མི་དམངས་ཉིན་རེའི་ཚགས་པར་ཁང་དུ་པེ་ཅིང་ནས་ཟླ་3ཚེས་27ཉིན་གློག་འཕྲིན་འབྱོར་གསལ། ཕྱི་རྒྱལ་དུ་བཅའ་སྡོད་འདི་ག་ཚགས་པར་གྱི་གསར་འགོད་པས་སྤེལ་བའི་གནས་ཚུལ་ཕྱོགས་བསྡུས་བྱས་པ་ལྟར་ན། ཚེས་26ཉིན་རྒྱལ་ཁབ་མང་པོའི་དཔུང་སྡེས་ལི་པི་ཡའི་མངའ་ཁོངས་ནང་གི་དམིགས་སར་མུ་མཐུད་མཁའ་རྒོལ་བྱས་ཡོད། གནས་ཚུལ་སྤེལ་བར་གཞིགས་ན། རྒྱལ་ཁབ་མང་པོའི་དཔུང་སྡེའི་གནམ་གྲུས་བར་སྣང་ནས་འགེབས་སྲུང་བྱས་པར་བརྟེན་ནས་ལི་པི་ཡའི་ངོ་རྒོལ་ཤོག་ཁག་གིས་ཚེས་26 ཉིན་ཤར་རྒྱུད་ཀྱི་གནད་ཆེའི་གྲོང་ཁྱེར་ཨའེ་ཅི་ཏ་པི་ཡེ་དང་པུའུ་ལུའེ་ཅ་འཕྲོག་པ་དང་ཚེས་27ཉིན་ངོ་རྒོལ་ཤོག་ཁག་གིས་ནུབ་རྒྱུད་དུ་མུ་མཐུད་དྲག་ཆས་ལ་བརྟེན་ནས་དཔུང་སྐྱོད་བྱེད་ཀྱི་ཡོད་པ་རེད། དབུས་ཤར་ཁུལ་གྱི་སྨྱན་སྦྱོར་ཚན་པས་ཁ་ཀྲ་ཕེའི་དམག་དཔུང་དེ་འགོག་སྲུང་གི་གནས་སུ་གྱར་ཡོད་པ་དབྱེ་ཞིབ་བྱས་པ་རེད།

    ཚེས་26ཉིན་ལི་པི་ཡའི་ཕྱི་འབྲེལ་པུའུ་ཀྲང་གཞོན་པ་ཧ་ལི་ཏེས་གསར་འགྱུར་ཡོངས་བསྒྲགས་ཀྱི་ཚོགས་འདུའི་ཐོག་ངོ་རྒོལ་ཤོག་ཁག་གིས་གནད་ཆེའི་གྲོང་ཁྱེར་ཨའེ་ཅི་ཏ་པི་ཡེ་དྲག་ཆས་ལ་བརྟེན་ནས་བཙན་བཟུང་བྱས་པའི་གནས་ཚུལ་དེ་བདེན་པ་ཡིན་པ་ར་སྤྲོད་བྱས་ཤིང་། ཁོང་གིས་རྒྱལ་ཁབ་མང་པོའི་དཔུང་སྡེས་ལི་པི་ཡའི་དམག་དཔུང་དང་ཐད་ཀར་དམག་བརྒྱབ་པ་མ་ཟད་ཉེས་མེད་མི་སེར་མི་ཉུང་བ་ཞིག་ཀྱང་བསད་པས་རྒྱལ་ཁབ་མང་པོའི་དཔང་སྡེས “ལི་པི་ཡའི་མི་སེར་སྲུང་སྐྱོབ་རྩ་བ་ནས་བྱེད་ཀྱི་མེད་པར་དེ་ལས་ལྡོག་སྟེ་ལི་པི་ཡའི་ངོ་རྒོལ་ཤོག་ཁག་གི་དྲག་ཆས་པ་སྲུང་སྐྱོབ་བྱེད་ཀྱི་ཡོད ”དང “ཁོང་ཚོས་ལི་པི་ཡ་དེ་ནང་འཁྲུག་གི་སྡུག་བསྔལ་ནང་འཁྲིད་རྩིས་ཡོད་པ་རེད ”ཅེས་བཤད་པ་རེད།

    ཚེས་26ཉིན་ཧྥ་རན་སེའི་སྤྱི་ཁབ་ཇུས་འདོན་པུའུ་ཡིས་སྤྱི་བསྒྲགས་ཤིག་སྤེལ་བའི་ནང་ཧྥ་རན་སེའི་དམག་གྲུས་ལི་པི་ཡའི་རྒྱལ་ས་ཏི་ལི་པོ་དང་བར་ཐག་སྤྱི་ལེ་200 ཆོད་སར་འབར་མདེལ་ཐེངས་མང་དབྱུག་ནས་ལི་པི་ཡའི་དམག་ཕྱོགས་ཀྱི་དམག་གྲུ་ 5 དང་དྲག་ཆས་ཀྱི་ཐད་འཕུར་གནམ་གྲུ་2 ཉུང་མཐར་ཡང་རྩ་གཏོར་བཏང་ཡོད། ལི་པི་ཡའི་གནམ་གྲུ་དེ་དག་ནི་འཕུར་རྩིས་བྱས་ནས་ཕར་རྒོལ་གྱི་ལས་འགན་སྒྲུབ་སྐབས་གཏོར་ཕམ་བཏང་བ་ཞིག་རེད་ཅེས་འཁོད་ཡོད། ཧྥ་རན་སེའི་སྤྱི་ཁྱབ་ཇུས་འདོན་པུའུ་ཡིས་ཧྥ་རན་སེའི་དཔུང་སྡེའི་གནམ་གྲུ་ 20 ལྷག་ཙམ་དེ་དག་སྣུམ་སྣོན་གནམ་གྲུ་4 དང་ཉེན་བརྡ་གཏོང་བའི་གནམ་གྲུ་1 གི་རམ་འདེགས་འོག་ཉིན་དེ་རང་གི་མཁའ་རྒོལ་ནང་ཞུགས་པ་རེད་ཅེས་བཤད་པ་རེད།

    ཡུལ་དེ་རང་གི་སྨྱན་སྦྱོར་ཚན་པས་གནས་ཚུལ་སྤེལ་བར་གཞིགས་ན། རྒྱལ་ཁབ་མང་པོའི་དཔུང་སྡེས་ལི་པི་ཡར་མུ་མཐུད་དེ་མཁའ་རྒོལ་བྱས་པ་དང་དུས་མཚུངས་ཧྥ་རན་སེ་དང་དབྱིན་ཇི་རྒྱལ་ཁབ་གཉིས་པོས་ཆབ་སྲིད་ཐད་ནས་ལི་པི་ཡའི་གནད་དོན་ཐག་གཅོད་ཡོང་ཐབས་བྱེད་པའི་བསམ་ཕྱོགས་གསར་པ་ཞིག་འཚོལ་རྒྱུའི་གྲ་སྒྲིག་བྱས་ཟིན་པ་སྟེ། ཚེས་29ཉིན་ལུན་ཏུན་དུ་མཐོ་རིམ་ཚོགས་འདུ་འཚོགས་ནས་གནད་དོན་དེར་གྲོས་མོལ་བྱ་རྒྱུ་ཡིན་པ་རེད། བྱང་ཆིངས་རྩ་འཛུགས་ཀྱིས་གཟའ་འཁོར་རྗེས་མར་ལི་པི་ཡར་གནམ་གྲུ་འཕུར་མཚམས་འཇོག་རྒྱུའི་ལས་འགན་བསྒྲུབས་ནས་འཕུར་མཚམས་འཇོག་ཡུན་ཟླ་བ་གསུམ་གནས་སྐབས་གཏན་འབེབས་བྱ་རྒྱུའི་གྲོས་མཐུན་བྱུང་བ་རེད།

    ཚེས་26ཉིན་ཨ་རིའི་དམག་འཁྲུག་ངོ་རྒོལ་རྩ་འཛུགས་དང་མི་སྣས་ཝ་ཧྲིང་ཐོན་དང་། པོ་ཧྲི་ཏུན། ལུའོ་ཧྲན་ཅི་སོགས་སུ་རྔམ་སྟོན་གྱི་བྱེད་སྒོ་སྤེལ་ནས་ཨ་རིས་ལི་པི་ཡར་དམག་དོན་གྱི་ཐེ་ཇུས་བྱས་པར་རྒོལ་གཏམ་བཏང་ཞིང་། ཕོ་བྲང་དཀར་པོའི་མདུན་དུ་རྔམ་སྟོན་པ་བརྒྱ་ལ་ཉེ་བས་བྱང་བུ་བསྒྲེངས་པ་དང་འབོད་ཚིག་བསྒྲགས་ནས་རྒྱལ་ཁབ་མང་པོའི་དཔུང་སྡེས་ལི་པི་ཡར་མཁའ་རྒོལ་བྱས་པར་ངོ་རྒོལ་བྱས་པ་དང་ལི་པི་ཡའི་འབྱུང་འགྱུར་དེ་ལི་པི་ཡའི་མི་དམངས་རང་ཉིད་ཀྱིས་ཐག་གཅོད་རྒྱུའི་ནན་བཤད་བྱས་ཡོད། པོ་ཧྲི་ཏུན་རུ་རྔམ་སྟོན་པས་ཨ་དམག་ལི་པི་ཡ་ནས་ཕྱིར་འཐེན་བྱ་རྒྱུའི་རེ་བ་བཏོན་པ་དང་རྒྱལ་ཁབ་མང་པོའི་དཔུང་སྡེས་འབར་མདེལ་དབྱུག་པ་དེས་ལི་པི་ཡའི་མི་སེར་ཤི་རྨས་བྱུང་ཡོད་ཅེས་བཤད་པ་རེད།

    (ཕྱི་རྒྱལ་དུ་བཅའ་སྡོད་མི་དམངས་ཉིན་རེའི་ཚགས་པར་གྱི་གསར་འགོད་པ་ཧོང་ཕེ་ཀྲའོ་དང་། ཅའོ་ཞང་། ཝང་ཐེན། ཀུའུ་ཡུས་ཆིང་། སུན་ཐེན་རེན། ཏིང་ཏ་ཝུའེ་བཅས་ཀྱིས )