ཉེ་ཆར་མོ་ཞི་ཁོ་གྲོང་ཁྱེར་གྱིས་ཀྲུང་གོ་དང་འབྲེལ་བ་ཡོད་པའི་དེབ་གསར་པའི་འགྲེམས་སྤེལ་ཚོགས་འདུ་ཐེངས་གཉིས་བསྟུད་མར་འཚོགས་པ་དང་དེབ་གཅིག་ནི 《མོ་ཞི་ཁོ་དང་ཀྲུང་གོ་དབར་སྐད་ཆ་ཤོད་རེས་བྱས་པ་སྟེ། ལོ་སུམ་ཅུའི་རིང་གི་དཔལ་འབྱོར་དང་སྤྱི་ཚོགས་ཀྱི་འཕོ་འགྱུར 》ཞེས་པ་དེ་ཡིན་པ་དང་དེ་ནི་མོ་ཞི་ཁོ་གྲོས་ཁང་གོང་མ་དང་མོ་ཞི་ཁོའི་གཞུང་བཙུགས་རང་སྐྱོང་སློབ་ཆེན་གྱིས་རྩོམ་སྒྲིག་བྱས་ནས་དཔེ་སྐྲུན་བྱས་པ་དང་དེབ་གཞན་ཞིག་ནི 《སྤྱོད་གོ་ཆོད་པའི་རྒྱ་ཡིག་བརྡ་སྤྲོད་ཀྱི་ཕྱོགས་སྟོན 》ཞེས་པ་དེ་ཡིན་པ་དང་དེ་ནི་མོ་ཞི་ཁོ་སློབ་གླིང་གི་དགེ་རྒན་ཆེ་མོ་བ་མཁྱེན་ལྡན་མ་ལི་ལི་ཡ་ནས་བརྩམས་པ་ཞིག་ཡིན། དེབ་དེ་གཉིས་པོའི་རྩོམ་སྒྲིག་པ་གཙོ་བོས་དེབ་གསར་པའི་འགྲེམས་སྤེལ་ཚོགས་འདུའི་ཐོག་ཀྲུང་གོར་སྒྱུར་བཅོས་སྒོ་དབྱེ་བྱས་ནས་ལོ་30 ལྷག་ཙམ་སོང་རིང་དཔལ་འབྱོར་དང་སྤྱི་ཚོགས་གོང་འཕེལ་མྱུར་པོ་ཕྱིན་ནས་འཛམ་གླིང་ཐོག་མགྱོགས་མྱུར་འབུར་དུ་ཐོན་ཡོད། མོ་ཞི་ཁོར་རྒྱལ་ཁབ་གཞན་དང་འདྲ་བར་ཀྲུང་གོ་བར་ཤེས་རྟོགས་བྱེད་འདོད་མཁན་དང་རྒྱ་ཡིག་སྦྱོང་འདོད་མཁན་ཇེ་མང་དུ་སོང་བར་བརྟེན་ཀྲུང་གོའི་སྐོར་གྱི་དེབ་ལ་དགའ་པོ་བྱེད་ཀྱི་ཡོད་ཅེས་གསུངས་པ་རེད།

    མོ་ཞི་ཁོར་གསར་འགོད་པས་རིམ་གྲས་མི་འདྲ་བའི་མི་སྣ་དང་སྤེལ་རེས་བྱེད་སྐབས་གླེང་གཞི་དེ་ཀྲུང་གོ་དང་རྒྱ་ཡིག་དང་རྟག་ཏུ་ཁ་འབྲལ་གྱི་མེད་ཅིང་། མི་སེར་དཀྱུས་མས་གསར་འགོད་པ་དང་གླེང་མང་ཤོས་བྱེད་པ་ནི་ཀྲུང་གོའི་ཚོང་ཟོག་ཡིན་པའམ་ཡང་ན་སྨྱན་སྦྱོར་ཚན་པའི་ཐོག་བསྟན་པའི་ཀྲུང་གོའི་གསར་འགྱུར་ཡིན་པ་དང་སློབ་མ་དང་ལྷག་དོན་དུ་སློབ་ཆེན་སློབ་མས་རྒྱ་ཡིག་སྦྱོང་འདོད་ཤིན་ཏུ་ཆེན་པོ་བྱེད་ཀྱི་འདུག ཤེས་རྟོགས་བྱུང་བར་གཞིགས་ན། མོ་ཞི་ཁོར་ཁུང་ཙེའི་སློབ་གླིང་5 ཡོད་པ་དང་མོ་ཞི་ཁོའི་རྒྱ་ཡིག་སློབ་གྲྭ་དང་པོ་དེ་ཀྲུང་གོའི་རིག་གནས་སློབ་གླིང་དུ་གྱུར་བ་དེར་སློབ་མ་ 1500 ལྷག་ཙམ་ཡོད་པ་དང་སྦྲགས་ཀྲུང་གོའི་རྒྱལ་ཁབ་ཀྱི་རྒྱ་ཡིག་གཞུང་དོན་ཁང་གིས་དབང་ཆ་སྤྲད་དེ་ཁུང་ཙེའི་སློབ་གླིང་བཙུགས་ཡོད། སློབ་གླིང་གསར་འཛུགས་བྱེད་མཁན་མཁྱེན་ལྡན་མ་ཀྲོའུ་ལིང་ཡན་གྱིས་མོ་ཞི་ཁོ་གྲོང་ཁྱེར་དུ་སྒེར་བཙུགས་སློབ་གྲྭ་འགའ་ཞིག་གིས་རྒྱ་ཡིག་དེ་སྦྱོང་དགོས་ངེས་ཀྱི་སློབ་ཚན་དུ་བརྩིས་པ་དང་དགེ་རྒན་བཀོད་སྒྲིག་བྱ་ཆེད་ད་དུང་ཁོང་ཚོའི་སློབ་གྲྭའི་རྒྱ་ཡིག་དགེ་རྒན་སློབ་ཁྲིད་བྱ་རྒྱུར་གདན་ཞུ་བྱས་ཡོད་ཅེས་དགའ་སྤྲོའི་ངང་གསར་འགོད་པར་གསུངས་བྱུང་།

    མོ་ཞི་ཁོའི་གྲོས་ཁང་གོང་མའི་ཕྱི་འབྲེལ་འབྲེལ་བ་ཨུ་ལྷན་ཨེ་ཤེ་ཡ་དང་ཞི་བདེ་རྒྱ་མཚོ་ཆེ་མོའི་ཨུ་ལྷན་གྱི་ཀྲུའུ་ཞི་ཤིས་མོན་ནེ་སིས་རྒྱལ་སྤྱིའི་སྤྱི་ཚོགས་ཐོག་ཀྲུང་གོས་འགངས་ཆེའི་ནུས་པ་འདོན་བཞིན་ཡོད་པ་དང་དུས་རབས་ཉེར་གཅིག་པའི་འཛམ་གླིང་ཧྲིལ་པོའི་འཕེལ་རིམ་ནང་ཐག་གཅོད་པའི་ནུས་པ་འདོན་མཁན་གྱི་གྲས་སུ་གྱུར་ཡོད། མོ་ཞི་ཁོས་ཀྲུང་གོ་དང་འབྲེལ་བ་གོང་འཕེལ་གཏོང་རྒྱུ་དེ་ཕྱི་འབྲེལ་ཁྱབ་ཁོངས་ནང་གི་གལ་ཆེའི་གནས་བབ་ཐོག་བཞག་ཡོད་ཅེས་གསར་འགོད་པར་གསུངས་བྱུང་། མོ་ཞི་ཁོའི་པུའུ་ཀྲང་གཞོན་པ་མཁྱེན་ལྡན་མ་ཨ་ལན་ཏས་ཀྲུང་གོའི་དཔལ་འབྱོར་དང་སྤྱི་ཚོགས་གོང་འཕེལ་མྱུར་པོ་ཕྱིན་པ་དེ་མོ་ཞི་ཁོའི་ངོས་ནས་བརྗོད་ན་འཕེལ་རྒྱས་དང་གོ་སྐབས་ཤིག་ཡིན་ཞེས་གསར་འགོད་པར་གསུངས་བྱུང་།