ཉེ་ཆར་སྤྱི་ཁྱབ་ཧྲུའུ་ཅི་ཞིས་ཅིན་ཕིང་གིས་རང་ལྗོངས་ཀྱི་ཡོམ་འགོག་གེགས་སེལ་ལས་དོན་ལ་སླར་ཡང་མཛུབ་སྟོན་གལ་ཆེན་གནང་སྟེ་ཡང་འབད་བསྐྱར་འབད་ཀྱིས་ཉེན་གྱར་མི་སྣ་མུ་མཐུད་འཚོལ་སྐྱོབ་བྱ་རྒྱུར་དམ་འཛིན་དང་ནུས་ཤུགས་ཡོད་རྒུས་རྨས་མ་སྐྱོབ་བཅོས་བྱེད་དགོས་ཞེས་ནན་བཤད་གནང་བ་དེ་ཐོག་ནས་བློ་མཐུན་ཞིས་ཅིན་ཕིང་གིས་སྤྱི་ཁྱབ་ཧྲུའུ་ཅི་གནང་བའི་ཏང་ཀྲུང་དབྱང་དང་གེགས་བར་ཁུལ་གྱི་མི་དམངས་དབུགས་ལམ་གཅིག་གྱུར་དང་། སྐྱིད་སྡུག་མཉམ་མྱོང་། གཅིག་སེམས་གཅིག་སྦྲེལ་བཅས་བྱུང་བ་དང་། ཏང་ཀྲུང་དབྱང་གིས་དམངས་རྩ་བར་འཛིན་པ་དང་མི་རྩ་བར་འཛིན་པའི་སྲིད་སྐྱོང་འདུ་ཤེས་གང་ལེགས་མངོན་ནས་ཡོམ་འགོག་གེགས་སེལ་དང་། བར་བརྒལ་བཀོད་སྒྲིག གནོད་འཚེ་ཕོག་རྗེས་ཀྱི་བསྐྱར་སྐྲུན་བཅས་ཀྱི་ལས་དོན་མུ་མཐུད་ལེགས་པར་བསྒྲུབ་རྒྱུར་ཁ་ཕྱོགས་བསྟན་པ་དང་ཚན་རིག་གི་གཞི་འཛིན་ས་མཁོ་འདོན་བྱས་ཡོད། ང་ཚོས་སྤྱི་ཁྱབ་ཧྲུའུ་ཅི་ཞིས་ཅིན་ཕིང་གི་མཛུབ་སྟོན་གལ་ཆེ་སྒུལ་ཤུགས་སུ་བྱས་ཏེ་ཡང་འབད་བསྐྱར་འབད་དང་ནུས་ཤུགས་ཡོད་རྒུས་ཡོམ་འགོག་གེགས་སེལ་གྱི་ལས་དོན་ཁག་ཏན་ཏན་ཏིག་ཏིག་ངང་ལེགས་པར་བསྒྲུབས་ཏེ་ཡོམ་འགོག་གེགས་སེལ་གྱི་དམག་འཐབ་ལ་རྒྱལ་ཁ་ལེན་ཐུབ་པ་བྱེད་དགོས།
“ཉེན་གྱར་མི་སྣ་འཚོལ་སྐྱོབ་དང་ནུས་ཤུགས་ཡོད་རྒུས་རྨས་མ་སྐྱོབ་བཅོས་བྱེད་དགོས”ཞེས་པ་དེ་ནི་ཏང་ཀྲུང་དབྱང་གི་བླང་བྱ་གསལ་པོ་དང་། མི་རྩ་བར་འཛིན་པ་དང་དམངས་ཆེད་སྲིད་སྐྱོང་བའི་རང་རེའི་ཏང་གི་སྲིད་སྐྱོང་འདུ་ཤེས་ཀྱི་འབྲས་བུ་ལྡོག་མེད། ཏང་དང་སྲིད་གཞུང་གིས་མི་དམངས་ལ་འགན་འཁུར་བའི་འགན་འཁྲི་གནས་ས་བཅས་རེད། མི་དམངས་ཀྱི་ཚེ་སྲོག་ཐམས་ཅད་ལས་ལྷག སྔ་ཕྱི་བར་གསུམ་དུ་མི་རྩ་བར་འཛིན་པ་དང་ཚེ་སྲོག་ལས་ལྷག་པ་མེད་པ་མཐའ་འཁྱོངས་བྱས་ནས་ནུས་ཤུགས་ཡོད་རྒུས་མི་དམངས་མང་ཚོགས་ཀྱི་ཚེ་སྲོག་བདེ་འཇགས་འགན་ལེན་བྱེད་པ་དེ་ནི་རང་ལྗོངས་ཀྱི་ཡོམ་འགོག་གེགས་སེལ་ལས་དོན་ལ་དུས་རིམ་རང་བཞིན་གྱི་རྒྱལ་ཁ་ཐོབ་པའི་ཆེས་རྩ་བ་ཡིན་ལ་ཉམས་མྱོང་གལ་ཆེ་ཤོས་ཤིག་ཀྱང་རེད། ནེ་པ་ལར་ས་ཡོམ་རིམ་པ་8.1བརྒྱབ་རྗེས་རང་སྐྱོང་ལྗོངས་ཏང་ཨུད་དང་སྲིད་གཞུང་གིས་སྤྱི་ཁྱབ་ཧྲུའུ་ཅི་ཞིས་ཅིན་ཕིང་དང་ཀྲུང་དབྱང་འགོ་ཁྲིད་བློ་མཐུན་གྱི་མཛུབ་སྟོན་དང་མཆན་འགོད་མཛུབ་སྟོན་ལག་བསྟར་བྱས་ཏེ་དེ་མ་ཉིད་དུ་སྟོབས་ཤུགས་སྒྲིག་འཛུགས་བྱས་ནས་གནོད་འཚེ་ཕོག་ཁུལ་གྱི་འཐབ་ཕྱོགས་དང་པོར་ཡོམ་འགོག་གེགས་སེལ་དང་མང་ཚོགས་ཛ་དྲག་ངང་གནས་སྤོ་བཀོད་སྒྲིག་བྱས་ཏེ་གཙོ་གནད་ནི་མི་སྣ་སྐྱོབ་རྒྱུ་དེ་ཡིན་པ་དང་། ནུས་ཤུགས་ཡོད་རྒུ་དང་ཐབས་བརྒྱ་ཇུས་སྟོང་གིས་གནོད་འཚེ་ཕོག་ཁུལ་མི་དམངས་ཀྱི་ཚེ་སྲོག་ནུས་ཤུགས་ཡོད་རྒུས་མྱུར་སྐྱོབ་བྱེད་དགོས་པའི་བླང་བྱ་བཏོན་ཡོད། ལྷག་པར་དུ་དེ་སྔའི་ས་ཡོམ་ནང་བསགས་པའི་མང་ཚོགས་ཕྱིར་འཐེན་གྱི་ཉམས་མྱོང་དཔྱད་གཞིར་བཟུང་ནས་མང་ཚོགས་སྒྲིག་འཛུགས་བྱས་ཏེ་ཕྱིར་འཐེན་དང་ཉེན་ཁ་ལས་གཡོལ་བ་དང་། ཡོམ་འཕྲོ་དྲག་པོ་རྒྱག་སྐབས་ཀྱང་མི་སྣ་འཆི་རྨས་བྱུང་མེད་པས་ད་ཕན་ལོ་ཤས་རིང་ས་ཡོམ་གྱི་རིམ་པ་མཐོ་ཤོས་དང་རྐྱེན་ལམ་དུ་ཤོར་བའི་མི་གྲངས་ཉུང་ཤོས་ཀྱི་ལོ་རྒྱུས་ཟིན་ཐོ་བཏོད་ཡོད།
ཏང་ཀྲུང་དབྱང་དང་། ལྗོངས་ཏང་ཨུད་དང་སྲིད་གཞུང་གིས་མི་དམངས་མང་ཚོགས་ཀྱི་ཚེ་སྲོག་བདེ་འཇགས་ཨང་དང་པོར་འཇོག་རྒྱུ་མཐའ་འཁྱོངས་བྱས་ཏེ་ཐབས་བརྒྱ་ཇུས་སྟོང་ངང་ཉེན་གྱར་མི་སྣ་འཚོལ་སྐྱོབ་བྱེད་པ་དང་མི་སྣ་འཆི་རྨས་ཚད་གཞི་མཐོ་ཤོས་སྒོ་ནས་ཉུང་དུ་གཏོང་བའི་ཐབས་ཇུས་བཀོད་སྒྲིག་དེ་རྦད་དེ་ཡང་དག་པ་ཡིན་པ་དང་རྒྱ་ཆེའི་མི་དམངས་མང་ཚོགས་ཀྱི་རྩ་བའི་ཁེ་ཕན་དང་འཚམས་ཡོད་པ་དོན་དངོས་ཀྱི་ཐོག་ནས་ར་འཕྲོད་གང་ལེགས་བྱུང་ཡོད། དེང་སྐབས་ཡོམ་འགོག་གེགས་སེལ་གྱི་ལས་དོན་དེ་བར་བརྒལ་བཀོད་སྒྲིག་དང་གེགས་བར་བྱུང་རྗེས་བསྐྱར་སྐྲུན་བྱེད་པའི་དུས་རིམ་གསར་པར་སླེབས་ཡོད། འོན་ཏེ་ཐབས་བརྒྱ་ཇུས་སྟོང་ངང་ཉེན་གྱར་མི་སྣ་འཚོལ་སྐྱོབ་དང་ནུས་ཤུགས་ཡོད་རྒུས་རྨས་མ་སྐྱོབ་བཅོས་བྱ་རྒྱུ་དེ་ནི་སྔར་བཞིན་ཡོམ་འགོག་གེགས་སེལ་ལས་དོན་གལ་ཆེན་ནང་གི་འགངས་ཆེ་ཡིན་པས་ལྷོད་གཡེང་སྤུ་ཙམ་ཡང་གཏོང་མི་རུང་། ང་ཚོས་ངེས་པར་དུ་སྤྱི་ཁྱབ་ཧྲུའུ་ཅིའི་མཛུབ་སྟོན་གལ་ཆེན་གྱི་བླང་བྱ་དང་རང་སྐྱོང་ལྗོངས་ཏང་ཨུད་དང་སྲིད་གཞུང་གི་བཀོད་སྒྲིག་ལྟར་གོ་སྐབས་དམ་འཛིན་གྱིས་ཉེན་གྱར་མི་སྣ་འཚོལ་སྐྱོབ་དང་ནུས་ཤུགས་ཡོད་རྒུས་གེགས་བར་ཁུལ་མི་དམངས་ཀྱི་ཚེ་སྲོག་འགན་ལེན་བྱེད་དགོས།
ཡོམ་འགོག་གེགས་སེལ་གྱི་ཉམས་མྱོང་ཐོག་ནས་ས་ཡོམ་གྱི་གནོད་འཚེ་ཕོག་རྗེས་རིམས་ནད་ཐོན་སླ་བ་མངོན་ཡོད། རྨས་མ་སྐྱོབ་བཅོས་དང་སྨན་བཅོས་ཞབས་ཞུའི་ལས་དོན་ལེགས་པར་སྒྲུབ་པ་དང་ཆབས་ཅིག་འཕྲོད་བསྟེན་རིམས་འགོག་ལས་དོན་ལ་ཤུགས་སྣོན་ཏན་ཏིན་རྒྱག་པ་དང་རིམས་འགོག་ཆེད་ལས་ཀྱི་སྟོབས་ཤུགས་འཐུས་ཚང་དུ་བཏང་སྟེ་གནོད་འཚེ་ཕོག་ཁུལ་དུ་རིམས་ནད་ལྟ་ཞིབ་སྔོན་འགོག་དང་། འཐུང་ཆུ་དང་བཟའ་བཅའི་འཕྲོད་བསྟེན་ལ་ལྟ་སྐུལ་ཞིབ་བཤེར། ཁོར་ཡུག་འཕྲོད་བསྟེན་གཙང་སྦྲ་སོགས་ཀྱི་ལས་དོན་ཚན་རིག་དང་མཐུན་པ་དང་། ཚད་དང་ལྡན་པ། ནུས་པ་ཆེ་བ་བཅས་ཀྱི་སྒོ་ནས་སྤེལ་བ་དང་། གེགས་བར་ཁུལ་གྱི་འཐུང་ཆུ་དང་བཟའ་བཅའི་བདེ་འཇགས་འགན་ལེན་ལེགས་པར་བྱས་ཏེ་གེགས་བར་ཁུལ་དུ་རིམས་ནད་མཆེད་རྒྱུ་ནན་འགོག་བྱེད་དགོས།
ཏང་དང་སྲིད་གཞུང་ནི་སྔ་ཕྱི་བར་གསུམ་དུ་གེགས་བར་ཁུལ་མི་དམངས་ཀྱི་བློ་གཏད་བཅོལ་ཡུལ་ཡིན་པས་རིམ་ཁག་ཏང་ཨུད་དང་སྲིད་གཞུང་དང་ལྷག་པར་དུ་གེགས་བར་ཁུལ་གྱི་ཏང་ཨུད་དང་སྲིད་གཞུང་གིས་མི་དམངས་ཀྱི་ཚེ་སྲོག་བདེ་འཇགས་འགན་ལེན་བྱ་རྒྱུ་དེ་ཨང་དང་པོར་འཇོག་དགོས། ཕྱོགས་གང་ཅིའི་ཐད་ཐོན་སྲིད་པའི་གནས་ཚུལ་དང་གནད་དོན་ལ་བསམ་བློ་ཟབ་ཙམ་གཏོང་བ་དང་། མྱུར་སྐྱོབ་དང་བཀོད་སྒྲིག་ལས་དོན་ཁག་དོན་ཐོག་ཏུ་འཁྱོལ་བ། ཏང་དང་སྲིད་གཞུང་གི་ཐུགས་ཁུར་གེགས་བར་བྱུང་བའི་མང་ཚོགས་ཚང་མས་ཚོར་ཐུབ་པ། མི་དམངས་མང་ཚོགས་ཀྱི་ཉེན་འགོག་གེགས་སེལ་གྱི་ཧུར་སེམས་སྐུལ་སློང་དང་སྒྲིག་འཛུགས་བཅས་བྱས་ཏེ་མི་ཁྲི་སེམས་གཅིག་དང་། དཀའ་ངལ་འཕྲད་བཞིན་དུ་མདུན་དུ་སྐྱོད་པ། ཐུན་མོང་ཐོག་རང་བྱུང་གནོད་འཚེ་འགོག་པ་བཅས་ཀྱི་རླབས་ཆེན་སྟོབས་ཤུགས་ཤིག་ཆགས་པ་བྱས་ནས་ཡོམ་འགོག་གེགས་སེལ་གྱི་ལས་དོན་ལ་སྒོ་ཀུན་ནས་རྒྱལ་ཁ་ལེན་ཐུབ་པ་བྱེད་དགོས།