མི་དམངས་ཉིན་རེའི་ཚགས་པར་ཁང་དུ་པེ་ཅིང་ནས་ཟླ་4ཚེས་11ཉིན་གློག་འཕྲིན་འབྱོར་གསལ། ཕྱི་རྒྱལ་དུ་བཅའ་སྡོད་འདི་ག་ཚགས་པར་གྱི་གསར་འགོད་པ་ཧོང་ཕེ་ཀྲའོ་དང་། ཕེ་ཀོང་ཅང་། ཡོན་ཅི་རུང་། ཝུའེ་ཏུང་ཙེ། སུན་ཐེན་རེན་བཅས་དང་ཤིན་ཧྭ་གསར་འགྱུར་ཁང་གིས་སྤེལ་བའི་གནས་ཚུལ་ཕྱོགས་བསྡུས། ཚེས་10ཉིན་ལི་པི་ཡའི་འགོ་ཁྲིད་པ་ཁ་ཀྲ་ཕེས་རྒྱལ་ས་ཐི་རི་ཕོ་ལིར་ལྷོ་ཨ་ཧྥེ་རི་ཁའི་ཙུང་ཐུང་ཙུའུ་མ་ཡིས་སྣེ་ཁྲིད་བྱས་པའི་མོ་རི་ཐ་ནི་ཡའི་ཙུང་ཐུང་ཨ་ཅི་ཚི་དང་། མ་ལིའི་ཙུང་ཐུང་ཨ་མ་ཏུའུ། ཁོང་ཀོའི (པུའུ )ཙུང་ཐུང་ས་སུའུ་སོགས་ཚུད་པའི་ཨ་ཧྥེ་རི་ཁ་མནའ་འབྲེལ་རྒྱལ་ཁབ་ཀྱི་འཐུས་མི་ཚོགས་པ་དང་མཇལ་འཛོམས་བྱས་ནས་ཕྱོགས་གཉིས་པོས་ལི་པི་ཡའི་ས་ཁོངས་ནང་དམག་མཚམས་འཇོག་རྒྱུ་མངོན་འགྱུར་ཡོང་བ་བྱ་རྒྱུའི་ལམ་ཐིག་གི་ས་བཀྲའི་སྐོར་གྲོས་མོལ་བྱས་པ་རེད། ཚོགས་འདུ་མཇུག་འགྲིལ་རྗེས་ཙུའུ་མ་ཡིས་སྨྱན་སྦྱོར་ལ་ཁ་ཀྲ་ཕེས་ཨ་ཧྥེ་རི་ཁ་མནའ་འབྲེལ་རྒྱལ་ཁབ་ཀྱིས་བཏོན་པའི་དམག་མཚམས་འཇོག་རྒྱུའི་ལམ་ཐིག་གི་ས་བཀྲའི་འཆར་གཞི་རྩ་དོན་ཐོག་དང་ལེན་བྱས་ཡོད་ཅེས་བཤད་པ་རེད། ད་དུང་ཁོང་གིས་བྱང་ཆིངས་ཀྱིས་ལི་པི་ཡར་མཁའ་ཐོག་འཇབ་རྒོལ་བྱེད་མཚམས་བཞག་ནས “དམག་མཚམས་འཇོག་རྒྱུར་གོ་སྐབས་གཅིག་སྤྲོད ”བདེ་ཡོང་བ་བྱེད་དགོས་ཞེས་བཤད་པ་རེད། དེ་ནི་ད་ལོའི་ཟླ་བ་3པར་ལི་པི་ཡའི་གདོང་ཐུག་རིམ་འཕར་བྱུང་ཚུན་ཆབ་སྲིད་ཐོག་ནས་ལི་པི་ཡའི་མིག་སྔའི་ཉམས་ཉེན་ཐག་གཅོད་བྱེད་པའི་གོ་སྐབས་ཡག་ཏུ་འགྲོ་བ་ཞིག་རེད་ཅེས་ནན་བཤད་བྱས་པ་རེད།

    ཨ་ཧྥེ་རི་ཁ་མནའ་འབྲེལ་རྒྱལ་ཁབ་དང་ཁ་ཀྲ་ཕེ་སྲིད་གཞུང་གི་འཐུས་མིས་ཚེས་11ཉིན་ཨ་ཧྥེ་རི་ཁ་མནའ་འབྲེལ་རྒྱལ་ཁབ་ཀྱི་སྤྱི་ཁྱབ་པུའུ་རུ་མཉམ་འབྲེལ་གསར་འགོད་པའི་ཚོགས་འདུ་འཚོགས་པ་དང་ཨ་ཧྥེ་རི་ཁ་མནའ་འབྲེལ་རྒྱལ་ཁབ་ཀྱི་ཞི་བདེ་དང་བདེ་འཇགས་ཀྲོན་ཡོན་ལ་མ་ལས་ཨ་ཧྥེ་རི་ཁ་མནའ་འབྲེལ་རྒྱལ་ཁབ་ཀྱི་འཐུས་མི་དང་ཁ་ཀྲ་ཕེ་དབར་བཞག་པའི་གྲོས་མཐུན་སྒྲོག་སྦྱངས་བྱས་པ་དང་འབྲེལ་ཁ་ཀྲ་ཕེས་ཁོ་པའི་མཐའ་བསྐོར་དཔུང་སྡེར་དམག་མཚམས་འཇོག་ཏུ་འཇུག་རྒྱུའི་མོས་མཐུན་བྱས་ཀྱང་། གྲོས་མཐུན་དེའི་ནང་ཁ་ཀྲ་ཕེས་དབང་ཆ་དོར་མིན་སྐོར་བཏོན་མེད་པ་རེད། ཨ་ཧྥེ་རི་ཁ་མནའ་འབྲེལ་རྒྱལ་ཁབ་ཀྱི་འཐུས་མི་ཚོགས་པའི་ཁོངས་མི་འགའ་ཞིག་གིས་ད་དུང་ཚེས་11ཉིན་ལི་པི་ཡའི་ཤར་རྒྱུད་ཀྱི་ངོ་རྒོལ་ཤོག་ཁག་གིས་ཚོད་འཛིན་བྱས་པའི་ལི་པི་ཡའི་གྲོང་ཁྱེར་ཆེ་གྲས་གཉིས་པ་པན་ཅ་ཤིས་སུ་བསྐྱོད་དེ་སྲིད་གཞུང་ལ་ངོ་རྒོལ་བྱེད་མཁན་རྩ་འཛུགས་ཀྱི “རྒྱལ་ཁབ་བར་བརྒལ་ཨུ་ཡོན་ལྷན་ཁང ”གི་འགོ་ཁྲིད་པ་དང་གྲོས་མོལ་བྱས་པ་རེད། ཨུ་ཡོན་ལྷན་ཁང་དེའི་འགན་འཁུར་བ་གཅིག་གིས་ཚེས་11ཉིན་གྱི་སྔ་དྲོ་ཁོང་ཚོས “ཨ་ཧྥེ་རི་ཁ་མནའ་འབྲེལ་རྒྱལ་ཁབ་ཀྱི་ལམ་ཐིག་ས་བཀྲའི་འཆར་གཞིར་ཞིབ་འཇུག་བྱས་ཀྱང་ཁ་ཀྲ་ཕེ་སྲིད་སྟེགས་ནས་འབབ་ཏུ་འཇུག་རྒྱུའི་ལངས་ཕྱོགས་མཐའ་འཁྱོངས་བྱ་རྒྱུ་ཡིན ”ཞེས་བཤད་པ་རེད།

    བྱང་ཆིངས་ཀྱི་དྲུང་ཆེ་ལ་སི་མུའུ་སེན་གྱིས་ཚེས་11ཉིན་པུ་རུ་སེར་དུ་བྱང་ཆིངས་ལ་ཨ་ཧྥེ་རི་ཁ་མནའ་འབྲེལ་རྒྱལ་ཁབ་ཕྱོགས་ནས་འབྱོར་བའི་དམག་མཚམས་འཇོག་རྒྱུ་ལག་བསྟར་བྱ་རྒྱུའི་སྐོར་གྱི་རེ་འདུན་དངོས་འབྱོར་མ་བྱུང་ཞེས་བཤད་པ་རེད། ཁོང་གིས་ཁ་ཀྲ་ཕེས་ཚེས་10ཉིན་བཏང་བའི་དམག་མཚམས་འཇོག་རྒྱུའི་བརྡ་རྟགས་དེར “རིན་ཐང་མེད་པ ”མངོན་པས་དམག་མཚམས་འཇོག་རྒྱུ་དེ་ནི་ངེས་པར་དུ་ཡིད་ཆེས་ཐོབ་པ་དང་ར་སྤྲོད་བྱེད་ཐུབ་པ་ཞིག་དགོས་པའི་ངོས་འཛིན་བྱས་པ་རེད།

    ཨ་ཧྥེ་རི་ཁ་མནའ་འབྲེལ་རྒྱལ་ཁབ་ཀྱིས་སྔར་ནས་བཟུང་ལི་པི་ཡར་དམག་དོན་གྱི་བྱ་སྤྱོད་ལག་བསྟར་བྱ་རྒྱུའི་མོས་མཐུན་མི་བྱེད་པར་ཞི་བདེའི་བྱ་ཐབས་ལ་བརྟེན་ནས་ལི་པི་ཡའི་ཉམས་ཉེན་ཐག་གཅོད་བྱེད་དགོས་པའི་འདོད་ཚུལ་འཛིན་གྱི་ཡོད། ལི་པི་ཡའི་གནད་དོན་སྐོར་གྱི་ཨ་ཧྥེ་རི་ཁ་མནའ་འབྲེལ་རྒྱལ་ཁབ་ཀྱི་ཆེད་དོན་ཨུ་ཡོན་ལྷན་ཁང་གིས་ཟླ་3ཚེས་25ཉིན་ལམ་ཐིག་ས་བཀྲའི་འཆར་གཞི་དོན་ཚན་ལྔ་བཏོན་པ་སྟེ། མི་སེར་སྲུང་སྐྱོང་བྱེད་པ་དང་དམག་དོན་གདོང་ཐུག་དང་དགྲ་འཛིན་བྱེད་སྤྱོད་མཇུག་འགྲིལ་རྒྱུ་དང་། མི་ཆོས་རིང་ལུགས་ཀྱི་རོགས་སྐྱོར་འགན་སྲུང་བྱ་རྒྱུ། ངོ་རྒོལ་ཤོག་ཁག་ཚུད་པའི་ཤོག་ཁག་མི་འདྲ་བའི་དབར་སྐད་ཆ་ཤོད་རེས་བྱེད་འགོ་འཛུགས་རྒྱུ། བར་བརྒལ་དུས་མཚམས་འཛུགས་རྒྱུ། དགོས་ངེས་ཀྱི་ཆབ་སྲིད་སྒྱུར་བཅོས་བྱེད་འགོ་འཛུགས་རྒྱུ། ལི་པི་ཡའི་མི་དམངས་ཀྱི་འདུན་པ་སྐོང་རྒྱུ་སོགས་རེད། ལམ་ཐིག་ས་བཀྲ་དེས་ཁེ་ཕན་དང་འབྲེལ་བའི་ཨ་ཧྥེ་རི་ཁའི་རྒྱལ་ཁབ་ཀྱི་འདུན་པའི་ཚབ་བྱས་ཀྱང་མཐོང་ཆེན་འདང་ངེས་བྱེད་ཐུབ་མེད་པ་རེད།

    དེ་དང་དུས་མཚུངས་སུ་བྱང་ཆིངས་ཀྱི་མཁའ་ཐོག་འཇབ་རྒོལ་དྲག་པོའི་རྒྱབ་སྐྱོར་འོག་ལི་པི་ཡའི་སྲིད་གཞུང་ལ་ངོ་རྒོལ་བྱེད་མཁན་དྲག་ཆས་ཀྱིས་ཚེས་10ཉིན་གྱི་མཚན་མོ་འཐབ་ཇུས་ཀྱི་གནད་ཆེའི་ས་ཆ་ཨའེ་ཅི་ཏ་པི་ཡེ་བཟུང་བ་རེད། ཚེས་10ཉིན་གྱི་མཚན་མོ་གྲོང་ཁྱེར་དེར་དཔུང་འཇུག་བྱས་ཟིན་པའི་སྲིད་གཞུང་དམག་གིས་དེ་གར་བརྟན་སྲུང་བྱེད་མཁན་སྲིད་གཞུང་ལ་ངོ་རྒོལ་བྱེད་མཁན་དྲག་ཆས་མི་སྣ་དང་དམག་འཛིང་བྱས་པ་དང་འབྲེལ་སྐབས་ཤིག་རིང་རང་དབང་གི་གནས་སུ་གནས་ཐུབ་པ་བྱུང་བ་རེད། ཁ་ཐར་ཕྱེད་གླིང་བཪྙན་འཕྲིན་ལས་ཁུངས་ཀྱིས་གནས་ཚུལ་སྤེལ་བ་གཞིར་བཟུང་། བྱང་ཆིངས་ཀྱིས་དམག་འཐབ་གནམ་གྲུ་འབོར་ཆེན་བཏང་ནས་ཨའེ་ཅི་ཏ་པི་ཡེ་གྲོང་ཁྱེར་ཕྱི་རོལ་སོགས་ཀྱི་ལི་པི་ཡའི་སྲིད་གཞུང་དམག་ལ་འབར་མདེལ་དྲག་པོ་དབྱུགས་ནས་སྲིད་གཞུང་དམག་གི་ཐན་ཁེ་25དང་གོ་མཚོན་འབོར་ཆེན་གཏོར་བ་དང་སྲིད་གཞུང་དམག་གི་དཔོན་དམག་འབོར་ཆེན་འབར་མདེལ་གྱིས་བསད་པ་རེད། རྒྱབ་ཕྱོགས་ཀྱི་རོགས་སྐྱོར་ཧ་ལམ་མཚམས་ཆད་པའི་གནས་ཚུལ་འོག་སྲིད་གཞུང་དམག་ཨའེ་ཅི་ཏ་པི་ཡེ་ནས་ཕྱིར་འཐེན་མི་བྱེད་ཀ་མེད་བྱུང་བ་རེད། སྲིད་གཞུང་ལ་ངོ་རྒོལ་བྱེད་མཁན་དྲག་ཆས་ཀྱི་མགྲིན་ཚབ་པས་བྱང་ཆིངས་ཀྱིས་མཁའ་ཐོག་ནས་དམག་དོན་རྡུང་རྡེག་བཏང་བ་དེས་ང་ཚོར “རོགས་པ་ཆེན་པོ ”བྱས་བྱུང་ཞེས་བཤད་པ་རེད།