ཤིན་ཧྭ་གསར་འགྱུར་ཁང་ཨ་ལ་མུའུ་ཐུ་ནས་ཟླ་4ཚེས་13ཉིན་གློག་འཕྲིན་འབྱོར་གསལ། ཏུའུ་ཧྲང་པེ་ནས་གནས་ཚུལ་སྤེལ་བར་ཚེས་13ཉིན་ཨེ་ཤེ་ཡའི་དབུས་རྒྱུད་དང་ཨེ་ཤེ་ཡ་ལྷོ་མའི་ལས་འགན་འཁུར་མཁན་ཨ་རིའི་རྒྱལ་དོན་བློན་ཆེན་གྱི་ལས་རོགས་པུའུ་ལའེ་ཁེས་ཐ་ཅིས་ཁེ་སི་ཐན་གྱི་རྒྱལ་ས་ཏུའུ་ཧྲང་པེ་རུ་འཚོགས་པའི་གསར་འགྱུར་ཡོངས་བསྒྲགས་ཀྱི་ཚོགས་འདུའི་ཐོག་ཨ་རིས་ཨ་ཧྥུ་ཀ་ནི་སི་ཐན་གྱི་བདེ་འཇགས་དང་འཕེལ་རྒྱས་ཆེད་མུ་མཐུད་ཤུགས་རྒྱག་རྒྱུ་དང་ཚོད་དཔག་བྱས་ན་2015ལོར་ཨ་ཧྥུ་ཀ་ནི་སི་ཐན་དུ་སྤེལ་བའི་དམག་དོན་བྱ་སྤྱོད་མཇུག་སྒྲིལ་རྒྱུ་རེད་ཅེས་གསུངས།

    དེའི་རིང་བཅར་འདྲི་གནང་བཞིན་ཡོད་པའི་པུའུ་ལའེ་ཁེས་སྨྱན་སྦྱོར་ལ་དེང་སྐབས་ཨ་ཧྥུ་ཀ་ནི་སི་ཐན་དུ་ཨ་རིའི་དམིགས་ཚད་གཙོ་བོ་ནི་ས་གནས་དེ་གའི་དམག་དཔུང་དང་ཉེན་རྟོག་དཔུང་སྡེ་གསོ་སྦྱོང་བྱས་ཏེ་ཁོང་ཚོས་རྒྱལ་ཁབ་ཀྱི་བདེ་འཇགས་སྲུང་སྐྱོང་བྱེད་པའི་འགན་འཁྲི་ལྕི་པོ་ཕྲག་སྟེང་དུ་འཁུར་ཐུབ་པ་བྱ་རྒྱུ་རེད་ཅེས་གསུངས།

    པུའུ་ལའེ་ཁེས་མིག་སྔར་ཨ་ཧྥུ་ཀ་ནི་སི་ཐན་གྱི་དུས་བབ་རིམ་བཞིན་ཡག་ཏུ་འགྲོ་བཞིན་ཡོད་མོད། འོན་ཀྱང་བལྟོས་བཅས་ཀྱིས་བརྟན་ལྷིང་དེ་ཙམ་མེད། ཨ་ཧྥུ་ཀ་ནི་སི་ཐན་དུ་བཅའ་སྡོད་བྱང་ཆིངས་རྒྱལ་སྤྱིའི་བདེ་འཇགས་རོགས་སྐྱོར་དཔུང་སྡེ་ཨ་ཧྥུ་ཀ་ནི་སི་ཐན་ནས་ཕྱིར་འཐེན་བྱས་རྗེས་ཨ་དམག་གིས་ད་དུང་ཨ་ཧྥུ་ཀ་ནི་སི་ཐན་གྱི་བདེ་འཇགས་དང་འཕེལ་རྒྱས་འགན་ལེན་བྱ་ཆེད་མུ་མཐུད་ནུས་པ་འདོན་སྤེལ་བྱ་རྒྱུ་རེད་ཅེས་གསུངས།

    འདི་ལོ་ནས་འགོ་ཚུགས་ཏེ་2014ལོ་བར་ཨ་ཧྥུ་ཀ་ནི་སི་ཐན་དུ་བཅའ་སྡོད་བྱང་ཆིངས་རྒྱལ་སྤྱིའི་བདེ་འཇགས་རོགས་སྐྱོར་དཔུང་སྡེ་ཁྲི་14ལས་བརྒལ་བ་དེ་དག་ཨ་ཧྥུ་ཀ་ནི་སི་ཐན་ནས་རིམ་བཞིན་ཕྱིར་འཐེན་བྱ་རྒྱུ་རེད།

    པུའུ་ལའེ་ཁེས་ད་དུང་ཐ་ཅིས་ཁེ་སི་ཐན་དང་ཨེ་ཤེ་ཡ་དབུས་རྒྱུད་ཀྱི་རྒྱལ་ཁབ་གཞན་དག་གིས་ཨ་ཧྥུ་ཀ་ནི་སི་ཐན་གྱི་བརྟན་ལྷིང་སྲུང་སྐྱོང་དང་བསྐྱར་སྐྲུན་བྱེད་རིང་ནུས་པ་ཧ་ཅང་གལ་ཆེན་འདོན་སྤེལ་བྱས་ཡོད་ཅེས་ཀྱང་གསུངས་པ་རེད།