མི་དམངས་ཉིན་རེའི་ཚགས་པར་ཁང་དུ་རི་པིན་ཏ་པན་ནས་ཟླ་3ཚེས་24ཉིན་གློག་འཕྲིན་འབྱོར་གསལ། གོང་ཚེས་ཉིན་གྱི་སྔ་དྲོ་རི་པིན་ལ་གེགས་བར་སེལ་རོགས་བྱེད་པའི་ཀྲུང་གོའི་ཆུ་འཐེན་འཕྲུལ་ཆས་བླུགས་པའི་རྒྱལ་སྤྱིའི་འགྲུལ་སྐྱེལ་གྲུ་གཟིངས “སུའུ་ཀྲོའུ་རྟགས་ཅན ”དེ་ཏ་པན་རྒྱལ་སྤྱིའི་འཕྲེད་སྒྲོལ་འཁོར་གྲུའི་འགྲུལ་སྐྱེལ་ས་ཚིགས་གྲུ་ཁར་འབྱོར་ཞིང་། རི་པིན་ཏུང་ཅིང་གློག་ཤུགས་ཀུང་སིའི་རེ་བ་ལྟར་གསུམ་གཅིག་ལྕི་བའི་བཟོ་ལས་ཀྱིས་ད་རེས་རི་པིན་ཕྱོགས་ལ་རིན་སྐྱིན་མི་དགོས་པར་འཕྲལ་དུ་ཆུ་འཐེན་འཕྲུལ་ཆས་གཅིག་སྤྲད་པ་དང་འབྲེལ་ཕྱོགས་མང་པོའི་ཐད་ཀྱི་ལག་རྩལ་རྒྱབ་སྐྱོར་བྱས་ཡོད་པ་རེད།

    ས་གནས་ས་ཐོག་ཏུ་འཕྲུལ་ཆས་རྩིས་ལེན་པར་ཡོང་མཁན་ཀྲུང་གོ་གསུམ་གཅིག་ལྕི་བའི་བཟོ་ལས་མ་རྐང་ཚད་ཡོད་ཀུང་སིའི་རི་པིན་དུ་ཚོང་གཉེར་བྱེད་མཁན་ཅིང་ལི་དབྱང་པིང་ལུང་གིས་གསར་འགོད་པར “སྔོན་གཏན་འཁེལ་བའི་ཉིན་གྲངས་ལྟར་ཆུ་འཐེན་འཕྲུལ་ཆས་དེ་ཚེས་24ཉིན་གྱི་སྔ་དྲོ་ཏ་པན་གྲུ་ཁ་ནས་ཏུང་ཅིང་དང་ཉེ་བའི་ཆན་ཡེ་རྫོང་དུ་དབོར་ཟིན་པས་ཚེས་25ཉིན་ཀྲུང་གོ་ཕྱོགས་ཀྱི་ལག་རྩལ་ཆེ་མོ་བས་ཆུ་འཐེན་འཕྲུལ་ཆས་སྤྱོད་མཁན་རི་པིན་གྱི་ལས་བཟོར་གསོ་སྦྱོང་བྱ་རྒྱུ་ཡིན་པ་དང་ཚེས་26ཉིན་ཕུའུ་ཏའོ་ཉིང་རྡུལ་གློག་ཁང་དང་པོར་དབོར་ཏེ་ཆུ་སྟོར་ནས་གྲང་མོ་བཟོ་བའི་ལས་ཀ་བྱ་རྒྱུ་རེད ”ཅེས་བཤད་ཡོད། ཆུ་འཐེན་འཕྲུལ་ཆས་དེ་ཏ་པན་གྲུ་ཁ་ནས་ཐོན་རྗེས་ལམ་བར་ཉེན་རྟོག་རླངས་འཁོར་གྱིས་སྐྱེལ་རོགས་བྱས་ཡོད་པས་ཚོད་དཔག་བྱས་ན་ཚེས་25ཉིན་གྱི་ཐོ་རེངས་སུ་ཆན་ཡེ་རྫོང་དུ་འབྱོར་ཐུབ།

    ཕུའུ་ཏའོ་ཉིང་རྡུལ་གློག་ཁང་དང་པོའི་འཕྲུལ་ཚན་གསུམ་པ་ཉམས་གསོ་བྱེད་མཁན་བཟོ་པ་སྐྱེས་པ་གསུམ་ལ་ཚེས་24ཉིན་གྱི་ཕྱི་དྲོ་ཤིས་ཧྥུ་ཧའོ་173ནས་180བར་གྱི་ཉིང་རྡུལ་འགྱེད་འཕྲོ་བྱུང་བ་དེའི་ནང་གི་མི་གཉིས་ཀྱི་རྐང་པའི་པགས་པར་འགྱེད་འཕྲོའི་རང་བཞིན་གྱི་རྫས་རྒྱུ་འགོས་ཡོད་པས་ཕུའུ་ཏའོ་རྫོང་གསོ་རིག་སློབ་ཆེན་དུ་སྨན་བཅོས་བྱེད་པར་བསྐྱལ་བ་དང་དེ་རྗེས་ཆན་ཡེ་གྲོང་ཁྱེར་འཕྲོ་འོད་གསོ་རིག་ཕྱོགས་བསྡུས་ཞིབ་འཇུག་ཁང་དུ་བསྐྱལ་བ་རེད། རི་པིན་གྱི་དཔལ་འབྱོར་ཐོན་ལས་པུའི་རྡུལ་ཕྲན་ནུས་པའི་བདེ་འཇགས་སྲུང་ཁང་གིས་བཤད་པར་གཞིགས་ན། མི་གསུམ་པོ་ཚང་མ་ཏུང་ཅིང་གློག་ཤུགས་མཉམ་ལས་ཁེ་ལས་ཀྱི་བཟོ་པ་ཡིན་པ་དང་ཁོང་གསུམ་པོས་ཞོགས་པའི་ཆུ་ཚོད་བཅུ་པ་ཙམ་ནས་བཟུང་འཕྲུལ་ཚན་གསུམ་པའི་སྒྲོ་གཤོག་སྒུལ་བྱེད་འཕྲུལ་ཁང་ནང་གློག་སྐུད་འཁྲིད་སྐབས་རྐང་པ་ཆུའི་ནང་སྦངས་ནས་སྡོད་དགོས་བྱུང་ཡོད་པས་སྨན་པས་མི་གཉིས་ཀྱི་པགས་པར་འཕྲོ་འོད་βཕོག་ནས་འཚིག་པའི་ངོས་འཛིན་བྱས་ཡོད། ཚེས་24ཉིན་བར་ཉིང་རྡུལ་ཤིས་ཧྥུ་ཧའོ་100ཡན་ལས་བརྒལ་བའི་འགྱེད་འཕྲོ་བྱུང་བའི་མི་གྲངས་བདུན་མང་དུ་ཕྱིན་ནས་ཁྱོན་མི་གྲངས་14ལ་འགྱེད་འཕྲོ་བྱུང་བར་བརྟེན་ཚེས་24ཉིན་ཕུའུ་ཏའོ་ཉིང་རྡུལ་གློག་ཁང་དང་པོའི་ཉམས་བཟོའི་ལས་ཀ་བྱེད་མཚམས་འཇོག་དགོས་བྱུང་ཡོད་པ་རེད།

    ཏུང་ཅིང་སྲིད་གཞུང་གིས་ཚེས་24ཉིན་ལོ་གཅིག་མན་ཆད་ཀྱི་ཕྲུ་གུ་དམར་འབྱར་ཡོད་པའི་ཁྱིམ་ཚང་ལ་འཐུང་ཆུ་འགྱིག་དམ་ཁྱོན་ཁྲི་24སྤྲད་ཡོད་པ་དང་ཏུང་ཅིང་ཆུ་ལམ་ཅུས་ཀྱིས་ཚེས་24ཉིན་ཅིང་ཏིང་ཆུ་གཙང་བཟོ་བཟོ་གྲྭས་མཁོ་འདོན་བྱས་པའི་རང་འབབ་ཆུ་དེ་ཕྲུ་གུ་དམར་འབྱར་གྱིས་འཐུང་ཆོག་པའི་ཚད་གཞི་ལོན་ཡོད་པའི་ཁྱབ་བསྒྲགས་བྱས་པ་དང་རི་པིན་ཆན་ཡེ་རྫོང་ཆུ་མཁོ་འདོན་ཅུས་ཀྱིས་ཚེས་24ཉིན་རྫོང་དེའི་སུང་ཧུ་གྲོང་ཁྱེར་གྱི་རང་འབབ་ཆུ་གཙང་བཟོ་བཟོ་གྲྭ་གཉིས་ཀྱི་ཆུའི་ནང་ནས་འགྱེད་འཕྲོའི་རང་བཞིན་གྱི་ཏེན་འདུ་ཚད་དེ་བྱིས་པ་དང་ཕྲུ་གུ་དམར་འབྱར་གྱིས་སྤྱོད་ཆོག་པའི་གནས་སྐབས་གཏན་འཁེལ་བྱས་པའི་ཚད་གཞི་ལས་བརྒལ་ཡོད་པས་ཕྲུ་གུ་དམར་འབྱར་ལ་སྟེར་མི་རུང་བའི་ཁྱབ་བསྒྲགས་བྱས་ཡོད། སུང་ཧུ་གྲོང་ཁྱེར་གྱིས་ཚེས་24ཉིན་མི་དམངས་ལ་ཕྲུ་གུ་དམར་སྦྱར་ལ་འོ་རྩམ་སྦང་བྱེད་ཁྲོན་ཆུ་ཁུག་མ་4500སྤྲད་པ་དང་ཚེས་25ཉིན་གྲོང་ཁྱེར་ནང་གི་རང་འབབ་ཆུ་གཙང་བཟོ་བཟོ་གྲྭས་གྲོང་མིར་ཆུ་མཁོ་འདོན་བྱ་རྒྱུ་ཡིན་པ་རེད། ཁྲོམ་རའི་ཐོག་འགྱིག་དམ་ནང་བླུགས་པའི་འཐུང་ཆུ་དཀོན་པའི་གནས་ཚུལ་ལ་དམིགས་ཏེ་དཔོན་རིགས་རྒན་གྲས་ཅི་ཡེ་ཤིན་ནན་གྱིས་ཚེས་24ཉིན་གྱི་སྔ་དྲོའི་གསར་འགོད་པའི་ཚོགས་འདུའི་ཐོག “ཀྲུང་དབྱང་སྲིད་གཞུང་གིས་འབྲེལ་ཡོད་སྡེ་ཚན་ལ་འགྱིག་དམ་ནང་བླུགས་པའི་འཐུང་ཆུ་ཐོན་སྐྱེད་བྱེད་ཚད་མང་དུ་གཏོང་བ་དང་འབྲེལ་བྱ་ཐབས་འོས་འཚམས་སྤྱོད་དགོས་པའི་རེ་བ་འདོན་རྒྱུ་ཡིན ”ཞེས་གསུངས་ཡོད།

    སློབ་གསོ་ཚན་རིག་པུའུ་ཡིས་ཚེས་24ཉིན་ཕུའུ་ཏའོ་རྫོང་ནང་གི་རྩྭའི་མ་དཔེར་འགྱེད་འཕྲོའི་རང་བཞིན་གྱི་རྫས་རྒྱུ་འགྱེད་འཕྲོ་བྱུང་ཡོད་མེད་བརྟག་དཔྱད་བྱས་པར་ཚེས་20ཉིན་ཕུའུ་ཏའོ་ཉིང་རྡུལ་གློག་ཁང་དང་པོའི་ནུབ་བྱང་ངོས་དང་བར་ཐག་སྤྱི་ལེ་40ཙམ་ཡོད་པའི་ཟ་ཁང་གྲོང་ཚོ་ནས་བསྡུས་པའི་རྩྭའི་མ་དཔེ་སྤྱི་རྒྱ་རེར་མཐོ་ཤོས་ལ་པེ་ཁེ་ལེར་ཏེན་ཁྲི་254དང་པེ་ཁེ་ལེར་སེས་ཁྲི་265འདུས་ཡོད་པ་ཤེས་རྟོགས་བྱུང་ཡོད་པ་རེད། 《བཟའ་བཅའི་འཕྲོད་བསྟེན་བཅའ་ཁྲིམས 》གཏན་འབེབས་ནང་གི་གནས་སྐབས་གཏན་ལ་ཕབ་པའི་ཚད་གཞི་ནི་སྤྱི་རྒྱ་རེར་པེ་ཁེ་ལེར་ཏེན་2000དང་པེ་ཁེ་ལེར་སེས་500ཡིན་པ་རེད། ཕུའུ་ཏའོ་ཉིང་རྡུལ་གློག་ཁང་དང་པོའི་ལས་འཛོལ་ལ་དམིགས་ཏེ་སློབ་གསོ་ཚན་རིག་པུའུ་ཡིས་ཉིང་རྡུལ་གློག་ཁང་དེའི་ཉེ་འདབས་ཀྱི་ས་རྒྱུ་དང་རྒྱ་མཚོ་དང་དེ་བཞིན་མཁའ་དབྱིངས་ཁྲོད་ཀྱི་འགྱེད་འཕྲོའི་རང་བཞིན་གྱི་རྫས་རྒྱུར་ལྟ་ཞིབ་ཚད་ལེན་བྱེད་འགོ་བཙུགས་ཡོད། ཉིང་རྡུལ་གྱི་ལས་འཛོལ་ལས་ཞིང་ལས་དང་ཉ་ལས་ལ་ཤུགས་རྐྱེན་ངན་པ་ཐེབས་ཡོང་སྙམ་པའི་ཕྱི་རོལ་གྱི་སེམས་ཁྲལ་ཉིན་བཞིན་ཆེ་རུ་ཕྱིན་པའི་རྐྱེན་གྱིས་ད་རེས་ཀྱི་ལྟ་ཞིབ་ཚད་ལེན་ཐད་དངོས་སུ་བཙོག་སྐྱོན་བྱུང་བའི་གནས་ཚུལ་ཕྱོགས་བསྡུས་ཤེས་རྟོགས་བྱ་རྒྱུ་ཡིན་པ་རེད།