ཤིན་ཧྭ་གསར་འགྱུར་ཁང་ཐི་རི་ཕོ་ལི་ནས་ཟླ་3ཚེས་21ཉིན་གློག་འཕྲིན་འབྱོར་པ་གཞིར་བཟུང་། ལི་པི་ཡའི་རྒྱལ་ས་ཐི་རི་ཕོ་ལིའི་དམིགས་ས་མང་པོར་ཚེས་21ཉིན་གྱི་མཚན་མོ་ནུབ་ཕྱོགས་རྒྱལ་ཁབ་ཀྱི་དམག་འཐབ་གནམ་གྲུའི་མཁའ་ཐོག་གི་འཇབ་རྒོལ་ཕོག་ཅིང་། དེ་ནི་ཚེས་19ཉིན་ནུབ་ཕྱོགས་རྒྱལ་ཁབ་ཀྱིས་ལི་པི་ཡར་དམག་དོན་རྡུང་རྡེག་བཏང་ཚུན་དམག་འཐབ་གནམ་གྲུས་ཐི་རི་ཕོ་ལིའི་དམིགས་སར་མཁའ་ཐོག་ནས་བསྟུད་མར་འཇབ་རྒོལ་བྱེད་ཐེངས་གསུམ་པ་དེ་ཡིན་པ་རེད།

    གནས་ཚུལ་ཤེས་མཁན་ཞིག་གིས་ཤིན་ཧྭ་གསར་འགྱུར་ཁང་གི་གསར་འགོད་པར་ཐི་རི་ཕོ་ལིའི་གྲོང་ཁྱེར་ཤར་རྒྱུད་མཚོ་འགྲམ་དང་བར་ཐག་ཉེ་བའི་མཚོ་དམག་གི་རྟེན་གཞི་ཞིག་ལ་དང་ཐོག་འཇབ་རྒོལ་ཕོག་པ་དང་དམག་སྒར་དེ་རླུང་འཕྲིན་བཪྙན་འཕྲིན་གྱི་ཐོག་བརྩེགས་མཁར་ཆེན་གྱི་འགྲམ་དུ་གནས་ཡོད། དེ་རྗེས་མཚོ་དམག་གི་དམག་སྒར་དང་བར་ཐག་སྤྱི་ལེ་གཉིས་ཙམ་ཡོད་པའི་ཧྲ་ཨ་ཕུ་གྲུ་ཁའི་འགྲམ་གྱི་སྣུམ་འདྲེན་མདོང་ལམ་མཁའ་ཐོག་གི་འཇབ་རྒོལ་ནང་འབར་ནས་མེ་ཆེན་པོ་ཤོར་སོང་། གཞན་ཡང་ཐི་རི་ཕོ་ལིའི་ནུབ་ངོས་སྤྱི་ལེ་30སར་གནས་པའི་སྲིད་གཞུང་གི་དམག་སྒར་ལའང་དམག་འཐབ་གནམ་གྲུས་འབར་གཏོར་བྱས་ལུགས་བརྗོད་བྱུང་།

    ལི་པི་ཡའི་ས་གནས་དུས་ཚོད་ཚེས་21ཉིན་གྱི་དགོང་མོའི་ཆུ་ཚོད་དགུ་པ་ཙམ་ལ་ནུབ་ཕྱོགས་རྒྱལ་ཁབ་ཀྱི་དམག་འཐབ་གནམ་གྲུས་སླར་ཡང་མཁའ་ཐོག་ནས་འཇབ་རྒོལ་བྱེད་འགོ་ཚུགས། གསར་འགོད་པའི་རྣ་བར་ཡང་གྲོང་ཁུལ་དུ་གྲགས་པའི་འབར་གས་ཀྱི་སྒྲ་ཆེན་པོ་ཐོས་ཤིང་། དེ་རྗེས་ཐི་རི་ཕོ་ལིའི་མཁའ་ཟོན་དཔུང་སྡེས་མཁའ་དབྱིངས་སུ་མེ་སྒྱོགས་བརྒྱབ་ནས་ཕར་རྒོལ་བྱས་པ་རེད།

    འབར་གས་ཀྱི་གནས་ཚུལ་ཐོན་རྗེས་ལི་པི་ཡའི་སྲིད་གཞུང་གི་མགྲིན་ཚབ་པ་མུའུ་ས་·དབྱི་ཕུའུ་ལ་ཤིས་ཛ་དྲག་ངང་གསར་འགོད་པའི་ཚོགས་འདུ་འཚོགས་ནས་འབར་གཏོར་གྱི་བྱེད་སྤྱོད་ལ་ཁ་རྡུང་དྲག་པོ་བཏང་ཞིང་། ཁོང་གིས་ནུབ་ཕྱོགས་རྒྱལ་ཁབ་ཀྱིས་ཉིན་གསུམ་བསྟུད་མར་ལི་པི་ཡར་དམག་དོན་གྱི་རྡུང་རྡེག་བཏང་བ་དང་གནས་ཚུལ་དེ་ལི་པི་ཡའི་དྲག་ཆས་དཔུང་སྡེས་ཁྱོན་ཡོངས་ནས་དམག་མཚམས་འཇོག་རྒྱུ་དང་འབྲེལ་དམག་དོན་གྱི་བྱ་སྤྱོད་ཡོད་དོ་ཅོག་མཚམས་འཇོག་བྱ་རྒྱུ་ཁྱབ་བསྒྲགས་བྱས་རྗེས་ཐོན་པ་ཞིག་ཡིན། ལི་པི་ཡའི་དམངས་སྤྱོད་གནམ་ཐང་དང་མཚོ་ཐོག་གྲུ་ཁ་ཕལ་ཆེ་བ་འཇབ་རྒོལ་ནང་གཏོར་ཡོད། ནུབ་ཕྱོགས་རྒྱལ་ཁབ་ཀྱི་དམག་དོན་རྡུང་རྡེག་ནང་མི་སེར་མང་པོ་ཤི་རྨས་བྱུང་ཡོད་ཅེས་བཤད་པ་རེད།