རི་པིན་དུ་ས་ཡོམ་བརྒྱབ་པ་དང་མཚོ་ཡོམ་ལས་བྱུང་བའི་ཉིང་རྡུལ་ཕྱིར་ཤོར་གྱི་ཆག་སྒོ་དེ་མི་ཚོས་སྔོན་དཔག་ལས་རྦད་དེ་བརྒལ་བ་དང་རི་པིན་གྱི་དཔལ་འབྱོར་ལ་གྱོང་གུན་ཚབས་ཆེན་ཕོག་པའི་གྲངས་གཞི་རྒྱུན་ཆད་མེད་པར་མཐོ་རུ་སོང་ཁར་སྐྱིན་ཚབ་འཇལ་དངུལ་མཐོ་རུ་ཕྱིན་པ་དེས་ཀྱང་འཛམ་གླིང་ཡོངས་ཀྱི་འགན་བཅོལ་ལས་རིགས་ལ་གྱོང་གུན་ཚབས་ཆེན་བཟོས་ཡོད།
དུས་རབས་20པའི་ལོ་རབས་90པར་སླེབས་ཚུན་འཛམ་གླིང་ཡོངས་སུ་རང་བྱུང་གི་གནོད་འཚེ་ཕོག་ཚད་མང་བ་དང་། གནོད་འཚེ་མང་པོ་མཉམ་དུ་ཐོན་པ། གཏོར་སྐྱོན་ཕོག་ཤུགས་ཆེ་བ་སོགས་ཀྱི་ཁྱད་ཆོས་ལྡན་པར་རྒྱལ་ཁབ་གང་རུང་ཞིག་གིས་རང་ཚུགས་ངང་གྱོང་གུན་ཚབས་ཆེན་ཐེག་མི་ཐུབ་པ་དང་ཐོན་ཁུངས་གཅིག་གྱུར་ཐོག་གཏོང་འདྲེན་བྱེད་པ་དང་ཕྱོགས་བསྡུས་མཐུན་སྦྱོར་བྱེད་ནུས་དེ་བས་འདང་གི་མེད་པར་བརྟེན་ཇི་ལྟར་བྱས་ཏེ་འཛམ་གླིང་ཡོངས་ཀྱི་གུན་སེལ་གྱི་ཐོན་ཁུངས་བསྡུ་སྒྲིལ་བྱས་ནས་རྒྱལ་ཁབ་གཅིག་གམ་ཡང་ན་ས་ཁོངས་ཤིག་གིས་དོགས་ཟོན་བྱས་པ་ནས་འཛམ་གླིང་ཡོངས་ཀྱིས་མཉམ་ཟོན་བྱ་རྒྱུའི་བར་མངོན་འགྱུར་ཡོང་བ་བྱེད་པ་དང་འཛམ་གླིང་ཡོངས་ཀྱི་གཅིག་གྱུར་གྱི་གནོད་འཚེ་ཚབས་ཆེན་གྱི་འཕྲལ་སྡོམ་དོ་དམ་ལམ་སྲོལ་འཛུགས་རྒྱུ་དེ་འཕྲལ་དུ་ཐག་གཅོད་བྱེད་དགོས་པའི་འགངས་ཆེའི་གྲོས་གཞི་ཞིག་ཏུ་གྱུར་ཡོད།
ཇི་ལྟར་བྱས་ནས་འཛམ་གླིང་ཡོངས་ཀྱི་གནོད་འཚེ་ཚབས་ཆེན་གྱི་ཉེན་ཁའི་དོ་དམ་སྒྲིག་གཞི་འཛུགས་རྒྱུའི་ཐད་མིག་སྔར་བསམ་ཕྱོགས་གཉིས་ཡོད་པ་སྟེ། གཅིག་ནི་མཉམ་འབྲེལ་རྒྱལ་ཚོགས་ཀྱིས་སྣེ་ཁྲིད་དེ་འཛམ་གླིང་ཡོངས་ཀྱི་གནོད་འཚེ་འཕྲལ་སྡོམ་དོ་དམ་ལྟེ་གནས་འཛུགས་རྒྱུ་དང་། གཉིས་ནི་ད་ཡོད་ཀྱི་རང་བྱུང་གནོད་འཚེར་ཁ་གཏད་གཅོག་པའི་རྩ་འཛུགས་ཀྱི་ཐོན་ཁུངས་བསྡུ་སྒྲིལ་བྱས་ཏེ་འབྲེལ་ལམ་བཙུགས་ནས་ཐོན་ཁུངས་ཀྱི་ཆ་འཕྲིན་མཉམ་སྤྱོད་བྱ་རྒྱུ་དེ་གཉིས་ཡིན།
ཆག་སྒོ་ལས་སྡུག་བསྔལ་བཟོ་གི་ཡོད་ལ་རང་སྐྱོན་རང་བརྟག་དང་བསམ་ཤེས་ཀྱང་བྱེད་དགོས་ཀྱི་ཡོད། རང་བྱུང་གི་གནོད་འཚེ་ཚབས་ཆེན་འཕྲད་སྐབས་རྒྱལ་ཁབ་མང་པོ་ཞིག་ལ་ཉེན་ཁ་དེ་དང་འདྲ་བ་འཕྲད་ཀྱི་ཡོད་པས་འཛམ་གླིང་ཡོངས་ནི “ཐུན་མོང་གི་ཕུང་པོ ”ཞིག་དང་མཚུངས་ཀྱི་ཡོད། གནོད་འཚེ་ཚབས་ཆེན་སྔོན་བརྡ་དང་། འཕྲལ་སྡོམ། འགན་བཅོལ་སོགས་ལ་ཁྱབ་པའི་འཛམ་གླིང་ཡོངས་ཀྱི་གཅིག་གྱུར་གྱི་དོ་དམ་མ་ལག་དང་དེའི་རིམ་པ་མང་བའི་འཛམ་གླིང་ཡོངས་ཀྱི་མཉམ་ལས་ལམ་སྲོལ་ཞིག་འཛུགས་རྒྱུའི་དགོས་པ་ཤིན་ཏུ་ཆེ།