ཤིན་ཧྭ་གསར་འགྱུར་ཁང་ཉིའུ་གཡོད་ནས་ཟླ་4ཚེས་8ཉིན་གློག་འཕྲིན་འབྱོར་པ་གཞིར་བཟུང་། མ་འཇོག་མཁན་གྱིས་དབུས་ཤར་ས་ཁུལ་གྱི་ཛ་དྲག་ཆེ་བའི་དུས་བབ་ལ་སེམས་ཁྲལ་བྱེད་པ་དང་དེ་བཞིན་ཨ་སྒོར་གྱི་འཛའ་ཐང་ཆག་པའི་སྐུལ་མ་ཐེབས་ནས་ཚེས་8ཉིན་ཉིའུ་གཡོད་ཁྲོམ་རའི་རྒྱལ་སྤྱིའི་སྣུམ་རིན་མུ་མཐུད་འཕར་ནས་ལོ་གཉིས་དང་ལོ་ཕྱེད་ནང་གི་དུས་བཅད་ཚོང་ཟོག་གི་མཐའ་མའི་གོང་ཐང་ཁྱབ་བསྒྲགས་ཀྱི་ཟིན་ཐོ་གསར་པ་སླར་ཡང་བཏོད་པ་རེད།

    ལི་པི་ཡ་སོགས་དབུས་ཤར་ས་ཁུལ་དང་དེ་བཞིན་ཨ་ཧྥེ་རི་ཁ་བྱང་མའི་སྣུམ་ཐོན་རྒྱལ་ཁབ་ཀྱི་དུས་བབ་བརྟན་པོ་མེད་པའི་གནས་ཚུལ་སྔར་བཞིན་གནས་པའི་རྐྱེན་གྱིས་མ་འཇོག་བྱེད་མཁན་གྱིས་མ་བཅོས་རྡོ་སྣུམ་མཁོ་འདོན་བྱ་རྒྱུར་སེམས་ཁྲལ་བྱེད་པ་དེ་ནི་སྣུམ་རིན་མཐོ་རུ་སོང་བའི་རྒྱུ་མཚན་གཙོ་བོ་ཞིག་སྔར་བཞིན་ཡིན་པ་རེད།

    ཉིན་དེ་རང་དུ་དུས་བཅད་ཚོང་ཟོག་གི་མཐའ་མའི་གོང་ཐང་ཁྱབ་བསྒྲགས་བྱེད་སྐབས་ཉིའུ་གཡོད་ཚོང་ཟོག་ཉོ་ཚོང་ཁང་གི་ཟླ་བ་ལྔ་པར་རྩིས་སྤྲོད་བྱས་པའི་ཡང་བའི་མ་བཅོས་རྡོ་སྣུམ་གྱི་དུས་བཅད་ཚོང་ཟོག་གི་རིན་གོང་ཨ་སྒོར་2.49འཕར་ཏེ་སྣུམ་ལྕགས་ཀྲིན་རེར་ཨ་སྒོར་112.79ལོན་ནས་2.26%འཕར་བར་བརྟེན་2008ལོའི་ཟླ་བ་དགུ་པ་ནས་བཟུང་གི་དུས་བཅད་ཚོང་ཟོག་མཐའ་མའི་གོང་ཐང་ཁྱབ་བསྒྲགས་ཀྱི་རིན་གོང་མཐོ་ཤོས་ཤིག་རེད། ལོན་ཏུན་ཁྲོམ་རས་ཟླ་བ་ལྔ་པར་རྩིས་སྤྲོད་བྱས་པའི་པའེ་ཧའེ་པུའུ་ལུན་ཐའེ་ཡི་མ་བཅོས་རྡོ་སྣུམ་གྱི་དུས་བཅད་རིན་གོང་ཨ་སྒོར་0.37འཕར་ནས་སྣུམ་ལྕགས་ཀྲིན་རེར་ཨ་སྒོར་122.67ལོན་ཡོད་པ་རེད།