ཤིན་ཧྭ་གསར་འགྱུར་ཁང་པེ་ཅིང་ནས་ཟླ་3ཚེས་29ཉིན་གློག་འཕྲིན་འབྱོར་གསལ། རི་པིན་ཕུའུ་ཏའོ་ཡི་ཉིང་རྡུལ་གློག་ཁང་དང་པོར་ལས་འཛོལ་བྱུང་བ་དེས་རང་རྒྱལ་དུ་ཤུགས་རྐྱེན་ཐེབས་སྲིད་པའི་གནས་ཚུལ་ཐད་རྒྱལ་ཁབ་ཉིང་རྡུལ་ལས་འཛོལ་འཕྲལ་སྡོམ་མཐུན་སྦྱོར་ཨུ་ལྷན་གྱིས་ཟླ་3ཚེས་29ཉིན་དབང་གྲགས་ལྡན་པའི་ཁྱབ་བསྒྲགས་བྱས་པ་སྟེ། རྒྱལ་སྤྱིའི་རྡུལ་ཕྲན་ནུས་པའི་སྒྲིག་གཞིས་བརྡ་ཁྱབ་བཏང་བར་གཞིགས་ན། རི་པིན་ཕུའུ་ཏའོ་ཉིང་རྡུལ་གློག་ཁང་དང་པོའི་ལས་འཛོལ་གནས་ཚུལ་བརྟན་དུ་འགྲོ་ཚུལ་ཐོན་པ་དང་དེའི་ཉེ་འཁོར་གྱི་ཁོར་ཡུག་ལ་འགྱེད་འཕྲོའི་རང་བཞིན་བྱུང་ཚད་མུ་མཐུད་ཆག་པའི་གནས་ཚུལ་ཐོན་བཟོ་ཡོད་པ་རེད།

    གཞན་ཡང་ཕྱི་རྒྱལ་གྱི་སྨྱན་སྦྱོར་ཚན་པས་གནས་ཚུལ་སྤེལ་བར་གཞིགས་ན། ཨ་རི་དང་། འཁྱགས་གླིང་། ཧྥིན་ལན། ཧྥ་རན་སེ། སུའེ་ཏན། ཧན་གོ ཐུར་ཁེ། ཨུ་རུ་སུ། ཁ་ན་ཏ། ཧྥི་ལི་ཕིན་སོགས་རྒྱལ་ཁབ་ཚང་མར་རི་པིན་གྱི་ཕུའུ་ཏའོ་ཉིང་རྡུལ་གློག་ཁང་གི་ལས་འཛོལ་ལས་ཐོན་པའི་འགྱེད་འཕྲོའི་རང་བཞིན་གྱི་དངོས་རྫས་ཧ་ཅང་ཉུང་ཉུང་ཞིབ་དཔྱད་ཚད་ལེན་བྱུང་ཡོད་ཅེས་ཁྱབ་བསྒྲགས་བྱས་པའི་ནང་ཧན་གོར་འགྱེད་འཕྲོའི་རང་བཞིན་བྱུང་ཚད་མཐོ་ཤོས་ཡིན་པ་དེ་ས་གནས་དེ་གའི་རང་བྱུང་མ་གཞིའི་སྟོང་ཕྲག་ཁ་ཤས་ཀྱི་ཆ་གཅིག་ཡིན་པ་རེད།

    ཟླ་3ཚེས་29ཉིན་རང་རྒྱལ་གྱི་བྱང་ཤར་དང་། ཧྭ་ཤར། ཧྭ་ལྷོ། ལྷོ་ནུབ། ནུབ་བྱང་། ཧྭ་བྱང་བཅས་ཀྱི་ས་ཁུལ་ཆ་ཤས་ཀྱི་མཁའ་རླུང་ཁྲོད་ནས་རི་པིན་གྱི་ཉིང་རྡུལ་ལས་འཛོལ་ལས་ཐོན་པའི་མི་བཟོས་འགྱེད་འཕྲོའི་རང་བཞིན་གྱི་ཉིང་རྡུལ་གཞི་རྒྱུའི་ཏེན་—131ཞིབ་དཔྱད་ཚད་ལེན་བྱུང་བ་དེ་བྲག་རྡོ་དང་། ས་རྒྱུ། འཛུགས་སྐྲུན་དངོས་པོ། བཟའ་བཅའ། ཉི་མ་སོགས་རང་བྱུང་འགྱེད་འཕྲོའི་རྩིབས་འཕྲོའི་ཁུངས་ལས་བྱུང་བའི་ཁྲི་བཅུའི་ཆ་གཅིག་ཡིན་པ་དང་དེ་དམངས་སྤྱོད་གནམ་གྲུར་བསྡད་ནས་སྤྱི་ལེ་2000བསྐྱོད་པ་ལས་བྱུང་བའི་འཇིག་རྟེན་ཁམས་ཀྱི་འཕྲོ་འོད་འཕྲོ་བའི་སྟོང་ཆ་གཅིག་ཡིན་པས་ཁོར་ཡུག་དང་སྤྱི་དམངས་ཀྱི་བདེ་ཐང་ལ་ཤུགས་རྐྱེན་མི་ཐེབས་པས་འགོག་སྲུང་གི་བྱ་ཐབས་གང་ཡང་སྤྱོད་དགོས་ཀྱི་མེད་པ་རེད།

    འཛམ་གླིང་གནམ་གཤིས་རྩ་འཛུགས་དང་རྒྱལ་སྤྱིའི་རྡུལ་ཕྲན་ནུས་པའི་སྒྲིག་གཞི་པེ་ཅིང་ས་ཁོངས་ཀྱི་ཁོར་ཡུག་འཕྲལ་སྡོམ་ལྟེ་གནས་དང་། རྒྱལ་ཁབ་རྒྱ་མཚོ་ཅུས། ཁོར་ཡུག་སྲུང་སྐྱོང་པུའུ (རྒྱལ་ཁབ་ཉིང་རྡུལ་བདེ་འཇགས་ཅུས )བཅས་ཀྱིས་ལྟ་ཞིབ་ཚད་ལེན་བྱས་ནས་རི་པིན་ཕུའུ་ཏའོ་ཉིང་རྡུལ་གློག་ཁང་ལ་ལས་འཛོལ་བྱུང་བ་དེས་རང་རྒྱལ་གྱི་ཁོར་ཡུག་དང་ས་ཁོངས་ནང་གི་སྤྱི་དམངས་ཀྱི་བདེ་ཐང་ལ་ཤུགས་རྐྱེན་མི་ཐེབས་པའི་ངོས་འཛིན་བྱས་ཡོད་པ་རེད།