མི་དམངས་ཉིན་རེའི་ཚགས་པར་ཁང་དུ་པུ་རུ་སེར་ནས་གློག་འཕྲིན་འབྱོར་གསལ། ཚེས་5ཉིན་པེའོ་ཀྲུན་ཕུའར་དང་ཧུད་ཡུད་རྗེས་ཀྱི་རྒྱལ་སྤྱིའི་རིམ་པ་དཔྱད་འདེམས་སྒྲིག་གཞི་གཞན་མུའུ་ཏེས་ཀྱང་ཕོར་ཐིའུ་ཀལ་གྱི་དུས་ཡུན་རིང་བའི་རྒྱལ་བུན་གྱི་ཡིད་རྟོན་རིམ་པ་དཔྱད་འདེམས་དེ་A3ནས་BAA1བར་ཆག་ནས་མདུན་ལམ་དེ་ཙམ་ཆེན་པོ་མེད་ཚུལ་ཁྱབ་བསྒྲགས་བྱས་ཤིང་། མུའུ་ཏེས་རིམ་པ་མར་ཆག་པའི་རྒྱུ་རྐྱེན་ནི་ཕོར་ཐིའུ་ཀལ་གྱི་ཆབ་སྲིད་དང་དཔལ་འབྱོར་ལ་འཕྲད་པའི་ངེས་མེད་རང་བཞིན་ཉིན་བཞིན་ཆེ་རུ་ཕྱིན་ནས་ཕྱིས་འབྱུང་རྒྱལ་ཁབ་དེའི་རིམ་པ་དཔྱད་འདེམས་མུ་མཐུད་ཆག་མིན་དེ་ཕོར་ཐིའུ་ཀལ་གྱིས་དུས་འབྲིང་གི་མ་རྩ་བསྡུ་སྒྲིལ་བྱེད་ཐུབ་མིན་ལ་རག་ལུས་ཡོད་ཚུལ་བཤད། དེ་ནི་མུའུ་ཏེས་འདས་ཟིན་པའི་གཟའ་འཁོར་གསུམ་ནང་ཕོར་ཐིའུ་ཀལ་གྱི་དུས་རིང་གི་ཡིད་རྟོན་རིམ་པ་དམའ་རུ་གཏོང་ཐེངས་གཉིས་པ་དེ་ཡིན་པ་རེད། འདི་ཟླའི་ཚེས་5བར་པེའོ་ཀྲུན་ཕུའར་དང་ཧུད་ཡུད་གཉིས་ཀྱིས་ཕོར་ཐིའུ་ཀལ་གྱི་དུས་ཡུན་རིང་བའི་རྒྱལ་བུན་གྱི་རིམ་པ་ཚང་མ་BBB-ལ་བཟོས་པ་དེ་མུའུ་ཏེས་དཔྱད་འདེམས་བྱས་པའི་རིམ་པ་ལས་ཀྱང་དམའ་བ་ཡོད་པ་རེད། ཉེ་ཆར་རྒྱལ་སྤྱིའི་རིམ་པ་དཔྱད་འདེམས་སྒྲིག་གཞིས་ཡོ་རོབ་སྒོར་མོ་སྤྱོད་ཁུལ་གྱི་མདུན་ལམ་དུས་ཐུང་ནང་དེ་ཙམ་ཡག་པོ་མེད་པར་བལྟས་ནས་ཕོར་ཐིའུ་ཀལ་དེ་ཀེ་རི་སེ་དང་ཨིར་ལན་རྗེས་སུ་དངུལ་བུན་རོགས་སྐྱོབ་ཞུ་མཁན་ཡོ་རོབ་སྒོར་མོ་སྤྱོད་ཁུལ་གྱི་རྒྱལ་ཁབ་གསུམ་པར་འགྱུར་རྒྱུའི་ངོས་འཛིན་བྱས་ཤིང་། ཚེས་1ཉིན་གྱི་ཕྱི་དྲོར་པེའོ་ཀྲུན་ཕུའར་གྱིས་ཨར་ལན་གྱི་དཔྱད་འདེམས་རིམ་པ་བཅག་པ་དང་རྒྱལ་ཁབ་དེའི་དངུལ་ཁང་ལས་རིགས་ཁྲོད་ཀྱི་གནོན་ཤུགས་གསར་པར་བརྟག་དཔྱད་བྱས་པའི་འབྲས་བུ་ལས་ད་དུང་རོགས་སྐྱོབ་དངུལ་ཡོ་རོབ་སྒོར་མོ་དུང་ཕྱུར་140འཕར་མ་རྒྱག་དགོས་པ་མངོན་ཡོད། ཉམས་ཞིབ་བྱས་པའི་ཐོག་ནས་ཡོ་རོབ་སྒོར་མོ་སྤྱོད་ཁུལ་རྒྱལ་ཁབ་ཀྱིས་གཟབ་བརླིང་བརྟན་གསུམ་གྱི་ཐོག་ནས་སྤྱི་པའི་ནོར་སྲིད་སྲིད་ཇུས་ལ་སྐུལ་འདེད་མ་བཏང་ཚེ་སླར་ཡང་ཁྲོམ་ར་ཟང་ཟིང་ཆགས་སྲིད་པའི་ངོས་འཛིན་བྱས་ཡོད།

    ཚེས་5ཉིན་གྱི་ཧུད་ཡུད་ཚོགས་འདུ་དེ་ཡོ་རོབ་སྒོར་མོ་སྤྱོད་ཁུལ་གྱི་བདག་དབང་དང་འབྲེལ་བའི་བུན་འཇལ་གྱི་རིམ་པ་ལ་དམིགས་ནས་འཚོགས་པའི་གཞི་ཁྱོན་ཆེ་བའི་ཁ་པར་ཚོགས་འདུ་ཞིག་ཡིན་པ་དང་། དེས་ཉེ་དུས་ཡོ་རོབ་སྒོར་མོ་སྤྱོད་ཁུལ་རྒྱལ་ཁབ་ཁག་གཅིག་གི་བདག་དབང་དང་འབྲེལ་བའི་བུན་འཇལ་གནད་དོན་སྐོར་ལ་གྲོས་བསྡུར་བྱས་པ་རེད།