ཤིན་ཧྭ་གསར་འགྱུར་ཁང་ཧྲོའར་ནས་ཟླ་4ཚེས་5ཉིན་གློག་འཕྲིན་འབྱོར་གསལ། ཚེས་5ཉིན་ཧན་གོ་ཕྱི་འབྲེལ་ཚོང་འགྲུལ་པུའུ་ཡིས་རི་པིན་གྱིས་རྒྱ་མཚོའི་ནང་འགྱེད་འཕྲོའི་རང་བཞིན་གྱི་བཙོག་ཆུ་གཏོང་འབུད་བྱེད་པའི་བྱ་སྤྱོད་དེས་རྒྱལ་སྤྱིའི་བཅའ་ཁྲིམས་ལས་འགལ་སྲིད་ཅེས་གསུངས་པ་རེད།

    ཕྱི་འབྲེལ་ཚོང་འགྲུལ་པུའུ་ཡིས་ཚེས་4ཉིན་གྱི་དགོང་མོར་ཧན་གོ་ཕྱོགས་ཀྱིས་རི་པིན་དུ་བཅའ་བཞུགས་ཧན་གོའི་གཞུང་ཚབ་ཁང་བརྒྱུད་རི་པིན་ཕྱི་འབྲེལ་པུའུ་ལ་ཧན་གོ་སྲིད་གཞུང་གིས་སེམས་ཁྲལ་བྱེད་ལུགས་མཚོན་པར་བྱེད་པ་དང་རི་པིན་ཕྱོགས་ཀྱི་བྱ་སྤྱོད་དེས་རྒྱལ་སྤྱིའི་བཅའ་ཁྲིམས་ལས་འགལ་སྲིད་པའི་ངོས་འཛིན་བྱེད་པ་དང་འབྲེལ་རི་པིན་ཕྱི་འབྲེལ་པུའུ་རུ་དེའི་ཁ་གཏད་གཅོག་ཐབས་འདྲི་རྩད་བྱས་པ་རེད།

    ཧན་གོ་མཉམ་འབྲེལ་གསར་འགྱུར་ཁང་གིས་གནས་ཚུལ་སྤེལ་བར་གཞིགས་ན། ཧན་གོའི་ཕྱི་འབྲེལ་ཚོང་འགྲུལ་པུའི་པུའུ་ཀྲང་གཞོན་པ་དང་པོ་ཕུའུ་ཤིན་ཧོན་གྱིས་རྒྱལ་ཚོགས་ཀྱི་ལྷོ་བྱང་འབྲེལ་བའི་འཕེལ་རྒྱས་དམིགས་བསལ་ཨུ་ཡོན་ལྷན་ཁང་དུ་ཕེབས་སྐབས་རི་པིན་གྱིས་བཙོག་ཆུ་གཏོང་འབུད་བྱེད་པའི་སྐོར་ཧན་གོ་སྲིད་གཞུང་དང་མཐུན་འགྲིག་བྱས་མེད་པ་དང་དགོས་ངེས་ཀྱི་སྐབས་སུ་ཧན་གོས་རི་པིན་ལ་འབྲེལ་ཡོད་ཆ་འཕྲིན་མཁོ་འདོན་དང་འབྲེལ་ས་ཆ་དངོས་སུ་བརྟག་དཔྱད་བྱ་རྒྱུའི་བླང་བྱ་འདོན་རྒྱུ་དང་རི་པིན་སྲིད་གཞུང་གི་འགན་འཁྲི་རྩད་གཅོད་བྱ་རྒྱུ་ཡིན་པ་རེད་ཅེས་གསུངས་པ་རེད།

    ཚེས་4ཉིན་ཐོ་ཁེའོ་གློག་ཤུགས་ཀུང་སིས་ཧྥུའུ་ཏའོ་གློག་ཁང་གི་འགྱེད་འཕྲོའི་རང་བཞིན་དམའ་བའི་བཙོག་ཆུ་ཏུན་ཁྲི་1.15རྒྱ་མཚོའི་ནང་གཏོང་འབུད་བྱས་ཏེ་འཕྲུལ་ཚན་ནང་དུ་ཡོད་པའི་འགྱེད་འཕྲོའི་རང་བཞིན་མཐོ་བའི་འཁྱིལ་ཆུ་ཐག་གཅོད་བྱེད་ས་ཡོང་བ་བྱ་རྒྱུ་རེད་ཅེས་ཁྱབ་བསྒྲགས་བྱས་པ་རེད།