ཤིན་ཧྭ་གསར་འགྱུར་ཁང་ཏོ་ཧ་ནས་ཟླ་4ཚེས་13ཉིན་གློག་འཕྲིན་འབྱོར་གསལ། “ལི་པི་ཡའི་འབྲེལ་གཏུག་ཚོགས་ཆུང ”གི་ཚོགས་འདུ་ཐོག་མ་དེ་ཚེས་13ཉིན་ཁ་ཐར་གྱི་རྒྱལ་ས་ཏོ་ཧར་འཚོགས་ཤིང་། ཚོགས་ཞུགས་ཕྱོགས་ཁག་གིས་ད་ལྟའི་ལི་པི་ཡའི་ཉམས་ཉེན་དེ་ཆབ་སྲིད་ཐོག་ནས་ཐག་གཅོད་བྱས་ཏེ་ཡུན་རིང་གི་ཞི་བདེ་ཡོང་ཐབས་བྱ་རྒྱུ་དེ་བྱ་ཐབས་ཉག་ཅིག་ཡིན་པའི་ནན་བཤད་བྱས་པ་རེད།

    མཉམ་འབྲེལ་རྒྱལ་ཚོགས་ཀྱི་དྲུང་ཆེ་ཕན་ཅི་ཝུན་དང་། བྱང་ཆིངས་ཀྱི་དྲུང་ཆེ་ལ་སི་མུའུ་སེན། དབྱིན་ཇིའི་ཕྱི་འབྲེལ་བློན་ཆེན་ཧེ་ཀོ་བཅས་དང་ཨ་རི་དང་། འཇར་མན། སེ་ཕེན་བཅས་དང་དེ་བཞིན་ཡོ་རོབ་མནའ་འབྲེལ་དང་། བྱང་ཆིངས། ཨ་རབ་མནའ་འབྲེལ། ཨ་ཧྥེ་རི་ཁ་མནའ་འབྲེལ་སོགས་རྒྱལ་སྤྱིའི་རྩ་འཛུགས་ཀྱི་འཐུས་མི་དུས་ཡུན་ཆུ་ཚོད་གཉིས་ཙམ་གྱི་གསང་བའི་ཚོགས་འདུར་ཞུགས་ཡོད་པ་རེད། ལི་པི་ཡ་སྲིད་གཞུང་གིས་འབྲེལ་གཏུག་ཚོགས་འདུར་འཐུས་མི་མངགས་མེད་པ་རེད།

    ཚོགས་འདུ་གྲོལ་རྗེས་སྤེལ་བའི་ཀྲུའུ་ཞིའི་གསལ་བསྒྲགས་ལ་གཞིགས་ན། ཚོགས་ཞུགས་ཕྱོགས་ཁག་གིས་ལི་པི་ཡའི་བདག་དབང་དང་། རང་བཙན། མངའ་ཁོངས་ཆ་ཚང་། རྒྱལ་ཁབ་ཀྱི་གཅིག་གྱུར་བཅས་སྲུང་སྐྱོང་བྱ་རྒྱུར་འབད་བརྩོན་བྱ་རྒྱུ་ཡིན་པ་རེད།

    གསལ་བསྒྲགས་ནང་རྒྱལ་སྤྱིའི་སྤྱི་ཚོགས་ལ་ལི་པི་ཡར་མི་ཆོས་རིང་ལུགས་ཀྱི་རོགས་སྐྱོར་མུ་མཐུད་བྱ་རྒྱུའི་རེ་འབོད་དང་འབྲེལ་ཡོད་ཕྱོགས་ཁག་ལ་རོགས་སྐྱོར་དེ་དུས་ཐོག་ཏུ་ཡུལ་གྱར་བའི་ལག་ཏུ་འབྱོར་ཐུབ་པའི་འགན་ལེན་བྱེད་དགོས་པའི་བླང་བྱ་བཏོན་ཡོད་པ་རེད།

    མཉམ་འབྲེལ་རྒྱལ་ཚོགས་ཀྱི་དྲུང་ཆེ་ཕན་ཅི་ཝུན་གྱིས་ལི་པི་ཡ་སྲིད་གཞུང་དང་ངོ་རྒོལ་ཕྱོགས་ཁག་དབར་མུ་མཐུད་གདོང་ ཐུག་བྱུང་ཚེ་མི་གྲངས་ཁྲི་360ལ་མི་ཆོས་རིང་ལུགས་ཀྱི་རོགས་སྐྱོར་བྱེད་དགོས་པ་ཆགས་རྒྱུ་རེད་ཅེས་གསུངས་པ་རེད།

    ཟླ་བ་གོང་མའི་ཚེས་29ཉིན་དབྱིན་ཇིའི་ལོན་ཏོན་དུ་འཚོགས་པའི་ལི་པི་ཡའི་གནད་དོན་གྱི་རྒྱལ་སྤྱིའི་ཚོགས་འདུའི་ཐོག “ལི་པི་ཡའི་འབྲེལ་གཏུག་ཚོགས་ཆུང ”འཛུགས་རྒྱུའི་ཐག་གཅོད་བྱས་ནས་ལི་པི་ཡར་སྤེལ་བའི་རྒྱལ་སྤྱིའི་བྱ་སྤྱོད་ལ་མཐུན་སྦྱོར་བྱེད་པ་དང་འབྲེལ་ལི་པི་ཡའི་ཤོག་ཁག་ཁག་དང་འབྲེལ་བ་བཙུགས་ཡོད། “ལི་པི་ཡའི་འབྲེལ་གཏུག་ཚོགས་ཆུང ”གི་ཚོགས་འདུ་ཐེངས་གཉིས་པ་དེ་ཟླ་བ་ལྔ་པའི་གཟའ་འཁོར་དང་པོའི་ནང་དབྱི་ཐ་ལིར་འཚོག་རྒྱུ་ཡིན་པ་རེད།