ཡོ་རོབ་མནའ་མཐུན་ཨུ་ཡོན་ལྷན་ཁང་གིས་ཚེས་4ཉིན་མཁའ་སྐྱོད་བཟོ་ལས་འཕེལ་རྒྱས་ཀྱི་དམིགས་ཚད་ཁྱབ་བསྒྲགས་བྱས་ནས “རང་ཚུགས་དང་འགྲན་རྩོད་ཀྱི་ནུས་པ་ལྡན་པའི ”མཁའ་སྐྱོད་བཟོ་ལས་གཏོད་རྒྱུའི་བསྐྱར་བསྒྲགས་བྱས་པ་དང་འབྲེལ་མཁའ་སྐྱོད་ཀྱི་རྨང་གཞིའི་སྒྲིག་བཀོད་འཛུགས་སྐྲུན་ལ་མཐོང་ཆེན་གྱིས་མཁའ་སྐྱོད་བཟོ་ལས་དང་བཟོ་ལས་གཞན་དག་ལ་གྲུབ་འབྲས་མཉམ་དུ་ལོངས་སྤྱོད་དང་མཉམ་དུ་གོང་འཕེལ་གཏོང་རྒྱུར་སྐུལ་འདེད་བཏང་སྟེ་ཚན་རྩལ་གསར་གཏོད་ལ་བརྟེན་ནས་འགྲན་རྩོད་ཀྱི་ནུས་པ་ཆེ་རུ་གཏོང་རྒྱུར་སྐུལ་ཁྲིད་བྱ་རྒྱུར་ནན་བཤད་བྱས་ཡོད།

    སྲུང་སྐར་གྱི་ཕྱོགས་སྟོན་མ་ལག་ཐད་རྗེས་སུ་ལུས་འདོད་མི་བྱེད་པ།

    ཡོ་རོབ་མནའ་མཐུན་གྱི་མཁའ་སྐྱོད་བཟོ་ལས་ཀྱི་འཆར་གཞི་གསར་པ་དེའི་ནང་གཏན་ལ་ཕབ་པའི་གཙོ་གནད་དུ་སྲུང་སྐར་གྱི་ཕྱོགས་སྟོན་མ་ལག་འཛུགས་རྒྱུ་དམིགས་ཡུལ་གཙོ་བོར་བྱས་པའི་ཅ་ལི་ལུའེ་འཆར་གཞི་དང་། ས་གོ་ལའི་རྒྱང་ཚོར་ལྟ་ཞིབ་འཕེལ་རྒྱས་ཀྱི་འཆར་གཞི། མཁའ་དབྱིངས་སུ་དུས་ཐོག་གི་ཐིག་ལེན་མ་ལག་འཛུགས་རྒྱུ། ཡོ་རོབ་མནའ་མཐུན་གྱི་ཁོངས་མིའི་རྒྱལ་ཁབ་དབར་གྱི་མཁའ་སྐྱོད་མཉམ་ལས་ལ་རོགས་སྐྱོར་བྱ་རྒྱུ་བཅས་དོན་འཁྱོལ་དང་འཐུས་སྒོ་ཚང་དུ་གཏོང་རྒྱུ་དང་དེ་བཞིན་ཡོ་རོབ་ཀྱི་ལག་རྩལ་ཐད་ཀྱི་རང་ཚུགས་རང་བཞིན་ཆེ་རུ་གཏོང་རྒྱུ་སོགས་ཚུད་ཡོད། ཡོ་རོབ་མནའ་མཐུན་གྱི་བཟོ་ལས་ཀྱི་འགན་འཁུར་མཁན་ཨུ་ཡོན་ཨན་ཏུང་ནི་ཨའོ་.ཐ་ཡ་ནེས་ཅ་ལི་ལུའེ་འཆར་གཞི་ནི་ཡོ་རོབ་མནའ་མཐུན་གྱི་བཀོད་འདོམས་དམག་གྲུའི་རྣམ་གྲངས་ཤིག་ཡིན་པ་དང་ཨ་རི་དང་ཨུ་རུ་སུ་དང་བསྡུར་ན་ཅ་ལི་ལུའེ་འཆར་གཞི་དེ་དམངས་སྤྱོད་དམིགས་ཡུལ་དུ་བྱས་པ་ཞིག་ཡིན་པས་དེར་ཡོ་རོབ་མནའ་མཐུན་གྱི་སྲུང་སྐར་ཕྱོགས་སྟོན་ཁྱབ་ཁོངས་ཁྲོད་རང་ཚུགས་རང་བདག་ཡོང་བ་བྱ་རྒྱུར་གལ་འགངས་ཤིན་ཏུ་ཆེ་བའི་འཐབ་ཇུས་ཀྱི་དོན་སྙིང་ལྡན་ཡོད་ཅེས་གསུངས་ཡོད། གསར་དུ་བཏོན་པའི་འཕེལ་རྒྱས་ཀྱི་དམིགས་ཚད་གསར་པ་དེའི་ཐད་ཡོ་རོབ་ཀྱི་སྨྱན་སྦྱོར་ཚན་པས་ཡོ་རོབ་མནའ་མཐུན་གྱིས “སྲུང་སྐར་ཕྱོགས་སྟོན་གྱི་མ་ལག་ཐད་ཨ་རི་དང་། ཨུ་རུ་སུ། ཀྲུང་གོ་བཅས་ཀྱི་རྗེས་སུ་ལུས་འདོད་མི་བྱེད་པའི ”བསམ་པ་བཅངས་ཡོད་ལུགས་སྐོར་དཔྱད་གཏམ་སྤེལ་ཡོད། ཡོ་རོབ་མནའ་མཐུན་ཨུ་ཡོན་ལྷན་ཁང་གིས་ཨུ་ལྷན་དེས་གལ་ཆེའི་མཁའ་སྐྱོད་མཉམ་ལས་ཀྱི་རོགས་པ་ཨ་རི་དང་ཨུ་རུ་སུ་དང་སྐད་ཆ་ཤོད་རེས་མུ་མཐུད་མཐའ་འཁྱོངས་བྱ་རྒྱུ་དང་འབྲེལ་ཀྲུང་གོ་དང་མཁའ་སྐྱོད་རྒྱལ་ཁབ་གཞན་དག་དང་འབྲེལ་ཡོད་ལས་དོན་ཐད་གྲོས་བསྡུར་བྱས་ནས་སྔར་ལས་མང་བའི་མཉམ་ལས་ཀྱི་གོ་སྐབས་འཚོལ་རྒྱུ་ཡིན་ལུགས་བཤད་ཡོད། ཤེས་རྟོགས་བྱུང་བར་གཞིགས་ན། ཡོ་རོབ་ཀྱིས་ལྷག་པར་དུ་ཀྲུང་གོ་དང་མཁའ་སྐྱོད་རྒྱལ་ཁབ་གཞན་དག་དང་སྲུང་སྐར་ཕྱོགས་སྟོན་གྱི་འཕྲིན་ལམ་མཉམ་དུ་ལོངས་སྤྱོད་བྱ་རྒྱུའི་རེ་བ་བྱེད་ཀྱི་ཡོད་པ་རེད། ཉམས་ཞིབ་མཁན་གྱིས་མཁའ་སྐྱོད་ལག་རྩལ་ནི་ཡོ་རོབ་མནའ་མཐུན་གྱིས་ཕྱི་ཕྱོགས་ལ་འཛིན་པའི་སྲིད་ཇུས་ཀྱི་གྲུབ་ཆ་གལ་ཆེན་ཞིག་ཡིན་པ་དང་དེས་ཚད་གཞི་ངེས་ཅན་ཞིག་གི་ཐོག་ནས་ཡོ་རོབ་མནའ་མཐུན་གྱི་ཕྱི་འབྲེལ་འཇམ་ཤུགས་ཡིན་པ་མངོན་ལུགས་བཤད་ཡོད།

    ནོར་སྲིད་ཀྱི་གཏོང་སྒོ་ཉུང་གཏོང་སྲིད་ཇུས་ཀྱི་ཚོད་འཛིན་ཕོག་པ་ཧ་ཅང་གསལ་པོ་ཡིན།

    ཉེ་ལམ་ཡོ་རོབ་མཁའ་སྐྱོད་ཅུས་ཀྱིས་ཀྱང་མཁའ་སྐྱོད་བཟོ་ལས་གསར་སྤེལ་བྱེད་ཤུགས་ཆེ་རུ་བཏང་ཞིང་། འདི་ལོའི་ཟླ་བ་གཉིས་པའི་ནང་ཡོ་རོབ་མཁའ་སྐྱོད་ཅུས་ཀྱིས་ཡོ་རོབ་ཀྱི་མི་མེད་སྐྱེལ་འདྲེན་འཕུར་གྲུ་ལྕི་ཤོས་བཏང་བ་ལམ་ལྷོངས་བྱུང་བ་དང་དེས་མི་ཞུགས་མཁའ་སྐྱོད་ཐུབ་བཟོ་ཆེན་པོ་ཡོད་པ་མཚོན། དེ་མུར་ཅུས་དེས་ཟླ་བ་གསུམ་པའི་ནང་ཡོ་རོབ་ཀྱིས་མཉམ་བགྲོད་སྲུང་སྐར་ཕྱོགས་སྟོན་ཁྱབ་རྒྱུའི་ཞབས་ཞུ་དེ་མཁའ་སྐྱོད་ཀྱི་ཁྱབ་ཁོངས་ནང་དངོས་སུ་ཞུགས་ཡོད་པས་འཕྲལ་སྡོམ་གྱི་ལས་འགན་སྒྲུབ་མཁན་གནམ་གྲུ་བདེ་འཇགས་ངང་འབབ་རྒྱུར་འགན་ལེན་བྱ་རྒྱུ་ཡིན་པ་ཁྱབ་བསྒྲགས་བྱས་ཡོད། མ་ལག་དེ་ཡོ་རོབ་མནའ་མཐུན་ཨུ་ཡོན་ལྷན་ཁང་དང་ཡོ་རོབ་མཁའ་སྐྱོད་ཅུས་དང་དེ་བཞིན་ཡོ་རོབ་མཁའ་སྐྱོད་བདེ་འཇགས་རྩ་འཛུགས་ཀྱིས་ཐུན་མོང་ཐོག་གསར་སྤེལ་བྱས་པ་ཞིག་ཡིན་པས་ཡོ་རོབ་ས་ཁུལ་གྱི་སྲུང་སྐར་ཕྱོགས་སྟོན་བརྡ་རྟགས་གནད་ལ་འཕིགས་ཚད་ཆེ་རུ་གཏོང་རྒྱུར་སྤྱོད་ཆོག་པ་དང་མིག་སྔར་ཡོ་རོབ་ཀྱི་རྒྱལ་ཁབ་27ལ་རིན་མེད་ཞབས་འདེགས་ཞུ་གི་ཡོད་པ་རེད། ཡོ་རོབ་མཁའ་སྐྱོད་ཅུས་ཀྱིས་ཕྱོགས་སྟོན་མ་ལག་དེར་ལེགས་བཅོས་བྱེད་བཞིན་པ་དང་དེའི་ནུས་པ་སྔར་ལས་ལྷག་པ་ཡོང་བའི་རེ་བ་བྱེད་ཀྱི་ཡོད་པ་རེད།

    གནས་ཚུལ་སྤེལ་བར་གཞིགས་ན། ཡོ་རོབ་མཁའ་སྐྱོད་བཟོ་སྐྲུན་ལས་རིགས་ལ་ད་ལྟ་གླ་པ་མི་གྲངས་ཁྲི་གསུམ་ལྷག་ཙམ་ཡོད་པ་དང་ལོ་རེའི་ཐོན་རྫས་རིན་ཐང་ཡོ་སྒོར་དུང་ཕྱུར་54ཟིན་ཞིང་། ཡོ་རོབ་ཀྱི་སྲུང་སྐར་སྐྱེལ་གཉེར་ཀུང་སི་11ལ་བཟོ་པ་6000ཙམ་ཡོད་པ་དང་རིགས་ཁག་གི་སྲུང་སྐར་153སྐྱེལ་གཉེར་བྱས་པར་ལོར་ཡོང་འབབ་ཡོ་སྒོར་དུང་ཕྱུར་60བྱུང་ཡོད་པ་རེད། གལ་ཏེ་ཅ་ལི་ལུའེ་འཆར་གཞི་དང་ས་གོ་ལའི་ཁོར་ཡུག་བདེ་འཇགས་ཀྱི་ལྟ་ཞིབ་ཚད་ལེན་འཆར་གཞི་ལག་བསྟར་ཐུབ་ཚེ་མ་འོངས་པའི་ལོ་ཉི་ཤུའི་ནང་དཔལ་འབྱོར་དང་སྤྱི་ཚོགས་ཀྱི་ཕན་འབྲས་ཡོ་སྒོར་དུང་ཕྱུར་600ནས་900བར་ཡོང་རྒྱུ་རེད།

    འོན་ཏེ་ཁོངས་མིའི་རྒྱལ་ཁབ་ཁག་གི་མ་དངུལ་དང་ལག་རྩལ་གྱི་ཆུ་ཚད་གཅིག་མཚུངས་མིན་པའི་ཁར་རྒྱལ་སྤྱིའི་དངུལ་རྩའི་ཉམས་ཉེན་གྱི་ཤུགས་རྐྱེན་ཕོག་པའི་རྐྱེན་ལས་ཡོ་རོབ་མནའ་མཐུན་གྱི་ཁོངས་མིའི་རྒྱལ་ཁབ་ཀྱི་མཁའ་སྐྱོད་ཁྱབ་ཁོངས་ནང་ནོར་སྲིད་ཀྱི་གཏོང་སྒོ་ཉུང་དུ་གཏོང་བའི་སྲིད་ཇུས་སྔ་རྗེས་སུ་ལག་ལེན་བསྟར་ཡོད། ཤེས་རྟོགས་བྱུང་བར་གཞིགས་ན། ལག་ལེན་བསྟར་ཉེར་ཡོད་པའི་ཅ་ལི་ལུའེ་འཆར་གཞིའི་མ་གནས་དེ་ཡོ་སྒོར་དུང་ཕྱུར་བཅོ་ལྔའི་སྔོན་རྩིས་ལས་བརྒལ་བཟོ་ཡོད་པར་བརྟེན་དབྱིན་ཇིས་ཅ་ལི་ལུའེ་འཆར་གཞིའི་ནོར་སྲིད་ཀྱི་སྔོན་རྩིས་མང་དུ་གཏོང་རྒྱུར་མཐའ་གཅིག་ཏུ་ངོ་རྒོལ་བྱེད་ཀྱི་ཡོད་པ་རེད།