ཚེས་16ཉིན་གུ་པའི་རྒྱལ་ས་ཧ་ཝ་ན་གསར་བརྗེའི་ཐང་ཆེན་དུ་དགའ་སྤྲོའི་རྣམ་པས་ཁེངས་པ་དང་ཁུ་པའི་འགོ་ཁྲིད་པས་རྒྱ་ཆེའི་དམངས་ཚོགས་དང་མཉམ་དུ་ཅི་ལུང་ཐང་གཡུལ་འགྱེད་ལ་རྒྱལ་ཁ་ཐོབ་ནས་ལོ་50འཁོར་བ་དང་དེ་བཞིན་ཁུ་པས་སྤྱི་ཚོགས་རིང་ལུགས་ཀྱི་ལམ་ལུགས་འཛུགས་རྒྱུ་ཁྱབ་བསྒྲགས་བྱས་ནས་ལོ་50འཁོར་བར་སྤྲོ་སེམས་འཁོལ་བའི་ངང་རྟེན་འབྲེལ་ཞུས་ཤིང་། སྐམ་མཚོ་མཁའ་བཅས་དམག་རིགས་གསུམ་གྱི་རུ་སྟར་གྲུ་བཞི་མ་རིམ་པ་ལྟར་གཟིགས་ཞིབ་སྟེགས་བུའི་མདུན་ནས་བསྐྱོད་དེ་ཁུ་པ་རྒྱལ་དོན་ཨུ་ཡོན་ལྷན་ཁང་གི་ཀྲུའུ་ཞི་ལའོ་འར ·ཁ་སི་ཐེ་ལུའོ་ཡི་གཟིགས་ཞིབ་དང་ལེན་བྱས་པ་དང་ཁུ་པ་གསར་བརྗེའི་འགོ་ཁྲིད་པ་ཕེ་ཏེའར ·ཁ་སི་ཐེ་ལུའོ་ཉིན་དེ་རང་གི་བྱེད་སྒོའི་ནང་ཞུགས་མེད་པ་རེད།

    སྤྲོ་སེམས་རབ་ཏུ་འཕེལ་བའི་ཁུ་པའི་དམངས་ཚོགས་ཚོ་ནམ་མ་ལངས་གོང་ཕྱོགས་བཞི་མཚམས་བརྒྱད་ནས་གསར་བརྗེའི་ཐང་ཆེན་དུ་ཡོང་བ་དང་ཁོང་ཚོས་ཐང་ཆེན་ནས་བརྒྱུད་སྐབས “ཁུ་པའི་གསར་བརྗེ་ཁྲི་ལོ་བརྟན་པར་ཤོག ”སོགས་འབོད་ཚིག་སྐད་གསང་མཐོན་པོའི་ངང་མགྲིན་གཅིག་ཏུ་འབོད་ནས་བྱེད་སྒོ་དེའི་ཚ་རླབས་ཤིག་འཕྱུར་ཞིང་། དམག་ལོག་དམག་མི་རྒན་གྲས་ཨའེ་འར་ནེ་སི་ཐོ་ཡིས་འདི་ག་ཚགས་པར་གྱི་གསར་འགོད་པར་དེ་རིང་མི་རྣམས་སླར་ཡང་གསར་བརྗེའི་ཐང་ཆེན་དུ་འཛོམས་པ་དེ་ནི་གསར་བརྗེའི་རྒན་རབས་པ་ཚོས་རྒྱལ་ཁབ་ཀྱི་རང་བདག་རང་བཙན་སྲོག་འབེན་ལ་བཙུགས་ནས་སྲུང་སྐྱོབ་བྱེད་པའི་ཕུགས་བསམ་ལྡན་པའི་དཔའ་སྟོབས་ལ་དྲན་གསོ་ཞུས་ནས་དེང་དུས་ཀྱི་ལས་སླ་པོར་ཐོབ་པ་ཞིག་མིན་པའི་མི་རིགས་རང་དབང་ལ་སྔར་བས་གཅེས་སྤྲས་བྱེད་ཆེད་རེད། ཁུ་པའི་མི་འབོར་70%ལྷག་ཙམ་ནི་ཨ་རིས་བཀག་སྡོམ་བྱེད་རིང་སྐྱེས་པ་ཞིག་ཡིན་སྟབས་དཀའ་སྤྱད་ཁྲོད་འཚར་ལོངས་བྱུང་བ་ཞིག་རེད་ཅེས་བཤད།

    ཉིན་དེ་རང་གི་ཕྱི་དྲོར་ལོ་14འགྱངས་པའི་ཁུ་པ་གུང་ཁྲན་ཏང་རྒྱལ་ཡོངས་འཐུས་མི་ཚོགས་ཆེན་ཐེངས་དྲུག་པ་འགོ་ཚུགས་ཤིང་། རྒྱལ་ཡོངས་ནས་ཡོང་བའི་འཐུས་མི་1000ཡིས་དུས་ཡུན་ཉིན་བཞིའི་ཚོགས་འདུའི་ཐོག 《དཔལ་འབྱོར་དང་སྤྱི་ཚོགས་སྲིད་ཇུས་དང་བྱེད་ཕྱོགས་ཀྱི་འཆར་ཟིན 》ལ་གྲོས་བསྡུར་དང་གྲོས་འཆམ་བྱས་ནས་ཁུ་པར་སླད་ཕྱིན་དཔལ་འབྱོར་སྒྲིག་སྲོལ་སྒྱུར་བཅོས་བྱེད་པའི་སྲིད་ཇུས་བཟོ་གི་ཡོད། ཁུ་པའི་མི་འབོར་ཁྲི་1120ཡི་སླད་ཕྱིན་གྱི་ལས་དབང་དང་འབྲེལ་བ་ཡོད་པའི་ཚོགས་ཆེན་དེ་ལའང་ཐུན་མོང་མ་ཡིན་པའི་དོན་སྙིང་ལྡན་ཡོད་པ་རེད།

    ཚོགས་ཆེན་འགོ་ཚུགས་སྐབས་ལའོ་འར ·ཁ་སི་ཐེ་ལུའོ་ཡིས་གསུང་བཤད་ཆུ་ཚོད་གཉིས་ལྷག་ཙམ་གནང་ནས་སྤྱི་ཚོགས་རིང་ལུགས་ཀྱི་དཔེ་དབྱིབས་ལ་གསར་བརྗེས་བྱ་རྒྱུའི་དགོས་ངེས་རང་བཞིན་རྒྱས་བཤད་ཞིབ་ཕྲ་གནང་ཞིང་། ཁོང་གིས་ད་ཆ་ལག་ལེན་བསྟར་བའི་སྒྲིག་སྲོལ་ནང་སྐྱོན་ཆ་མང་པོ་ཡོད་པར་བརྟེན་དཔལ་འབྱོར་སྒོ་མོ་འབྱེད་པའི་གོམ་སྟབས་མགྱོགས་སུ་གཏོང་བ་སོགས་འཕོ་འགྱུར་གྱི་བྱ་ཐབས་བརྒྱུད་ད་ཆ་ལག་ལེན་བསྟར་བའི་དཔལ་འབྱོར་གྱི་དཔེ་དབྱིབས་ལ “གསར་བརྗེས ”བྱེད་དགོས། “སྲིད་གཞུང་གིས་རང་བདག་ལས་རིགས་ཀྱི་དོ་བདག་འཕེལ་རྒྱས་འགྲོ་རྒྱུར་རྒྱབ་སྐྱོར་བྱས་ནས་དེ་དག་རྒྱལ་ཁབ་ཀྱི་དཔལ་འབྱོར་འཕེལ་རྒྱས་གཏོང་བའི་ཁ་གསབ་ནུས་ལྡན་ཞིག་ཆགས་པ ”བྱེད་དགོས་མོད། འོན་ཀྱང་སླད་ཕྱིན་ཁུ་པའི་དཔལ་འབྱོར་གྱི་དཔེ་དབྱིབས་ནི “འཆར་འགོད་དཔལ་འབྱོར་གྱིས་མུ་མཐུད་གཙོ་ཁྲིད་ཀྱི་གནས་བབ་བཟུང་དགོས་པ ”དང་སྤྱི་ལ་དབང་བ་མིན་པའི་སྡེ་ཚན་རྒྱ་ཆེར་གཏོང་བ་དེ་སྒེར་ལ་དབང་བ་ཞིག་མིན་ཞེས་གསུངས་པ་དང་ཁོང་གིས་ན་ནིང་གི་ཟླ་བ་བཅུ་གཉིས་པའི་ཟླ་སྟོད་ནས་ད་ལོའི་ཟླ་བ་གཉིས་པའི་ཟླ་མཇུག་བར་དཔལ་འབྱོར་འཕོ་འགྱུར་སྐོར་གྱི་རྒྱལ་ཡོངས་ཀྱི་གྲོས་བསྡུར་ཆེ་མོའི་ནང་ཞུགས་མཁན་མི་གྲངས་ཁྲི་891ལྷག་ཙམ་ཟིན་ནས་མི་རྣམས་ཀྱི་སྤྲོ་སེམས་ནི་སྔར་བྱུང་མ་མྱོང་བ་ཞིག་ཡོད་ཅེས་གསུངས་པ་རེད།

    དུས་མཚུངས་ཁ་སི་ཐེ་ལུའོ་ཡིས་ཚོཌ་ཆེན་ཐོག “དཔལ་འབྱོར་གྱི་དཔེ་དབྱིབས་དེང་རབས་ཅན་དུ ”འགྱུར་བའི་འཕེལ་རིམ་གྱི་ཆ་ཤས་ཤིག་ཏུ་བརྩིས་ནས་ཁུ་པ་སྲིད་གཞུང་གིས་མི་སྒེར་ལ་རླངས་འཁོར་དང་ས་ཁང་བདག་ཁོངས་ཉོ་ཚོང་བྱེད་ཆོག་གི་ཡོད་ཅེས་ཁྱབ་བསྒྲགས་གནང་བ་རེད། ཁོང་གིས “སྡོད་ཁང་དང་རླངས་འཁོར་ཉོ་ཚོང་བྱ་རྒྱུའི་སྐོར་གྱི་ཁྲིམས་སྲོལ་བཟོ་རྒྱུའི་ལས་ཀ་གཏིང་ཟབ་བྱེད་བཞིན་ཡོད ” གཞན་ཡང་སྒེར་གཉེར་སྡེ་ཚན་གྱི་གཉེར་སྐྱོང་བ་དང་མི་སེར་ལ་དངུལ་ཁང་གི་དངུལ་བུན་མཁོ་འདོན་བྱ་རྒྱུའི་སྐོར་གྱི་གཏན་འབེབས་ཀྱང་བཟོ་བཞིན་ཡོད་ཅེས་གསུངས་ཤིང་། ཁ་སི་ཐེ་ལའོ་ཡིས་ད་དུང་སྲིད་གཞུང་གིས་དཔལ་འབྱོར་འཕེལ་རྒྱས་འགྲོ་ཚུལ་ལ་དམིགས་ཏེ “རིམ་བགྲོད་གོང་འཕེལ ”ངང་ལས་པ་ཉུང་དུ་གཏོང་བའི་འཆར་འགོད་ལག་ལེན་བསྟར་རྒྱུ་ཡིན་པ་དང་ད་དུང་ཆ་སྙོམས་རིང་ལུགས་ཀྱི་རྣམ་པ་ཟབ་མོ་ལྡན་པའི “མཁོ་འདོན་གཱའི ”ལམ་ལུགས་དེ་ནི་རྒྱལ་ཁབ་ཀྱི “དཔལ་འབྱོར་གྱིས་ཁུར་ཐབས་བྲལ་བའི་ཁུར་པོ ”ཞིག་ཏུ་གྱུར་བར་བརྟེན་ལམ་ལུགས་དེ “ངེས་པར་དུ་མེད་པ་བཟོས་དགོས ”ཞེས་གསུངས་པ་རེད།