མི་དམངས་ཉིན་རེའི་ཚགས་པར་ཁང་དུ་ཨོ་ཐེ་ཝ་ནས་ཟླ་3ཚེས་22ཉིན་གློག་འཕྲིན་འབྱོར་གསལ། གོང་ཚེས་ཉིན་ཁ་ན་ཏར་འཚམས་འདྲི་གནང་བཞིན་པའི་རྒྱལ་ཡོངས་མི་དམངས་འཐུས་ཚོགས་ཀྱི་བོད་ཀྱི་འཐུས་མི་ཚོགས་པ་ཁར་ཅ་ལི་སློབ་ཆེན་དུ་ཕེབས་ཏེ་ཁ་ན་ཏའི་མཐོ་སློབ་དགེ་རྒན་གྱི་འཐུས་མི་དང་བཞུགས་མོལ་གནང་བ་རེད།

    འཐུས་མི་ཚོགས་པའི་ཚོགས་གཙོ་བྱམས་པ་ཕུན་ཚོགས་ཀྱིས་བོད་རང་སྐྱོང་ལྗོངས་ལ “ལོ་ལྔ་ཚན་བཅུ་གཅིག་པའི ”རིང་ཐོབ་པའི་རླབས་ཆེའི་གྲུབ་འབྲས་ལ་ཕྱིར་མིག་གཟིགས་པ་དང་སླད་ཕྱིན་ལོ་ལྔའི་རིང་གི་བོད་ཀྱི་དཔལ་འབྱོར་དང་སྤྱི་ཚོགས་འཕེལ་རྒྱས་ཀྱི་དམིགས་ཚད་ངོ་སྤྲོད་གནང་བ་རེད།

    བྱམས་པ་ཕུན་ཚོགས་ཀྱིས་མིག་སྔར་བོད་ཀྱི་སྤྱི་ཚོགས་ཀྱི་འགལ་བ་གཙོ་བོ་ནི་སྔར་བཞིན་མི་དམངས་མང་ཚོགས་ཀྱི་ཉིན་བཞིན་ཤུགས་ཆེར་འགྲོ་བའི་དངོས་པོ་དང་རིག་གནས་ཀྱི་དགོས་མཁོ་དང་རྗེས་སུ་ལུས་པའི་སྤྱི་ཚོགས་ཐོན་སྐྱེད་དབར་གྱི་འགལ་བ་དེ་ཡིན། ཕྱོགས་མཚུངས་ད་དུང་བོད་ཀྱི་མི་རིགས་ཁག་གི་མི་དམངས་དང་ཏཱ་ལའི་རུ་ཚོགས་ཀྱིས་ཚབ་བྱས་པའི་ཁ་ཕྲལ་གྱི་སྟོབས་ཤུགས་དབར་གྱི་དམིགས་བསལ་གྱི་འགལ་བ་གནས་ཡོད། བོད་ཪྙིང་པའི་ཆོས་སྲིད་ཟུང་འབྲེལ་གྱི་བཀས་བཀོད་རྒྱུད་འཛིན་ཞིང་བྲན་ལམ་ལུགས་ཀྱི་ལྷག་རོའི་ཚབ་ཅིག་དང་། ཆོས་གོས་གྱོན་ནས “གཞུང་ལུགས་འཆད་ཁྲིད ”དང “བཀའ་ཆོས ”བྱེད་པར་ཁ་བཏགས་ཏེ་ཡུན་རིང་མེས་རྒྱལ་ཁ་ཕྲལ་གཏོང་བའི་བྱེད་སྤྱོད་སྤེལ་ཏེ་མི་རིགས་མཐུན་སྒྲིལ་ལ་གཏོར་བཤིག་གཏོང་མཁན་ཆབ་སྲིད་ཀྱི་ཡུལ་གྱར་པ་ཞིག་བཅས་ཡིན་པའི་ཏཱ་ལས་ཐོག་མཐའ་བར་གསུམ་དུ་རྒྱལ་སྤྱིའི་ཐོག་བོད་ཀྱི་གནས་ཚུལ་འཁྱོག་བཤད་བྱས་ཏེ་ནུབ་ཕྱོགས་ཀྱི་མི་དམངས་ལ་གོ་ནོར་ཐེབས་སུ་འཇུག་གི་ཡོད་པས་ཁ་ན་ཏའི་སློབ་གསོའི་ལས་རིགས་ཀྱིས་ཕྱི་ཚུལ་ལ་མ་གཟིགས་པར་ངོ་བོར་གཟིགས་ནས་ཏཱ་ལའི་གདོང་རིས་ངོ་མ་གཟིགས་ཐུབ་པ་གནང་སྟེ་ཀྲུང་གོ་དང་ཁ་ན་ཏའི་འབྲེལ་བ་གོང་འཕེལ་གཏོང་བའི་མདུན་གྲལ་དུ་སླེབས་རྒྱུའི་རེ་བ་ཡོད་ཅེས་གསུངས།

    འཐུས་མི་ཚོགས་པས་བོད་ཀྱི་ཁོར་ཡུག་སྲུང་སྐྱོང་དང་། སློབ་གསོ་རིག་གནས། ཆོས་དད་རང་མོས་སོགས་ཀྱི་ཐད་ཁ་ན་ཏའི་དགེ་རྒན་གྱིས་བཏོན་པའི་དྲི་བར་ལན་བསྐྱོན་པ་རེད།

    བཞུགས་མོལ་ནང་ཞུགས་མཁན་ཁ་ན་ཏའི་མཐོ་སློབ་དགེ་རྒན་གྱི་འཐུས་མི་ཚོས་ཁ་ན་ཏར་ཀྲུང་གོའི་བོད་ལྗོངས་ཇི་བཞིན་ཞིབ་འཇུག་གཏིང་ཟབ་བྱེད་མཁན་རིག་གནས་པ་ཡིན་ཕྱིན་ཏཱ་ལའི་དྲང་གཞག་མིན་པའི་དྲིལ་བསྒྲགས་ལ་ཡིད་ཆེས་མི་བྱེད་པར་ཁ་ན་ཏའི་མཐོ་རིམ་སློབ་གྲྭས་ཀྲུང་གོའི་སློབ་གསོའི་ལས་རིགས་དང་བོད་རང་སྐྱོང་ལྗོངས་དང་སྤེལ་རེས་མཉམ་ལས་བྱ་རྒྱུར་ཤུགས་སྣོན་བརྒྱབ་ནས་རྒྱལ་ཁབ་གཉིས་ཀྱི་འབྲེལ་བ་སྐྱོན་བྲལ་ངང་འཕེལ་རྒྱས་ཡོང་རྒྱུར་ཐུན་མོང་ཐོག་སྐུལ་འདེད་གཏོང་འདོད་ཡོད་ཅེས་གསུངས།

    ཉིན་དེའི་ཕྱི་དྲོ་འཐུས་མི་ཚོགས་པས་ཁར་ཅ་ལི་ཀྲུང་གོའི་རིག་གནས་ལྟེ་གནས་སུ་ཕྱིར་སྡོད་རང་མི་དང་ཕྱི་ཁོངས་ཀྲུང་གོ་བའི་འཐུས་མི་50ཙམ་དང་བཞུགས་མོལ་གནང་ཞིང་། རྒྱ་ཆེའི་ཕྱིར་སྡོད་རང་མི་ཚོས་བོད་རང་སྐྱོང་ལྗོངས་ཀྱི་དཔལ་འབྱོར་དང་སྤྱི་ཚོགས་འཕེལ་རྒྱས་ལ་སྔར་བཞིན་རྒྱབ་སྐྱོར་བྱ་རྒྱུ་དང་ཏཱ་ལའི་རུ་ཚོགས་ཀྱི་ཁ་ཕྲལ་སྟོབས་ཤུགས་ལ་ངོ་རྒོལ་མཐའ་གཅིག་ཏུ་བྱས་ཏེ་མེས་རྒྱལ་གྱི་ཞི་བདེ་དང་གཅིག་གྱུར་གྱི་བྱ་གཞག་ཆེན་པོར་ནུས་ཤུགས་ཡོད་རྒུས་སྐུལ་མ་གཏོང་རྒྱུ་ཡིན་ལུགས་བཤད།