ནུབ་ཕྱོགས་རྒྱལ་ཁབ་མང་པོའི་མཉམ་འབྲེལ་དམག་གིས་ལི་པི་ཡར་རྡུང་རྡེག་གཏོང་བའི་དམག་དོན་བྱ་སྤྱོད་སྤེལ་ནས་ཚེས་6ཉིན་ཉིན་བཅོ་བརྒྱད་སོང་ཡོད་ཀྱང་དམག་འཁྲུག་སྔར་བཞིན་མཇུག་བསྒྲིལ་བཟོ་མེད་པ་རེད། ཨ་རི་དང་། ཕ་རན་སེ། དབྱིན་ཇི་བཅས་ཀྱིས་ལི་པི་ཡའི་ངོ་རྒོལ་ཤོག་ཁག་ལ་གོ་མཚོན་མཁོ་འདོན་མི་བྱེད་པ་ཡོང་མི་སྲིད་སྟབས་མི་ཆོས་རིང་ལུགས་ཀྱི་ཉམས་ཉེན་དེར་མི་རྣམས་ཀྱིས་དེ་བས་དོ་སྣང་ཆེན་པོ་བྱེད་ཀྱི་ཡོད། ཉེ་ཆར་ཤར་ཕྱོགས་ནས་ནུབ་ཕྱོགས་བར་འཛམ་གླིང་རྒྱལ་ཁབ་ཁག་ཏུ་ཐོན་པའི་དམག་འཁྲུག་ལ་ངོ་རྒོལ་བྱེད་པའི་འབོད་སྒྲ་ཉིན་བཞིན་ཆེ་རུ་སོང་བ་དང་རྒྱལ་སྤྱིའི་སྤྱི་ཚོགས་ཀྱིས་ཕྱི་ནས་ཐེ་ཇུས་བྱ་རྒྱུར་ངོ་རྒོལ་བྱས་ཏེ་ཆབ་སྲིད་ཐོག་ནས་སྐད་ཆ་ཤོད་རེས་བྱེད་པའི་ཐབས་ལམ་བརྒྱུད་ལི་པི་ཡའི་ཉམས་ཉེན་ཐག་གཅོད་བྱེད་དགོས་པའི་རེ་འབོད་ཆེན་པོ་བྱེད་ཀྱི་ཡོད།

    འཛམ་གླིང་དབུས་ཤར་ས་ཁུལ་དུ་ལི་པི་ཡའི་ཁྱིམ་མཚེས་རྒྱལ་ཁབ་ཡིན་པའི་ཨར་ཅི་རི་ཡས་ཕྱི་རྒྱལ་གྱི་དམག་དོན་གྱིས་ལི་པི་ཡར་ཐེ་ཇུས་བྱ་རྒྱུར་ངོ་རྒོལ་བྱ་རྒྱུ་ཡིན་ཞེས་བཤད་པ་མ་ཟད་མཚོན་ཆ་རྒྱ་བསྐྱེད་འགྲོ་བ་དང་ས་ཁུལ་གྱི་འཇིགས་སྐུལ་ཆེ་རུ་འགྲོ་རྒྱུར་ཡང་སེམས་ཁྲལ་བྱེད་ཀྱི་ཡོད།

    ཚེས་5ཉིན་ཨར་ཅི་རི་ཡའི་ཕྱི་འབྲེལ་པུའི་འགན་འཁུར་བ་མ་ཀེ་ལི་པུའུ་དང་ཨ་ཧྥེ་རི་ཁའི་ལས་དོན་གྱི་པུའུ་ཀྲང་རིམ་པའི་འཐུས་མི་མའེ་ས་ཧོ་ལེས་འཚམས་འདྲིར་ཡོང་བའི་དབྱིན་ཇི་སྲིད་གཞུང་གི་མཐོ་རིམ་དཔོན་རིགས་པོ་ཐེ་དང་མཇལ་འཛོམས་གནང་རྗེས་འཚོགས་པའི་གསར་འགོད་པའི་ཚོགས་འདུའི་ཐོག་གཏུམ་སྤྱོད་དང་དམག་འཁྲུག་དེས་ལི་པི་ཡ་བསྐྱར་གསོ་དང་བརྟན་ལྷིང་ཡོང་རྒྱུ་ནར་འགྱངས་བཟོ་སྲིད་ལ་ས་ཁུལ་བརྟན་ལྷིང་དང་བདེ་འཇགས་ཡོང་རྒྱུར་ཡང་ཤུགས་རྐྱེན་ཐེབས་སྲིད་ཅེས་བཤད་པ་རེད།

    ཐུར་ཁེ་ནི་བྱང་ཆིངས་ཁོངས་གཏོགས་རྒྱལ་ཁབ་ཡིན་རུང་ལི་པི་ཡར་དམག་དོན་རྡུང་རྡེག་གཏོང་རྒྱུར་མོས་མཐུན་བྱེད་ཀྱི་མེད།

    ཨུ་རུ་སུའི་ཕྱི་འབྲེལ་དཔོན་ལ་ཕུའུ་ལུའོ་ཕུའུ་ཡིས་ཟླ་བ་གོང་མའི་ཚེས་30ཉིན་མོ་སི་ཁོར་འཚམས་འདྲིར་ཡོང་བའི་ཨོ་སི་ཁྲུ་རི་ཡའི་ཕྱི་འབྲེལ་དཔོན་ཧྲི་ཕིང་ཏེ་ལེ་ཀེ་དང་གྲོས་མོལ་བྱས་རྗེས་ལི་པི་ཡར་དམག་འཚམས་འཇོག་རྒྱུ་དང་འཕྲལ་དུ་སྐད་ཆ་ཤོད་རེས་བྱ་རྒྱུ་ནི་རྒྱལ་སྤྱིའི་སྤྱི་ཚོགས་ཀྱིས་དང་ཐོག་ཐག་གཅོད་བྱེད་དགོས་པའི་གནད་དོན་ཞིག་རེད། ལི་པི་ཡའི་འབྱུང་འགྱུར་དེ་ལི་པི་ཡའི་མི་དམངས་རང་ཉིད་ཀྱིས་ཐག་གཅོད་བྱེད་དགོས། ཨུ་རུ་སུས་ཕྱོགས་ཁག་གིས་འབད་བརྩོན་ཡོད་རྒུ་བྱས་ཏེ་ཆབ་སྲིད་ཐད་ནས་སྐད་ཆ་ཤོད་རེས་བྱེད་འགོ་འཛུགས་དགོས་པའི་རེ་འབོད་བྱེད་ཀྱི་ཡོད་ཅེས་བཤད་པ་རེད།

    གླིང་ཆེན་ཨ་ཧྥེ་རི་ཁར་ལྷོ་ཨ་ཧྥེ་རི་ཁའི་ཙུང་ཐུང་གི་མགྲིན་ཚབ་པ་ཆི་ཆི ·ཁོའོ་ཏེ་ཝ་ཡིས་ཚེས་5ཉིན་སྨྱན་སྦྱོར་གསར་འགོད་པར་ལྷོ་ཨ་ཧྥེ་རི་ཁས་ཕྱི་ཕྱོགས་ཀྱི་སྟོབས་ཤུགས་གང་རུང་ཞིག་གིས་ཆབ་སྲིད་དང་ཡང་ན་དམག་དོན་ཐད་ནས་ཐེ་ཇུས་བྱ་རྒྱུར་ངོ་རྒོལ་བྱེད་ཀྱི་ཡོད། ལྷོ་ཨ་ཧྥེ་རི་ཁས་ཕྱོགས་ཁག་གིས་འཕྲལ་དུ་དམག་འཚམས་བཞག་སྟེ་ཉེས་མེད་མི་སེར་ཤི་རྨས་ཡོང་ཚད་ཉུང་དུ་གཏོང་དགོས་པའི་རེ་འབོད་བྱེད་ཀྱི་ཡོད་ཅེས་བཤད་པ་རེད།

    ཨ་ཧྥེ་རི་ཁའི་མནའ་འབྲེལ་རེས་སྐོར་ཀྲུའུ་ཞི་ཐིག་དམར་ཀུའི་ནེ་ཡའི་ཙུང་ཐུང་ཨའོ་པི་ཨང ·ཨེན་ཀུའེ་མ ·མུའུ་པ་སུའོ་ཀེས་ཚེས་5ཉིན་སུའེ་ཙེར་གྱི་རི་ནེ་བར་འཚོགས་པའི་གླིང་ཆེན་ཨ་ཧྥེ་རི་ཁའི་གནད་དོན་གྱི་རྒྱལ་སྤྱིའི་ཚོགས་འདུའི་ཐོག་ལི་པི་ཡར་དམག་འཚམས་འཇོག་རྒྱུའི་རེ་འབོད་བྱས་པ་དང་ལི་པི་ཡའི་གདོང་ཐུག་ནི་བྱང་ཨ་ཧྥེ་རི་ཁའི་རྒྱལ་ཁབ་ནང་ཁུལ་གྱི་བྱ་བ་ཞིག་ཡིན་པས་ཕྱི་རྒྱལ་གྱིས་ཐེ་ཇུས་བྱེད་དགོས་དོན་མེད་པའི་ངོས་འཛིན་བྱས་ཡོད། ཨའོ་པི་ཨང་གིས་ནུབ་ཕྱོགས་རྒྱལ་ཁབ་ཀྱིས་ལི་པི་ཡར་འཕུར་བསྐྱོད་བཀག་བྱའི་ཁུལ་འཛུགས་རྒྱུའི་མཉམ་འབྲེལ་རྒྱལ་ཚོགས་བདེ་འཇགས་ལས་འཛིན་ལྷན་ཚོགས་ཀྱི་གྲོས་ཆོད་དྲག་ཤུགས་ལ་བརྟེན་ནས་ལག་ལེན་བསྟར་བ་ནི “མི་ཆོས་རིང་ལུགས་ཟེར་བའི་ཐེ་ཇུས ”ཤིག་རེད་ཅེས་བཤད་པ་རེད།

    དབྱི་ཐ་ལིའི་ཕྱི་འབྲེལ་དཔོན་ཕུའུ་ལ་ཏི་ཉིས་ཚེས་5ཉིན་རོ་མར་འཚམས་འདྲིར་ཕེབས་པའི་ཨ་ཧྥེ་རི་ཁའི་མནའ་འབྲེལ་ཨུ་ཡོན་ལྷན་ཁང་གི་ཀྲུའུ་ཞི་དབྲང ·ཕིང་དང་གྲོས་མོལ་བྱས་ཏེ་ཕྱོགས་གཉིས་ཀས་མིག་སྔར་འཕྲལ་དུ་ཕན་ནུས་ལྡན་ལ་ར་སྤྲོད་ཐུབ་པའི་དམག་མཚམས་འཇོག་རྒྱུར་བརྟེན་ནས་ལི་པི་ཡའི་རྒྱལ་ནང་གི་གཏུམ་སྤྱོད་བྱེད་སྤྱོད་མཇུག་བསྒྲིལ་ཏེ་ལི་པི་ཡའི་མི་སེར་ལ་སྲུང་སྐྱོབ་བྱས་ཐོག་ཆབ་སྲིད་ཐོག་ནས་ལི་པི་ཡའི་གནད་དོན་ཐག་གཅོད་བྱ་རྒྱུར་ཆ་རྐྱེན་བསྐྲུན་དགོས་པ་མགྲིན་གཅིག་ཏུ་ངོས་འཛིན་བྱས་ཡོད། དབྱི་ཐ་ལིའི་ཕྱི་འབྲེལ་པུས་ཡོངས་བསྒྲགས་བྱས་པའི་གསར་འགྱུར་སྤྱི་བསྒྲགས་ནང་ཆབ་སྲིད་ཐོག་ནས་ཐག་གཅོད་བྱེད་པའི་བྱ་ཐབས་ནང་ངེས་པར་དུ་རྒྱལ་ནང་ཞི་མཐུན་ཡོང་བའི་བརྒྱུད་རིམ་ཚུད་དགོས་ཞེས་འཁོད་ཡོད།

    ཚེས་1ཉིན་འཇར་མན་གྱི་ཙུང་ལི་གཞོན་པ་ཕྱི་འབྲེལ་དཔོན་གཅིག་ལྕོགས་ཝུའེ་སི་ཐེ་ཝུའེ་ལེས་ཀྱང་ལི་པི་ཡའི་གནད་དོན་དེར་ཆབ་སྲིད་ཀྱི་བྱ་ཐབས་ཁོ་ན་སྤྱོད་དགོས་པ་ལས་དམག་དོན་གྱི་བྱ་ཐབས་སྤྱད་ནས་ཐག་གཅོད་བྱ་རྒྱུ་མེད། ང་ཚོས་ངེས་པར་དུ་ཆབ་སྲིད་ཐད་ཀྱི་བརྒྱུད་རིམ་སྤེལ་འགོ་འཛུགས་དགོས་ཞེས་བཤད་པ་རེད།

    ཡོ་རོབ་བྱང་མ་དང་། ཧྥིན་ལན། སུའེ་ཏེན། ཏེན་མག ནོར་ཝེ་བཅས་དང་འཁྱགས་གླིང་རྒྱལ་ཁབ་ལྔའི་ཕྱི་འབྲེལ་དཔོན་གྱིས་ཚེས་5ཉིན་ཧྥིན་ལན་གྱི་རྒྱལ་ས་ཧེར་སིན་ཁེར་ཚོགས་འདུ་འཚོགས་པ་མ་ཟད། མཉམ་འབྲེལ་གསལ་བསྒྲགས་ཀྱང་སྤེལ་ནས་ལི་པི་ཡའི་རྒྱལ་ནང་གི་གདོང་ཐུག་ཕྱོགས་ཀྱིས་རྒྱལ་ཡོངས་རང་བཞིན་གྱི་སྐད་ཆ་ཤོད་རེས་བྱས་པ་བརྒྱུད་དེང་སྐབས་ཀྱི་ཉམས་ཉེན་ཐག་གཅོད་བྱེད་དགོས་པའི་རེ་འབོད་བྱས་ཡོད་པ་རེད།