས་ཐའེ་ཚང་དུ་ཡོང་ནས་འཕེལ་རྒྱས་གཏོང་འདོད་ཆེན་པོ་ཡོད་པ་གང་ལེགས་མཚོན་ཐུབ་ཅེས་བཤད་པ་རེད།

    འཇར་མན་རྒྱལ་ཕྲན་མཉམ་འབྲེལ་སྲིད་གཞུང་གི་དཔལ་འབྱོར་དང་ལག་རྩལ་པུའི་པུའུ་ཀྲང་པུའུ་ལུའུ་ཏེ་ལེ་ཡིས་ཡུན་རིང་མ་སོང་གོང་འཇར་མན་དང་ཀྲུང་གོའི་ཁེ་ལས་ཀྱིས་ཐའེ་ཚང་དུ་མཉམ་ལས་བྱས་པའི་སྐོར་བྲིས་པའི་ནང “ཐའེ་ཚང་ལྟ་བུའི་བར་མཚོན་མེད་པར་འཇར་མན་དང་ཀྲུང་གོའི་མཉམ་ལས་ལེགས་འགྲུབ་བྱུང་བའི་སྒྲུང་གཏམ་མཐུད་འབྲི་བྱེད་མཁན་རྟེན་གཞི་མང་པོ་དེ་ཚོས་ང་ཚོ་རྒྱལ་ཁབ་གཉིས་པོའི་འབྲེལ་བ་ཡུན་རིང་གནས་པ་དང་སྲ་བཞིན་བརྟན་པའི་ངང་འཕེལ་རྒྱས་འགྲོ་རྒྱུར་སྐུལ་མ་ཐེབས་ཡོད ”ཅེས་འཁོད་ཡོད་པ་རེད།