དབྱར་ཟླ་དྲུག་པའི་ཉིན་ཞིག་ལ་ཉི་འོད་རབ་ཏུ་བཀྲ་བའི་དཔའ་ཤོད་རྫོང་གི་ཁྲོམ་གཞུང་དུ་བོད་རིགས་བུ་མོ་ཚེ་སྐྱིད་ཀྱིས་མཐོང་མྱོང་མེད་པའི་ཨ་ཁུ་དང་ཨ་ཞང་ཁྱུ་ཞིག་བསུས་ཤིང་། ཉིན་དེར་ཁྲུང་ཆིང་གྲོང་ཁྱེར་གྱི་བོད་སྐྱོར་ལས་བྱེད་པ་ཁག་དྲུག་པས་ཆབ་མདོ་གྲོང་རྡལ་ནས་ཆེད་མངགས་དཔའ་ཤོད་རྫོང་གྲོང་དུ་ཚེ་སྐྱིད་ལ་ལྟ་བར་ཡོང་།

    ད་ལོ་ཚེ་སྐྱིད་ལོ་ལྔར་སླེབས་པ་དང་དཔའ་ཤོད་རྫོང་བུ་བཅོལ་ཁང་དུ་འགྲོ་གི་ཡོད། ཚེ་སྐྱིད་སྐྱེས་པའི་ཉིན་དེར་ཨ་མ་སྟབས་མི་ལེགས་པར་གྲོངས། བོད་སྐྱོར་ལས་བྱེད་པ་སླེབས་པས་ཚེ་སྐྱིད་ལ་དགའ་སྤྲོ་དཔག་མེད་བྱུང་ཞིང་། ཁོང་ཚོས་རོགས་དངུལ་སྒོར་2000ཁྱེར་ཡོང་བ་མ་ཟད། ད་དུང་ཁོང་ལ་དཔེ་ཁུག་དང་ཡིག་ཆས་སྣ་ཚོགས་འཁྱེར་ཡོད།

    ཉིན་དེར་དཔའ་ཤོད་རྫོང་པད་མ་གྲོང་རྡལ་གནས་རབས་གྲོང་ཚོའི་འཇམ་དབྱངས་དོན་རྒྱལ་དང་འཇམ་དབྱངས་ཚེ་རྒྱལ་བུ་སྤུན་གཉིས་ཀྱིས་ཀྱང་ཁྲུང་ཆིང་ནས་ཡིན་པའི་བོད་སྐྱོར་ཨ་ཁུ་རྣམས་བསུས།

    འཇམ་དབྱངས་དོན་རྒྱལ་དང་འཇམ་དབྱངས་ཚེ་རྒྱལ་བུ་སྤུན་གཉིས་ཀྱི་ཕ་མ་གྲོངས་ནས་ཨ་ནེ་དང་མཉམ་དུ་འཚོ་བ་སྐྱེལ་གྱི་ཡོད། ཉིན་དེར་ཁྲུང་ཆིང་གི་བོད་སྐྱོར་ལས་བྱེད་པས་ཁོང་གཉིས་ལ་འཚམས་འདྲིའི་དངུལ་སྒོར་4000དང་། དཔེ་ཁུག ཡིག་ཆས་སོགས་སློབ་སྦྱོང་སྤྱོད་ཆས་སྣ་ཚོགས་སྤྲད་པ་དང་འབྲེལ་བུ་སྤུན་གཉིས་དང་མཉམ་དུ་དྲན་རྟེན་པར་ཡང་བརྒྱབ་ནས་ཁོང་གཉིས་ལ་སློབ་སྦྱོང་ཡག་པོ་བྱས་ཏེ་ཕ་ཡུལ་དང་བོད་གསར་འཛུགས་སྐྲུན་བྱེད་མཁན་ཤེས་ལྡན་པར་འགྱུར་བ་བྱེད་དགོས་པའི་སྐུལ་མ་བཏང་།

    ཁྲུང་ཆིང་གྲོང་ཁྱེར་གྱི་བོད་སྐྱོར་ལས་བྱེད་པ་ཁག་དྲུག་པའི་རུ་སྣེ་ཁྲིད་མཁན་ཆབ་མདོ་ས་ཁུལ་སྲིད་འཛིན་ཀུང་ཧྲུའུ་ཡི་ཀྲོན་ཡོན་གཞོན་པ་དབྱང་ཧྲུའུ་ཧའེ་ཡིས་འཇམ་དབྱངས་དོན་རྒྱལ་དང་འཇམ་དབྱངས་ཚེ་རྒྱལ་བུ་སྤུན་གཉིས་ཀྱི་ལག་ནས་འཇུས་ཏེ “ལོ་ལྟར་ང་ཚོས་ཁྱེད་གཉིས་ལ་ལྟ་བར་ཡོང་རྒྱུ་དང་ཁྱེད་གཉིས་ཀྱི་སློབ་སྦྱོང་དང་འཚར་ལོངས་ལ་སེམས་ཁུར་བྱེད་ཀྱི་ཡིན ”ཞེས་གསུངས་པས་དཔེ་ཁུག་གསར་པ་འཁུར་བའི་གཅེན་པོ་འཇམ་དབྱངས་དོན་རྒྱལ་གྱིས་མིག་ཞག་འཁོར་བཞིན་དུ “སེམས་བཟང་ཅན་གྱི་ཨ་ཁུ་ཚོར་ཐུགས་རྗེ་ཆེ་ཞུ་རྒྱུ་ཡིན ”ཞེས་བཤད། ན་ནིང་ལོ་མཇུག་ཏུ་ཁྲུང་ཆིང་གྲོང་ཁྱེར་གྱི་བོད་སྐྱོར་ལས་བྱེད་པ་33གྱིས་ཐུན་མོང་ཐོག་ཞལ་འདེབས་སྒོར་ཁྲི་20བརྒྱབ་ནས “ཁྲུང་ཆིང་གི་བོད་སྐྱོར་ལས་བྱེད་པའི་སློབ་རོགས་ཐེབས་རྩ ”བཙུགས་ཤིང་ཚེ་སྐྱིད་དང་། འཇམ་དབྱངས་དོན་རྒྱལ། འཇམ་དབྱངས་ཚེ་རྒྱལ་བཅས་ནི “ཁྲུང་ཆིང་གི་བོད་སྐྱོར་ལས་བྱེད་པའི་སློབ་རོགས་ཐེབས་རྩའི ”ཕན་པ་ཐོབ་མཁན་གཞན་ཞིག་རེད།