ཀྲུང་གོ་དང་ཨ་རིའི་སྤྱི་ཚོགས་ཀྱི་རིག་གནས་སྤེལ་རེས་ཀྱི་རེས་འཁོར་གཉིས་པའི་མཐོ་རིམ་གྲོས་མོལ་དེ་ཨ་རིའི་རྒྱལ་ས་ཝ་ཧྲེང་ཐོན་དུ་བྱེད་རིང་ཨ་རིའི་སྟག་མཆོང་རུ་ཁག་ཅིག་གི་རུ་མིའི་དངོས་ཡོད་གནས་ཚུལ་ཞིག་ལས་མི་མང་པོར་སེམས་འགུལ་ཟབ་མོ་ཐེབས།

    ཟླ་4ཚེས་12ཉིན་གྱི་ཕྱི་དྲོ་ཀྲུང་གོ་མི་དམངས་ཕྱི་ཕྱོགས་མཛའ་གྲོགས་མཐུན་ཚོགས་ཀྱིས་ཨ་རིར་བཅའ་སྡོད་ཀྲུང་གོའི་གཞུང་ཚབ་ཆེ་མོ་ཁང་ནང་དངོས་པར་གློག་བཪྙན 《འཕུར་སྟག་གི་བརྩེ་སེམས 》ཞེས་པ་ཐོག་མར་བསྟན་པའི་མཛད་སྒོ་སྤེལ་བ་རེད། ཨ་རིར་འཚམས་འདྲི་གནང་བཞིན་ཡོད་པའི་ཀྲུང་གོའི་རྒྱལ་དོན་ཨུ་ཡོན་ལིའུ་ཡན་ཏུང་དང་ཨ་རིར་བཅའ་སྡོད་ཀྲུང་གོའི་གཞུང་ཚབ་ཆེ་མོ་བ་ཀྲང་ཡེ་སུའེ་དང་དེ་བཞིན་ཨ་རིའི་སྟག་མཆོང་རུ་ཁག་གི་དེ་སྔའི་རུ་དཔོན་ཁྲེན་ན་ཏེའི་སྐུ་ཟླ་མཁྱེན་ལྡན་མ་ཁྲེན་ཤང་མའེ་དང་། འཕུར་སྟག་རུ་ཁག་གི་རུ་མི་ཁག་གཅིག ཨ་རིའི་མཁའ་སྐྱོད་རུ་ཁག་14པའི་འཐུས་མི་སོགས་མི་170ལྷག་ཙམ་ཐོག་མར་སྟོན་པའི་མཛད་སྒོར་ཞུགས་པ་རེད།

    《འཕུར་སྟག་གི་བརྩེ་སེམས 》ཞེས་པ་དེས་ཨ་རིའི “འཕུར་སྟག་རུ་ཁག ”གི་འཕུར་སྐྱོད་པ་ཀོ་ལུན ·པིན་ཉི་ཏ་དང་ཀྲུང་གོའི་མི་དམངས་དབར་གྱི “ཉིན་60ཡི་བརྩེ་སེམས་དང་ལོ་60ཡི་ལས་དབང ”གི་མི་སེམས་འགུལ་བའི་གནས་ཚུལ་གསོན་ཉམས་ལྡན་པའི་ངང་བཀོད་ཡོད་པ་རེད། 1943ལོར་འཕུར་སྟག་རུ་ཁག་གི་དམག་འཐབ་གནམ་གྲུའི་འཕུར་སྐྱོད་པ་ཡིན་པའི་ལོ་ན་18ལ་སླེབས་མ་ཐག་པའི་པིན་ཉི་ཏ་ནི་ཀྲུང་གོའི་གཡུལ་སར་བཏང་བ་དང་དམག་འཐབ་གནམ་གྲུ་P-51བཏང་ནས་མཁའ་འཐབ་ཐེངས་81པའི་ལས་འགན་སྒྲུབ་སྐབས་སྟབས་མ་ལེགས་པར་རི་པིན་དམག་གི་སྒྱོགས་མདེལ་ཕོག་ནས་ལྷུང་བ་རེད། གདུགས་མཆོང་བྱས་ནས་སྲོག་ཉེན་ལས་ཐར་ཐབས་བྱེད་པའི་པིན་ཉི་ཏ་ཧོ་པེ་ཞིང་ཆེན་ཅན་ལིས་རྫོང་གི་ས་ཞིང་གཅིག་ནང་བབས་པ་དང་ས་གནས་དེ་གའི་མི་སེར་དང་། རི་འགོག་ངེས་མེད་རྒོལ་རྡུང་རུ་ཁག དམག་དཔུང་ཤིན་སི་ཅུན་བཅས་ཀྱིས་དཀའ་ཉེན་ཁྱད་བསད་བྱས་ནས་ཉིན་60ཙམ་བརྒྱུད་པིན་ཉི་ཏ་བདེ་འཇགས་ངང་ཁྲུང་ཆིང་དུ་བསྐྱལ་བ་རེད།

    ཀྲུང་གོའི་དམག་དམངས་ཀྱི་སྲོག་སྐྱོབ་བཀའ་དྲིན་ལས་པིན་ཉི་ཏས་ཀྲུང་གོར་བརྩེ་སེམས་ཟབ་མོ་ཆགས་ཡོད། 2002ལོར་ཁོང་དེ་སྔོན་རི་པིན་ཇག་པ་དང་དམག་འཐབ་བྱས་པ་དང་སྲོག་སྐྱོབ་ཀྲུང་གོར་དང་ཐོག་ཡོང་བ་དང་2010ལོར་དགུང་ལོ་86ལ་སླེབས་པའི་པིན་ཉི་ཏ་སླར་ཡང་ཅན་ལིས་སུ་ཡོང་ནས “དྲིན་འཇལ་གྱི་ཡུལ་སྐོར ”སླར་ཡང་ཐེངས་གཅིག་བྱས། ན་ནིང་ཟླ་10ཚེས་23ཉིན་པིན་ཉི་ཏ་སྐུ་གཤེགས་པ་རེད། ཨ་རིའི་ཙུང་ཐུང་ཟུར་པ་པུའུ་ཧྲི་རྒན་པས་གནས་ཚུལ་དེ་ཐོས་རྗེས་སེམས་འགུལ་ཐེབས་པའི་ངང “གཏོར་ལྷུང་བཏང་བའི་ཨ་རིའི་འཕུར་སྐྱོད་པ་ཀྲུང་གོའི་མི་དམངས་ཀྱིས་བསྐྱབས་པ་དེ་ནི་དཔའ་ངར་ཤིན་ཏུ་ཆེ་བ་དང་སེམས་འགུལ་ཚད་མེད་ཐེབས་པའི་རླབས་ཆེན་གྱི་བྱ་སྤྱོད་ཅིག་རེད། ངའི་བསམ་པར་ད་ལྟའི་ཨ་རི་དང་ཀྲུང་གོའི་འབྲེལ་བ་དུས་དེ་ལས་བརྒལ་བས་ཕན་ཚུན་ཡིད་ཆེད་དང་རྒྱུན་ཆད་མེད་པར་ཕན་ཚུན་རོགས་རེས་བྱེད་པའི་རྨང་གཞི་བསྐྲུན་ཡོད ”ཅེས་གསུངས་པ་རེད།

    གློག་བཪྙན་བསྟན་ཚར་རྗེས་ལིའུ་ཡན་ཏུང་ཆེད་མངགས་མདུན་དུ་ཕེབས་ནས་དེ་གར་བཞུགས་པའི་པིན་ཉི་ཏའི་ལྷ་ལྕམ་ཨེ་ལི་ནུ ·པིན་ཉི་ཏ་དང་འཐམ་ནས་འཚམས་ཞུ་གནང་བ་རེད། ལིའུ་ཡན་ཏུང་གིས་ཤིས་ཚིག་ནང་པིན་ཉི་ཏའི་གནས་ཚུལ་དེ་ལས་ང་ལ་སེམས་འགུལ་ཐེབས་ནས་མིག་ཆུ་ཤོར་བྱུང་ཞེས་གསུངས། ཁོང་གིས་སེམས་འགུལ་ཚད་མེད་ཐེབས་པའི་གནས་ཚུལ་དེ་ཐོག་ནས་ཀྲུང་གོ་དང་ཨ་རིའི་རྒྱལ་ཁབ་གཉིས་དབར་གྱི་མཛའ་གྲོགས་མཉམ་ལས་ཀྱི་ལོ་རྒྱུས་གང་ལེགས་མངོན་པ་དང་ད་ལྟའི་འཛམ་གླིང་གི་ཞི་བདེ་དང་། འཕེལ་རྒྱས། དར་རྒྱས། བརྟན་ལྷིང་བཅས་ཚང་མར་ཤུགས་རྐྱེན་གལ་ཆེན་ཐེབས་པས་རྒྱལ་ཁབ་གཉིས་ཡིན་པའི་ཀྲུང་གོ་དང་ཨ་རིས་ལོ་60ལྷག་ཙམ་གོང་ལྟར་སླར་ཡང་ལག་གདང་སྦྲེལ་ནས་ཐུན་མོང་ཐོག་དགེ་མཚན་ལྡན་པའི་ནུས་པ་བཏོན་ཏེ་ཀྲུང་གོ་དང་ཨ་རི་རྒྱལ་ཁབ་གཉིས་ཀྱི་མི་དམངས་ཀྱི་འཚོ་བ་དེ་བས་མཛེས་སྡུག་ལྡན་པ་ཞིག་དང་འཛམ་གླིང་ཐོག་གི་མི་ཚང་མར་འཚོ་བ་དེ་བས་མཛེས་སྡུག་ལྡན་པ་ཞིག་ཡོང་བ་བྱེད་དགོས་ཞེས་གསུངས་པ་རེད། དེ་རྗེས་ལིའུ་ཡན་ཏུང་གིས་ཨེ་ལི་ནུ ·པིན་ཉི་ཏར “མི་དམངས་ཀྱི་མཛའ་གྲོགས་ཕོ་ཉའི ”ལག་ཁྱེར་སྤྲད་གནང་བ་དང་ཁོང་གིས་དགུང་ལོ་མཐོ་བར་མི་འཛེམས་པར 《འཕུར་སྟག་གི་བརྩེ་སེམས 》པར་ལེན་ལ་གཞོགས་འདེགས་ཧུར་ཐག་བྱས་ནས་ཕུལ་བའི་ལེགས་སྐྱེས་ལ་གཟེངས་བསྟོད་གནང་བ་རེད།