“ཁྱེད་ཚོས་རྒན་རྒོན་གྱི་སྤྱི་སྤྱོད་རླངས་འཁོར་གཱ་ཡི་འགྲོ་ལུགས་གཉེར་རོགས་གནང་བས་ང་ཚོ་རང་ཉིད་སྤྱི་སྤྱོད་རླངས་འཁོར་ཀུང་སིར་འགྲོ་མི་དགོས་པའི་སྟབས་བདེ་སྤྲད་པར་ཐུགས་རྗེ་ཆེ་ཞུ་རྒྱུ་ཡིན ”ཞེས་པ་དེ་ནི་ལྷ་ས་གྲོང་ཁྱེར་ཁྲེང་ཀོན་ཆུས་ར་མོ་ཆེ་སྡེ་ཁུལ་དུ་ལས་དོན་ཚོགས་ཆུང་གིས་སྡེ་ཁུལ་དེའི་རྒན་རྒོན་ཚོར་གཟིགས་སྐྱོང་ལག་ཁྱེར་དང་བདལ་གླ་མི་དགོས་པའི་སྤྱི་སྤྱོད་རླངས་འཁོར་གཱ་གནང་སྐབས་རྒན་རྒོན་ཚོས་བརྗོད་པ་ཞིག་རེད།
ཤེས་རྟོགས་བྱུང་བར་གཞིགས་ན། བོད་རང་སྐྱོང་ལྗོངས་ཀྱི་རྒན་རྒོན་གྱི་གཟིགས་སྐྱོང་ལག་ཁྱེར་དང་ལྷ་ས་གྲོང་ཁྱེར་གྱི་རྒན་རྒོན་བདལ་གླ་མི་དགོས་པར་སྤྱི་སྤྱོད་རླངས་འཁོར་ནང་སྡོད་རྒྱུ་དེ་ནི་ཏང་ཨུད་དང་སྲིད་གཞུང་གི་དམངས་ཕན་སྲིད་ཇུས་ཤིག་ཡིན་པས་དམངས་སེམས་ལ་ཟུག་ཡོད་རུང་རྒན་རྒོན་ཁག་གཅིག་གིས་ལག་ཁྱེར་དེ་ཇི་ལྟར་བྱས་ནས་གཉེར་དགོས་མིན་ཤེས་ཀྱི་མེད་པར་བརྟེན་ཁོང་ཚོའི་རྒན་རྒོན་གྱི་གཟིགས་སྐྱོང་ལག་ཁྱེར་དང་སྤྱི་སྤྱོད་རླངས་འཁོར་གཱ་ཡི་འགྲོ་ལུགས་གཉེར་ཐུབ་མེད་པ་རེད། གཞི་རིམ་འཛུགས་སྐྱོང་ལ་ཤུགས་སྣོན་རྒྱག་པའི་ལོའི་བྱེད་སྒོ་སྤེལ་རིང་ར་མོ་ཆེར་བཅའ་སྡོད་ལྷ་ས་གྲོང་ཁྱེར་ཁྲེང་ཀོན་ཆུས་ལས་དོན་ཚོགས་ཆུང་གིས་གནས་ཚུལ་དེར་དམིགས་ནས་སྡེ་ཁུལ་རྒན་རྒོན་གྱི་གཟིགས་སྐྱོང་ལག་ཁྱེར་དང་བདལ་གླ་མི་དགོས་པའི་སྤྱི་སྤྱོད་རླངས་ཁོར་གཱ་གཉེར་རྒྱུའི་ཆ་རྐྱེན་འཛོམས་པའི་རྒན་རྒོན་ཚོའི་ཆ་འཕྲིན་བསྡུ་རུབ་བྱས་རྗེས་འབྲེལ་ཡོད་ཚན་པ་དང་སྡེ་ཚན་དུ་བསྐྱོད་དེ་གཅིག་སྡུད་ཐོག་གཉེར་ཐོག་སྡེ་ཁུལ་མང་ཚོགས་ལ་ཕན་པ་དང་སྟབས་བདེ་སྤྲད་པ་རེད། ར་མོ་ཆེར་བཅའ་སྡོད་ལྷ་ས་གྲོང་ཁྱེར་ཁྲེང་ཀོན་ཆུས་ལས་དོན་ཚོགས་ཆུང་གི་ཙུའུ་ཀྲང་སྤེན་པ་ཚེ་རིང་གིས “ད་རེས་ང་ཚོས་རྒན་རྒོན་86ལ་ལྷ་ས་གྲོང་ཁྱེར་དམངས་སྲིད་ཅུས་ནས་བོད་རང་སྐྱོང་ལྗོངས་ཀྱི་རྒན་རྒོན་གྱི་གཟིགས་སྐྱོང་ལག་ཁྱེར་གཉེར་བ་དང་སྡེ་ཁུལ་གྱི་ལོ་ན་དྲུག་ཅུ་ཡན་གྱི་རྒན་རྒོན་33 ལ་ལྷ་ས་གྲོང་ཁྱེར་སྤྱི་སྤྱོད་རླངས་འཁོར་ཀུང་སི་ནས་བདལ་གླ་མི་དགོས་པའི་སྤྱི་སྤྱོད་རླངས་འཁོར་གཱ་གཉེར་རོགས་བྱས་ཡོད ”ཅེས་བཤད་པ་རེད།