ཤིན་ཧྭ་གསར་འགྱུར་ཁང་ཐ་ལིན་ནས་ཟླ་4ཚེས་4ཉིན་གློག་འཕྲིན་འབྱོར་པ་གཞིར་བཟུང་། ཨེ་སོ་ནི་ཡ་རུ་འཚམས་འདྲི་གནང་བཞིན་ཡོད་པའི་ཀྲུང་གོའི་བོད་རིག་པ་མཁས་ཅན་གྱི་འཐུས་མི་ཚོགས་པས་ཟླ་4ཚེས་4ཉིན་རྒྱལ་ས་ཐ་ལིན་དུ་རང་བྱུང་རིག་པ་དང་བཟོ་སྐྲུན་རིག་པའི་སློབ་ཆེན་གྱི་དགེ་སློབ་ཁག་གཅིག་ལ་བོད་ཀྱི་གནད་དོན་སྐོར་གྱི་ཆེད་དོན་གཏམ་བཤད་གནང་ནས་ཉེ་བའི་ལོ་ཤས་རིང་བོད་རང་སྐྱོང་ལྗོངས་ཀྱི་འཕེལ་རྒྱས་ཀྱི་གནས་ཚུལ་ངོ་སྤྲོད་གནང་བ་དང་སྦྲགས་ཀྲུང་གོའི་གྲངས་ཉུང་མི་རིགས་སྲིད་ཇུས་དང་ཀྲུང་གོའི་འགྲོ་བ་མིའི་ཐོབ་ཐང་སོགས་ཀྱི་གནད་དོན་ཐད་ཨེ་སོ་ནི་ཡའི་ལས་རིགས་ཁག་གི་མི་སྣ་དང་རྒྱ་ཁྱབ་ངང་སྤེལ་རེས་ཀྱང་གནང་བ་རེད།
འཐུས་མི་ཚོགས་པའི་ཚོགས་གཙོ་ཀྲུང་གོ་སྤྱི་ཚོགས་ཚན་རིག་ཁང་གི་དྲུང་ཆེ་གཞོན་པ་ཧའོ་ཧྲི་ཡོན་གྱིས་ཡི་གེ་དང་པར་རིས་ཀྱི་རྣམ་པའི་ཐོག་ནས་དགེ་སློབ་ཚོར་བོད་ཀྱི་དཔལ་འབྱོར་དང་སྤྱི་ཚོགས་འཕེལ་རྒྱས་དང་ཀྲུང་གོའི་གྲངས་ཉུང་མི་རིགས་ཀྱི་ས་ཁོངས་རང་སྐྱོང་སྲིད་ཇུས་དང་དེ་བཞིན་ཀྲུང་གོའི་ནུབ་རྒྱུད་ཐོན་འབྱེད་ཆེ་མོའི་འཐབ་ཇུས་སོགས་ཀྱི་གནས་ཚུལ་ངོ་སྤྲོད་རགས་ཙམ་གནང་བ་དང་སྦྲགས་དགེ་སློབ་ཚོའི་དྲི་བར་ལན་རེ་རེ་བཞིན་བསྐྱོན་པ་རེད།
གཏམ་བཤད་མཇུག་འགྲིལ་རྗེས་ཧའོ་ཧྲི་ཡོན་གྱིས་གསར་འགོད་པར་ཉེ་བའི་ལོ་ཤས་རིང་ཀྲུང་གོའི་བོད་ལྗོངས་ས་ཁུལ་གྱི་འཕེལ་རྒྱས་ཐད་འཛམ་གླིང་སྐྱེ་བོ་མང་པོ་ཞིག་གིས་དོ་ཁུར་ཧ་ཅང་ཆེན་པོ་བྱེད་ཀྱི་ཡོད། ཀྲུང་གོའི་བོད་རིག་པ་མཁས་ཅན་གྱི་འཐུས་མི་ཚོགས་པས་ཨེ་སོ་ནི་ཡ་རུ་འཚམས་འདྲི་བྱེད་དོན་ནི་བོད་རང་སྐྱོང་ལྗོངས་འཕེལ་རྒྱས་འགྲོ་བའི་གནས་ཚུལ་དངོས་བརྒྱུད་བསྒྲགས་བྱ་ཆེད་ཡིན་པ་མ་ཟད་མི་རིགས་མང་བའི་གཅིག་གྱུར་གྱི་རྒྱལ་ཁབ་འཛུགས་སྐྲུན་བྱེད་པ་སོགས་ཀྱི་གནད་དོན་ཐད་ཨེ་སོ་ནི་ཡའི་ལས་རིགས་ཁག་དང་ལྟ་ཚུལ་བརྗེ་རེས་དང་ཉམས་མྱོང་སྤེལ་རེས་ཀྱང་བྱ་ཆེད་ཡིན་ཞེས་གསུངས་པ་རེད།
ཀྲུང་གོ་རྒྱལ་སྲིད་སྤྱི་ཁྱབ་ཁང་གསར་འགྱུར་གཞུང་དོན་ཁང་གིས་སྒྲིག་འཛུགས་བྱས་པའི་ཀྲུང་གོའི་བོད་རིག་པ་མཁས་ཅན་གྱི་འཐུས་མི་ཚོགས་པ་ཚེས་3ཉིན་ཨེ་སོ་ནི་ཡར་འབྱོར་པ་དང་སྦྲགས་ཨེ་སོ་ནི་ཡའི་གྲོས་མི་ཁག་གཅིག་དང་གྲོས་མོལ་ཡང་གནང་བ་རེད། ཚེས་4ཉིན་འཐུས་མི་ཚོགས་པས་ད་དུང་ཨེ་སོ་ནི་ཡའི་ཕྱི་འབྲེལ་པུའི་པུའུ་ཀྲང་གཞོན་པ་སོགས་དཔོན་རིགས་དང་མཇལ་འཛོམས་གནང་བ་རེད། འཐུས་མི་ཚོགས་པའི་ཁོངས་མི་ཀྲུང་གོ་མཚོ་སྔོན་སྐུ་འབུམ་བྱམས་པ་གླིང་དགོན་གྱི་གཟིམ་ཁང་སྤྲུལ་སྐུས་ཨེ་སོ་ནི་ཡའི་དཔོན་རིགས་ལ་སྐུ་འབུམ་བྱམས་པ་གླིང་དགོན་གྱི་བོད་མིའི་འཚོ་བ་དང་ཆོས་ལུགས་ཀྱི་བྱེད་སྒོའི་གནས་ཚུལ་ངོ་སྤྲོད་གནང་བ་རེད། ཚེས་5ཉིན་འཐུས་མི་ཚོགས་པ་དང་བཅས་པ་ཨེ་སོ་ནི་ཡའི་གྲོང་ཁྱེར་ཆེ་གྲས་གཉིས་པ་ཐའར་ཐུ་རུ་ཕེབས་པ་དང་སྦྲགས་ལོ་རྒྱུས་ཡུན་རིང་ལྡན་པའི་ཐའར་ཐུ་སློབ་ཆེན་དུ་བོད་ཀྱི་གནད་དོན་སྐོར་གྱི་ཆེད་དོན་གཏམ་བཤད་ཀྱང་གནང་བ་རེད།