ཨ་རིའི་སློབ་གསོའི་སྐོར་བརྗོད་སྐབས་མི་མི་ཉུང་བ་ཞིག་གི་བསམ་བློར་སྒོ་མོ་དབྱེ་བའི་སློབ་ཁྲིད་བྱེད་སྟངས་དང་ཕུན་སུམ་ཚོགས་པའི་སློབ་ཁྲིད་ཀྱི་ཐོན་ཁུངས་དེ་འཁོར་གྱི་ཡོད། འོན་ཀྱང་སྨྱུག་འཛིན་པར་སེམས་འགུལ་ཐེབས་ཤོས་ཤིག་ནི་ཨ་རིའི་ལུས་རྩལ་སློབ་ཁྲིད་ཀྱི་ཐོན་ཁུངས་དེ་རེད།
ཨ་རིའི་ལུས་རྩལ་སློབ་ཚན་ནི་སློབ་ཆུང་ནས་ཁྲིད་ཀྱི་ཡོད་པ་མ་ཟད་ཕུན་སུམ་ཚོགས་པོ་ཡོད་པ་དང་སློབ་ཆེན་དུ་སླེབས་སྐབས་དེ་བས་འདྲ་མིན་ཕུན་སུམ་ཚོགས་པོ་ཡོད། རྐང་རྩེད་སྤོ་ལོ་དང་། ལན་ཆིའུ་སྤོ་ལོ། ཝང་ཆིའུ་སྤོ་ལོ་སོགས་རྒྱུན་གཏན་གྱི་རྣམ་གྲངས་ཕུད་སློབ་མར་དགོས་མཁོ་ཡོད་ཚེ་སྐོང་ཐུབ་པ་སྟེ། གལ་སྲིད་ལུས་ཟུངས་གསོ་འདོད་ཡོད་ཚེ་བསམ་བློ་གཏོང་བའི་སློབ་ཚན་ཡོད་པ་དང་། གལ་སྲིད་ལུས་གཟུགས་མཛེས་བཟོ་བྱེད་འདོད་ཡོད་ཚེ་ཡུས་ཅ་སློབ་ཚན་ཡོད་པ། གལ་སྲིད་མཐུན་འབྲེལ་བྱེད་འདོད་ཡོད་ཚེ་ཞབས་བྲོའི་སློབ་ཚན་ཡོད་པ། གལ་སྲིད་དམག་ནང་ཞུགས་རྒྱུའི་འཆར་གཞི་ཡོད་ཚེ་དམག་དོན་སྦྱོང་བརྡར་སློབ་ཚན་ཡོད་པ། གལ་སྲིད་དབྱར་ཁའི་གུང་གསེང་རིང་ཡ་མ་ཤུན་ནགས་ཚལ་དུ་མྱུལ་དཔྱད་བྱེད་པར་བསྐྱོད་རྒྱུའི་འཆར་གཞི་ཡོད་ཚེ་བྱེས་སུ་འཚོ་ཐབས་བྱེད་པའི་སློབ་ཚན་བཅས་ཡོད། གཞན་ཡང་ད་དུང་རྟ་རྩལ་དང་། ཨ་རིའི་རྐང་རྩེད་སྤོ་ལོ། རྒྱག་སྟངས་ཆུ་རྐྱལ། འཁྱག་ཤུད། གྲི་རྩལ། ཁུ་ཚུར་སྣུན་རྩལ་སོགས་ཁྱེད་ཀྱིས་བསམ་པ་མཐའ་དག་ཡོད་པ་རེད། དེས་མ་ཟད་ལུས་རྩལ་སློབ་ཚན་གྱི་དུས་ཚོད་ངེས་མེད་ཡིན་པ་དང་སྤྱི་ཡོངས་ནས་བརྗོད་ན་རྩལ་འགྲན་ལུས་རྩལ་སློབ་ཁྲིད་དང་། ལུས་སྦྱོང་ལུས་རྩལ་སློབ་ཁྲིད། སྤྱི་ཚོགས་ཀྱི་དངོས་སྤྱོད་སློབ་ཁྲིད། རིག་གཞུང་མཉམ་འབྲེལ་སློབ་ཁྲིད་བཅས་ཁག་བཞི་ཡོད། སློབ་མ་ཚོས་སློབ་ཚན་གདམ་ག་མ་བྱས་གོང་དང་ཐོག་རང་ཉིད་ཀྱི་སློབ་སྦྱོང་དམིགས་ཡུལ་གཏན་འཁེལ་བྱས་རྗེས་རང་ཉིད་ཀྱི་སྤྲོ་སྣང་དང་བྱང་ཚད་གཞིར་བཟུང་སློབ་ཚན་དང་དཀའ་ཚད་མི་འདྲ་བ་གདམ་ག་བྱེད་དགོས། ཨ་རིའི་ལུས་རྩལ་སློབ་ཚན་ལ་སྤྱི་ཚོགས་ཀྱི་རྨང་གཞི་རྒྱ་ཁྱབ་ལྡན་ཡོད། སྡེ་ཁུལ་དུ་ཁྱིམ་བདག་ཚོས་ཕྲུ་གུ་དང་མཉམ་དུ་རྒྱུག་ཤར་གློད་པ་དང་དབྱུག་རྩེད་སྤོ་ལོ་རྒྱག་པའི་གནས་ཚུལ་གང་སར་མཐོང་རྒྱུ་ཡོད་པ་དང་སྡེ་ཁུལ་ཚང་མར་ལུས་སྦྱོང་ཡོ་བྱད་སྒྲིག་སྦྱོར་བྱས་ནས་རིན་མི་དགོས་པར་སྤྱོད་ཆོག་གི་ཡོད། གལ་སྲིད་སློབ་མ་སློབ་གྲྭའི་རུ་ཁག་ནང་ཞུགས་ཐུབ་ཚེ་ཁྱིམ་ཚང་ཡོངས་ཀྱི་ངོས་ནས་བརྗོད་ན་གཟི་བརྗིད་ཆེ་བའི་བྱ་བ་ཞིག་ཡིན་པར་བརྟེན་ཁྱིམ་བདག་གིས་ཆེད་མངགས་ཁྱིམ་ཚང་མཉམ་འཛོམས་བྱས་ནས་རྟེན་འབྲེལ་ཞུ་ཡི་ཡོད་པ་རེད། སློབ་ཚན་ཚོགས་སྐབས་དགེ་རྒན་གྱིས་ལུས་རྩལ་གྱི་ཐབས་རྩལ་སློབ་པ་མ་ཟད་སློབ་མའི་རང་གཤིས་གསོ་སྐྱོང་བྱེད་རྒྱུར་དེ་བས་སྣང་ཆེན་དང་སྦྱོང་བརྡར་ཆེན་པོ་དང་འགྲན་རྩོད་ཆེན་པོ་བྱེད་རྒྱུ་ནན་བཤད་བྱས་ནས་ཛ་དྲག་ཆེ་བའི་འགྲན་བསྡུར་ནང་རང་འཇོན་ཀུན་འདོན་བྱས་ནས་སློབ་གྲྭའི་ལུས་རྩལ་མཁས་ཅན་གཏོད་རྒྱུའི་ལྕག་སྐུལ་བྱེད་ཀྱི་ཡོད་པ་རེད། ཨ་རིའི་སློབ་གྲྭའི་ནང་མི་རྣམས་ཀྱི་དད་གུས་ཆེ་ཤོས་བྱེད་པ་ནི་སྦྱངས་འབྲས་ཨང་དང་པོར་སླེབས་པའི་སློབ་མ་ཁོ་ན་མིན་པར་སློབ་གྲྭའི་དབར་གྱི་ལུས་རྩལ་འགྲན་བསྡུར་ནང་སློབ་གྲྭར་མཚན་སྙན་ལེན་མཁན་གྱི་མི་དེ་ཚོ་ཡིན་པ་དང་སློབ་མ་དེ་ཚོ་ནི་རྒྱལ་ཁབ་ཀྱི་ལུས་རྩལ་མཁས་པའི་རྗེས་གྲབས་ཀྱི་སྟོབས་ཤུགས་ཤིག་ཏུ་བསྒྱུར་རྒྱུ་ཡིན་པ་རེད། ཨ་རིའི་ཆེད་ལས་ལན་ཆིའུ་སྤོ་ལོའི་མཉམ་འབྲེལ་འགྲན་བསྡུར་དང་ཨ་རིའི་རྒྱལ་ཁབ་ཀྱི་སྐྱུ་རུའི་སྤོ་ལོའི་མནའ་འབྲེལ་སོགས་ཀྱིས་སློབ་གྲྭ་ཆེ་མོ་ནས་མི་འདེམས་པར་བསྐྱོད་ཀྱི་ཡོད་པས་སློབ་མ་ཚོས་ཆེད་དོན་ལུས་རྩལ་རྣམ་གྲངས་འགའ་ཤས་ལ་དགའ་པོ་བྱེད་ཚད་ཆེ་རུ་འགྲོ་ཐུབ་པ་མ་ཟད་དེའི་ནང་གི་ཕུལ་བྱུང་མི་སྣ་ལས་ཞོར་ནས་ཆེད་ལས་ཅན་དང་ལས་རིགས་ཅན་གྱི་ཕྱོགས་སུ་བསྐྱོད་ཐུབ་ཀྱི་ཡོད་པ་རེད།
ཨ་རིའི་ཁེང་ནའེ་ཨར་སློབ་གྲྭ་ཆེ་མོ་ནས་ཡོང་བའི་གྲོགས་པོ་ཞིག་གིས་སློབ་གྲྭའི་ནང་ནས་ཕྱིར་སྡོད་ཀྲུང་གོ་བ་མཐོང་སྐབས་གཟུགས་སྟོབས་ཁོ་ན་ནས་ཕྱི་རྒྱལ་དུ་སློབ་སྦྱོང་བྱེད་པར་ཡོང་མཁན་གྱི་སློབ་མའམ་ཡང་ན་ཀྲུང་གོའི་གནས་སྤོས་མི་རབས་གཉིས་པ་ཡིན་པ་ཤེས་ཐུབ། ཨ་རིར་སློབ་སྦྱོང་བྱེད་པར་ཡོང་མཁན་ཀྲུང་གོའི་སློབ་མ་ཚོ་སྤྱིར་བཏང་རྒྱགས་དྲགས་པ་མིན་ན་སྐམ་དྲགས་ཀྱི་ཡོད་ཅེས་བརྗོད་ཀྱི་འདུག ཤོད་སྟངས་དེ་ཅུང་ཐལ་དྲགས་ནའང་བསམ་གཞིག་བྱེད་རིན་ཡོད་པ་ཞིག་རེད། ཀྲུང་གོའི་དུས་ཡུན་རིང་བའི་རྒྱུགས་ལེན་སློབ་གསོ་ལས་སློབ་མར་གདེང་འཇོག་བྱེད་སྐབས་སྐར་གྲངས་ལ་སྣང་ཆེན་བྱེད་པ་མ་གཏོགས་གཞན་ལ་སྣང་ཆུང་བྱེད་ཀྱི་ཡོད་པ་དང་ལུས་རྩལ་སློབ་ཚན་ཁྲིད་སྐབས་རྒྱུན་ལྡན་གྱི་རྣམ་གྲངས་ཀྱི་དགོས་མཁོ་སྐོང་ཐུབ་པ་ཙམ་ལས་སློབ་མའི་ཁྱད་ཆོས་དང་སྤྲོ་སྣང་ལ་སོགས་པའི་དགོས་མཁོ་སྐོང་ཐབས་བྲལ། ཨ་རི་ལྟ་བུའི་ལུས་རྩལ་གྱི་སློབ་ཁྲིད་་མ་ལག་དེ་ཀྲུང་གོར་ཡོངས་ཁྱབ་ངང་ཁྱབ་གདལ་གཏོང་བར་དཀའ།
ད་ལོ “སློབ་གྲྭ་འབྲིང་ཆུང་གི་སློབ་མར་ཉིན་ལྟར་ཆུ་ཚོད་གཅིག་གི་སློབ་གྲྭའི་ལུས་རྩལ་བྱེད་སྒོ་འགན་ལེན་བྱེད་རྒྱུ་དེ ”སྲིད་གཞུང་གི་ལས་དོན་སྙན་ཞུའི་ནང་དང་ཐོག་དངོས་སུ་བཏོན་པ་དེས་སྲིད་ཇུས་ཀྱི་ཐོག་ནས་རང་རྒྱལ་གྱི་ལུས་རྩལ་སློབ་གསོའི་འཕེལ་རྒྱས་ལ་རྒྱབ་སྐྱོར་ཤུགས་ཆེན་བྱས་ཡོད། མ་གཞི་རྒྱལ་ཁབ་ཀྱི་གནས་ཚུལ་མི་འདྲ་ཡང་རྒྱལ་ཁབ་གཞན་གྱི་ཉམས་མྱོང་དཔྱད་གཞིར་འཛིན་ནས་ལུས་རྩལ་སྦྱོང་བརྡར་གྱི་དུས་ཚོད་འགན་ལེན་བྱེད་པ་དང་དུས་མཚུངས་ལུས་རྩལ་སློབ་ཚན་བེད་སྤྱད་ནས་སློབ་མའི་ལུས་རྩལ་ལ་དགའ་ཞེན་བྱེད་པའི་སྤྲོ་སྣང་འཕེལ་བ་བྱ་རྒྱུར་སྣང་ཆེན་བྱས་པ་དང་རང་འགུལ་ངང་སྦྱོང་བརྡར་བྱེད་པའི་འདུ་ཤེས་གསོ་སྦྱོང་བྱེད་དགོས། དེར་བརྟེན་རྒྱུགས་ལེན་ལ་སྣང་ཆེན་བྱེད་པ་ལས་ལུས་སྦྱོང་ལ་སྣང་ཆེན་མི་བྱེད་པའམ་ཡང་ན་ལུས་སྦྱོང་ལ་སྣང་ཆེན་བྱེད་པ་ལས་སྤྲོ་སྣང་ལ་སྣང་ཆེན་མི་བྱས་ཚེ་གཟུགས་པོར་སྦྱོང་བརྡར་བྱ་རྒྱུ་དེ་སྤྲོ་སྣང་ཆེ་བའི་བྱ་བ་ཞིག་ཏུ་འགྱུར་ཐབས་བྲལ།