མི་དམངས་ཉིན་རེའི་ཚགས་པར་ཁང་དུ་ཁེ་རོ་ནས་ཟླ་4ཚེས་10ཉིན་གློག་འཕྲིན་འབྱོར་གསལ། ཚེས་10ཉིན་ལི་པི་ཡའི་སྲིད་གཞུང་དང་ངོ་རྒོལ་ཤོག་ཁའི་དྲག་ཆས་སྟོབས་ཤུགས་དབར་གྱི་དམག་འཐབ་གྲོང་ཁྱེར་མང་དག་ཞིག་ཏུ་རྒྱག་བཞིན་ཡོད་པ་དང་བྱང་ཆིངས་ཀྱིས་ལི་པི་ཡའི་སྲིད་གཞུང་དམག་ལ་མཁའ་ཐོག་ནས་མུ་མཐུད་འཇབ་རྒོལ་བྱས་པ་དང་ལི་པི་ཡའི་འགོ་ཁྲིད་ཁ་ཀྲ་ཕེ་སླར་ཡང་དོན་དགོས་བྱུང་ཞིང་། ཨ་ཧྥེ་རི་ཁའི་མནའ་འབྲེལ་རྒྱལ་ཁབ་ཀྱི་མཐོ་རིམ་འཐུས་མི་ཚོགས་པ་ལི་པི་ཡར་འབྱོར་ནས་རེས་སྐོར་གསར་པའི་འདུམ་སྒྲིག་བྱེད་འགོ་ཚུགས་པ་རེད།

    ཨ་རབ་བཪྙན་འཕྲིན་ལས་ཁུངས་ཀྱིས་གནས་ཚུལ་སྤེལ་བར་གཞིགས་ན། ཚེས་10ཉིན་ལི་པི་ཡའི་སྲིད་གཞུང་དམག་གིས་འཐབ་ཇུས་ཀྱི་གནས་གཙོ་བོ་ཨེ་ཅི་ཏ་པི་ཡེ་རུ་སླར་ཡང་ཕར་རྒོལ་བྱས་པ་དང་གྲོང་ཁྱེར་དེའི་ཁྲོམ་གཞུང་ཐོག་ངོ་རྒོལ་ཤོག་ཁའི་དྲག་ཆས་དང་མེ་མདའ་རྒྱག་རེས་བྱས་ཡོད། དེ་གོང་ཨེ་ཅི་ཏ་པི་ཡེར་ཕར་རྒོལ་བྱེད་མཁན་སྲིད་གཞུང་དམག་ལ་བྱང་ཆིངས་ཀྱིས་མཁའ་ཐོག་ནས་འབར་མདེལ་མང་པོ་དབྱུགས་པར་བརྟེན་གྲོང་ཁྱེར་དེ་ནས་ཕྱིར་འཐེན་མ་བྱེད་ཀ་མེད་བྱུང་ཡོད། ཚེས་9ཉིན་བྱང་ཆིངས་ཀྱིས་དམག་འཐབ་གནམ་གྲུ་ཐེངས་མང་བཏང་ནས་སྨི་སུའུ་ལ་ཐེ་དང་། ཨེ་ཅི་ཏ་པི་ཡེ། པུ་ལུའེ་ཅ་བཅས་དབར་གྱི་འཐབ་ས་གལ་ཆེན་ལ་མཁའ་ཐོག་ནས་འཇབ་རྒོལ་བྱས་ཏེ་ལི་པི་ཡའི་སྲིད་གཞུང་དམག་གི་ཐན་ཁེ་17གཏོར་ཡོད། བྱང་ཆིངས་ཀྱིས་མཁའ་ཐོག་ནས་འཇབ་རྒོལ་བྱས་པར་བརྟེན་ངོ་རྒོལ་ཤོག་ཁའི་དྲག་ཆས་ཀྱི་ཁུར་པོ་ཡང་དུ་ཕྱིན་ཏེ་སྲིད་གཞུང་དམག་ལ་ཁ་གཏད་གཅོག་བདེ་རུ་ཕྱིན་པས་ཨེ་ཅི་ཏ་པི་ཡེར་ཡོད་པའི་སྲིད་གཞུང་དམག་གནས་སྐབས་ཕྱིར་འཐེན་མི་བྱེད་ཀ་མེད་བྱུང་ཡོད། དེ་དང་དུས་མཚུངས་ངོ་རྒོལ་ཤོག་ཁག་གིས་གོ་སྐབས་དེ་བཟུང་ནས་འགོག་སྲུང་བརྟན་དུ་བཏང་བའི་ཐོག་མདེའུ་འདང་ངེས་གྲ་སྒྲིག་བྱས་ཏེ་ཁ་ཀྲ་ཕེའི་དམག་དཔུང་དང་ཐག་གཅོད་དམག་འཐབ་བྱ་རྒྱུའི་སྟ་གོན་བྱས་ཡོད།

    ས་གནས་དེ་གའི་དུས་ཚོད་ཟླ་4ཚེས་9ཉིན་གྱི་མཚན་མོ (པེ་ཅིང་གི་དུས་ཚོད་ཚེས་10ཉིན་གྱི་ཐོ་རེངས )ལི་པི་ཡའི་འགོ་ཁྲིད་ཁ་ཀྲ་ཕེ་སླར་ཡང་དོན་ཞིང་། ལི་པི་ཡའི་དཔོན་ཕྱོགས་ཀྱི་བཪྙན་འཕྲིན་ལས་ཁུངས་ཀྱིས་ཁ་ཀྲ་ཕེས་རྒྱལ་ས་ཐི་རི་ཕོ་ལིའི་སློབ་ཆུང་ཞིག་ཏུ་ལྟ་ཞིབ་བྱས་པའི་བཪྙན་ཕབ་བསྟན་པ་དང་བཪྙན་ཕབ་ནང་ཁ་ཀྲ་ཕེ་སྔར་བཞིན་གྲུང་ཤ་དོད་ལ་མིག་ཤེལ་ནག་པོ་གཅིག་བརྒྱབ་ནས་མི་རྣམས་ལ་ལག་པ་གཡུག་གཡུག་བྱེད་བཞིན་ཡོད།

    ཆབ་སྲིད་ཐོག་ནས་འདུམ་སྒྲིག་བྱེད་མཁན་ཕྱོགས་ཁག་གི་ཁྲོད་ནས་ཨ་ཧྥེ་རི་ཁ་མནའ་འབྲེལ་རྒྱལ་ཁབ་ཀྱི་ལངས་ཕྱོགས་ལ་མི་རྣམས་ཀྱིས་དོ་ཁུར་བྱེད་འོས་པ་ཞིག་ཡོད། ལི་པི་ཡའི་གནད་དོན་སྐོར་གྱི་ཨ་ཧྥེ་རི་ཁ་མནའ་འབྲེལ་རྒྱལ་ཁབ་ཆེད་དོན་ཨུ་ཡོན་ལྷན་ཁང་གིས་ཚེས་9ཉིན་མོ་རི་ཐ་ནི་ཡའི་རྒྱལ་ས་ནོ་ཝ་ཁ་ཆོ་ཐེར་ཚོགས་འདུ་འཚོགས་ནས་ལངས་ཕྱོགས་མཐུན་སྒྲིག་བྱས་ཏེ་ཚེས་10ཉིན་ལི་པི་ཡར་འཚམས་འདྲི་བྱ་ཆེད་གྲ་སྒྲིག་བྱས་པ་རེད།

    བྱང་ཆིངས་ཀྱིས་ཨ་ཧྥེ་རི་ཁའི་འགོ་ཁྲིད་ལི་པི་ཡར་སྐྱོད་ནས་འདུམ་འགྲིག་བྱ་རྒྱུར་མོས་མཐུན་བྱས་ཤིང་། ཉིན་རེའི་བཀོད་སྒྲིག་གཞིར་བཟུང་ལྷོ་ཨ་ཧྥེ་རི་ཁ་དང་། ཁོང་ཀོ མ་ལི། མོ་རི་ཐ་ནི་ཡ། ཝ་ཀན་ཏ་སོགས་རྒྱལ་ཁབ་ཀྱི་ཙུང་ཐུང་ས་གནས་དེ་གའི་དུས་ཚོད་ཚེས་10ཉིན་གྱི་ས་སྲོད་སྐབས་ལི་པི་ཡའི་རྒྱལ་ས་ཐི་རི་ཕོ་ལིར་འབྱོར་ནས་ལི་པི་ཡའི་འགོ་ཁྲིད་ཁ་ཀྲ་ཕེ་དང་གྲོས་མོལ་བྱས་པ་དང་ཚེས་11ཉིན་པན་ཅ་ཤིར་སྐྱོད་དེ་ངོ་རྒོལ་ཤོག་ཁག་དང་ཐུག་འཕྲད་བྱས་ཏེ་འབྲེལ་ཡོད་ལས་དོན་སྤེལ་རྒྱུ་ཡིན་པ་རེད། ཤེས་རྟོགས་བྱུང་བར་གཞིགས་ན། ཨ་ཧྥེ་རི་ཁའི་འགོ་ཁྲིད་ཀྱིས་ཨ་ཧྥེ་རི་ཁའི་མནའ་འབྲེལ་རྒྱལ་ཁབ་ཀྱིས་བཏོན་པའི་ལི་པི་ཡའི་གནད་དོན་ཐག་གཅོད་བྱེད་པའི་འཆར་གཞི་ལག་བསྟར་བྱ་རྒྱུའི་གལ་ཆེའི་རང་བཞིན་ནན་བཤད་བྱ་རྒྱུ་རེད།

    ཟླ་4ཚེས་9ཉིན་ཉིའུ་གཡོད་ཀྱི་དམག་འཁྲུག་ལ་ངོ་རྒོལ་བྱེད་མཁན་སྒྲིག་འཛུགས་མང་པོའི་མི་སྟོང་ཕྲག་ཁ་ཤས་ཀྱིས་མཉམ་འབྲེལ་ཐང་ཆེན་ཐོག་གཞི་ཁྱོན་ཆེ་བའི་དམག་འཁྲུག་ལ་ངོ་རྒོལ་བྱེད་པའི་འདུ་ཚོགས་འཚོགས་པ་དང་དམག་འཁྲུག་ལ་ངོ་རྒོལ་བྱེད་མཁན་མི་སྣས་ཨ་རིར་དབྱི་རག་དང་ཨ་ཧྥུ་ཀ་ནི་སི་ཐན་ནས་དམག་མི་གང་མགྱོགས་ཕྱིར་འཐེན་བྱ་རྒྱུ་དང་ཆབས་ཅིག་ལི་པི་ཡར་དམིགས་པའི་དམག་དོན་བྱ་སྤྱོད་ནང་མི་ཞུགས་པར་དམག་གྲོན་དེ་དག་རྒྱལ་ནང་གི་དཔལ་འབྱོར་ཉམས་རྒུད་ཀྱི་དཀའ་ངལ་འཕྲད་པའི་མང་ཚོགས་སྐྱོབ་རྒྱུར་སྤྱོད་རྒྱུའི་རེ་འབོད་བྱས་ཤིང་། འདི་ནི་མི་རྣམས་ཀྱིས་ཨ་རིའི་ཉིའུ་གཡོད་མཉམ་འབྲེལ་ཐང་ཆེན་དུ་སྦྱར་ཡིག་བཏེགས་ནས་དམག་འཁྲུག་ལ་ངོ་རྒོལ་བྱེད་པའི་འདུ་ཚོགས་ནང་ཞུགས་པའི་གནས་ཚུལ་ཡིན་པ།