མི་དམངས་ཉིན་རེའི་ཚགས་པར་ཁང་དུ་ཟླ་4ཚེས་12ཉིན་མཉམ་འབྲེལ་རྒྱལ་ཚོགས་ནས་གློག་འཕྲིན་འབྱོར་གསལ། ཚེས་11ཉིན་མཉམ་འབྲེལ་རྒྱལ་ཚོགས་བདེ་འཇགས་ལས་འཛིན་ལྷན་ཚོགས་ཀྱིས་སོ་མ་ལིའི་མཚོ་ཇག་གི་གནད་དོན་སྐོར་ཚོགས་འདུ་འཚོགས་པ་དང་ཚོགས་འདུའི་ཐོག་ཨུ་རུ་སུ་སོགས་རྒྱལ་ཁབ་ཀྱིས་བཏོན་པའི་མཚོ་ཇག་གི་བྱེད་སྤྱོད་ལ་རྡུང་རྡེག་གཏོང་རྒྱུར་ཤུགས་སྣོན་རྒྱག་རྒྱུའི་གྲོས་ཆོད་འཆར་ཟིན་ལ་མགྲིན་གཅིག་ཏུ་གྲོས་འཆམ་བྱུང་ནས་སོ་མ་ལིའི་ས་ཁོངས་ཕྱི་ནང་དུ་དམིགས་བསལ་གྱི་ཁྲིམས་ར་བཙུགས་ཏེ་སོ་མ་ལིའི་ཉེ་འགྲམ་གྱི་མཚོ་རྒྱུད་དུ་མཚོ་ཇག་གི་བྱེད་སྤྱོད་སྤེལ་མཁན་དོགས་ཡོད་མི་སྣར་འདྲི་གཅོད་བྱེད་འགན་འཁུར་རྒྱུའི་གཏན་འབེབས་བྱས་པ་རེད། དེ་ནི་རྒྱལ་སྤྱིའི་སྤྱི་ཚོགས་ཀྱིས་ཁྲིམས་འཛིན་གྱི་ལམ་སྲོལ་བརྒྱུད་ནས་སོ་མ་ལིའི་མཚོ་ཇག་གི་གནད་དོན་ཐག་གཅོད་ནུས་ལྡན་བྱེད་པའི་ཐད་གོམ་སྟབས་དང་པོ་སྤོས་པ་ཞིག་རེད།

    གྲོས་ཆོད་ནང་ངེས་པར་དུ་ཕྱོགས་བསྡུས་ཀྱི་བྱ་ཐབས་སྤྱད་ནས་མཚོ་ཇག་གི་བྱེད་སྒོ་དང་དེ་བཞིན་དེའི་འབྱུང་རྩའི་གནད་དོན་ལ་ཁ་གཏད་འཇོག་དགོས་པའི་ནན་བཤད་བྱས་པ་དང་འབྲེལ་དེའི་སྐོར་བྱ་ཐབས་རབ་དང་རིམ་པའང་བཏོན་པ་རེད། བྱ་ཐབས་དེ་དག་ནང་ཁོངས་མིའི་རྒྱལ་ཁབ་ལ་བཙན་ཁྲིད་བྱས་པའི་གཏའ་མིའི་གནད་དོན་སྐོར་མཉམ་ལས་ཤུགས་ཆེན་བྱ་རྒྱུའི་རེ་འབོད་བྱེད་པ་དང་། སོ་མ་ལིར་གཞོགས་འདེགས་ཀྱིས་མཚོ་འགག་གི་ཉེན་སྲུང་ནུས་པ་ཤུགས་ཆེར་གཏོང་བ། རྒྱལ་ཁབ་དེ་གའི་བཅའ་ཁྲིམས་ནང་མཚོ་ཇག་གི་བྱེད་སྤྱོད་དེ་ཉེས་གསོག་ལ་གཏན་འཁེལ་བྱེད་པ་དང་འབྲེལ་མཚོ་ཇག་དོགས་ཡོད་མི་སྣར་ཞུ་སྦྱོར་དང་བཀག་ཉར་བྱེད་པ་དང་དེ་བཞིན་མཚོ་ཇག་གི་བྱེད་སྤྱོད་ལ་རོགས་སྐྱོར་དང་། ཇུས་འགོད། སྒྲིག་འཛུགས་བཅས་བྱེད་པའམ་ཡང་ན་དེའི་ཁྲོད་ནས་ཁེ་སྤོགས་ཡོང་རེ་བྱེད་པའི་དོགས་ཡོད་པར་བརྟག་ཞིབ་དང་ཞུ་སྦྱོར་བྱེད་པ་སོགས་ཚུད་ཡོད་པ་རེད།