མི་དམངས་ཉིན་རེའི་ཚགས་པར་ཁང་དུ་པེ་ཅིང་ནས་ཟླ་4ཚེས་18ཉིན་གློག་འཕྲིན་འབྱོར་གསལ། ཕྱི་རྒྱལ་དུ་བཅའ་སྡོད་འདི་ག་ཚགས་པར་ཁང་གི་གསར་འགོད་པ་ཧོང་ཧྥེ་ཀྲའོ་དང་། སུན་ཐན་རེན། ལི་ཝུན་ཡུན་བཅས་དང་ཤིན་ཧྭ་གསར་འགྱུར་ཁང་གིས་ཕྱོགས་བསྡུས་གནས་ཚུལ་སྤེལ་གསལ། ཚེས་18ཉིན་ལི་པི་ཡའི་སྲིད་གཞུང་དམག་དང་སྲིད་གཞུང་ལ་ངོ་རྒོལ་བྱེད་མཁན་དྲག་ཆས་ཀྱིས་ནུབ་རྒྱུད་ཀྱི་སྨི་སུའུ་ལ་ཐའེ་དང་ཤར་རྒྱུད་ཀྱི་ཨེ་ཅི་ཏ་པི་ཡེར་སོགས་ས་ཆར་མུ་མཐུད་དེ་དམག་བརྒྱབ་པ་རེད།
ཚེས་18ཉིན་གྱི་སྔ་དྲོ་ལི་པི་ཡའི་ངོ་རྒོལ་ཤོག་ཁའི་དྲག་ཆས་ཀྱིས་ཚེས་17ཉིན་སྨི་སུའུ་ལ་ཐའེ་རུ་ཁོང་ཚོའི་དམག་མི་17རྐྱེན་ལམ་དུ་ཤོར་བ་དང་ཉུང་མཐར་ཡང་མི་70རྨས་ཡོད་ཅེས་བཤད་པ་རེད། ཨེ་ཅི་ཏ་པི་ཡེར་སྲིད་གཞུང་དམག་གིས་སྲིད་གཞུང་ལ་ངོ་རྒོལ་བྱེད་མཁན་དྲག་ཆས་དམག་མི་བཅུ་ལྷག་ཙམ་བསད་ཅིང་། བྱང་ཆིངས་ཀྱིས་འདས་ཟིན་པའི་ཆུ་ཚོད་ཉེར་བཞིའི་ནང་ལི་པི་ཡའི་རྒྱལ་ས་ཐི་རི་ཕོ་ལིའི་ལྷོ་རྒྱུད་དང་ཁ་ཀྲ་ཕེའི་ཕ་ཡུལ་སུའར་ཐེ་སོགས་ས་ཆར་མཁའ་ཐོག་ནས་འབར་མདེལ་དབྱུགས་པར་བརྟེན་སྲིད་གཞུང་དམག་གི་མཁའ་སྲུང་སྒྲིག་བཀོད་དང་། མཚོན་ཆའི་མཛོད་ཁང་གཉིས། ཐན་ཁེ་བཅུ་ལྷག་ཙམ་དང་དམག་སྐྱེལ་རླངས་འཁོར་བཅས་གཏོར་ཡོད་པ་རེད། འབར་མདེལ་དབྱུགས་པའི་རྐྱེན་གྱིས་མི་སེར་མང་པོ་ཞིག་ཕ་ཡུལ་ནས་བྲོས་དགོས་བྱུང་ཡོད།
ཚེས་18ཉིན་མཉམ་འབྲེལ་རྒྱལ་ཚོགས་ཀྱི་དྲུང་ཆེ་ཕན་ཅི་ཝུན་གྱིས་ཉིན་ཤས་གོང་མཉམ་འབྲེལ་རྒྱལ་ཚོགས་དང་ལི་པི་ཡའི་སྲིད་གཞུང་དབར་ལི་པི་ཡའི་རྒྱལ་ས་ཐི་རི་ཕོ་ལིར་མི་ཆོས་རིང་ལུགས་ཀྱི་རོགས་སྐྱོར་བྱ་རྒྱུའི་ཐད་གྲོས་མཐུན་བཞག་ཡོད་ཅེས་བཤད་ཅིང་། ཡོ་རོབ་མནའ་འབྲེལ་ཕྱོགས་ཀྱིས་ལི་པི་ཡའི་མི་ཆོས་རིང་ལུགས་ཀྱི་རོགས་སྐྱོར་ལ་དམག་དོན་ཐོག་ནས་རོགས་སྐྱོར་བྱ་རྒྱུའི་གྲ་སྒྲིག་བྱེད་བཞིན་ཡོད་ཅེས་བཤད་མོད། འོན་ཀྱང་འཇར་མན་རྒྱལ་སྲུང་པུའི་པུའུ་ཀྲང་ཏེ་མན་ཆི་ཨེ་ཡིས་ཉེ་དུས་འཇར་མན་རྒྱལ་ཕྲན་མཉམ་འབྲེལ་དམག་གིས་དམག་མི་བཏང་ནས་མི་ཆོས་རིང་ལུགས་ཀྱི་རོགས་སྐྱོར་བྱ་སྤྱོད་ནང་ཞུགས་བཟོ་མེད་ཅེས་བཤད་པ་རེད།
ཤེས་རྟོགས་བྱུང་བར་གཞིགས་ན། མཉམ་འབྲེལ་རྒྱལ་ཚོགས་ཀྱི་དྲུང་ཆེའི་ལི་པི་ཡའི་གནད་དོན་གྱི་ཆེད་བསྐོས་ཕོ་ཉ་ཧ་ཐེ་ཕུས་ཚེས་17ཉིན་ཐི་རི་ཕོ་ལིར་འཚམས་འདྲི་བྱེད་སྐབས་ལི་པི་ཡའི་ཙུང་ལི་མ་ཧ་མོའུ་ཏི་དང་མཉམ་འབྲེལ་རྒྱལ་ཚོགས་བདེ་འཇགས་ལས་འཛིན་ལྷན་ཚོགས་ཀྱི་གྲོས་ཆོད་ཨང་1970པ་དང་ཨང་1973པ་ལག་བསྟར་བྱ་རྒྱུའི་འབྲེལ་ཡོད་གནད་དོན་ཐད་བཞུགས་མོལ་བྱས་ཤིང་། ཚེས་17ཉིན་ལི་པི་ཡའི་འཕྲིན་གཏོང་ཁང་ནས་གནས་ཚུལ་སྤེལ་དོན། ཕྱོགས་གཉིས་པོས་གྲོས་ཆོད་གཉིས་ལག་བསྟར་བྱ་རྒྱུའི་འབྲེལ་ཡོད་ལམ་སྲོལ་གྲོས་བསྡུར་བྱས་པའི་ནང་ལི་པི་ཡ་ཕྱོགས་ཀྱིས་བཏོན་པའི་ཨ་ཧྥེ་རི་ཁ་མནའ་འབྲེལ་རྒྱལ་ཁབ་དང་མཉམ་འབྲེལ་རྒྱལ་ཚོགས་ཀྱིས་བཏང་བའི་ལྟ་ཞིབ་མི་སྣས་དམག་མཚམས་འཇོག་རྒྱུར་ལྟ་སྐུལ་བྱ་རྒྱུའི་བླང་བྱ་དང་དེ་བཞིན་བྱང་ཆིངས་ཀྱིས་ལི་པི་ཡར་མཁའ་ཐོག་ནས་འཇབ་རྒོལ་བྱེད་མཚམས་འཇོག་དགོས་པ་སོགས་ཀྱི་གནད་དོན་ཚུད་ཡོད་པ་རེད།