ཤིན་ཧྭ་གསར་འགྱུར་ཁང་གཡོད་ཧན་ནེ་སི་པའོ་ནས་གློག་འཕྲིན་འབྱོར་གསལ། ཟླ་4ཚེས་5ཉིན་ལྷོ་ཨ་ཧྥེ་རི་ཁའི་ཙུང་ཐུང་གི་མགྲིན་ཚབ་པ་ཆི་ཆི ·ཁའོ་ཏེ་ཝས་གསར་འགོད་པར་ལྷོ་ཨ་ཧྥེ་རི་ཁའི་སྲིད་གཞུང་གིས་མཉམ་འབྲེལ་རྒྱལ་ཚོགས་དང་ཨ་ཧྥེ་རི་ཁའི་མནའ་འབྲེལ་རྒྱལ་ཁབ་ཀྱི་གྲོས་ཆོད་ཀྱི་སྒྲོམ་གཞིའི་ནང་ལི་པི་ཡའི་གནད་དོན་ཞི་བའི་ཐོག་ནས་ཐག་གཅོད་བྱ་རྒྱུར་བརྩོན་བཞིན་ཡོད་ཅེས་བཤད་ཅིང་། ཁོང་གིས་ལྷོ་ཨ་ཧྥེ་རི་ཁས་ཕྱིའི་སྟོབས་ཤུགས་ཀྱི་ཆབ་སྲིད་དམ་ཡང་ན་དམག་དོན་གྱི་ཐེ་ཇུས་གང་རུང་ལ་ངོ་རྒོལ་བྱ་རྒྱུ་ཡིན་ཞེས་བཤད་པ་རེད།

    ཁའོ་ཏེ་ཝས་ལྷོ་ཨ་ཧྥེ་རི་ཁའི་སྲིད་གཞུང་གིས་དྲག་ཤུགས་བྱ་སྤྱོད་ལ་ངོ་རྒོལ་བྱེད་པའི་ལངས་ཕྱོགས་ནི་སྔ་ཕྱི་བར་གསུམ་བརྟན་པོ་ཡིན་པ་དང་ལྷོ་ཨ་ཧྥེ་རི་ཁས་ཕྱོགས་ཁག་གིས་འཕྲལ་མར་དམག་མཚམས་བཞག་ནས་ཉེས་མེད་མི་སེར་ཤི་རྨས་མི་ཡོང་བ་བྱ་རྒྱུའི་རེ་འབོད་བསྐྱར་བསྒྲགས་བྱས་པ་རེད།

    ཁའོ་ཏེ་ཝས་ལྷོ་ཨ་ཧྥེ་རི་ཁ་དང་ལི་པི་ཡའི་དབར་མཛའ་གྲོགས་འབྲེལ་བ་དམ་ཟབ་དང་ཕྱི་འབྲེལ་གྱི་འབྲེལ་བ་ཡག་པོ་མཐའ་གཅིག་ཏུ་རྒྱུན་འཁྱོངས་བྱས་ཡོད། འབྲེལ་བ་དེ་རིགས་ལྷོ་ཨ་ཧྥེ་རི་ཁས་རིགས་རྒྱུད་ཁ་ཕྲལ་ལ་ངོ་རྒོལ་བྱེད་པའི་བཅིངས་འགྲོལ་འཐབ་རྩོད་ཁྲོད་བཙུགས་ཡོད། ཨ་ཧྥེ་རི་ཁའི་མནའ་འབྲེལ་རྒྱལ་ཁབ་ཀྱི་ཁོངས་མི་ཞིག་ཡིན་པའི་ལྷོ་ཨ་ཧྥེ་རི་ཁས་ལི་པི་ཡའི་གནད་དོན་ཐད་ཨ་ཧྥེ་རི་ཁའི་མནའ་འབྲེལ་རྒྱལ་ཁབ་ཀྱི་ལངས་ཕྱོགས་ལ་རྒྱབ་སྐྱོར་བྱས་ཏེ་ཆབ་སྲིད་ཐད་ནས་ལི་པི་ཡའི་ཉེན་ཁ་ཐག་གཅོད་བྱེད་པའི་བྱེད་ཐབས་འཚོལ་ཞིབ་ཧུར་ཐག་བྱ་རྒྱུ་ཡིན་ཞེས་བཤད་པ་རེད།

    ཁའོ་ཏེ་ཝས་ལྷོ་ཨ་ཧྥེ་རི་ཁའི་སྲིད་གཞུང་གིས་ཕྱོགས་ཁག་གིས་མཉམ་འབྲེལ་རྒྱལ་ཚོགས་བདེ་འཇགས་ལས་འཛིན་ལྷན་ཚོགས་ཀྱི་གྲོས་ཆོད་ཨང་1973ལ་བརྩི་སྲུང་མཐའ་གཅིག་ཏུ་ཞུས་ཏེ་མི་སེར་ཤི་རྨས་མི་ཡོང་བ་བྱེད་དགོས་ཞེས་བཤད། ཁོང་གིས་ལི་པི་ཡའི་དུས་བབ་ཇི་འདྲ་ཡོང་མིན་དེ་མཐར་ལི་པི་ཡའི་མི་དམངས་ཀྱིས་ཐག་གཅོད་བྱེད་དགོས་པ་དང་ཕྱིའི་ཆབ་སྲིད་སྟོབས་ཤུགས་དང་དམག་དོན་སྟོབས་ཤུགས་གང་རུང་གི་ཤུགས་རྐྱེན་གྱིས་ལི་པི་ཡའི་གནད་དོན་ཐག་གཅོད་བྱ་རྒྱུར་ཕན་པ་མེད་ཅེས་བཤད་པ་རེད།