ཤིན་ཧྭ་གསར་འགྱུར་ཁང་ལུའོ་ཧྲན་ཅི་ནས་ཟླ་4ཚེས་2ཉིན་གློག་འཕྲིན་འབྱོར་གསལ། ཚེས་2ཉིན་ཨ་རི་ཚན་རིག་ཡར་སྐུལ་ཚོགས་པས་ཞིབ་འཇུག་སྙན་ཞུ་ཁྱབ་བསྒྲགས་བྱེད་སྐབས་འཚོ་བ་སྐྱེལ་སྟངས་མི་ལེགས་པའི་རྐྱེན་གྱིས་ཨ་རི་བ་དེ་བས་མང་བར་ཨ་རག་ཉིང་ཁུའི་རང་བཞིན་མིན་པའི་མཆིན་པ་ཚིལ་བཏུམས་ཀྱི་ནད་ཕོག་ཡོད། གལ་ཏེ་སྔོན་འགོག་བྱེད་ཐབས་ནུས་ལྡན་ཞིག་མ་སྤྱད་ན་ནད་དེ་ཨ་རིའི་ནད་ཡམས་སུ་འགྱུར་རྒྱུ་རེད་ཅེས་བཤད་པ་རེད།

    སྙན་ཞུའི་ནང་གལ་ཏེ་མིག་སྔར་ཨ་རི་བ་ཤ་རྒྱགས་པ་དང་གཅིན་པ་མངར་འགྱུར་གྱི་ནད་ཕོག་ཚད་དེ་མ་འོངས་ལོ་20ནང་མ་ཆག་ན་2030ལོར་སླེབས་སྐབས་ཨ་རིའི་མི་འབོར་50%ལ་ཨ་རག་ཉིང་ཁུའི་རང་བཞིན་མིན་པའི་མཆིན་པ་ཚིལ་བཏུམས་ཀྱི་ནད་ཕོག་རྒྱུ་རེད་ཅེས་བཤད་པ་རེད།

    སྙན་ཞུའི་ནང་ཞིབ་འཇུག་མི་སྣས་1988ལོ་ནས་1994ལོ་བར་དང་། 1999ལོ་ནས་2004ལོའི་བར། 2005ལོ་ནས་2008ལོ་བར་བཅས་ཀྱི་དུས་མཚམས་གསུམ་གྱི་ཨ་རི་ཡོངས་ཀྱི་ནད་ཐོག་སྨན་བཅོས་བརྟག་དཔྱད་གྲངས་གཞིར་དབྱེ་ཞིབ་བྱས་རྗེས་གོང་གསལ་གྱི་སྔོན་དཔག་དབྱེ་ཞིབ་དེ་བྱུང་ཡོད་ཅེས་བཤད་པ་རེད།

    དབྱེ་ཞིབ་ནས་མངོན་དོན། ཨ་རི་བ་ཨ་རག་ཉིང་ཁུའི་རང་བཞིན་མིན་པའི་མཆིན་པ་ཚིལ་བཏུམས་ཀྱི་ནད་ཕོག་ཚད་དེ་དུས་མཚམས་དང་པོའི་5.51%ནས་དུས་མཚམས་གསུམ་པའི་11%བར་འཕར་བ་དང་དེ་དང་དུས་མཚུངས་ཨ་རག་ཉིང་ཁུའི་རང་བཞིན་མིན་པའི་མཆིན་པ་ཚིལ་བཏུམས་ཀྱི་ནད་ཀྱིས་བཟུང་བའི་མཆིན་པའི་གཅོང་ནད་ཀྱི་བསྡུར་ཚད་དེ་ཡང་46.8%ནས་75.1%བར་འཕར་ཡོད་པ་རེད།

    ཞིབ་འཇུག་མི་སྣས་གྲངས་གཞིའི་ཐོག་ད་དུང་ཨ་རི་བ་ཤ་རྒྱགས་པ་དང་གཅིན་པ་མངར་འགྱུར་གྱི་ནད་ཕོག་ཚད་ཀྱང་དེའི་རིང་འཕར་བ་དང་ཤ་རྒྱགས་པ་དང་གཅིན་པ་མངར་འགྱུར་གྱི་ནད་ནི་ཨ་རག་ཉིང་ཁུ་རང་བཞིན་མིན་པའི་མཆིན་པ་ཚིལ་བཏུམས་ཀྱི་ནད་བཟོ་མཁན་གྱི་ཉེན་ཁའི་རྒྱུ་རྐྱེན་གཙོ་བོ་གཉིས་ཡིན་པ་མངོན་ཡོད་ཅེས་བསྟན་པ་རེད།

    ཨ་རག་ཉིང་ཁུའི་རང་བཞིན་མིན་པའི་མཆིན་པ་ཚིལ་བཏུམས་ཀྱི་ནད་ནི་ཆང་རག་མི་བཏུང་ཡང་མཆིན་པའི་ཕྲ་ཕུང་ཚིལ་དུ་འགྱུར་བ་དང་ཚིལ་གསོག་ཉར་གྱི་ཁྱད་ཆོས་ཡིན་པའི་ནད་ཐོག་ནད་དཔེའི་ཕྱོགས་བསྡུས་ནད་ཅིག་ཡིན་པ་དང་ནད་དེ་རིགས་ནི་ཆང་རག་བཏུང་རྒྱུར་དགའ་པོ་མེད་མཁན་ལའང་ཕོག་ཡོད། ནད་དེ་འཛམ་གླིང་འཕྲོད་བསྟེན་རྩ་འཛུགས་ཀྱིས་དུས་རབས་21པའི་འཛམ་གླིང་གི་གལ་ཆེའི་སྤྱི་པའི་བདེ་ཐང་གནད་དོན་གྱི་གྲས་ཤིག་ཏུ་བཞག་ཡོད་པ་རེད།