མི་དམངས་ཉིན་རེའི་ཚགས་པར་ཁང་དུ་ཏུང་ཅིང་ནས་ཟླ་4ཚེས་13ཉིན་གློག་འཕྲིན་འབྱོར་གསལ། ཚེས་13ཉིན་རི་པིན་སྲིད་གཞུང་ཁྲལ་བསྡུའི་ལམ་ལུགས་བརྟག་དཔྱད་ཨུ་ཡོན་ལྷན་ཁང་གིས་ཚང་འཛོམས་གྲོས་ཚོགས་འཚོགས་ནས་ས་ཡོམ་གྱི་གནོད་འཚེ་ཕོག་པའི་མང་ཚོགས་ལ་ཕྱོགས་པའི་ཁྲལ་བསྡུའི་ལམ་ལུགས་ཀྱི་དམིགས་བསལ་བྱེད་ཐབས་བཟོས་པ་དེའི་ནང་མཚོ་ཡོམ་གྱིས་རྐྱེན་པས་གནོད་འཚེ་ཚབས་ཆེན་ཕོག་པའི་ས་ཆ་དང་ཁང་པར་2011ལོའི་ལོ་འཁོར་གྱི་གཏན་འཇགས་རྒྱུ་ནོར་གྱི་དཔྱ་ཁྲལ་རྩ་ཆག་གཏོང་རྒྱུ་དང་། གེགས་བར་བྱུང་བའི་མང་ཚོགས་ཀྱིས་རང་ཉིད་སྡོད་སའི་ཁང་པ་ཉོ་བ་དང་རླངས་འཁོར་གསར་པ་ཉོ་སྐབས་དཔྱ་ཁྲལ་ཆག་ཡང་དང་རྩ་ཆག་གཏོང་རྒྱུ། གེགས་བར་བྱུང་བའི་ཁེ་ལས་ལ་ཁེ་ལས་ཀྱི་ཐོབ་ཁྲལ་ཕྱིར་སྤྲོད་བྱ་རྒྱུ་བཅས་ཚུད་ཡོད་པ་རེད། དེ་ནི་གེགས་བར་བྱུང་བའི་མི་དམངས་ལ་ཁྱིམ་གཞིས་བསྐྱར་སྐྲུན་བྱེད་པ་དང་ཁེ་ལས་ལ་ཐོན་སྐྱེད་བྱེད་སྒོ་བསྐྱར་གསོ་ཡོང་རྒྱུར་རྒྱབ་སྐྱོར་བྱེད་པའི་ཁྲལ་བསྡུའི་ལམ་ལུགས་ཀྱི་གཟིགས་སྐྱོང་བྱེད་ཐབས་ཁག་དང་པོ་དེ་རེད།
རི་པིན་སྲིད་གཞུང་གིས་ཚེས་13ཉིན་ཟླ་བ་4པའི་ལོ་འཁོར་གྱི་དཔལ་འབྱོར་སྙན་ཞུ་ཡོངས་བསྒྲགས་བྱས་ནས་དཔལ་འབྱོར་སྤྱི་ཡོངས་ཀྱི་དུས་བབ་ལ་དཔྱད་དཔོག་བྱ་རྒྱུ་དེ “སླར་གསོ་ཡོང་བ་བྱེད་པ ”ནས “ད་ཆའི་དུས་མཚམས་ཀྱི་འཕེལ་ཕྱོགས་ཆུང་དུ་གཏོང་བའི ”བར་དམའ་རུ་བཏང་ཡོད་པ་རེད། སྙན་ཞུའི་ནང་རི་པིན་ཤར་རྒྱུད་དུ་ས་ཡོམ་ཆེན་པོ་བརྒྱབ་པའི་ཤུགས་རྐྱེན་ཐེབས་པར་བརྟེན་ཁེ་ལས་ཀྱི་ཐོན་སྐྱེད་བྱེད་སྒོ་དང་མི་སྒེར་གྱི་འཛད་སྤྱོད་བྱེད་ཤུགས་མགྱོགས་མྱུར་ཆག་པ་དེ་ནི་ན་ནིང་ཟླ་10པ་ནས་བཟུང་དཔྱད་དཔོག་གི་རིམ་པ་དམའ་རུ་གཏོང་ཐེངས་དང་པོ་དེ་རེད།
ས་ཡོམ་ཁྲོད་དུ་མཚོ་ཡོམ་གྱི་གནོད་འཚེ་ཕོག་པའི་ཤན་ཐའེ་གནམ་གྲུ་ཐང་དུ་ཚེས་13ཉིན་གྱི་ཞོགས་པ་འགྲུལ་སྐྱེལ་གནམ་གྲུ་འབབ་འཕུར་བྱ་རྒྱུ་བསྐྱར་གསོ་བྱས་པ་དང་གེགས་བར་བྱུང་ཁུལ་དང་རྒྱལ་སའི་མཐའ་འཁོར་དང་དེ་བཞིན་ཀོན་ཤིས་ས་ཁུལ་གྱི་མཁའ་ཐོག་འགྲིམ་འགྲུལ་དེ་ནས་བཟུང་ལེགས་སུ་ཕྱིན་ཡོད་པས་གེགས་བར་བྱུང་ཁུལ་གྱི་སླར་གསོ་བསྐྱར་སྐྲུན་གྱི་གོམ་སྟབས་མགྱོགས་སུ་གཏོང་ཐུབ་རེ་ཡོད་པ་རེད།
རི་པིན་གྱི་ཕྱི་དོན་བློན་ཆེན་སུང་པུན་ཀང་མིང་གིས་ཚེས་13ཉིན་གྲོས་ཁང་འོག་མའི་ཕྱི་དོན་ཨུ་ཡོན་ལྷན་ཁང་གི་ཚོགས་འདུའི་ཐོག་ཕུའུ་ཏའོ་ཡི་ཉིང་རྡུལ་གློག་ཁང་དང་པོས་འགྱེད་འཕྲོའི་རང་བཞིན་དམའ་བའི་བཙོག་ཆུ་བཤངས་པའི་དོན་དེའི་སྐོར་ར་སྤྲོད་བྱས་དོན། ཚེས་4ཉིན་གྱི་དགོང་མོ་དངོས་སུ་གཤོང་འགོ་བཙུགས་རྗེས་ཕྱི་དོན་ལས་ཁུངས་ཀྱིས་རི་པིན་དུ་བཅའ་སྡོད་གཞུང་ཚབ་ཆེ་མོ་ཁང་ཡོངས་རྫོགས་དང་རྒྱལ་སྤྱིའི་སྒྲིག་གཞིར་བརྡ་ཐོ་གཏོང་བའི་ལས་དོན་ལེགས་སྒྲུབ་བྱས་ཡོད། དོན་དེར་མཐའ་འཁོར་རྒྱལ་ཁབ་དང་ས་ཁུལ་གྱི་སྐྱོན་བརྗོད་ཕོག་ཡོད་པ་རེད། སུང་པུན་གྱིས “འབྲས་བུའི་ཐོག་ནས་བརྗོད་ན་དོན་དངོས་ཐོག་བཪྙན་སྐྱེལ་བརྒྱུད་དེ་རྒྱལ་ཁབ་ཁག་ལ་བརྡ་ཐོ་གཏོང་སྐབས་བཙོག་ཆུ་གཤོང་འགོ་བཙུགས་ཡོད་པ་རེད། དེ་རྗེས་འབྲེལ་བ་བྱེད་པའི་ལམ་སྲོལ་ལེགས་སུ་བཏང་བ ”ཁས་ལེན་བྱས་པ་རེད། ད་རེས་སྲིད་གཞུང་གིས་ལས་འཛོལ་གྱི་རིམ་པ་མཐོ་རུ་མ་བཏང་གོང་འབྲེལ་ཡོད་རྒྱལ་ཁབ་དང་རྒྱལ་སྤྱིའི་རྡུལ་ཕྲན་ནུས་པའི་སྒྲིག་གཞིར་བརྡ་ཁྱབ་བཏང་བ་ཡིན་ཞེས་བཤད་པ་རེད།
ཏུང་ཅིང་གློག་ཤུགས་ཀུང་སིས་ཚེས་13ཉིན་ཕུའུ་ཏའོ་ཉིང་རྡུལ་གློག་ཁང་དང་པོའི་འཕྲུལ་ཙུའུ་བཞི་པའི་སྙིགས་རོའི་རྫིང་བུ་ནས་དཔེ་འཐེན་བྱས་པའི་ཆུར་དབྱེ་ཞིབ་བྱས་ནས་བཤད་དོན། སྙིགས་རོའི་རྫིང་བུའི་ཆུའི་དྲོད་ཚད་དང་དེའི་ནང་འདུས་པའི་འགྱེད་འཕྲོའི་དངོས་པོ་ཕྲན་བུ་མང་དུ་ཕྱིན་ཡོད་པ་དེ་ཐོག་ནས་འབར་རྫས་དབྱུག་པ་ཁག་གཅིག་ཆག་སྐྱོན་ཤོར་བ་ར་སྤྲོད་བྱེད་ཐུབ། འབར་རྫས་དབྱུག་པ་ཁག་གཅིག་ལ་ཆག་སྐྱོན་ཤོར་ཡང་མང་ཆེ་བ་སྔར་བཞིན་ཡག་པོ་ཡོད་ཅེས་བཤད་པ་རེད།