ཉིང་ཁྲི་རྫོང་བརྒྱད་གཅིག་གྲོང་རྡལ་བྲག་ཕྱིབས་གྲོང་ཚོའི་བགྲེས་སོང་དབང་རྒྱལ་འདི་ལོ་ལོ་80ལ་སླེབས་པ་དང་བོད་ཞི་བས་བཅིངས་འགྲོལ་མ་བཏང་གོང་ཞིང་བྲན་ཡིན་ཞིང་། ཞི་བས་བཅིངས་འགྲོལ་བཏང་རྗེས་གྲོང་ཚོའི་ཏང་ཀྲི་པུའི་ཧྲུའུ་ཅི་བྱེད་མྱོང་བའི་བགྲེས་སོང་དེས་ལོ་དྲུག་ཅུ་ཚུན་གྱི་རང་ཁྱིམ་སྡོད་ཁང་གི་འགྱུར་ལྡོག་སྐོར་གླེང་སྐབས་སྐད་ཆ་རྫོགས་རྒྱུ་མེད་པ་ཞིག་ཡོད།

    བགྲེས་སོང་དབང་རྒྱལ་གྱིས “སྤྱི་ཚོགས་ཪྙིང་པའི་དུས་སུ་བྲན་གཡོག་ལ་སྡོད་ཁང་ཟེར་བ་རྩ་བ་ནས་མེད་པ་དང་ལ་ལར་ཁང་ཆུང་ཐབས་ཆག་རེ་ལས་མེད་པ་དེའི་ཐོག་དཔངས་དམའ་པོ་ཡིན་པས་སྒུར་སྒུར་བྱས་ནས་སྐྱོད་དགོས་ཀྱི་ཡོད་པ་དང་། ཕྱུགས་འཚོ་མཁན་གྱི་སྦྲ་གུར་ཅུང་ཆ་རྐྱེན་ལེགས་པའི་གྲས་སུ་བརྩིས་རུང་ཆར་པ་ཆེན་པོ་འབབ་དུས་སྦྲ་གུར་ནང་ཆུ་འཛུལ་ཡོང་གི་ཡོད། སྐབས་དེ་དུས་ང་ལ་ཤིང་ཁང་གཅིག་ཡོད་པ་དེའི་ཐོག་དཔངས་དམའ་བའི་ཁར་བཞའ་ཚན་ཆེ་བ་དང་མི་ཕྱུགས་མཉམ་དུ་སྡོད་དགོས་པས་དཀའ་སྡུག་ཅི་འདྲ་ཡོད་མེད་ཁྱོད་ཚོས་ཤེས་གསལ་རེད ”ཅེས་བཤད།

    “བོད་ཞི་བས་བཅིངས་འགྲོལ་བཏང་རྗེས་ང་ཚོའི་སྡོད་ཁང་གི་ཆ་རྐྱེན་ལེགས་སུ་ཆེན་པོ་ཕྱིན་སོང་། གུང་ཁྲན་ཏང་གིས་ང་ཚོའི་སྣེ་ཁྲིད་དེ་ས་ཞིང་བགོ་བཤའ་བརྒྱབ་པ་མ་ཟད་ད་དུང་ང་ཚོར་སྡོད་ཁང་སྐྲུན་རོགས་བྱས་ནས་མི་ཕྱུགས་ལོགས་དབྱེ་བྱས་ཡོད་པས་ལུས་ཁམས་བདེ་རུ་དང་གཙང་སྦྲ་དོད་དུ་སོང་ཡོད ”ཅེས་བགྲེས་སོང་དབང་རྒྱལ་གྱིས་བཤད་པ་དང་། ཁོང་གིས་ད་དུང “དུས་རབས་གོང་མའི་ལོ་རབས་བརྒྱད་ཅུ་པའི་དུས་མཇུག་ནས་བཟུང་ང་ཚོའི་གྲོང་ཚོའི་ནང་གི་གྲོང་མི་མང་པོ་ཞིག་ཕྱིར་ལས་ཀ་བྱེད་པར་བསྐྱོད་པ་དང་ཡོང་འབབ་བྱུང་རྗེས་འགའ་རེས་རླངས་འཁོར་ཉོས་ནས་སྐྱེལ་འདྲེན་དང་ཟོག་འདྲེན་ལས་ལ་གཞོལ་བ་དང་ལ་ལས་སྨན་རྩྭ་ཚོང་གཉེར་བྱེད་པ་སོགས་དངུལ་མང་པོ་གསོག་ཐུབ་དུས་ཚང་མས་རང་གི་སྡོད་ཁང་གི་ཆ་རྐྱེན་ལེགས་སུ་བཏང་ཡོད་པ་སྟེ་ཐོག་སོ་གཅིག་དང་ཐོག་སོ་ཉིས་ལྡན་གྱི་སྡོད་ཁང་མང་པོ་བསྐྲུན་ཡོད་པ་དང་སྡོད་ཁང་མཛེས་བཟོ་བྱ་རྒྱུར་ཡང་དང་དོད་བྱེད་ཀྱི་ཡིད། 1995ལོར་ངས་ཀྱང་ཁང་མིག་བཞི་ལྔ་ཡོད་པའི་ཁང་པ་ཐོག་གཅིག་མ་ཅིག་བསྐྲུན་པ་དེ་ད་ཆ་རང་གི་བུས་བཤིག་ནས་སྡོད་ཁང་གསར་པ་བསྐྲུན་པ་དང་ཁྱེད་ཀྱིས་མཐོང་བའི་ཐོག་སོ་ཉིས་ལྡན་གྱི་སྡོད་ཁང་ནི་བུས་བསྐྲུན་པ་ཞིག་རེད ”ཅེས་སྐད་ཆའི་རྒྱུན་མཐུད་དེ་བརྗོད་བྱུང་།

    བགྲེས་སོང་དབང་རྒྱལ་ད་ལྟ་སྡོད་པའི་ཐོག་སོ་ཉིས་ལྡན་གྱི་སྡོད་ཁང་དེར་རྒྱ་ཁྱོན་སྨི་ངོས་སྙོམས་གྲུ་བཞི་མ་400ལྷག་ཙམ་ཡོད་པ་དང་ཁང་པའི་ནང་པང་གཅལ་བཏིང་བས་དགུན་ཁ་དྲོ་ལ་དབྱར་ཁ་བསིལ་བ་དང་ཁང་པའི་ནང་འཁྱགས་སྒམ་དང་། ཚོན་ཁྲ་ཅན་གྱི་བཪྙན་འཕྲིན། གློག་ཀླད། གོས་འཁྲུའི་འཕྲུལ་འཁོར་སོགས་དེང་རབས་ཀྱི་ཁྱིམ་སྤྱོད་གློག་ཆས་ཚང་ཡོད་པ་མ་ཟད། ད་དུང་ཐབ་ཚང་བསྐྲུན་ཡོད་པ་དང་། ས་ངོས་སུ་དཀར་པང་བཏིང་བ་དང་གྱང་ངོས་སུ་དཀར་པང་སྦྱར་ཡོད་པའི་ཁར་གཤེར་རླངས་ཐབ་ཆས་དང་ཐབ་དུད་འབུད་ཆས་སོགས་ཆ་ལག་ཆ་ཚང་པོ་ཡོད་པ་དང་། སྒོ་རའི་ནང་ཁམས་བུ་དང་། ལི་ཙི། སྟག་མ་མེ་ཏོག སོགས་བཏབ་ཡོད། བགྲེས་སོང་དབང་རྒྱལ་གྱི་བུ་རྡོར་ཕུར་གྱིས “ད་ཆ་སྡོད་སའི་ཁང་པ་དེ་2006ལོར་བསྐྲུན་པ་དང་དེར་དངུལ་སྒོར་ཁྲི་30ལྷག་ཙམ་བཏང་བ་དང་རྒྱལ་ཁབ་ཀྱིས་ཁ་གསབ་སྒོར་ཁྲི་1ལྷག་ཙམ་སྤྲད་བྱུང ”ཞེས་གསར་འགོད་པར་བརྗོད་པ་དང་། རྡོར་ཕུར་ནི་གྲོང་ཚོའི་ནང་འཇོན་ཐང་ཅན་ཞིག་ཡིན་པ་སྟེ་2004ལོར་མ་དངུལ་སྒོར་ཁྲི་50ལྷག་ཙམ་བཏོན་ནས་གྲོང་ཚོའི་ནང་བོད་ཕག་གསོ་ཚགས་བྱས་པ་དང་ཐོག་མའི་དུས་སུ་ཕག་པ་མགོ་གྲངས་100ལྷག་ཙམ་གསོ་ཚགས་བྱས་པ་དང་རྗེས་སུ་གཞི་ཁྱོན་རྒྱུན་ཆད་མེད་པར་ཆེ་རུ་བཏང་ནས་ད་ཆ་བོད་ཕག་མགོ་གྲངས་500ལྷག་ཙམ་བར་མང་དུ་སོང་ཡོད། རྡོར་ཕུར་གྱིས་ངས་གྲོང་ཚོའི་ནང་གི་དུད་ཚང་བཅུ་ཕྲག་ཁ་ཤས་དང་མཉམ་འབྲེལ་ཐོག་བོད་ཕག་གསོ་ཚགས་བྱས་ནས་བོད་ཕག་གསོ་ཚགས་མཉམ་ལས་ཁང་འཛུགས་རྒྱུའི་བསམ་བློ་ཡོད་ཅེས་བརྗོད་པ་དང་དེར་བགྲེས་སོང་དབང་རྒྱལ་དགའ་ཚོར་ཆེན་པོ་བྱུང་བ་དང་བགྲེས་སོང་དེ་བས་དགའ་ཚོར་ཆེ་བ་ཞིག་ནི་རང་གི་བུ་རྡོར་ཕུར་ན་ནིང་གཟི་བརྗིད་ལྡན་པའི་ངང་ཀྲུང་གོ་གུང་ཁྲན་ཏང་ནང་ཞུགས་པ་དེ་ཡིན་ཞིང་། བགྲེས་སོང་གིས “བུ་དངོས་གནས་འཇོན་པོ་ཡོད། རང་ཉིད་ཕྱུག་པོ་ཆགས་པ་བྱེད་པ་མ་ཟད་ད་དུང་མི་གཞན་ཕྱུག་འགྱུར་ཡོང་རོགས་བྱེད་ཀྱི་ཡོད་་པས་ང་དངོས་ནས་དགའ་པོ་འདུག ”ཅེས་བཤད།

    “སྡོད་ཁང་ཆ་རྐྱེན་ལེགས་སུ་ཕྱིན་པ་དང་ཆབས་ཅིག་འགྲོ་ལམ་ཡང་རྒྱ་ཆེར་ཕྱིན་སོང ”ཞེས་བགྲེས་སོང་དབང་རྒྱལ་གྱིས་བརྗོད་བཞིན་ཁོང་གིས “ཁྱེད་ཚོ་ལྟོས་དང་། གྲོང་ཚོའི་ནང་གི་འགྲོ་ལམ་ད་ཆ་ཚང་མ་ཨར་འདམ་ལམ་རེད་མི་འདུག་གམ། དེ་དག་ཚང་མ་ནི་གྲོང་ཚོའི་ཏང་ཀྲི་པུས་གྲོང་མི་ཚོའི་སྣེ་ཁྲིད་དེ་བསྐྲུན་པ་ཞིག་རེད ”ཅེས་བརྗོད་མཚམས་འདིར་སླེབས་སྐབས་བགྲེས་སོང་དབང་རྒྱལ་གྱིས “གུང་ཁྲན་ཏང་ལ་ཐུགས་རྗེ་ཆེ་ཞུ་རྒྱུ་ཡིན། ཏང་གི་སྲིད་ཇུས་བཟང་པོ་དང་ཏང་གི་ཡང་དག་པའི་འགོ་ཁྲིད་མེད་ཚེ་ང་ཚོས་བདེ་སྐྱིད་ལྡན་པའི་འཚོ་བ་དེ་འདྲ་སྐྱེལ་ཐུབ་བམ ”ཞེས་སེམས་འགུལ་ཐེབས་པའི་ངང་བཤད་བྱུང་།