ཤིན་ཧྭ་གསར་འགྱུར་ཁང་པེ་ཅིང་ནས་ཟླ་3ཚེས་22ཉིན་གློག་འཕྲིན་འབྱོར་གསལ། ཚེས་22ཉིན་ཕྱི་འབྲེལ་པུའི་མགྲིན་ཚབ་པ་ཅང་ཡུས་ཀྱིས་ལི་པི་ཡའི་འབྱུང་འགྱུར་དེ་ལི་པི་ཡའི་མི་དམངས་རང་ཉིད་ཀྱིས་ཐག་གཅོད་དགོས་ཞེས་གསུངས་པ་རེད།

    ཅང་ཡུས་ཀྱིས་ཀྲུང་གོ་ཕྱོགས་ཀྱིས་འབྲེལ་ཡོད་རྒྱལ་ཁབ་ཀྱིས 《མཉམ་འབྲེལ་རྒྱལ་ཚོགས་ཀྱི་རྩ་ཁྲིམས 》ཀྱི་སྙིང་དོན་དང་རྩ་དོན་དེ་བཞིན་རྒྱལ་སྤྱིའི་བཅའ་ཁྲིམས་ཀྱི་འབྲེལ་ཡོད་ཚད་འཛིན་ལ་བསྟུན་པ་དང་ལི་པི་ཡའི་བདག་དབང་དང་། རང་བཙན། གཅིག་གྱུར། མངའ་ཁོངས་ས་ཆ་ཆ་ཚང་བཅས་ལ་བརྩི་འཇོག་བྱེད་དགོས་པའི་ངོས་འཛིན་བྱེད་ཀྱི་ཡོད། ང་ཚོས་སྐད་ཆ་བྱེད་པ་སོགས་ཞི་བའི་བྱེད་ཐབས་བརྒྱུད་མིག་སྔའི་ལི་པི་ཡའི་དཀའ་གནད་ཐག་གཅོད་བྱ་རྒྱུའི་འདོད་ཚུལ་འཛིན་གྱི་ཡོད། ལི་པི་ཡའི་འབྱུང་འགྱུར་དེ་ལི་པི་ཡའི་མི་དམངས་རང་ཉིད་ཀྱིས་ཐག་གཅོད་དགོས། འབྲེལ་ཡོད་རྒྱལ་ཁབ་ཀྱིས་དམག་དོན་བྱ་སྤྱོད་སྤེལ་ནས་མི་སེར་ཤི་རྨས་བྱུང་བའི་གནས་ཚུལ་ལ་ཀྲུང་གོ་ཕྱོགས་ཀྱིས་དོ་སྣང་བྱས་ཡོད་ལ་དོན་དེར་དེ་བས་དོ་ཁུར་བྱ་རྒྱུ་ཡིན། བདེ་འཇགས་ལས་འཛིན་ལྷན་ཚོགས་ཀྱི་འབྲེལ་ཡོད་གྲོས་ཆོད་ཀྱི་ཐོག་མའི་དམིགས་ཡུལ་ནི་ལི་པི་ཡའི་མི་སེར་གྱི་བདེ་འཇགས་སྲུང་སྐྱོབ་བྱ་རྒྱུ་དེ་ཡིན། དྲག་ཤུགས་གང་བྱུང་དུ་སྤྱད་པ་ལས་མི་སེར་དེ་བས་མང་པོ་ཤི་རྨས་དང་མི་ཆོས་རིང་ལུགས་ཀྱི་གནོད་འཚེ་དེ་བས་ཆེ་བ་ཐོན་རྒྱུར་ང་ཚོས་ངོ་རྒོལ་བྱ་རྒྱུ་ཡིན་ཞེས་གསུངས་པ་རེད། གཞན་ཡང་གནས་ཚུལ་སྤེལ་བར་གཞིགས་ན། ལི་པི་ཡས་རང་ཉིད་ཀྱི་དྲག་ཆས་དཔུང་སྡེར་དམག་དོན་གྱི་བྱ་སྤྱོད་སྤེལ་མཚམས་འཇོག་དགོས་པའི་བླང་བྱ་བཏོན་ཡོད། ང་ཚོས་སླར་ཡང་འབྲེལ་ཡོད་ཕྱོགས་ཀྱིས་འཕྲལ་དུ་དམག་མཚམས་བཞག་ནས་ཞི་བའི་བྱེད་ཐབས་བརྒྱུད་ལི་པི་ཡའི་གནད་དོན་ཐག་གཅོད་བྱ་རྒྱུའི་རེ་འབོད་བྱ་རྒྱུ་ཡིན། ང་ཚོས་མཉམ་འབྲེལ་རྒྱལ་ཚོགས་ཀྱི་དྲུང་ཆེའི་ལི་པི་ཡའི་གནད་དོན་གྱི་ཆེད་བསྐོས་ཕོ་ཉ་དང་དེ་བཞིན་ཨ་ཧྥེ་རི་ཁའི་མནའ་འབྲེལ་རྒྱལ་ཁབ་དང་ཨ་རབ་མནའ་འབྲེལ་རྒྱལ་ཁབ་ཀྱིས་མུ་མཐུད་ཞི་བའི་ཐོག་ནས་ལི་པི་ཡའི་མིག་སྔའི་ཉེན་ཁ་ཐག་གཅོད་བྱེད་པའི་ཐད་སྤེལ་བའི་ཕྱི་འབྲེལ་འབད་འཐབ་ལ་རྒྱབ་སྐྱོར་བྱ་རྒྱུ་ཡིན་ཞེས་གསུངས་པ་རེད།