འཚོ་བའི་ཁྲོད་ནས་ཤ་ཚ་མངོན་པ་དང་གེགས་བར་འཕྲད་སྐབས་འགྱུར་མེད་བརྩེ་དུང་མངོན་ཞིང་། ཁྲེང་ཀོན་ཆུས་སུ་སྐྱོད་སྐབས་གསར་འགོད་པར་དམག་བཀུར་དམངས་གཅེས་དང་། དམག་དཔུང་དང་ས་གནས། དམག་མི་དང་མང་ཚོགས་བཅས་དབར་མཉམ་སྐྲུན་གྱི་རྣམ་པ་ཟབ་མོ་ཞིག་མྱོང་ཚོར་ཐུབ་བྱུང་། འཚོ་བའི་ཁྲོད་དང་གེགས་བར་འཕྲད་པའི་སྐབས་སུ་དམག་མི་དང་མང་ཚོགས་དབར་ཟོལ་མེད་ཀྱི་སེམས་པ་མཚོན་པ་དང་། ལྷད་མེད་ཀྱི་གཅེས་སེམས་མཚོན་ཞིང་། ལོ་མང་རིང་ཁྲེང་ཀོན་ཆུས་ཀྱིས “གཉིས་བཀུར ”བྱེད་སྒོ་རྒྱ་ཁྱབ་ཏུ་སྤེལ་ནས་དཔལ་འབྱོར་འཕེལ་རྒྱས་དང་དུས་བབ་བརྟན་དུ་འགྲོ་རྒྱུར་སྐུལ་འདེད་ཧུར་ཐག་བཏང་ཡོད་པ་རེད།

    ཟོལ་མེད་ཀྱི་སེམས་པ།

    ལོ་མང་རིང་ཁྲེང་ཀོན་ཆུས་ཨུད་དང་ཆུས་སྲིད་གཞུང་གིས “གཉིས་བཀུར ”ལས་དོན་མཐའ་འཁྱོངས་བྱ་རྒྱུ་དེ་དཔལ་འབྱོར་དང་སྤྱི་ཚོགས་འཕེལ་རྒྱས་གཏོང་བ་དང་དཔུང་སྡེ་འཛུགས་སྐྲུན་བྱེད་པའི་སྤྱིའི་འཆར་འགོད་ནང་བཅུག་པ་དང་ཉིན་རེའི་གྲོས་རིམ་ནང་བཅུག་སྟེ་བཀོད་སྒྲིག་ཞིབ་ཚགས་ཀྱིས་ནོར་སྲིད་ཀྱི་གཏོང་ཆ་ཆེ་རུ་གཏོང་བ་དང་དམག་བཀུར་གྱི་གཟིགས་སྐྱོང་སྲིད་ཇུས་དོན་འཁྱོལ་བྱས་ནས “གཉིས་བཀུར ”མཉམ་སྐྲུན་ལས་དོན་ཇུས་ཤུགས་མཉམ་འདོན་གྱི་སྒོ་ནས་སྤེལ་ཡོད་པ་རེད།

    ཉེ་བའི་ལོ་3རིང་ཁྲེང་ཀོན་ཆུས་ཀྱིས་སྔ་རྗེས་སུ་མ་དངུལ་སྒོར་ཁྲི་3000ལྷག་ཙམ་བཏང་བ་དེ་དག་བཅའ་སྡོད་དཔུང་སྡེ་འཛུགས་སྐྲུན་བྱ་རྒྱུའི་ཐད་སྤྱད་པ་དང་དཔུང་སྡེར་དཔེ་དེབ་ངོ་གྲངས་12500ཞལ་འདེབས་ཕུལ་བ་དང “གཉིས་བཀུར ”ལས་དོན་གྱི་བཞུགས་མོལ་ཚོགས་འདུ་ཐེངས་བཞི་འཚོགས་པ་དང་། ཁྲེང་ཀོན་ཆུས་མི་དམངས་དྲག་ཆས་པུའུ་ལ་མ་དངུལ་སྒོར་ཁྲི་2500ལྷག་ཙམ་མཁོ་འདོན་གྱིས་གཞུང་དོན་སྒྲུབ་སའི་ཁང་པ་དང་དེ་བཞིན་སྦྱོང་བརྡར་རྟེན་གཞིའི་སྒྲིག་བཀོད་འཛུགས་སྐྲུན་བྱེད་པའི་གནད་དོན་ཐག་གཅོད་བྱས་པ། ཁྲེང་ཀོན་ཆུས་མེ་གསོད་མེ་ཟོན་རུ་ཆེན་ལ་མ་དངུལ་སྒོར་ཁྲི་200ལྷག་ཙམ་མཁོ་འདོན་གྱིས་གོ་མཚོན་སྒྲིག་ཆས་དང་ཡོ་བྱད་ཀྱི་གནད་དོན་ཐག་གཅོད་བྱས་ནས་དཔུང་སྡེ་འཛུགས་སྐྲུན་བྱ་རྒྱུར་རོགས་སྐྱོར་ནུས་ལྡན་བྱས་ཡོད་པ་རེད།

    ཉེ་བའི་ལོ་ཤས་རིང་ཁྲེང་ཀོན་ཆུས་ཨུད་དང་ཆུས་སྲིད་གཞུང་གིས་ལོ་ལྟར་རིམ་རྩིས་བརྒྱབ་ན་མ་དངུལ་སྒོར་ཁྲི་170བཏང་སྟེ་ཁྲེང་ཀོན་ཆུས་སུ་བཅའ་སྡོད་ལས་སྒྲུབ་དཔུང་སྡེར་འཚོ་བའི་མཁོ་ཆས་དང་གཞུང་དོན་ཡོ་བྱད་སོགས་ཉོས་ནས་ལས་སྒྲུབ་དཔོན་དམག་གི་འཚོ་བའི་ཁོར་ཡུག་ལེགས་སུ་བཏང་ཡོད་པ་རེད།

    རྔ་ཆེན་ཤང་གཙང་བྲན་གྲོང་ཚོ་ནས་གྲོང་ཁུལ་དུ་སྐྱོད་སའི་འགྲོ་ལམ་ལོ་མང་རིང་ཉམས་གསོ་བྱ་རྒྱུར་ལུས་པ་དང་འབར་འབུར་ཚབས་ཆེན་ཆགས་ཡོད། ཁྲེང་ཀོན་ཆུས་ཀྱིས་འཛུགས་སྐྲུན་མ་དངུལ་སྒོར་ཁྲི་400ལྷག་ཙམ་གྲབས་གསོག་བྱས་ཏེ་ཁྱོན་རིང་ཚད་སྤྱི་ལེ་4.7ཡོད་པའི་འགྲོ་ལམ་གྱི་ལམ་ངོས་ཆུ་འབུད་ལས་གྲྭ་སྒྱུར་བཀོད་བྱས་ནས་མང་ཚོགས་དང་དཔུང་སྡེའི་དཔོན་དམག་ཚོ་འགྲོ་སྐྱོད་དཀའ་བའི་གནད་དོན་ཐག་གཅོད་བྱས་པ་རེད།

    “ཚལ་དཀོན་པ ”དེས་དུས་ཡུན་རིང་པོའི་ནང་ཁྲེང་ཀོན་ཆུས་སུ་བཅའ་སྡོད་བྱེད་མཁན་དཔུང་སྡེ་ཞིག་གི་འཐབ་འཛིང་པ་ཚོར་དཀའ་ངལ་ཆེན་པོ་འཕྲད་ཡོད། གནས་ཚུལ་ཤེས་རྟོགས་བྱུང་རྗེས་ཁྲེང་ཀོན་ཆུས་ཀྱིས་རིན་སྐྱིན་མི་དགོས་པར་ས་ཞིང་མུའུ་25གཏོང་སྤྲོད་བྱས་པའི་ཁར་མ་དངུལ་སྒོར་ཁྲི་30ལྷག་ཙམ་བཏང་སྟེ་སྔོ་ཚལ་དྲོད་ཁང་ཆེ་མོ་4བསྐྲུན་པས་དུས་དེ་ནས་བཟུང་དཔོན་དམག་ཚོར་སྔོ་ཚལ་སོས་པ་ཟ་རྒྱུ་བྱུང་ཡོད་པ་རེད།

    2008ལོ་ནས་བཟུང་ཁྲེང་ཀོན་ཆུས་ཀྱིས་སྐྱེ་ཁུངས་གྲོང་གསེབ་ནས་ཡིན་པའི་འཐབ་འཛིང་པའི་ཁྱིམ་ལ་བྱ་དགའ་སྒོར་5000སྤྲད་པ་དང་2010ལོར་ཁྲེང་ཀོན་ཆུས་ཀྱིས་ཚད་གཞི་དེ་སྒོར་ཁྲི་1བར་སྤར་ཡོད། ཡུལ་དམག་སྦྱོར་བརྡར་གྱི་ཁ་གསབ་དེ་མི་རེར་ཉིན་རེར་སྒོར་30ནས་མི་རེར་ཉིན་རེར་སྒོར་100བར་སྤར་བ་དང་འབྲེལ་ནོར་སྲིད་སྔོན་རྩིས་ནང་བཅུག་པ་རེད།

    ལྷད་མེད་ཀྱི་གཅེས་སེམས།

    ཐལ་སྤུངས་སྒང་སྡེ་ཁུལ་གྱིས་ལས་སྒྲུབ་དཔོན་དམག་ཚོར་རྒྱབ་ཕྱོགས་མཁོ་སྒྲུབ་ལས་དོན་གྱི་འགན་ལེན་ཡག་པོ་བྱས་ཤིང་། ལས་སྒྲུབ་དཔོན་དམག་ཁྲེན་ལིས “ང་ཚོ་འདི་གར་ལས་སྒྲུབ་བྱེད་སྐབས་གྲོང་ལྷན་གྱིས་ཐུགས་ཁུར་དང་རོགས་རམ་ཆེན་པོ་གནང་བྱུང་། ང་ཚོ་ཚོགས་འདུ་འཚོགས་པ་དང་སློབ་སྦྱོང་བྱེད་སྐབས་གྲོང་ལྷན་གྱིས་རིན་སྐྱིན་མི་དགོས་པར་ང་ཚོར་གྲོས་ཚོགས་ཁང་མཁོ་འདོན་བྱེད་པ་དང་རོགས་སྐྱོར་ཚད་མེད་གནང་བ་ལས་མི་འདོད་པའི་སྐད་ཆ་ཚིག་གཅིག་ཀྱང་ཤོད་མྱོང་མེད ”ཅེས་བཤད།

    ཁྲེང་ཀོན་ཆུས་སུ་བཅའ་སྡོད་དཔུང་སྡེའི་དཔོན་དམག་ཚོས་རྟག་ཏུ་སྡེ་ཁུལ་གྱི་འགན་ལེན་ལྔའི་དུད་ཚང་དང་། མ་མཐའི་འཚོ་བའི་འགན་ལེན་དུད་ཚང་། དེ་བཞིན་དཀའ་ངལ་ཡོད་པའི་ཁྱིམ་ཚང་ལ་འབྲས་དང་། གྲོ་ཞིབ། སྣུམ། གྱོན་གོས་བཅས་སྤྲོད་ཀྱི་ཡོད་ལ་ རང་ནུས་གང་ཡོད་བཏོན་ནས་ས་གནས་དེ་གའི་མང་ཚོགས་ལ་བྱ་བ་འགའ་ཞིག་སྒྲུབ་པ་དང་ཁོང་ཚོས་རང་འགུལ་ངང “དམངས་རོགས་ཞབས་ཞུའི་ས་ཚིགས ”བཙུགས་པ་དང་ད་དུང་རྐང་འཁོར་བཟོ་ཤེས་མཁན་ཚོས་རྐང་འཁོར་བཟོ་རོགས་བྱེད་པ་དང་། སྐྲ་བཞར་ཤེས་མཁན་ཚོས་སྐྲ་བཞར་རོགས་བྱེད་པ། འཕྲོད་བསྟེན་པས་མང་ཚོགས་ལ་ནད་གཞི་བལྟ་རོགས་བྱེད་ཀྱི་ཡོད་ཅིང་། གྲོང་མི་ཚོས་དམག་ཆས་གྱོན་མཁན་མཐོང་སྐབས་རང་ཉིད་ཀྱི་སྤུན་མཆེད་མཐོང་བའི་སྣང་བ་ཞིག་ཤར་གྱི་འདུག་ཅེས་གཅིག་རྗེས་གཉིད་མཐུད་ངང་བཤད།

    འགྱུར་མེད་ཀྱི་བརྩེ་དུང་།

    ཁྲེང་ཀོན་ཆུས་མི་དམངས་དྲག་ཆས་པུའུ་དང་ཁྲེང་ཀོན་ཆུས་རྗེ་འབུམ་སྒང་སློབ་ཆུང་གིས་སྔར་ནས་ད་བར་མཉམ་སྐྲུན་གྱི་འབྲེལ་བ་བཟང་པོ་རྒྱུན་འཁྱོངས་བྱས་ཤིང་། དཔོན་དམག་དང་སློབ་གྲྭའི་དགེ་རྒན་ཚོས་ལག་གདང་སྦྲེལ་ནས་སློབ་གྲྭའི་རྒྱལ་སྲུང་སློབ་གསོ་ཁང་དང་ཀུན་སྤྱོད་སློབ་གསོ་ཁང་བསྐྲུན་ཡོད་པ་དང་ད་དུང་ཁྲེང་ཀོན་ཆུས་མི་དམངས་དྲག་ཆས་པུའི་ཁྲེན་ཀྲེན་ཡུང་གིས་ལོ་ལྟར་སྒོར་1000ལྷག་ཙམ་བཏང་ནས་སློབ་གྲྭ་དེ་གའི་ཁྱིམ་ཚང་ལ་དཀའ་ངལ་ཡོད་པའི་སློབ་མ་གཉིས་སློབ་གྲྭར་གཏོང་རོགས་བྱས་ཡོད་པ་རེད།

    ཁྲེང་ཀོན་ཆུས་ཀྱི་སློབ་ཆུང་26ཚང་མར་རྒྱལ་སྲུང་ཤེས་བྱ་དང་། དམག་སྦྱོང་། མི་རིགས་མཐུན་སྒྲིལ། དེ་བཞིན་ལོ་རྒྱུས་སྲོལ་རྒྱུན་བཅས་ཀྱི་སློབ་ཚན་འཚོགས་ཀྱི་ཡོད་པ་མ་ཟད་ཆེད་ལས་སློབ་གསོ་བ་བཀོད་སྒྲིག་ཀྱང་བྱས་ཡོད། 2004ལོ་ཤར་ཚུན་དཔུང་སྡེ་དེས་སློབ་གྲྭར་ཁྱོན་སློབ་དེབ་8450དང་རིག་རྩལ་མཁོ་ཆས་10000སྤྲད་པ་དང་སློབ་ཕྱིའི་ཟུར་ཁྲིད་པ་521བཏང་ཡོད། “གཞོན་ནུའི་ཡུལ་དམག་ཁྱིམ་གཞིས ”དེ་བེད་སྤྱོད་གང་ལེགས་བྱས་ནས་འདེབས་འཛུགས་དང་། གསོ་སྤེལ། དེ་བཞིན་ཁྲིམས་ལུགས་བློ་འདྲི་སོགས་ཀྱི་གསོ་སྦྱོང་འཛིན་གྲྭ་གཉེར་ནས་ས་གནས་དེ་གའི་འདེབས་འཛུགས་དང་། གསོ་སྤེལ། ཤིང་འཛུགས་མཁས་ཅན་བཅས་མི་300ལྷག་ཙམ་གསོ་སྐྱོང་བྱས་ཡོད་པ་རེད།

    2010ལོའི་དབྱར་དུས་སུ་དོག་སྡེ་ཤང་ལ་གློ་བུར་དུ་འདམ་རྡོའི་ཆུ་རུད་ཀྱི་རང་བྱུང་གནོད་འཚེ་ཐོན་ནས་མི་དམངས་མང་ཚོགས་ཀྱི་ཚེ་སྲོག་དང་རྒྱུ་ནོར་ལ་གྱོང་གུན་ཚབས་ཆེན་ཕོག་པའི་གནས་ཚུལ་ཤེས་རྟོགས་བྱུང་རྗེས་ཁྲེང་ཀོན་ཆུས་ཀྱིས་འཕྲལ་མར་ཡུལ་དམག་དང་དཔོན་དམག་150ལྷག་ཙམ་སྒྲིག་འཛུགས་བྱས་ཏེ་ཉེན་སེལ་ནང་ཞུགས་ནས་བྱེ་རྡོ་འགྱངས་པ་དང་། ཆུ་རགས་བརྟན་དུ་གཏོང་བ། ཆུས་འཁྱེར་བའི་དངོས་པོ་གཙང་སེལ་བྱེད་པ། མང་ཚོགས་ཁ་འགྲེམས་པ། དངོས་ཟོག་མྱུར་སྐྱོབ་བཅས་བྱས་ཏེ་མི་དམངས་མང་ཚོགས་ཀྱི་ཚེ་སྲོག་དང་རྒྱུ་ནོར་བདེ་འཇགས་སྲུང་སྐྱོང་ནུས་ལྡན་བྱས་ཡོད་པ་རེད། ཁྲེང་ཀོན་ཆུས་དེ་ཉིད “རྒྱལ་ཡོངས་ཀྱི་གཉིས་བཀུར་དཔེ་སྟོན་རྫོང (ཆུས )”ལ་སྔ་རྗེས་སུ་ཐེངས་མང་བདམས་པ་དང་རང་སྐྱོང་ལྗོངས་ཀྱིས “གཉིས་བཀུར་དཔེ་སྟོན་རྫོང (ཆུས )”གི་མཚན་སྙན་སྤྲད་པ་རེད། གཟི་བརྗིད་དེའི་རྒྱབ་ཏུ་ཏང་སེམས་དང་། དམག་སེམས། དམངས་སེམས་བཅས་གོང་བུ་གཅིག་ཏུ་འགྲིལ་ཡོད་པ་མ་ཟད་དམག་དམངས་དབར་གྱི་ཉ་ཆུ་ལྟ་བུའི་བརྩེ་དུང་ཡང་གཅིག་ཏུ་སྡུད་ཡོད་པ་རེད།