མི་དམངས་ཉིན་རེའི་ཚགས་པར་ཁང་དུ་ཁེ་རོ་ནས་ཟླ་4ཚེས་6ཉིན་གློག་འཕྲིན་འབྱོར་གསལ། ཚེས་6ཉིན་ཕ་ལེ་སི་ཐན་སྨན་བཅོས་སྡེ་ཚན་གྱིས་དབྱི་སི་རལ་གྱི་དམག་འཐབ་གནམ་གྲུས་ཉིན་དེ་གའི་ཐོ་རེངས་སུ་ཅ་ཧྲ་ས་ཁུལ་དུ་མཁའ་ཐོག་འཇབ་རྒོལ་གྱི་བྱ་སྤྱོད་སྤེལ་བའི་ནང་ཕ་ལེ་སི་ཐན་བ་4ལ་རྨས་སྐྱོན་ཕོག་ཡོད་པ་དེའི་ནང་མི་2ནི་བུད་མེད་ཡིན་པ་མ་ཟད་གཅིག་ནི་སྦྲུམ་མ་ཡིན་ཞེས་བརྗོད་ཡོད་པ་རེད།

    དབྱི་སི་རལ་ཅེ་རུས་ས་ལེམ་གྲོང་ཁྱེར་གྲོས་ཚོགས་ཀྱིས་ས་གནས་དེ་གའི་དུས་ཚོད་ཚེས་4ཉིན་གྱི་ཕྱི་དྲོ་གྲོང་ཁྱེར་དེའི་ཤར་རྒྱུད་ཀྱི་གཞིས་ཆགས་བྱེད་ས་ཅེ་ལོ་སྡེ་ཁུལ་དུ་སྡོད་ཁང་942གསར་སྐྲུན་བྱེད་ཆོག་པའི་ཆོག་མཆན་སྤྲད་པ་དེར་ཕ་ལེ་སི་ཐན་ཕྱོགས་ཀྱིས་ཡི་མི་རང་བའི་རྣམ་འགྱུར་བསྟན་གྱི་ཡོད། ཕ་ལེ་སི་ཐན་དྲག་ཆས་མི་སྣས་ཚེས་5ཉིན་དབྱི་སི་རལ་ས་ཁོངས་ཀྱི་ས་ཁུལ་དུ་མེ་ཤུགས་འཕུར་མདེལ་གཅིག་བརྒྱབ་ཀྱང་མི་སྣ་ཤི་རྨས་བྱུང་མེད་པ་རེད།

    ཕ་ལེ་སི་ཐན་མི་རིགས་དབང་ཆའི་ལས་ཁུངས་ཀྱི་ཀྲུའུ་ཞི་ཨ་པ་སི་ཚེས་6ཉིན་ཨེ་ཅིབ་ཀྱི་རྒྱལ་ས་ཁེ་རོ་རུ་འབྱོར་ནས་དུས་ཡུན་ཉིན་4ཡི་འཚམས་འདྲི་བྱེད་འགོ་ཚུགས་པ་རེད། ཁོང་གིས་སྔ་རྗེས་སུ་ཨེ་ཅིབ་དྲག་ཆས་དཔུང་སྡེའི་ཆེས་མཐོའི་ཨུ་ལྷན་གྱི་ཀྲུའུ་ཞི་ཐན་ཐ་ཝེ་དང་ཨ་རབ་རྒྱལ་ཁབ་མནའ་འབྲེལ (ཨ་རབ་མནའ་འབྲེལ )གྱི་དྲུང་ཆེ་མུའུ་ས་སོགས་དཔོན་རིགས་དང་མཇལ་འཛོམས་གནང་སྟེ་ཕ་ལེ་སི་ཐན་ནང་ཁུལ་འདུམ་འགྲིག་བྱེད་པའི་ཐད་གྲོས་མོལ་གནང་བ་རེད། ཨ་པ་སི་ཨེ་ཅིབ་ཏུ་མ་ཕེབས་གོང་ཨ་རབ་མནའ་འབྲེལ་གྱི་དྲུང་ཆེ་མུའུ་ས་ཡིས་ཚེས་5ཉིན་ཕྱི་ཕྱོགས་ལ་ཨ་རབ་མནའ་འབྲེལ་གྱིས་ཕ་ལེ་སི་ཐན་ནང་ཁུལ་འདུམ་འགྲིག་བྱེད་པའི་གླེང་མོལ་གཙོ་སྐྱོང་བྱ་རྒྱུའི་གྲ་སྒྲིག་ཡག་པོ་བྱས་ཡོད་པས་གླེང་མོལ་བྱེད་ཐེངས་དེའི་ནང་ཕ་ལེ་སི་ཐན་གྱི་ཕྱོགས་ཁག་དང་རང་ཚུགས་མི་སྣ་ཚུད་པ་བྱ་རྒྱུ་དང་འབྲེལ་ཕ་ལེ་སི་ཐན་གྱི་ཁ་ཕྲལ་རྣམ་པ་གང་མགྱོགས་མཇུག་འགྲིལ་རྒྱུའི་རེ་བ་ཡོད་ཅེས་གསུངས་པ་རེད།