ཟླ་7ཚེས་21ཉིན་ཀྲུང་དབྱང་སྐུ་ཚབ་ཚོགས་པའི་ཚོགས་གཙོ་གཞོན་པ་དང་། ཀྲུང་དབྱང་སྐུ་ཚབ་ཚོགས་པའི་ལྷ་ས་ཡན་ལག་ཚོགས་པའི་ཚོགས་གཙོ། རྒྱལ་ཡོངས་མི་དམངས་འཐུས་ཚོགས་སྐབས་བཅུ་པའི་རྒྱུན་ལས་ཨུ་ཡོན་ལྷན་ཁང་གི་ཨུ་ཡོན་ཀྲང་གཞོན་པ་བཅས་ཡིན་པའི་རག་སྡིས་ཀྱིས་ཀྲུང་དབྱང་སྐུ་ཚབ་ཚོགས་པའི་ལྷ་ས་ཡན་ལག་ཚོགས་པའི་སྣེ་ཁྲིད་དེ་ལྷ་ས་གྲོང་ཁྱེར་ཁྲེང་ཀོན་ཆུས་རྔ་ཆེན་ཤང་དར་དམར་གྲོང་ཚོར་ཕེབས་ནས་གཞི་རིམ་ཏང་འཛུགས་སྐྱོང་དང་སྡེ་ཁུལ་ལས་དོན་ལ་གཟིགས་ཞིབ་གནང་བ་དང་འབྲེལ་གྲོང་ཚོ་དེའི་སློབ་ཆེན་ཐོན་པའི་གྲོང་དཔོན་དང་ཁྲེང་ཀོན་ཆུས་ཀྱི་ཆིང་ཧྭ་སློབ་ཆེན་ནས་འདེམས་གཏོང་བྱས་པའི་སློབ་མ་གསུམ་དང་བཞུགས་མོལ་ཡང་གནང་བ་རེད། ཉིན་ཤས་བསྟུད་མར་དར་དམར་གྲོང་ཚོའི་གྲོང་མི་དང་སློབ་ཆེན་སློབ་མ་རྣམས་སྤྲོ་བས་ཁེངས་ཤིང་། ཁོང་ཚོས་རང་ཉིད་ཀྱི་ལས་གནས་ཐོག་འབད་འཐབ་ཧུར་ཐག་བྱས་ཏེ་ལྷ་སའི་དཔལ་འབྱོར་དང་སྤྱི་ཚོགས་མཆོང་སྐྱོད་ལྟ་བུའི་འཕེལ་རྒྱས་ཆེད་ལེགས་སྐྱེས་འབུལ་གྱི་ཡིན་ཞེས་བཤད་པ་རེད།

    སློབ་ཆེན་ཐོན་པའི་དར་དམར་གྲོང་ཚོའི་ཏང་ཀྲི་པུའི་ཧྲུའུ་ཅིའི་ལས་རོགས་པད་མ་རྡོ་རྗེས་ད་ཕན་ལོ་ཤས་རིང་དར་དམར་གྲོང་ཚོའི་ཏང་ཀྲི་པུའུ་དང་གྲོང་ཚོ་ཨུ་ཡོན་ལྷན་ཁང་གིས་བསམ་བློར་འགྱུར་ལྡོག་ཏན་ཏིག་གཏོང་བ་དང་གོ་སྐབས་དམ་འཛིན་བྱས་ཏེ་ལོ་དྲུག་གོང་མི་རེའི་ཆ་སྙོམས་ཡོང་འབབ་ཁེ་གཙང་སྒོར་1000ཡང་མ་ཟིན་པའི་དབུལ་པོའི་གྲོང་ཚོ་དེ་ད་ཆ་མི་རེའི་ཆ་སྙོམས་ཡོང་འབབ་སྒོར་8755ཟིན་པ་དང་། མི་འཚོ་སྡོད་ཀྱི་ཁོར་ཡུག་ལེགས་པ། འཚོ་བའི་ཆ་རྐྱེན་འཐུས་སྒོ་ཚང་བ་བཅས་ཀྱི་ཕྱུག་པོའི་གྲོང་ཚོ་ཞིག་འཛུགས་སྐྲུན་བྱས་ཡོད་ཅེས་བཤད་པ་རེད།

    ཆིང་ཧྭ་སློབ་ཆེན་ནས་འདེམས་གཏོང་བྱས་པའི་སློབ་མ་ཁྲེང་ཀོན་ཆུས་ཀུན་བདེ་གླིང་ཁྲོམ་གཞུང་དོན་གཅོད་ཁྲུའུ་ཏང་ཨུད་ཀྱི་ཧྲུའུ་ཅི་ཀུང་དབྱི་ཕུང་གིས་ཀྲུང་དབྱང་སྐུ་ཚབ་ཚོགས་པ་ཕེབས་པས་ང་ཚོ་གཞི་རིམ་ལས་བྱེད་པ་དང་མང་ཚོགས་ཀྱི་ཡིད་ཆེས་དང་སྟོབས་ཤུགས་ཆེ་རུ་ཕྱིན་ཞིང་། ང་ཚོས་ངེས་པར་དུ་རང་ཉིད་ཀྱིས་ཁོང་དུ་ཆུད་པའི་བསམ་བློ་གསར་པ་དང་། ཤེས་བྱ་གསར་པ། ལྟ་བ་གསར་པ་བཅས་གཞི་རིམ་གྱི་དོན་དངོས་ལས་དོན་ནང་སྤྱད་དེ་སྡེ་ཁུལ་ཡུལ་མི་མང་ཚོགས་ལ་སྔར་བས་སློབ་སྦྱོང་བྱེད་པ་དང་། སྡེ་ཁུལ་མང་དམངས་ཀྱི་གནས་ཚུལ་ཤེས་རྟོགས་བྱེད་ཤུགས་ཆེ་རུ་གཏོང་བ། ཐབས་བརྒྱ་ཇུས་སྟོང་ངང་མང་ཚོགས་ཀྱི་ཡོང་འབབ་འཕར་རྒྱུར་རོགས་རམ་བཅས་བྱས་ཏེ་མི་སེར་གྱི་འཚོ་བ་ཉིན་བཞིན་ལེགས་སུ་འགྲོ་ཐུབ་པ་བྱེད་ཀྱི་ཡིན་ཞེས་བཤད་པ་རེད།