མི་དམངས་ཉིན་རེའི་ཚགས་པར་ཁང་དུ་ཁེ་རོ་ནས་ཟླ་4ཚེས་18ཉིན་གློག་འཕྲིན་འབྱོར་གསལ། ཟླ་4ཚེས་18ཉིན་ཨེ་ཤེ་ཡའི་ནུས་རྒྱུ་པུའུ་ཀྲང་གི་གྲལ་སྒོར་ཚོགས་འདུ་སྐབས་བཞི་པ་ཁུ་ཝེ་ཐེ་རུ་འཚོགས་ནས་ཨེ་ཤེ་ཡའི་རྒྱལ་ཁབ་དང་རྒྱལ་སྤྱིའི་རྩ་འཛུགས་30ཙམ་གྱི་སྐུ་ཚབ་ཞུགས་ཤིང་། ཚོགས་འདུའི་ཐོག་སོ་ཏི་ཨ་རབ་དང་། ཨ་རབ་མཉམ་འབྲེལ་ཚོ་དཔོན་རྒྱལ་ཁབ། ཁུ་ཝེ་ཐེ་སོགས་རྒྱལ་ཁབ་ཀྱི་རྡོ་སྣུམ་བློན་ཆེན་ཚོས་ཉིན་བཞིན་ཇེ་མཐོར་འགྲོ་བའི་རྡོ་སྣུམ་རིན་གོང་དེ་མཁོ་སྤྲོད་བྱེད་རྒྱུ་མི་འདང་བ་ལས་བྱུང་བ་ཞིག་མ་རེད་ཅེས་གཅིག་རྗེས་གཉིས་མཐུད་ངང་བརྗོད་པ་རེད།

    སོ་ཏི་ཨ་རབ་ཀྱི་གཞུང་ཕྱོགས་གསར་འགྱུར་ཁང་གིས་སོ་ཏི་ཨ་རབ་ཀྱི་རྡོ་སྣུམ་དང་གཏེར་རྫས་ཐོན་ཁུངས་ཀྱི་བློན་ཆེན་ན་དབྱི་སྨི་ཡི་སྐད་ཆ་དྲངས་ནས “སོ་ཏི་ཨ་རབ་ལ་རྒྱལ་སྤྱིའི་རྡོ་སྣུམ་ཁྲོམ་རའི་དགོས་མཁོ་སྐོང་བའི་ནུས་པ་གང་ལེགས་ལྡན་ཡོད་པ་དང་། མིག་སྔའི་རྒྱལ་སྤྱིའི་རྡོ་སྣུམ་ཁྲོམ་རའི་ཐོག་མཁོ་སྤྲོད་བྱས་པའི་རྡོ་སྣུམ་དེ་དངོས་སུ་མཁོ་བ་ལས་མང་བ་ཡོད། གལ་ཏེ་དགོས་མཁོ་ཡོད་ཚེ་སོ་ཏི་ཨ་རབ་ཀྱིས་ཟླ་4པའི་ནང་ཉིན་རེའི་རྡོ་སྣུམ་ཐོན་ཚད་སླར་ཡང་མཐོ་རུ་གཏོང་ཆོག ”ཅེས་བརྗོད་ཡོད་པ་རེད།

    ཨ་རབ་མཉམ་འབྲེལ་ཚོ་དཔོན་རྒྱལ་ཁབ་ཀྱི་ནུས་རྒྱུ་པུའི་པུའུ་ཀྲང་མུའུ་ཧན་མོ་ཏེ ·ཧ་སྨི་ལི་དང་ཁུ་ཝེ་ཐེའི་རྡོ་སྣུམ་བློན་ཆེན་ས་པ་ཧོ་ཡིས་ཉིན་དེ་རང་དུ་ལི་པི་ཡའི་རྡོ་སྣུམ་ཕྱིར་གཏོང་བྱེད་རྒྱུ་གནས་སྐབས་མཚམས་ཆད་རུང་རྒྱལ་སྤྱིའི་རྡོ་སྣུམ་ཁྲོམ་རའི་མཁོ་སྤྲོད་ཀྱི་གནས་ཚུལ་ལེགས་པོ་ཡོད་པ་སྟེ་མ་བཅོས་རྡོ་སྣུམ་མི་འདང་བའི་གནས་ཚུལ་གནས་མེད་ཅེས་བརྗོད་པ་དང་། ཧ་སྨི་ལི་ཡིས་ད་དུང་མིག་སྔའི་རྡོ་སྣུམ་རིན་གོང་འཕར་བ་དེ་ཁྲོམ་རའི་མཁོ་སྤྲོད་དང་སྤྱིར་ན་འབྲེལ་བ་མེད་པར་དེ་ནི་ཚད་གཞི་ངེས་ཅན་ཞིག་གི་ཐོག་ནས་བརྗོད་ན་ས་ཁུལ་དེ་གའི་ས་ཁོངས་ཆབ་སྲིད་ཀྱི་འགྱུར་ལྡོག་དང་སྐབས་འཚོལ་བས་འགྱུར་ལྡོག་དེ་སྤྱད་པ་ལས་བྱུང་བ་ཞིག་རེད་ཅེས་བརྗོད་པ་རེད།